LESEN 39
Met Kot A Apasa Usun Chcha?
A mmen fókkun aúchea chcha. Ika ese wor chcha lón inisich, sisap tongeni manaw. Pokiten Kot, i ewe Chón Férikichetá, iwe a wor an pwúúng le erenikich usun áeáán chcha. Met a apasa usun chcha? Kich mi tongeni ún chcha are angei IV chcha? Me ifa usun ka tongeni eáni kefil mi múrinné wóón ei mettóch?
1. Met Jiowa a apasa usun chcha?
Jiowa a ereni ekkewe chón fel ngeni me lóóm lóóm: “Chan iteiten mönümanau ina manauan.” (Lifitikos 17:14) Me ren Jiowa, chcha a wewe ngeni manaw. Iwe, pokiten manaw a pin me ina eú liffang seni Kot, iwe chcha a pwal pin.
2. Met Kot a allúkú usun chcha?
Me mwen fférútáán ewe mwichefelin Chón Kraist, Jiowa a allúkú ngeni ekkewe chón fel ngeni ar resap ún chcha. (Álleani Keneses 9:4 me Lifitikos 17:10.) Nge mwirin fférútáán ena mwichefel, Jiowa a enniwili ena allúk. Iei met ewe mwichen soupwúngúpwúng a ereni ekkewe Chón Kraist: “Ousap ün cha [“ttiisenikemi . . . chcha,” NW].”—Álleani Föför 15:28, 29.
Met weween ach sipwe ttiisenikich chcha? Ika emén tokter a erenuk óm kopwe túmúnuk seni sakaw, iwe kosap ún sakaw. Nge itá kopwe mwéngé och sókkun mwéngé mi wor sakaw lón are opposaalóng lón inisum? Aapw. Pwal ina chék usun, án Kot allúkú ach sipwe ttiisenikich chcha, a wewe ngeni ach sisap ún chcha are ochooch futuken man ese kokusuló chchaar. Me sisap pwal mwéngé sókkun mwéngé mi nofit ngeni chcha.
Nge ifa usun ren áeáán chcha lón pekin sáfei? A wor ekkóch minen álillis lón pioing mi weneiti chcha, nge mi ffat pwe ra atai án Kot allúk. Áwewe chék ren ewe IV chcha are ekkewe rúáánú kinikinin chcha, ewe red cells, white cells, platelets, me plasma. A pwal wor ekkóch minen álillis eli ese kon ffat ika ra atai án Kot allúk. Áwewe chék, a wor ekkóch minen álillis mi wor kinikisitiwen eú me lein ekkewe rúáánú kinikinin chcha lón. Are lón ekkóch minen álillis, ewe tokter epwe áeá pwisin chchaan ewe mi semmwen. Atun sipwe filatá met sókkun minen álillis sipwe angei, a lamot án emén me emén kich sipwe pwisin filatá. a—Kalatia 6:5.
KÚTTAFICHI
Ppii ifa usun kopwe filatá met sókkun minen álillis lón pekin sáfei kopwe angei.
3. Filatá ewe sókkun minen álillis lón pekin sáfei epwe apwapwaai Jiowa
Ifa usun kopwe filatá ewe sókkun sáfei mi tipeeú ngeni ekiekin Kot usun chcha? Fichi ei VIDEO, me mwirin pwóróusfengen wóón aúchean ach sipwe fiti ekkeei emmwen mi tettelitiw.
-
Tingor án Jiowa tipachem.—James 1:5.
-
Kútta án Paipel kewe kapasen emmwen me ifa usun kopwe apwénúretá.—Än Salomon Fos 13:16.
-
Ppii met sókkun minen álillis lón pekin sáfei mi kawor lón leeniom we.
-
Ppii menni leir ese fókkun ketiw me reom.
-
Túmúnú pwe óm kefil esap aosukosuka mwelien letipom.—Föför 24:16. b
-
Chemeni pwe esap wisen emén pwal mwo nge pwúlúwom we, emén mwán mi ásimaw, are ewe mi wisen káé ngonuk, an epwe erenuk met kopwe filatá wóón eú mettóch mi riri ngeni mwelien letipom.—Rom 14:12.
-
Makkeetiw met ka filatá.
4. Chón Pwáraatá Jiowa ra kútta ekkewe minen álillis lón pekin sáfei mi fókkun múrinné
Mi fókkun tufich ach sipwe álleasochisi án Kot allúk usun chcha me angei ekkewe minen álillis lón pekin sáfei mi fókkun múrinné ese nofit ngeni chcha. Fichi ei VIDEO.
Álleani Titus 3:2, me mwirin pwóróusfengen wóón ei kapas eis:
-
Pwata a lamot ach sipwe pwári súfél me tipetekison atun sia fós ngeni emén tokter?
|
Ese mumutá |
Filien emén Chón Kraist |
|---|---|
|
A. Blood plasma |
Kinikisitiwen plasma |
|
B. White cells |
Kinikisitiwen white cells |
|
C. Platelets |
Kinikisitiwen platelets |
|
D. Red cells |
Kinikisitiwen red cells |
5. Atun a wor kinikisitiwen chcha lón eú sáfei
A wor rúáánú kinikinin chcha, iter red cells, white cells, platelets, me plasma. A wor kinikisitiwen chcha lón ekkena kinikinin chcha. c Tokter ra áeá lón sáfei ekkóch ekkena kinikisitiwen chcha pwe álillisin fiu ngeni ménún semmwen are akaúlóón kusun chcha.
A lamot án emén me emén Chón Kraist epwe pwisin áeá mwelien letipan mi káit me ren Paipel le filatá ika epwe etiwa ekkewe kinikisitiwen chcha. Eli ekkóch repwe filatá ar resap etiwa och sókkun sáfei are minen álillis lón pioing mi áeá ekkewe kinikisitiwen chcha. Nge ren ekkóch, eli ra meefi pwe mwelien letiper a mut ngeniir ar repwe etiwa.
Ekieki ei kapas eis atun kopwe filatá met kopwe féri:
-
Ifa usun upwe áwewe ngeni emén tokter popun ai usap etiwa are ai upwe etiwa ekkewe kinikisitiwen chcha?
ELI EMÉN EPWE EIS: “Met ngawen ai angei IV chcha?”
-
Met meefiom?
MENLAPAN
Jiowa a mochen ach sipwe epini chcha.
Enniwili
-
Pwata a pin chcha me ren Jiowa?
-
Pwata sia silei pwe án Kot allúk ach sipwe ttiisenikich chcha a wewe ngeni ach sisap angei IV chcha?
-
Ifa usun kopwe eáni kefil mi múrinné usun áeáán chcha lón pekin sáfei?
PWAL EKKÓCH PWÓRÓUS
Met a lamot kopwe ekieki me mwen óm kopwe filatá ika kopwe mut ngeni ekkewe tokter ar repwe áeá pwisin chchaom atun ra angang wóóm?
Met kopwe ekieki atun kopwe filatá ika kopwe angei ekkewe kinikisitiwen chcha?
Met a álisi emén tokter le lúkú pwe a pwúng minne Jiowa a apasa usun chcha?
Katol ifa usun ekkewe mwán mi ásimaw mi chóni ewe Hospital Liaison Committees ra álisi chiener kewe Chón Kraist.
b Ppii nampa 5, “Atun A Wor Kinikisitiwen Chcha lón Eú Sáfei” me Sópwósópwun Pwóróus 3, “Minen Álillis lón Pioing mi Weneiti Chcha.”
c Me ren ekkóch tokter, ekkena rúáánú kinikinin chcha, iir kinikisitiwen chcha. Ina popun, eli epwe lamot óm kopwe áwewe ngeni noum tokter filiom óm kosap angei chcha are ekkewe rúáánú kinikinin chcha, red cells, white cells, platelets, are plasma.
