Jiowa epwe unusen amóeló meinisin minne mi ngaw Satan a efisi. A fen ewisa ngeni Jesus an epwe King wóón unusen fénúfan. Fán an nemenem, ei fénúfan epwe wiliti eú paratis.​—Taniel 7:13, 14; Lukas 23:43.

Ikkeei án Jiowa kewe pwon:

• CHÓMMÓNG MWÉNGÉ: “Fanüfan a awora räs, Kot ach Kot a afeiöchükich.” “Epwe wor chomong wiich lon ewe fanü. Amwo epwe wor uän irä won ekewe chuk.”​—Kölfel 67:6; 72:16.

• ESAP CHÚEN WOR MAUN: “Oupwe feito nengeni met ewe SAMOL a föri. Oupwe kuna ekkewe mettoch mi amwarar a fen föri won fonufan. A aukatiw ekkewe maun won unusen fonufan.”​—Kölfel 46:8, 9, Kapasen God.

• ESAP CHÚEN WOR ARAMAS MI NGAW: “Pun ekewe aramasangau repwe käriwu . . . Lon fansoun mochomoch echök ekewe aramasangau resap chüen nom. Inamwo are kopwe küttafichiir lon lenier, nge resap nom ikenan.”​—Kölfel 37:9, 10.

•  ESAP CHÚEN WOR SAMAU, LETIPETA, ARE MÁLÓ: “Mürin, mesen chon mesechun repwe nela, nge selingen chon selingepüng repwe sukula, chon pechemä repwe mwetemwet usun eman chia, nge ekewe chon awemwöch repwe köl fän mweireir.”​—Aisea 35:5, 6.

  “Püsin Kot epwe etiir pwe epwe ar Kot. Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”​—Pwärätä 21:3, 4.

Jiowa esap fókkun kapas chofona, ese usun Satan me néún kewe chónláng mi ngaw. Meinisin minne a pwonei epwe chék pwénúetá. (Lukas 1:36, 37) Jiowa a tongeok me a mochen kopwe manaw lón ewe Paratis epwe awora. Ina minne, chuuri ekkewe Chón Pwáraatá Jiowa me káé usun ekkewe pwóróus mi enlet me amwarar lón án Kot we Kapas. Ika ka apwénúetá ekkeei pwóróus mi enlet lón manawom, kopwe ngase seni fán nemenien ekkewe eéreni me afalafal mi chofona me epwe saramoló ekiekum. Ló, ló, ló, kopwe pwal mwo nge ngaseló seni fétekin tipis me máló. Usun met Jesus a erá: “Oupwe silei ewe let, nge ewe let epwe angasakemi.”​—Johannes 8:32.