LESEN 34

Ifa Usun Sipwe Pwár Ngeni Jiowa Pwe Sia Tongei?

PLAY

Ka meefi pwe ka ririéchúló ngeni Kot seni ewe atun ka kerán poputá le káé Paipel? Ka mochen apéchékkúlaló óm ririin chiechi ngeni? Ika ewer, iwe chemeni pwe ika Jiowa a kúna pwe a lapóló óm tongei, iwe epwe pwal lapóló an tongeok me túmúnuk. Ifa usun kopwe pwár ngeni pwe ka tongei?

1. Ifa usun sipwe pwár ngeni Jiowa pwe sia tongei?

Sia pwári ach tongei Jiowa ren ach álleasochisi. (Álleani 1 Johannes 5:3.) Ese kan echchimwa aramas ar repwe álleasochisi. Nge a fen mut ngeni emén me emén kich ach sipwe filatá ika sipwe álleasochisi are sisap. Pwata? Jiowa a mochen ach sipwe “aleasochis ngeni” seni ‘unusen letipach.’ (Rom 6:17) Weween, a mochen ach sipwe álleasochisi pokiten ach tongei, nge esap chék pokiten ina wisach. Kinikin 3 me 4 lón ei puk, repwe álisuk le pwári óm tongei Jiowa ren óm féri ekkewe mettóch mi apwapwaai i me ttiisonuk ekkewe mettóch mi eletipengawa.

2. Pwata a tongeni weires ach sipwe pwár ngeni Jiowa ach tongei?

“Chomong riaföü ra tori ewe chon pwüng.” (Kölfel 34:19) Oukich meinisin sia kúkkúna weires pokiten ach apwangapwangen tipis. Me eli a pwal torikich weiresin osupwangen moni, pwúngúngaw, me pwal ekkóch weires. Atun a torikich ekkena esin mettóch, eli esap mecheres ach sipwe féri met Jiowa a mochen ach sipwe féri pokiten eli epwe fen mecheres ach sisap álleasochisi. Nge lupwen ka tuppwél le féri met Jiowa a erenuk, iwe ka pwári pwe ka tongei i lap seni meinisin. Ka pwal pwári pwe ka tuppwél ngeni. Ika ina, iwe epwe pwal tuppwél ngonuk me esap fókkun likitukoló.—Álleani Kölfel 18:25.

KÚTTAFICHI

Ppii ika pwata óm álleasochis a apwapwaai Jiowa, me káé met epwe álisuk le féri ena.

3. Satan a tipimwáál ngonuk

Sia kúna me ren ewe puken Hiop usun án Satan tipimwáál ngeni Hiop me meinisin mi mochen angang ngeni Jiowa. Álleani Hiop 1:1, 6–2:10, me mwirin pwóróusfengen wóón ekkeei kapas eis:

Me ren Satan, pwata Hiop a álleasochisi Jiowa?—Ppii Hiop 1:9-11.
Met Satan a erá usun aramas meinisin kapachelong en?—Ppii Hiop 2:4.

Álleani Hiop 23:11, 12, me mwirin pwóróusfengen wóón ei kapas eis:

Ifa usun Hiop a ánnetatá pwe a enletin tongei Jiowa?

Hiop a pwári an tongei Jiowa ren an akkamwéchú an tuppwél ngeni

Sia pwári ach tongei Jiowa ren ach akkamwéchú ach tuppwél ngeni

4. Apwapwaai Jiowa

Álleani Än Salomon Fos 27:11, me mwirin pwóróusfengen wóón ekkeei kapas eis:

Met meefien Jiowa atun ka pwári pwe ka tipachem me álleasochisi? Pwata?

5. Ka tongeni tuppwél ngeni Jiowa

Ach tongei Jiowa a amwékútúkich le ereni aramas usun i. Ach tuppwél ngeni a álisikich le féri ena inaamwo ika ese mecheres. Fichi ei VIDEO, me mwirin pwóróusfengen wóón ekkeei kapas eis.

VIDEO: Defend Your Faith Despite Opposition (5:09)

A weires ngonuk óm kopwe fós ngeni aramas usun Jiowa?
Lón ewe video, met a álisi Grayson le pworacho ngeni an niwokkus?

A mecheres ach sipwe tuppwél ngeni Jiowa atun sia aúcheani minne a aúcheani me oputa minne a oput. Álleani Kölfel 97:10, me mwirin pwóróusfengen wóón ekkeei kapas eis:

Seni met ka fen káé, ikkefa ekkóch mettóch Jiowa a aúcheaniir? Ikkefa ekkóch mettóch a oput?
Ifa usun ka tongeni káé le aúcheani minne mi pwúng, me oput minne mi ngaw?

6. Sia feiéch ika sia álleasochisi Jiowa

Ach álleasochisi Jiowa a múrinné fansoun meinisin. Álleani Aisea 48:17, 18, me mwirin pwóróusfengen wóón ekkeei kapas eis:

Óm ekiek nge sia tongeni lúkúlúk pwe Jiowa a silei met a échitikich fansoun meinisin? Pwata?
Ifa usun óm káé ewe Paipel me óm káé usun ewe Kot mi enlet, Jiowa, a álisuk?

ELI EMÉN EPWE EIS: “Kot a pwapwa ren féfférúi?”