Meinisin férien Jiowa kewe chónláng ra múrinné. Nge mwirin, emén leir a filatá an epwe féri minne mi ngaw. Ina i Satan, ewe Tefil. Satan a mochen ekkewe aramas wóón fénúfan repwe fel ngeni i, nge esap Jiowa. Iei met a fis.

Lón ewe tánipiin Eten, mi wor chómmóng irá mi uwaani féún irá mi anné. Jiowa a ereni Atam me pwúlúwan we, Efa, pwe ra tongeni mwéngé seni uwaan ekkena irá. Nge mei wor efóch irá Kot a ereniir ar resap mwéngé seni, pún ika repwe mwéngé, repwe fókkun máló.​—Keneses 2:9, 16, 17.

Eú rán Efa a chék áláemén nge emén serepenit a fós ngeni. Pwúngún, esap ewe serepenit i a wesewesen fós, nge Satan ewe Tefil a féri pwe usun itá ewe serepenit a fóffós. Satan a ereni Efa pwe ika epwe mwéngé ewe féún irá mi pinepin, epwe tipachem usun chék Kot. A pwal erá pwe i esap tongeni máló. Minne Satan a apasa mi chofona. Nge, Efa a lúkú Satan me a mwéngé ewe féún irá. Mwirin, a ngeni Atam, iwe a pwal mwéngé.​—Keneses 3:1-6.

Seni ei pwóróus, sia káé pwe Satan i emén chón ú ngeni me chón kapas chofona. A ereni Efa pwe esap máló ika epwe álleasolapa Kot. Ina eú kapas mi chofona. Pún Efa a máló me Atam a pwal máló. Satan ese máló lón ena atun nge epwe pwal máló pokiten a tipis. Iwe nge, lón ei atun a chúen manaw me a sópwósópwóló le otupu aramas. I a chúen emén chón kapas chofona, me a achocho le etipetipa aramas ar repwe atai án Kot kewe allúk.​—Johannes 8:44.

Mwirin och fansoun, pwal ekkóch chónláng ra filatá ar repwe féri minne mi ngaw. Ekkeei chónláng ra nennengeni ekkewe fin fénúfan mi liéch me ra mochen lisowu ngeniir. Iwe, ra feitiw fénúfan me ewilaaló inisiir ngeni inisin aramas, me ra angei ekkewe fin fénúfan pwe pwúlúwer. Ei féffér a ú ngeni minne Kot a tipeni.​—Keneses 6:1, 2; Jutas 6.

Minne ra féri a pwal efisatá watteen fitikoko wóón fénúfan. Pwúlúwen ekkena chónláng ra néúnéú nge néúr kewe ra sókkóló. Néúr kewe ra wattetá ngeni mwánemmong mi kirikiringaw me ra féri féfférún akkachofesá. Ló, ló, ló, ewe fénúfan a ur ren féfféringaw, iwe, Jiowa a apwúngaló an epwe nieló ekkewe aramas mi ngaw ren eú watteen noter. Ewe mwán mi pwúng, Noa, me an we famili, iir chék ra manawewu seni ewe Noter.​—Keneses 6:4, 11; 7:23.

Iwe nge, ekkena chónláng mi ngaw ra siwili inisiir ngeni inisin chónláng, iwe rese máló. Nge Kot a apwúngúúr. I ese chúen mut ngeniir ar repwe fitisefáli an we familien chónláng mi pwúng. Pwal och, Jiowa ese chúen mutatá ngeniir ar repwe ewilaaló inisiir ngeni inisin aramas. Me lón mwachkkan repwe máló lón án Kot we kapwúng mi lap.​—Jutas 6.

Lón ewe ier 1914, a fis maun lón láng. Iei met ewe puken Pwärätä lón Paipel a áweweei: “Mürin a fis maun lon läng. Mikael [ewe mi manawsefál Jesus Kraist] me nöün kewe chon läng [mi múrinné] ra fiu ngeni ewe trakon [Satan], nge ewe trakon me nöün kewe chon läng [mi ngaw] ra pwal fiu ngeniir. Iwe, ewe trakon a kuf, nge i me nöün kewe chon läng resap chüen mwümwütä ar repwe nonom lon läng. Ewe trakon mi watte a koturuwu lükün, ewe serepenitin lom mi iteni Tefil are Satan, a atupu unusen chon fanüfan. A koturutiu won fanüfan, i me nöün kewe chon läng [mi ngaw].”

Iwe, met mwirilóón? Iei met Paipel a pwal erá: “Iei mine, en läng kopwe fokun pwapwa, pwal meinisin mi nonom lon läng.” Ekkewe chónláng mi múrinné ra pwapwa pún Satan me ekkewe chónláng mi ngaw rese chúen nóm lón láng. Nge ifa usun ekkewe aramas wóón fénúfan? Paipel a erá: “Feiengau ngeni fanüfan me matau, pun Satan a feitiu remi o a fokun lingeringer pokiten an silei pwe a mochomoch chök an fansoun.”​—Pwärätä 12:7-9, 12.

Pwúngún pwe Satan me chienan kewe chónláng mi ngaw ra otupu me efisi watteen riáfféú ngeni aramas wóón fénúfan. Fán ekkóch lón ewe Paipel ekkeei chónláng mi ngaw ra iteni timon. Iir chón oputa Kot. Iir meinisin ra ngaw.