Iei alon Dauda seni eú fénú lón Afrika: “Ua mááritá lón eú kúkkún sóópw lón ennefenin fénúei. Lekúkkúni ai we famili me pwal eú famili ra osukosukfengen wóón fénú. A wor eú fénú ekkeei ruu famili ra erá pwe fénúer. Iwe, ra kérato emén sou roong pwe epwe apwúngaló ei mettóch. Iwe ena sou roong a ngeni emén mwán eú kinasen oori, mwirin a pwélúoló fán eché mangaku mi pwechepwech. Ekiseló mwirin, ena mwán a poputá le chechchech me moloon. Lupwen a oori lón ewe kinaas, a erá: ‘Ua kúna emén mwán a pweppwereto! A úféúf úf mi pwech. I emén chinnap mi ttam, mi úwan mékúran me a ekis fetálepwor.’

“A kapas usun Papa chi! Iwe a fókkun rúké me púchérútá: ‘Ika ouse lúkú aloi, iwe o etto pwisin katol!’ Nge pwúngún pwe ese wor emén me leim a pwora le katol! Ewe sou roong a amosonosonaló ewe mwán ren an uti ngeni ewe konik mi magic mi nofit ngeni ekkóch chéén irá mi nóm lón eú bowl.

“‘Papa chi’ a afósa ewe mwán mi kamwéch ewe kinasen oori me a apasa pwe ewe fénú, fénúen ám famili. A ereni inei we chinnap pwe esap lólilen, epwe chék atakeni ewe fénú. Ewe pwal eú famili a tipeeú ngeni minne a fen pwúngúló. Iwe a kinamweeló lefilem.”

 Ekkena esin pwóróus ra kan fis lón sókkópaten fénú wóón fénúfan. Chómmóng aramas ra lúkú pwe ekkewe mi máló ra feiló lón pwal eú leeni ikewe ra tongeni nennengeni me etipetipa manawen aramas wóón fénúfan. Mei pwúng ei sókkun lúkú? A chúen sópwósópwóló manawen ekkewe mi máló? Ika ese pwúng ena, iwe ié kewe chék ra pwomweni pwe iir ngúnún ekkewe aramas mi máló? A fókkun lamot ach sipwe silei enletin pélúwen ekkeei kapas eis. Manawach a lóngólóng wóón.