Kich meinisin a wor rech eú kefil. Sia tongeni filatá ika sipwe angang ngeni Jiowa are angang ngeni Satan me néún kewe chónláng mi ngaw. Sise tongeni angang ngeniir me rúúemén. A ifa me tipachemach ika sia filatá ach sipwe angang ngeni Jiowa!

Usun met sia fen káé, ekkewe chónláng mi ngaw ra pwapwa le efeiengawa me otupu aramas. Esap ina usun Jiowa. I a tongei aramas usun chék án emén sam tongei néún kewe. Jiowa, i ewe Chón Awora “lifang mi mürina meinisin me feiöch mi unusöch meinisin.” (James 1:17) Ese amwéchú seni aramas och mettóch mi múrinné, a pwal mwo nge tinato néún we mi áchengicheng pwe epwe máló fán itach.​—Efisos 2:4-7.

Ekieki met Jesus, néún Kot we, a féri lupwen a nóm wóón fénúfan. A féri pwe ekkewe mi awemwéch repwe kapas, ekkewe mi mesechun repwe kúna mwer me ekkewe mi pechemá repwe fetál. A echikara ekkewe mi rupun pwétúr, asúoló ekkewe chónláng mi ngaw are timon, me áwesi sókkun semmwen meinisin. Ren án Kot manaman, Jesus a pwal mwo nge amanawasefálietá ekkewe  mi máló.​—Mateus 9:32-35; 15:30, 31; Lukas 7:11-15.

Fansoun meinisin Kot a apasa minne mi enlet, ese chofona ngenikich. Esap fán eú a otupu emén.​—Numperis 23:19.

Usun chék ewe fássin ninnim a asapaló emén noong, chómmóng aramas ra sapóló lón ekkewe lúkú mi chofona me eéreni mi lóngólóng wóón án Satan ewe Tefil afalafal mi chofona. Ikkefa ekkena afalafal mi chofona? Aramas ra niwokkusiti ekkewe mi máló. Ra niweiti ekkewe chónláng mi ngaw are timon. Ra niwokkus án aramas repwe péút ngeniir are lólilen ren masouen ekkewe pwee ren met epwe fis ngeniir lón mwach. Ra kan áeá pwénúpwén me ttit pwe epwe túmúnúúr. Nge néún Kot kewe aramas rese tupuló ren ekkena mettóch.

Jiowa a fókkun manaman seni Satan. Ika ka angang ngeni Jiowa, i epwe túmúnuk seni ekkewe chónláng mi ngaw. (James 4:7) Iwe esap wor manamanen péút wóóm. Áwewe chék, lón Afrika, Nigeria, úlúmén sou roong mi watte ar manaman ra péút ngeni emén Chón Pwáraatá Jiowa pwe epwe máló pún ese mochen ló seni ewe sóópw. Nge ese wor och mettóch a fis ngeni ena Chón Pwáraatá, iwe emén me lein ekkena sou roong a niwokkus, a lo chuuri me tingormaú an epwe kirekiréch ngeni.

Ika ekkewe chónláng mi ngaw ra osukosukok, ka tongeni kékkéri iten Jiowa we me i epwe túmúnuk. (Än Salomon Fos 18:10) Nge ren óm kopwe nóm fán án Kot túmún, kopwe unusen sú seni mettóch meinisin mi riri ngeni angangen roong me angangen fel ngeni ekkewe chónláng mi ngaw. Ekkewe chón fel ngeni Kot lón Efisos lóóm ra féri ena. Ra ionfengeni meinisin néúr kewe puken angangen roong me keniireló. (Föför 19:19, 20) A lamot chón angang ngeni Kot ikenái repwe pwal féri ena. Kopwe péútaaló ekkewe puken angangen roong, ttit, féún eis, léén sácháfi me mettóch meinisin mi riri ngeni angangen roong.

Ika ka mochen apwapwaai Kot ese naf óm kopwe chék likitaló fel mi chofona me úkútiw le féri féffér mi ngaw. Mi lamot kopwe achocho lón óm fiffiti ewe fel mi enlet. Ikkeei met ewe Paipel a affata mi lamot kopwe féri:

Satan me néún kewe chónláng mi ngaw a wor néúr aramas wóón fénúfan, iir kewe ra féri me áiti ngeni aramas ekkewe mettóch mi mwáál. Nge a pwal wor néún Jiowa kewe aramas. Iir ekkewe Chón Pwáraatá Jiowa. (Aisea 43:10) Wóón unusen fénúfan, a wor lap seni fisu million Chón Pwáraatá Jiowa. Iir meinisin ra achocho le eáni féffér mi múrinné me asukula aramas ewe pwóróus mi enlet. Lón chómmóng fénú, ka tongeni chuuriir me lón ar kewe Leenien Mwich, me repwe fókkun pwapwa le etiwok.

Wiser ar repwe álisi aramas le angang ngeni Kot. Ra tongeni káé ngonuk ewe Paipel lón imwom me álisuk le káé ifa usun kopwe fel ngeni Jiowa lón ewe napanap epwe pwapwaiti. Ese kamé ei kókkótun káé. Chón Pwáraatá Jiowa ra pwapwa le áiti ngonuk ewe enlet pokiten ra tongei aramas me ra tongei Jiowa Kot.