Mi wor ekkewe ngún mi ngaw me ngún mi múrinné! Nge ekkena ngún, iir ngúnún ekkewe aramas mi máló?

Aapw! Lupwen emén a máló ese wiliti emén ngún, usun met chómmóng aramas ra ekieki. Pwata sia silei? Pún Paipel a affata. Ewe Paipel ina eú puk mi enlet, a feito seni ewe emén chék Kot mi enlet, itan Jiowa. Jiowa a fératá aramas, ina minne a fókkun silei met a fis ngeniir lupwen ra máló.​—2 Timoty 3:16.

Ewe Paipel a erá pwe Kot a féri ewe áeménún mwán, Atam, “seni pwülün fanü.” (Keneses 2:7) Kot a eleenia lón Paratis, ewe tánipiin Eten. Ika Atam a fen álleasochisi án Jiowa allúk, iwe esap máló, epwe chúen manaw wóón fénúfan tori ikenái. Nge lupwen Atam a pwisin filatá an epwe atai án Kot allúk, Kot a ereni: “Kopwe wiliti pwül ka för seni. Pun pwül en, iei popun om kopwe wiliti pwül.”​—Keneses 3:19.

Met weween ena? Iwe, ia Atam a nóm ie mwen án Jiowa féri seni súsúún pwúl? Ese wor. Atam ese manaw lón pwal eú leeni, ese akkomw emén ngún mi manaw lón láng. Ese wesewesen wor Atam me mwan. Ina minne lupwen Jiowa a erá pwe Atam epwe “wiliti pwül,” a wewe ngeni pwe Atam epwe máló. Ese wiliti emén ngún. Lupwen Atam a máló, ese chúen wor manaw ren usun chék me mwen án Kot esaamwo féri. Ina weween máló, ese wor manaw ren.

 Nge ra fet chókkewe ra fen máló? Rese pwal chúen nóm usun chék Atam? Ewe Paipel a pélúweni:

• “Ir meinisin [aramas me man] ra feila lon eu chök leni. Ir meinisin ra för seni pwül, repwe pwal liwiniti pwül.”​—Än Salomon Afalafal 3:20.

• “Ekewe sotup resap silei och mettoch.”​—Än Salomon Afalafal 9:5.

• “Ar tong me ar oput pwal ar lolowo esap chüen wor.”​—Än Salomon Afalafal 9:6.

• “Esap wor och angang, ekiek, silelap ika tipachem lon lenien sotup ewe ia kopwe feila ie.”​—Än Salomon Afalafal 9:10.

• “Lupwen [aramas] ra mäla, ra liwiniti pwül. Lon ewe chök rän ar kewe akot meinisin ra tala.”​—Kölfel 146:4.

Mi weires óm kopwe áchiféúa ekkeei wokisin? Ika ina, ekieki ei mettóch: Lón chómmóng  famili, ewe mwán a angang pwe epwe atufichi osupwangen an famili. Lupwen ewe mwán a máló, eli an famili epwe nóm fán weires. Fán ekkóch, ese mwo nge chúen naf néún pwúlúwan we me néún kewe moni ar repwe kamé ener mwéngé. Neman chón oputa ewe mwán repwe kirikiringaw ngeniir. Iwe, pwisin eisinuk: ‘Ika ena mwán a chúen manaw lón och leeni mwirin an máló, pwata esap sópweló le atufichi an famili? Pwata ese túmúnúúr seni aramas mi ngaw?’ Popun, pún mi pwúng met ewe Paipel a apasa. Ewe mwán ese chúen manaw, ese tongeni féri och mettóch.​—Kölfel 115:17.

A itá wewe ngeni pwe ekkewe mi máló resap chúen manawsefál? Aapw. Sipwe fós usun manawsefál lón ekkewe lesen mwirin ei. Nge ekkewe mi máló rese silei met ka féfféri lón manawom iei. Rese tongeni kúnók, rongorong ngonuk, are fós ngonuk. Ese wor popun óm kopwe niweitiir. Rese tongeni álisuk are efeiengawok.​—Än Salomon Afalafal 9:4.