A ALLÚKÚ ngeni ekkewe Chón Kraist ar repwe féri Áchechchemen málóón Kraist. Ena rán mi aúchea a pwal iteni fááfen are “mongö än ach Samol.” (1 Korint 11:20) Pwata a mmen lamot ena rán? Ineet me ifa usun sipwe féri?

Lón ewe ier 33, Jesus Kraist a poputá le féri ena áchechchem lón pwinin án chón Jus we Pasofer. Ena Pasofer eú fetellap a fis fán eú iteiten ier lón ewe engol me arúáánúún ránin ewe maram itan Nisan me ren chón Jus. Nisan a poputá lupwen a kerán pwá ewe maram ekiseló mwirin áeúin wiiken March. Ina atun ekkewe Chón Jus ra álleani 14 rán pwe  repwe féri ewe Pasofer nge epwe mwirin tuputiwen ewe akkar.

Jesus me néún kewe aposel ra akkomw le féri ewe Pasofer, iwe, mwirin an tiinaaló Jutas Iskariot a poputááni ewe Fááfen Ach Samol. Ena fááf siwilin án chón Jus we Pasofer. Ina minne, epwe pwal chék fis fán eú iteiten ier.

Iei alon ewe puken Mateus: “Jises a angei pret o a afeiochu, a kinikisietiu o ngeni noun kewe chon kaeo, o a apasa, ‘Oupwe angei o ani. Iei inisi.’ A pwal angei eu kap, o a iotekin kilisou. Iwe, a ngenir, o a apasa, ‘Ami meinisin oupwe un seni. Pun iei chai, chaan ewe pwon, mi niinilo fan iten chommong aramas ren omusamusen tipis.’”​—Mateus 26:26-28, TF.

Ekkóch ra lúkú pwe Jesus a siwili ewe pilawa ngeni wesewesen futukan me ewe wain ngeni wesewesen chchaan. Iwe nge, Jesus a chúen manaw atun a ngeniir ena pilawa. Néún Jesus kewe aposel ra itá ochooch wesewesen futukan me ún wesewesen chchaan? Aapw, pún ina eú féffér mi atai allúkún Kot. (Keneses 9:3, 4; Lifitikos 17:10) Iei alon Jesus me ren Lukas 22:20: “Ei kap än Kot we pwon mi fö mi fis ren chai a ninnila fän itemi.” Ena kap a itá wesewesen wiliti ewe “pwon mi fö”? Esap tufich ena, pún eú pwon a wewe ngeni eú etipeeú nge esap och mettóch sia tongeni attapa.

Ina minne, ewe pilawa me ewe wain iir lios chék. Ewe pilawa a liosuetá inisin Kraist mi unuséch. Jesus a áeá och lusun pilawa seni ewe mwéngéén Pasofer. Ena pilawa ese wor lefen are iis lón. (Ekistos 12:8) Fán  chómmóng lón ewe Paipel, lefen a liosuetá tipis. Ina minne, ewe pilawa a liosuetá ewe inis mi unuséch Jesus a eáni asor, ewe ese wor tipisin.​—Mateus 16:11, 12; 1 Korint 5:6, 7; 1 Petrus 2:22; 1 Johannes 2:1, 2.

Ewe wain mi par a liosuetá chchaan Jesus. Ena chcha lóngólóngun ewe pwonen etipeeú mi fé. Jesus a apasa pwe chchaan we a niniiló “ren omusamusen tipis.” Ren ena, aramas ra tongeni liméchúló mwen mesen Kot me kapachelong lón ewe pwonen etipeeú mi fé ren Jiowa. (Ipru 9:14; 10:16, 17) Ena pwon are etipeeú, a atufichi 144,000 Chón Kraist mi tuppwél ar repwe feitá láng. Repwe wisen king me samolfel ikewe ie fán iten feiéchún aramas meinisin.​—Keneses 22:18; Jeremaia 31:31-33; 1 Petrus 2:9; Pwärätä 5:9, 10; 14:1-3.

Ié epwe mwéngé ewe pilawa me ún ewe wain lón ewe Áchechchem? Iir kewe chék mi kapachelong lón ewe pwonen etipeeú mi fé, weween, chókkewe mi eáni ewe ápilúkúlúkún manaw lón láng. Án Kot manaman mi fel a affata ngeniir pwe ra fen kefilitá pwe repwe wisen king lón láng. (Rom 8:16) Repwe pwal fiti Jesus lón ewe pwonen etipeeú fán iten eú Mwú.​—Lukas 22:29.

Nge ifa usun chókkewe mi eáni ewe ápilúkúlúkún manaw esemuch lón Paratis wóón fénúfan? Ra pwal álleasochisi án Jesus allúk me fiti ewe Fááfen Ach Samol fán súfél nge resap chék mwéngé ewe pilawa me ún ewe wain. Fán eú iteiten ier mwirin tuputiwen ewe akkar lón Nisan 14, Chón Pwáraatá Jiowa ra féri ewe Fááfen Ach Samol. Inaamwo ika fitengeréú chék wóón unusen fénúfan ra eáni ewe ápilúkúlúkún manaw lón láng nge ena áchechchem a aúchea ngeni Chón Kraist meinisin. Lón ena rán, ina atun meinisin ra tongeni ekiekifichi watteen án Jiowa Kot me Jesus Kraist tong.​—Johannes 3:16.