CHÓMMÓNG ra lúkú pwe a wor ngúnún aramas. Ra ekieki pwe lón fansoun máló, ena ngún a towu seni ewe inis me ese tongeni máló. Pokiten a chéúfetál ena pwóróus, chómmóng ra máirú lupwen ra káé pwe esap ina met ewe Paipel a apasa. Iwe met Paipel a wesewesen apasa usun ei mettóch?

Lón ekkóch Paipel ra afféwú ewe fósun Ipru ruʹach me ewe fósun Krik pneuʹma ngeni ewe kapas ngún. Iwe nge, ei esin afféú mi néúnéú ewe kapas ngún, ese wene ngeni ekkewe popun fós. Chón makkeei Paipel ra néúnéú ruʹach me pneuʹma fán iten ewe mettóch mi amanawa emén. Nge rese wewe ngeni ngúnún aramas. Áwewe chék, lón Paipelin Chuuk ei wokisin lón James 2:26, a iei itiitin afféwún: “Eu inis a mäla are ewe ngün esap nom lon.” Lupwen aramas ra álleani ei wokisin ra ekieki pwe a wor ngúnún aramas. Iwe nge, ewe afféú mi pwúng itá epwe iei itiitin: “Eú inis a máló are ewe ngasangasen manaw [pneuʹma] ese nóm lón.” Lón ekkewe ekkóch wokisin lón Paipelin Chuuk ra afféwú ruʹach me pneuʹma ngeni “ngasangasen manau.” Áwewe chék, iei alon Paipel usun ewe Noter lón fansoun Noa: “Meinisin mi eäni ngasangasen manau [ruʹach] o nom won fanüfan ra mäla.” (Keneses 7:22) Ina minne, ewe kapas ruʹach me pneuʹma ra wewe ngeni manamanen manaw mi amanawa ménúmanaw meinisin.

Ewe ngasangasen manaw a lamot ngeni ewe inis usun chék fiifi a lamot ngeni eú reitio pwe epwe tongeni  ttik. Ika kopwe pacheelong pattiri lón eú reitio me onnei, ewe fiifi lón ekkewe pattiri epwe amanawa ewe reitio. Iwe nge, ika ese wor pattiri, ewe reitio esap chúen ttik. A pwal ina usun ewe reitio fiifi ika ese purolong selin we. Iwe, pwal ina usun, ewe ngasangasen manaw a amanawa inisich. Ena ngasangasen manaw a usun chék fiifi, pún ese wor meefian are ese tongeni ekiek. Ina eú chék sókkun manaman. Nge ika ese wor ena ngasangasen manaw are manamanen manaw, inisich epwe “mäla o liwiniti pwül moromor.”​—Kölfel 104:29.

Lón Paipelin Chuuk, iei alon Än Salomon Afalafal 12:7: “Kopwe chechemeni Kot mwen inisum epwe liwiniti pwül, pun a pop seni pwül, pwal mwen ngünum [ruʹach] epwe liwinla ren Kot, ewe a ngonuk.” Usun met sia fen kúna me asan, ewe kapas ngún esap ina ewe kapas mi wene ngeni ewe popun fós. Ewe fósun Ipru ruʹach a wewe ngeni ngasangasen manaw are manamanen manaw. Met weween pwe ewe ngasangasen manaw a liwinló ren Kot? Ei itiitin esap weween pwe ewe ngasangasen are manamanen manaw a wesewesen feitá láng, pwe eú chék kapas monomon. A wewe ngeni pwe lupwen emén a máló, an ápilúkúlúkún manawsefál a nóm ren Jiowa Kot. Manawan a nóm lepéún Kot lón kapas áwewe. Ren chék án Kot manaman, epwe tongeni kaworsefál ewe ngasangasen are manamanen manaw fán iten an epwe manawsefál.​—Kölfel 36:9.

 A ifa me oururun letipach le silei pwe ina ewe mettóch Kot epwe féri ngeni chókkewe a chechchemeni, iir kewe mi nóm lón “peiaser”! (Johannes 5:28, 29) Atun ewe manawsefál, Jiowa epwe fératá inis mi fé fán iten aramas mi annut lón máló me amanaweretá ren ewe ngasangasen are manamanen manaw. Epwele ifa me apwapwaan ena rán!