1. Ika a pwúng napanapen ach fel ngeni Kot, ikkefa ekkewe feiéch sipwe kúna?

JIOWA KOT a fókkun tongekich, iwe a mochen sipwe feiéch seni an emmwen mi fiti tong. Ika a pwúng napanapen ach fel ngeni i, iwe sipwe pwapwa me túmúnúkich seni chómmóng fitikoko. Jiowa epwe pwal efeiéchúkich me álisikich. (Aisea 48:17) Iwe nge, mei wor fitepúkú lamalam ra erá pwe ra áiti ngeni aramas minne mi enlet usun Kot. Nge a fókkun sókkofesen ar kewe afalafal usun Kot me met i a mochen sipwe féri.

2. Ifa usun sipwe silei menni lamalam a pwúng me ren Jiowa? Ifa ewe kapas áwewe a álisikich le weweiti ena?

² Ifa usun kopwe silei menni lamalam a pwúng me ren Jiowa? Esap weween pwe kopwe káé me apépéfengeni afalafalen lamalam meinisin. Nge kopwe chék káé met ewe Paipel a wesewesen apasa usun fel mi enlet. Áwewe chék: Lón chómmóng fénú, a wor osukosuk ren ekkewe tipitipin moni. Ika wisom pwe kopwe wisen esilla ena sókkun moni, met kopwe féri? Kopwe itá sótun amwéchúlúkún napanapen  iteiten sókkun tipitipin moni meinisin? Aapw. Epwe éch kopwe chék káéfichi napanapen ewe wesewesen moni. Mwirin óm silefichi napanapen ewe wesewesen moni, iwe ka tongeni silleni ekkewe tipitipin moni. Iwe, pwal ina chék usun, atun sipwe káé esissillen ewe lamalam mi enlet, sipwe tongeni silleni iteiten sókkun lamalam chofona meinisin.

3. Me ren Jesus, met sipwe féri ika sia mochen kúna án Kot chen?

³ A lamot sipwe fel ngeni Jiowa lón ewe napanap i a tipeeú ngeni. Chómmóng aramas ra lúkú pwe Kot a pwapwaiti lamalam meinisin nge esap ina áitien Paipel. Ese pwal naf án aramas repwe chék apasa pwe iir Chón Kraist. Iei alon Jesus: “Esap aramas meinisin mi aita ngeniei ‘Samol, Samol’ repwe tolong lon Mwün Läng, nge chokewe chök mi föri letipen Semei lon läng.” Ina popun, sipwe káé wisach me ren Kot me apwénúetá pwe sipwe kúna an chen. Jesus a apasa pwe chókkewe rese féri letipen Kot, iir “chon föri föför mi ngau!” (Mateus 7:21-23) Nikinikin ekkewe tipitipin moni ra usun itá nge wesewesen moni nge ese wor aúchear are lamoter. A ina usun lamalam chofona, usun itá nge ra fel ngeni Kot nge Kot ese pwapwaitiir. Ika sia fitiir, epwe eingawa ach ririéch ngeni Kot.

4. Met weween alon Jesus usun ekkewe ruuofóch al me ra aleló ngeni met?

⁴ Jiowa a suuk ngeni aramas meinisin ewe tufichin kúna manaw esemuch. Iwe nge, ach kúna manaw esemuch lón Paratis epwe alóngólóng wóón pwúngún ach fel ngeni Kot me ach manaweni ewe manaw mi fich ngeni. Nge solapan pwe chómmóng  rese mochen féri ena. Ina minne, Jesus a apasa: “Oupwe tolong lon ewe asam mi pwangekükün! Pun a pwangemong ewe asam o chömong ewe al mi ale ngeni feiengau esemüch, nge chokewe mi fetal won ra chomong. Nge a pwangekükün ewe asam o chökükün ewe al mi ale ngeni manau esemuch. Mi wor ekoch chök aramas mi fetal won ei al ngeni manau.” (Mateus 7:13, 14) Lamalam mi enlet a emmweni aramas ngeni manaw esemuch. Lamalam mi chofona a emmweni aramas ngeni máló. Jiowa ese mochen pwe aramas repwe máló, iwe ina ewe popun a atufichi aramas meinisin ar repwe káé usun i. (2 Petrus 3:9) Ina minne, napanapen ach fel ngeni Kot epwe atoto rech manaw are máló.

5. Ifa usun sipwe tongeni esilla chókkewe mi fiti ewe lamalam mi enlet?

⁵ Ifa usun sipwe kúna ewe “al ngeni manau”? Jesus a apasa pwe ewe lamalam mi enlet epwe silleló ren manawen ekkewe aramas mi fiti. A apasa: “Oupwe silleniir ren mine ra föri. . . . Efoch irä mi öch a uani ua mi mürina.” (Mateus 7:16, 17) Weween pwe aramas repwe tongeni esilla chókkewe mi fiti ewe lamalam mi enlet ren ar lúkú me ar féffér. Inaamwo ika rese unuséch me ra kan mwámmwáálliló nge ewe mwichefelin chón fel mi enlet ra kan achocho le féfféri letipen Kot. Sipwe káé wonu mettóch mi esissillatá chókkewe mi fiti ewe lamalam mi enlet.

6, 7. Met ekiekin néún Kot kewe aramas usun ewe Paipel? Ifa usun Jesus a isetiw eú leenien áppirú mi pwúng ren ena mettóch?

⁶ Án néún Kot kewe aramas afalafal ra pop seni  Paipel. Iei alon Paipel: “Kapasen lon ekewe Toropwe mi Pin meinisin ra pop seni Ngünün Kot, ra aüchea fän iten afalafala ewe kapas mi let, ra amiritikich, ra apwüngükich o aiti ngenikich usun ach sipwe manau fän pwüng, pwe ewe aramas mi angang ngeni Kot epwe fokun tufich o lipwäköch ngeni sokun angang mürina meinisin.” (2 Timoty 3:16, 17) Iei makkeien ewe aposel Paulus ngeni chienan kewe Chón Kraist: “Lupwen sia uwato remi ewe kapasen Kot, oua rongorong ngeni o etiwa. Ousap ekieki pwe kapasen aramas, nge oua etiwa pwe iei wesewesen kapasen Kot.” (1 Tesalonika 2:13) Ina popun, lúkúen me féfférún ewe lamalam mi enlet rese popu seni ekiekin are eérenien aramas. Ra popu seni án Kot Kapas mi fel, ewe Paipel.

⁷ Jesus Kraist a isetiw ewe leenien áppirú mi pwúng ren an áeá án Kot Kapas lón an kewe afalafal. Lupwen a iótek ngeni Seman we lón láng, a apasa: “Om kapas a let.” (Johannes 17:17) A lúkú ewe Kapasen Kot, iwe an kewe afalafal meinisin ra tipeeú ngeni Paipel. Fán chómmóng, Jesus a apasa: “A mak.” (Mateus 4:4, 7, 10) Iwe mwirin, a aloni alon ewe Taropwe mi Fel. Pwal ina chék usun néún Kot kewe aramas ikenái, rese afalafal seni pwisin ekiekiir. Nge ra lúkú pwe Paipel, ina án Kot we Kapas me ar kewe afalafal ra feito seni minne a apasa.

8. Met a kapachelong lón ach fel ngeni Jiowa?

⁸ Chón ewe lamalam mi enlet ra fel ngeni Jiowa chék me pwáraatá itan we. Iei alon Jesus: “Kopwe fel ngeni ewe Samol om Kot o angang ngeni i chök.” (Mateus 4:10) Ina minne, néún Kot kewe  chón angang ra fel ngeni Jiowa chék, kapachelong ar esile ngeni aramas iten Kot we me napanapan kewe. Iei alon Kölfel 83:18, NW: “En, ewe mi iteni Jiowa, en chék ewe mi Unusen Tekia seni meinisin wóón fénúfan.” Jesus a álisi aramas pwe repwe sissileeló Kot, usun an a pwáló lón an iótek, a erá: “Üa pwärala itom ngeni chokewe ka ngeniei seni won fanüfan.” (Johannes 17:6) Chón ewe lamalam mi enlet ikenái ra pwal áiti ngeni aramas usun iten Kot we, minne a tipeni me napanapan kewe.

9, 10. Ifa usun Chón Kraist mi enlet ra pwáraatá tong lefiler?

⁹ Néún Kot aramas ra enletin tongfengen lefiler. Iei alon Jesus: “Are oupwe echenifengenikemi, aramas meinisin repwe silei, pwe ämi nei chon kaiö.” (Johannes 13:35) Ekkewe popun Chón Kraist ra eáni ena sókkun tong lefiler. Ena tong a ochufengeni aramas mi sókkofesen ar lewo me mwúúr lón eú ririin pwipwi mi enlet me núkúchar. (Álleani Kolose 3:14.) Ese wor ena sókkun tongen pwipwi lein chón fiti lamalam chofona. Pwata sia silei ena? Ra nifengeniir pokiten sókkofesenin mwúúr are ar lewo. Chón Kraist mi enlet rese angei pisekin efeiengaw pwe repwe nifengeniir are aramas ese lifilifil. Iei alon Paipel: “Iei fatöchün sokofesenin lefilen nöün Kot me nöün Tefil: Eman esap föri mine a pwüng, ika esap echeni pwiin we, i esap nöün Kot. . . . Sipwe echenifengenikich lefilach. Sisap wewe ngeni Kain, i nöün Ewe mi Ngau, a püsin niela pwiin we Epel.”​—1 Johannes 3:10-12; 4:20, 21.

¹⁰ Ach sisap nieló aramas, esap chék ina alen ach  sipwe pwári tong enlet. Chón Kraist mi enlet ra áeá ar fansoun, péchékkúl me wéúúr le álillisfengen me apéchékkúlafengeniir. (Ipru 10:24, 25) Ra álillisfengen lón fansoun riáfféú me ra wenechar lón ar féffér ngeni aramas. Ren enletin ra apwénúetá án Paipel we fén a erá, “eäni kirikiröch ngeni aramas meinisin.”​—Kalatia 6:10.

11. Pwata a lamot ach sipwe lúkú pwe Kot a amanawa aramas ren Jesus Kraist?

¹¹ Chón Kraist mi enlet ra lúkú pwe Kot a amanawa aramas ren Jesus Kraist. Iei alon Paipel: “Aramas repwe küna manau ren Jesus chök. Pun esap fokun wor pwal eu it won fanüfan Kot a ngeni aramas, pwe sipwe küna manau ren.” (Föför 4:12) Sia fen kúna lón Sópwun 5 pwe Jesus a fangóló manawan pwe epwe eú méén kepich fán iten aramas mi álleasochis. (Mateus 20:28) Kot a pwal seikaatá Jesus pwe epwe King lón ewe Mwúún láng, ewe epwe nemeni unusen fénúfan. Iwe, Kot a allúkú pwe sipwe álleasochisi Jesus me féfféri minne a áiti ngenikich ika sia mochen kúna manaw esemuch. Ina popun, a mak lón Paipel pwe: “Iö a lükü ewe Nau a eäni manau esemüch. Iö a lükümach ngeni ewe Nau esap eäni ewe manau.”​—Johannes 3:36.

12. Met weween ach sisap angolong lón mwékútúkútún mwúún fénúfan?

¹² Chón fel mi enlet rese angolong lón mwékútúkútún mwúún fénúfan. Lupwen Jesus a kapwúng mwen mesen ewe sounemenemen Rom itan Pilatus, iei alon: “Mwüi esap pop seni ei fanüfan.” (Johannes 18:36) Ese lifilifil ika Chón Kraist mi enlet iir seni  menni fénú nge ra nóm fán nemenien ewe Mwúún Kot lón láng, ina popun rese fókkun angolong lón mwékútúkútún mwúún fénúfan. Rese pelong lón ar kewe osukosuk. Iwe nge, rese eppeti án aramas fiti mwékútúkútún mwúúr, ssá ngeni wis are úttút. Inaamwo ika rese angolong lón politics nge ra álleasochisi allúkún ekkewe mwúún fénúfan. Pwata? Pún Paipel a allúk ngeniir pwe repwe “aleasochisi nöüwisen ewe mwü mi nemeniir.” (Rom 13:1) Ika allúkún ekkewe mwú ra ú ngeni allúkún Kot, iwe chón fel mi enlet repwe áppirú ekkewe aposel le erá: “Äm aipwe chök aleasochisi Kot lap seni äm aleasochisi aramas.”​—Föför 5:29; Markus 12:17.

13. Met chókkewe mi enletin áppirú Jesus ra ekieki usun án Kot we Mwú? Iwe, met ra féri?

¹³ Chókkewe mi enletin áppirú Jesus ra afalafala pwe án Kot we Mwú, ina chék án aramas ápilúkúlúk. Jesus a osuni: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.” (Mateus 24:14) Néún Jesus kewe chón áppirú rese pesei aramas pwe repwe lúkúlúkú sounemenemen fénúfan le ataweei ar osukosuk nge ra afalafala pwe án Kot we Mwú lón láng, ina chék ach ápilúkúlúk. (Kölfel 146:3) Jesus a áiti ngenikich pwe sipwe ióteki ena nemenem mi unuséch, a erá: “Mwum epwe war, letipom epwe fis won fanüfan usun chök lon läng.” (Mateus 6:10) Paipel a osuni pwe ena Mwúún láng “epwe ataela o arosala ekewe lusun mwü [mi nónnóm iei], nge epwe püsin  nom tori feilfeilachök.”​—Taniel 2:44; Pwärätä 16:14; 19:19-21.

14. Ka lúkú nge menni lamalam a eáni meinisin ekkewe napanapen fel mi enlet?

¹⁴ Me ren minne sia kerán káé, kopwe pwisin eisinuk: ‘Menni lamalam an kewe afalafal meinisin ra pop seni Paipel me pwáraatá iten Jiowa? Menni lamalam  a eáni tong mi enlet, anganga ar lúkú Jesus, ese angolong lón mwékútúkútún mwúún fénúfan me afalafala pwe án Kot we Mwú, ina chék án aramas ápilúkúlúk? Menni lein ekkewe lamalam wóón fénúfan a féri meinisin ekkeei mettóch?’ Ekkewe pisekin ánnet ra affata pwe Chón Pwáraatá Jiowa.​—Álleani Aisea 43:10-12.

15. Met Kot a mochen sipwe féri me lúkún ach sipwe chék lúkú pwe a wor emén Kot?

¹⁵ Ika sia mochen apwapwaai Kot, ese naf ach sipwe chék lúkú i. Popun, pún Paipel a apasa pwe pwal mwo nge ekkewe chónláng mi ngaw ra lúkú pwe a wor emén Kot. (James 2:19) Nge a ffat pwe rese féri letipen Kot me Kot ese pwapwaitiir. Sisap chék lúkú pwe a wor emén Kot nge a lamot sipwe pwal féri letipan pwe sipwe kúna an chen. Sipwe pwal unusen imu seni lamalam chofona me etiwa ewe fel mi enlet.

16. Met emén epwe féri ika a chúen fiti féfférún lamalam chofona?

¹⁶ Ewe aposel Paulus a affata pwe sisap fiti féfférún lamalam chofona. Iei makkeian: “Ach Samol a apasa, ‘Oupwe towu seniir o aimwükemiila seniir. Ousap atapa och mettoch mi limengau, pwe üpwe etiwakemi.’” (2 Korint 6:17; Aisea 52:11) Ina minne, Chón Kraist mi enlet ra imu seni mettóch meinisin mi riri ngeni lamalam chofona.

17, 18. Met weween “Papilon mi lapalap”? Pwata a fókkun atapwalapwal án aramas repwe ‘towu seni’?

¹⁷ Ewe Paipel a affata pwe ekkewe sókkopaten lamalam chofona meinisin ra kapachelong lón  “Papilon mi lapalap.” * (Pwärätä 17:5) Ena it a áchema ngenikich usun ewe telinimw lóóm itan Papilon, ikewe ie a poputá lamalam chofona mwirin ewe Noter lón fansoun Noa we. Chómmóng afalafal me féfférún lamalam chofona iei ra pop seni Papilon lóóm. Áwewe chék, chón Papilon ra fel ngeni fitu sókkun trinitas are úlúmén kot lón emén. Iwe, ikenái, ewe Trinitas, iei chúúlapen án chómmóng lamalam afalafal. Nge Paipel a affata pwe a wor emén chék Kot mi enlet itan Jiowa, iwe Jesus Kraist, i Néún we. (Johannes 17:3) Chón Papilon ra pwal lúkú pwe mi wor och mettóch lón inisin aramas ese tongeni máló, a manaw mwirin málóón ewe inis me a tongeni kúna riáfféú lón eú leenien riáfféú. Iwe ikenái, chómmóng lamalam ra lúkú ekkena afalafal.

¹⁸ Pokiten ekkewe afalafal seni Papilon lóóm ra chéúfetál wóón unusen fénúfan, Papilon mi Lapalap lón ach ei fansoun a liosuetá ekkewe lamalam mi chofona meinisin. Iwe, Kot a osuni pwe epwe chék weiweitá talóón ekkewe lamalam chofona meinisin. Ka kúna lamoten óm kopwe imuló seni mettóch meinisin mi pacheri Papilon mi Lapalap? Jiowa Kot a mochen pwe kopwe mwittir “towu” lupwen a chúen wor fansoun.​—Álleani Pwärätä 18:4, 8.

19. Met sókkun feiéch kopwe kúna ika kopwe angang ngeni Jiowa?

¹⁹ Lupwen kopwe towu seni lamalam chofona, eli ekkóch resap chúen mochen chiechi ngonuk. Iwe  nge, óm fiti néún Jiowa kewe aramas le angang ngeni epwe atoto watteen feiéch, epwe lap seni minne a péút sonuk. Kopwe chék usun néún Jesus kewe popun chón káé, ra likitaló ekkóch mettóch pwe repwe tapweló mwirin, iwe kopwe chóni eú watteen familien Chón Kraist mi enlet wóón unusen fénúfan, repwe enletin tongeok. Epwe pwal wor óm ápilúkúlúkún manaw esemuch “lon ewe fansoun epwe feito.” (Álleani Markus 10:28-30.) Eli mwirin och fansoun, chókkewe mi sápe sonuk pokiten óm lúkú repwe pwal káé met ewe Paipel a apasa me wiliti chón fel ngeni Jiowa.

20. Ifa ewe ápilúkúlúk fán iten chókkewe mi fiti ewe lamalam mi enlet?

²⁰ Paipel a apasa pwe Kot epwele asopwaló ei ótót mi ngaw me siwili ngeni eú ótót mi pwúng fán nemenien an we Mwú. (2 Petrus 3:9, 13) Epwele ifa me amwararen ena ótót! Iwe, epwe wor eú chék lamalam mi enlet lón ena ótót mi pwúng. Óm kopwe achocho le fiffiti ekkewe chón fel mi enlet iei esap pwe ina ewe alen tipachem?