Ika Kot i mi tong, iwe pwata ekkewe lamalam mi erá pwe ra tupuni i ra féri chómmóng féffér mi fókkun ngaw? Ekkena lamalam, iir lamalam chofona. Minne ra apasa me féri a atowauaaló aramas seni Kot. Ifa usun ra féri ena? Met meefien Kot usun? Me met epwe féri?

1. Ifa usun lamalam chofona ra atowauaaló aramas seni Kot ren minne ra eáni afalafal?

Lamalam chofona ra “akasiwili mine a let usun Kot ngeni mine a chofona.” (Rom 1:25) Áwewe chék, lape ngeniir rese áiti ngeni chón ar kewe lamalam iten Kot we. Iwe nge, ewe Paipel a apasa pwe a lamot ach sipwe nénnéúnéú iten Kot we. (Rom 10:13, 14) Atun a fis ngeni emén och mettóch mi fókkun ngaw, ekkóch néúwisin lamalam ra kan erá pwe ina letipen Kot. Nge ina eú kapas chofona. Esap fókkun efisien Kot minne mi ngaw. (Álleani James 1:13.) A elichippúng pwe án ekkewe lamalam afalafal chofona a áweiresi án aramas repwe tongei Kot.

2. Ifa usun lamalam chofona ra atowauaaló aramas seni Kot ren minne ra féfféri?

Féfférún lamalam chofona ngeni aramas a sókko seni féfférún Jiowa ngeniir. Paipel a apasa pwe án lamalam chofona “tipis ra chukuchukutä tori läng.” (Pwärätä 18:5) Ren fitepúkú ier, lamalam ra angolong lón pekin politics, álisatá angangen maun, me efisi are tipeeú ngeni ninniilóón chómmóng aramas. Ekkóch néúwisin lamalam ra mochen wéúéchúló, ina popun ra ereni chón ar kewe lamalam ar repwe fes moni. Ekkena esin féffér ra pwári pwe rese mwo nge silei Kot me ese fich ar repwe wisen tupuni i.​—Álleani 1 Johannes 4:8.

3. Met meefien Kot usun lamalam chofona?

Ika ka song ren minne ekkewe lamalam chofona ra féfféri, iwe óm ekiek epwe met meefien Jiowa usun? I a tongei aramas, nge a fókkun song ren ekkewe néúwisin lamalam mi atowauaaló aramas seni i me féfféringaw ngeni chón ar kewe lamalam. A pwonei pwe epwe ataieló lamalam chofona me esap “chüen pwäsefäl.” (Pwärätä 18:21) Ekiseló chék, Kot epwe arosaló lamalam chofona meinisin.​—Pwärätä 18:8.

 KÚTTAFICHI

4. Esap meinisin lamalam ra ketiw me ren Kot

Chómmóng aramas ra lúkú pwe ekkewe lamalam ra usun sókkopaten al, nge iir meinisin ra aleló ngeni Kot. Mi pwúng ena? Álleani Mateus 7:13, 14, me mwirin pwóróusfengen wóón ei kapas eis:

• Ifa usun Paipel a áweweei usun ewe al mi emmwen ngeni manaw?

Fichi ei VIDEO, me mwirin pwóróusfengen wóón ei kapas eis.

• Itá Paipel a erá pwe a chómmóng lamalam mi ketiw me ren Kot?

 6. Kot a mochen álisi aramas le towu seni lamalam chofona

Álleani Pwärätä 18:4, a me mwirin pwóróusfengen wóón ei kapas eis:

• Met meefiom ren óm silei pwe Kot a mochen álisi emén me emén chókkewe mi fen tupuló ren lamalam chofona?

7. Sópweló le kákkáé usun ewe Kot mi enlet

Itá ekkewe mettóch mi ngaw lamalam chofona ra apasa me féri epwe siwili óm ekiek usun Kot? Anchangei usun emén nau ese mochen álleasochisi seman we, a ló seni imwer we, me féri ekkewe mettóch mi fókkun ngaw. Ena sam ese tipeeú ngeni féfférún néún na. Mi pwúng ach sipwe tipi ngeni ena sam féfféringawen néún na?

• Mi pwúng ach sipwe tipi ngeni Jiowa féfféringawen lamalam chofona, me úkútiw le kákkáé usun i?

 MENLAPAN

Lamalam chofona ra atowauaaló aramas seni Kot ren ar kewe afalafal chofona, me ren féfférúr mi fókkun ngaw. Kot epwe arosaló lamalam chofona.

Enniwili

• Met meefiom ren met lamalam chofona ra eáni afalafal me féfféri?

• Met meefien Jiowa usun lamalam chofona?

• Met Kot epwe féri ngeni lamalam chofona?