LESEN 21
Ifa Usun ewe Kapas Allim A Afalafalfeil?
Ekiseló chék Jiowa epwele áeá an we Mwú le amóeló meinisin ach kewe osukosuk. Pokiten a fókkun aúchea ena kapas allim, iwe a lamot án aramas meinisin repwe rong. Jesus a mochen án chókkewe mi tapweló mwirin repwe afalafala ena pwóróus ngeni aramas meinisin! (Mateus 28:19, 20) Ifa usun Chón Pwáraatá Jiowa ra apwénúetá met Jesus a eáni allúk?
1. Ifa usun Mateus 24:14 a pwéppwénútá lón ei fansoun?
Iei met Jesus a apasa: “Aramas repwe afalafalafeili ewe Pworausen Manau usun ewe Mwün Kot won unusen fanüfan.” (Mateus 24:14) Chón Pwáraatá Jiowa ra pwapwa le álillis lón ena angang mi aúchea. Aua afalafalafeili ewe kapas allim wóón unusen fénúfan lón lap seni 1,000 sókkun fós! A lamot watteen fansoun me péchékkúl fán iten ena angang mi fókkun watte, me a pwal lamot an epwe kókkótéch. Ren án Jiowa álillis, a tongeni fisiéch ena angang.
2. Met Chón Pwáraatá Jiowa ra féri pwe repwe afalafal ngeni aramas?
Aua afalafal ese lifilifil ia aua tongeni kúna me ie aramas. Aua usun ekkewe Chón Kraist lóóm le afalafal lón meinisin “imwen aramas.” (Föför 5:42) Ám féri ena esin angang, a álisikem le afalafal ngeni fite million aramas iteiten ier. Pokiten aramas rese kan kon nóm lón imwer kewe, iwe aua pwal afalafal lón chómmóng leeni ikewe aramas ra soun nóm ie. Fansoun meinisin aua kan kútta alen ám aupwe fós ngeni aramas usun Jiowa me minne a tipeni.
3. Ié epwe wisen afalafala ewe kapas allim?
Wisen meinisin Chón Kraist mi enlet ar repwe afalafala ewe kapas allim ngeni aramas. Aua fókkun aúcheani ena angang. Aua afalafal úkúkún ám tufich pokiten aua silei pwe a tongeni seláni manawen aramas. (Álleani 1 Timoty 4:16.) Ause peiof ren ám féri ena angang pún iei met Paipel a apasa: “Oua angafatei . . . oupwe pwal fangafat.” (Mateus 10:7, 8) Esap meinisin aramas ra etiwa ám afalafal ngeniir. Nge aua chék sópweló le afalafal pokiten ina kinikinin ám fel ngeni Jiowa me ina met a apwapwaai i.
KÚTTAFICHI
Ppii ifa usun Chón Pwáraatá Jiowa ra achocho le afalafal wóón unusen fénúfan, me ifa usun Jiowa a álisiir.
Angangen afalafal wóón unusen fénúfan: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Aua fókkun achocho le tikeri aramas meinisin
Chón Pwáraatá Jiowa ra fókkun achocho le afalafala ewe kapas allim ngeni aramas meinisin. Fichi ei VIDEO, me mwirin pwóróusfengen wóón ei kapas eis.
-
Met ka sani me lón ewe video usun achochoon Chón Pwáraatá Jiowa le afalafal?
Álleani Mateus 22:39 me Rom 10:13-15, me mwirin pwóróusfengen wóón ekkeei kapas eis:
-
Ifa usun ám angangen afalafal a pwári ám tongei chón órum?
-
Met meefien Jiowa usun chókkewe mi afalafala ewe kapas allim?—Ppii wokisin 15.
5. Aua angangfengen me Kot
A wor chómmóng pwóróus mi affata pwe Jiowa a ekkemmweni ám angang. Áwewe chék, iei pwóróusen emén mwán Chón Kraist itan Paul seni New Zealand mi chuuri emén fefin lón eú kuniolun atun a afalafal imw me imw. Ena fefin a fen iótek ngeni Kot lesossorun ena rán me a féúni itan we, Jiowa, me tingorei an epwe tiinaato emén an epwe chuuri. Paul a erá: “Mwirin úlúngát awa, ua wareiti imwan we.”
Álleani 1 Korint 3:6, 9, me mwirin pwóróusfengen wóón ei kapas eis:
-
Ifa usun ekkóch pwóróus, áwewe chék ren pwóróusen Paul seni New Zealand ra pwári pwe Jiowa a ekkemmweni ewe angangen afalafal?
Álleani Föför 1:8, me mwirin pwóróusfengen wóón ei kapas eis:
-
Pwata a lamot ngenikich án Jiowa álillis ren ach sipwe tongeni apwénúetá ach angangen afalafal?
En mi silei?
Iteiten wiik lón ám kewe mwich lón weekday aua kan káé met epwe elipwákéchúkem lón ám angangen afalafal. Ika ka fiti eú me lein ám kana mwich, met meefiom usun met aua káé?
6. Aua álleasochisi án Kot allúk le afalafal
Lón fansoun ekkewe popun Chón Kraist, ekkewe chón oputa chókkewe mi tapweló mwirin Jesus ra sótun aúkatiw ar angangen afalafal. Ekkena Chón Kraist ra ánnetatá me “anüküchara” lón kapwúng ar pwúúng le afalafala ewe kapas allim. (Filipi 1:7) Ina met Chón Pwáraatá Jiowa ra pwal féri lón ei fansoun. a
Álleani Föför 5:27-42, me mwirin pwóróusfengen wóón ei kapas eis:
-
Pwata sisap úkútiw le afalafal?—Ppii wokisin 29, 38, me 39.
ELI EMÉN EPWE EIS: “Pwata Chón Pwáraatá Jiowa ra kan afalafal imw me imw?”
-
Met kopwe pélúwen ngeni?
MENLAPAN
Jesus a áiti ngeni chókkewe mi tapweló mwirin ar repwe afalafala ewe kapas allim ngeni mwú meinisin. Jiowa a ákkálisi néún kewe aramas le féri ena angang.
Enniwili
-
Ifa usun ewe kapas allim a tori unusen fénúfan?
-
Ifa usun ach angangen afalafal a pwári pwe sia tongei chón óruch?
-
Óm ekiek nge ewe angangen afalafal a tongeni apwapwaok? Pwata?
PWAL EKKÓCH PWÓRÓUS
Ppii ifa usun Chón Pwáraatá Jiowa ra afalafal ngeni aramas lón ekkewe telinimw watte.
Met Chón Pwáraatá Jiowa ra féri pwe repwe álisi ekkewe choisá?
Katol ifa usun emén a áweweei popun an pwapwa ren an áeá unusen an fansoun lón ewe angangen afalafal.
Ppii ekkóch pwóróus usun pwúngúlóón án Chón Pwáraatá Jiowa kapwúng mi ámecheresi ewe angangen afalafala ewe kapas allim.
“Kingdom Preachers Take Their Case to Court” (God’s Kingdom Rules!, sópwun 13)
a Kot ewe a allúkú ngenikich ach sipwe afalafal. Ina popun ese pwal lamot án Chón Pwáraatá Jiowa repwe angei mumutá seni aramas ar repwe afalafala ewe kapas allim.
