LESEN 46
Pwata Kopwe Fangóló Manawom me Papatais?
Ka fangóló manawom ngeni Jiowa ren óm pwon ngeni lón iótek pwe kopwe fel ngeni I chék me akkomwa letipan lón manawom. (Kölfel 40:8) Ekiseló mwirin, ka papatais. Atun ka féri ena, ka pwári ngeni ekkewe ekkóch pwe ka fen fangóló manawom ngeni Kot. Ach kefil le fangóló manawach ngeni Jiowa, ina eú kefil mi aúchea seni meinisin sia eáni lón manawach. Met a tongeni amwékútuk óm kopwe eáni ena sókkun kefil?
1. Met a tongeni amwékútú emén an epwe fangóló manawan ngeni Jiowa?
Sia fangóló manawach ngeni Jiowa pokiten sia tongei. (1 Johannes 4:10, 19) Iei án Paipel pesepes: “Kopwe echeni ewe Samol om Kot ren unusen lelukom, ren unusen ngünum, ren unusen ekiekum pwal ren unusen tufichum.” (Markus 12:30) Sia pwári ach tongei Kot esap chék lón met sia apasa, nge pwal lón met sia féri. Emén mwán me emén fefin ra pwúpwúlú pokiten ra enletin tongfengen, iwe pokiten sia tongei Jiowa, iwe ina met a amwékútúkich le fangóló manawach ngeni me papatais.
2. Met sókkun feiéch Jiowa a fang ngeni néún kewe Chón Pwáraatá mi papatais?
Atun ka papatais, kopwe chóni án Jiowa we famili iir mi pwapwa. Mwirin kopwe meefi an tongeok lón chómmóng napanap, me epwe lapóló óm ririéch ngeni lap seni iei. (Álleani Malakai 3:16-18.) Me lúkún án Jiowa wiliti Semom, epwe pwal wor eú óm familien lúkú wóón unusen fénúfan mi tongei I me pwal tongeok. (Álleani Markus 10:29, 30.) Ewer, mi wor fitu mettóch a lamot kopwe féri mwen óm kopwe papatais. A lamot kopwe káé usun Jiowa, tongei, me lúkú Néún we. Sáingolóón, a lamot kopwe fangóló manawom ngeni Jiowa. Ika ka féri ekkena mettóch me papatais, iwe epwe tufich ngonuk óm kopwe kúna manaw esemuch. Án Kot we Kapas a erá: ‘Papatais a amanauakemi iei.’—1 Petrus 3:21.
KÚTTAFICHI
Ppii pwata a lamot óm kopwe fangóló manawom ngeni Jiowa me papatais.
3. A lamot kich meinisin sipwe filatá ié sipwe angang ngeni
Lón Israel lóóm, ekkóch aramas ra lúkú pwe ra tongeni fel ngeni Jiowa me pwal ewe kot chofona Paal. Nge Jiowa a tiinaaló néún we soufós Elias an epwe áwena ar na ekiek mi mwáál. Álleani 1 King 18:21, me mwirin pwóróusfengen wóón ei kapas eis:
-
Ifa ewe kefil a lamot ekkewe chón Israel repwe eáni?
A lamot sipwe pwal filatá ié sipwe angang ngeni, usun chék ekkewe chón Israel. Álleani Lukas 16:13, me mwirin pwóróusfengen wóón ekkeei kapas eis:
-
Pwata ese tufich ach sipwe fel ngeni Jiowa me pwal fel ngeni emén are och mettóch?
-
Ifa usun sipwe pwári ngeni Jiowa pwe sia filatá le fel ngeni?
4. Ekilonei án Jiowa tong fán itom
Jiowa a fang ngenikich chómmóng liffang mi aúchea. Met sia tongeni fang ngeni i? Fichi ei VIDEO.
Ifa usun Jiowa a pwári an tongeok? Álleani Kölfel 104:14, 15 me 1 Johannes 4:9, 10, me mwirin pwóróusfengen wóón ekkeei kapas eis:
-
Ikkefa ekkewe liffang me ren Jiowa ka kon aúcheaniir?
-
Met ekkena liffang ra ámmeef ngonuk usun Jiowa?
Atun sia angei eú liffang sia fókkun sani, sia mochen pwári ach kilisou ngeni ewe emén mi liffang ngenikich. Álleani Tuteronomi 16:17, me mwirin pwóróusfengen wóón ei kapas eis:
-
Atun ka ekieki usun meinisin met Jiowa a fen féri fán itom, met ka mochen fang ngeni?
5. Atun ka fangóló manawom ngeni Jiowa, kopwe kúna chómmóng feiéch
Chómmóng aramas ra lúkú pwe moni, eú angang mi múrinné, are iteféúló, ina met epwe atoto ngeniir pwapwa. Mi pwúng ena? Fichi ei VIDEO, me mwirin pwóróusfengen wóón ekkeei kapas eis.
-
Inaamwo ika ewe emén lón ei video a fókkun sani soccer, nge pwata a likitaló?
-
A filatá le fangóló manawan ngeni Jiowa, nge esap ngeni soccer. Óm ekiek nge a kefiléch? Pwata?
Me mwen án aposel Paulus wiliti emén Chón Kraist, a eáni eú angang mi fókkun múrinné. A káé án chón Jus kewe allúk me ren emén sense mi iteféúló. Nge a likitaló ren an epwe tongeni wiliti emén Chón Kraist. Paulus a niamameló ren an féri ena? Álleani Filipi 3:8, me mwirin pwóróusfengen wóón ekkeei kapas eis:
-
Pwata Paulus a erá pwe minne a féri me mwen an wiliti emén Chón Kraist a “usun chök pipi,” are kápich?
-
Met sókkun feiéch a kúna mwirin an wiliti emén Chón Kraist?
-
Met epwe amúrinnééló manawom, óm angang ngeni Jiowa are óm féri pwal ekkóch mettóch lón manawom?
Atun Paulus a wiliti emén Chón Kraist, a kúna watteen feiéch lap seni met a fen pennúkúóló
EKKÓCH RA ERÁ: “Ua silei pwe iei ewe enlet, nge usaamwo mmólnetá le papatais.”
-
Pwata a éch óm kopwe fangóló manawom ngeni Jiowa?
MENLAPAN
Tong a amwékútúkich le fangóló manawach ngeni Jiowa me papatais.
Enniwili
-
Pwata a fich ngeni Jiowa ach sipwe tongei me fel ngeni seni unusen letipach?
-
Ifa usun Jiowa a efeiéchú néún kewe Chón Pwáraatá mi papatais?
-
Ka mochen fangóló manawom ngeni Jiowa?
PWAL EKKÓCH PWÓRÓUS
Ppii pwata emén chón kél me emén chón fiti sport ra filatá le fangóló manawer ngeni Jiowa.
Young People Ask—What Will I Do With My Life?—Looking Back (6:54)
Ppii pwal ekkóch popun pwata kopwe fangóló manawom ngeni Jiowa.
“Met Popun Kopwe Fangolo Manauom Ngeni Jiowa?” (Ewe Leenien Mas, January 1, 2010)
Lón ei video mi fiti nikáttik, katol úkúkún pwapwaan chókkewe mi fangóló manawer ngeni Jiowa.
Lón ewe pwóróus itelapan “For Years I Wondered, ‘Why Are We Here?’” ppii met a amwékútú emén fefin an epwe ekieki met a kon aúchea me ren.
“The Bible Changes Lives” (The Watchtower, November 1, 2012)
