Nge pwata Satan me néún kewe chónláng mi ngaw are timon ra fókkun achocho le otupu aramas? Pún ra mochen sipwe fitiir lón ar angangen ú ngeni Kot. Ra mochen sipwe fel ngeniir, lúkú ar kewe kapas chofona me féri minne Jiowa a oput. Chómmóng me lein ekkena mettóch ra weneiti ekkewe eérenien mi má.

Málóón emén attongach a mmen ámmetek. Ina minne, ese wor ngawen ach sipwe pwáraawu ach kechiweitiir. Jesus a “kechü” mwirin málóón chienan we itan Lasarus.​—Johannes 11:35.

A wor chómmóng sókkópaten eéreni wóón fénúfan mi weneiti ekkewe mi máló. Chómmóng me leir rese ú ngeni ekkewe kapasen emmwen lón Paipel. Iwe nge, ekkóch ra lóngólóng wóón ewe lúkú pwe a chúen sópwósópwóló manawen ekkewe mi máló me iir ra chúen tongeni kúna ekkewe mi manaw. Aúchimw wóón ewe mi máló, ssenúkúlóón ngúngúresin kechiw, me sókkun mwékútúkútún wóón mi má mi kon ssenúk, meinisin ekkeei eéreni ra feito seni án aramas niwokkus le eletipengawa ekkewe mi máló. Nge pokiten Paipel a affata pwe ekkewe mi máló “resap silei och mettoch,” iwe chókkewe mi féri ekkena eéreni ra apéchékkúla án Satan  afalafal mi chofona.​—Än Salomon Afalafal 9:5.

Pwal ekkóch eéreni ra feito seni án aramas lúkú pwe mi lamot ekkewe mi manaw repwe álisi ekkewe mi máló pún ika rese álisiir me cháchcháriir, iwe, ekkewe mi máló repwe efeiengawer. Lón ekkóch fénú, mwirin an a peias ewe mi máló, aramasan kewe ra kan chufengen ren fitu rán pwe repwe iótek pwe epwe álisi ewe mi máló an epwe fetáléch ngeni láng. Pwal eú eéreni mi chéúfetál, ina ar awora ngeni ekkewe mi máló ener me únúmer.

Ekkeei eéreni ra mwáál pún ra apéchékkúla án Satan kewe kapas chofona usun ekkewe mi máló. Jiowa epwe pwapwa ika sia féri ekkewe eéreni mi lóngólóng wóón ekkewe afalafal mi chofona mi pop seni ekkewe chónláng mi ngaw? Aapw, esap fókkun pwapwa!​—2 Korint 6:14-18.

Néún ewe Kot mi enlet kewe chón angang rese fókkun fiti ekkewe féffér mi apéchékkúla án Satan kewe afalafal mi chofona. Nge fán tong ra achocho le álisi me oururu chókkewe mi má seniir attonger.  Ra silei pwe Jiowa chék a tongeni álisi ekkewe mi fen máló.​—Hiop 14:14, 15.

Ekkóch aramas ra néúnéú emén sou roong pwe repwe chuuri ekkewe ngún (iir ekkewe chónláng mi ngaw) are fen pwisin iir ra chuuri. Ina angangen roong. Pwee, fériér, péút, magic, oesini me fós ngeni ekkewe mi fen máló, meinisin iir ra kapachelong lón angangen roong.

Ewe Paipel a oput ekkena mettóch, a erá: “Esap wor . . . leimi eman soupwe, are eman souasisil, are eman souwo, are eman sourong, are eman soupöüt, are eman souamwöngün, are eman souawarawar, are eman souasomä. Pun chokewe mi föri ekei sokun föför ra anioput me ren ewe Samol mi Lapalap.”​—Tuteronomi 18:10-12.

Pwata Jiowa a fókkun éúréúrakich ach sipwe túmúnúkich seni ekkeei féffér?

Jiowa a mochen túmúnúkich, ina minne a éúréúrakich ach sipwe  sú seni meinisin sókkun angangen roong. A tongei néún kewe aramas me a silei pwe chókkewe mi onómuur fán nemenien ekkewe chónláng mi ngaw repwe feiengaw.

Áwewe chék ren emén sou awarawar lón Brazil itan Nilda. Ekkewe chónláng mi ngaw are timon, ra fókkun eriáfféwú i. Iei met a apwóróusa: “Ekkewe ngún . . . ra tétá wóói me ra nemeniei. Fán ekkóch ua silei met a fiffis ngeniei nge fán ekkóch ua peló me use chúen silei met ua féfféri. Ua pwal núing lón pioing ren osukosuken tupwuei. Ekkewe timon ra fókkun eriáfféúei pwe ua chék rúrrúké iteitan. Ua ún sáfei pwe epwe ekinamweiei, ua poputá le ún sakaw me ún suupwa iteitan. Iei met a fis ngeniei ren fite ier.”

Mwirin och fansoun, ren án Jiowa álillis me án néún kewe Chón Pwáraatá, Nilda a ngaseló seni fán nemenien ekkewe chónláng mi ngaw me iei a eáni ewe sókkun manaw mi pwapwa. A erá: “Ua pesei ngeni meinisin pwe ousap mwo nge sótuni fán eú le chiechi ngeni ekkewe ngún [mi ngaw].”