Anchangei mwo ei: Atun Tim me chienan kewe ra play, Tim a monei eféú pwóór iwe a kkúú asammwachoon wáán chón órun we, iwe a mék.

Ika en Tim, met kopwe féri?

A WOR ÚLÚNGÁT ÓM KEFIL:

1. Sú.

2. Tipi ngeni pwal emén.

3. Ereni chón órum we met a fis, me ereni pwe ka tongeni mééni siwilin met a ta.

Neman kopwe filatá Nampa 1. Nge a wor popun mi múrinné óm kopwe akkaffat ese lifilifil met ka mwáálliló wóón.

1. Pokiten ina met mi pwúng.

   Paipel a apasa: “Sia fokun mochen föri mine a pwüng [“wenechar,” NW] fansoun meinisin.”​—Ipru 13:18.

2. Aramas ra kan mwittir omusaaló tipisin chókkewe mi pwári mwáállir.

   Paipel a apasa: “Emén aramas mi aopaaló an tipis esap feffeitá lón manawan, nge emén mi pwáraatá o likitaló, epwe kúna úméúméch.”​—Än Salomon Fos 28:13, NW.

3. Nge lap seni meinisin, a apwapwaai Kot.

   Paipel a apasa: “Ewe Samol mi Lapalap a oput eman aramas mi chök föri mine a ngau [“otuputup,” NW], nge a lükülükü eman mi wenechar.”​—Än Salomon Fos 3:32.

Emén nengngin seni Merika itan Karina, 20 ierin, a sótun aopa seni seman we an pakkingin spiito. Nge saminne epwe chék akkamonomonaaló. Karina a erá: “Mwirin eú ier semei we a kúna nei we tikitin spiito. Iwe a wenewenen song ngeniei!”

Ifa ewe lesen? Karina a erá: “Óm akkamonomonaaló mwáállumw, epwe fen chék sópweei ewe osukosuk. Kopwe fókkun kúna liwinin óm tipis mwirin!”

Paipel a apasa: “Kich meinisin sia mwälila fän chomong.” (James 3:2) Ach mwittir le akkaffat met sia mwáálliló wóón, ina esissillen emén mi tipetekison me ásimaw.

Iwe mwirin, káé seni met ekkewe ka mwáálliló wóón. Emén nengngin itan Vera a erá: “Iteiten ua mwáálliló, ua achocho le ekieki ekkewe lesen ua tongeni káé seni pwe epwe émúrinnéeiló me ua tongeni silei met upwe féri ika epwe fissefál ngeniei.” Sipwe ppii ifa usun kopwe féri ena.

Ka paaro waan pwiium we watte we pasiken iwe ka atai. Met kopwele ffér?

• Kosap akkaffat me áneánei pwe pwiium we esap pwal esilla.

• Akkaffat ngeni pwiium we met a wesewesen fis.

• Ereni pwiium we met a fis nge tipi ngeni pwal emén.

Kese pásini eú test pokiten kese study me mwan. Iwe, met kopwele féri?

• Tipi ngeni weiresin ewe test.

• Wenechar le erá pwe kese pass pwe kese study.

• Erá pwe noum we sense ese sanuk.

 Iwe iei, kopwele nesékúriti ekkena mettóch me anchangei pwe en pwiium we watte ika noum we sense. Met repwe ekieki ika ka mwittir akkaffat mwáállumw kewe? Met repwe ekieki usum ika ka túkúmaaló mwáállumw kewe?

Iwe iei kopwele ekieki eú óm mwáál lón ewe ier me pélúweni ekkeei kapas eis.

Met ua mwáálliló wóón me met ua féri mwirin?

• Ua túkúmaaló.

• Tipi ngeni pwal emén.

• Ua mwittir akkaffat mwáálli.

Ika kese akkaffat mwáállumw na, met meefiom mwirin?

• Ua pwapwa pwe ese wor emén a kúna!

• Ua mengiringir. Ika ú silei upwe fen pwári.

Itá met mi fen éch kopwe féri?

Met ka káé seni mwáállumw we?

Pwata ekkóch rese mwittir akkaffat ar kewe mwáál?

Epwe ifa ekiekin aramas usum ika ka kan túkúmaaló mwáállumw kewe? Nge epwe ifa ar ekiek usum ika ka kan akkaffat mwáállumw kewe?—Lukas 16:10.