Anchangei mwo ei: Heather a kerán chék kammwet ngeni Mike ren úkúkún ruu maram nge a meefi pwe a fen silefichi Mike. Ra kan textfengen, fósfengen wóón phone ren fitu awa, me ra pwal mwo nge taitap wóón met ra ekiekin apasa.

Lón ekkena ruu maram, Mike me Heather ra kan chék kamwéchúpéú me ekis kiss, nge Mike a pwal mochen féri lap seni ena. Iwe Heather ese mochen, nge ese mochen epwe asonga Mike. Me ese pwal wor emén me lúkún Mike a kan ámmeef ngeni pwe a mmen liéch me nie súfél. Me iei met a pwisin ekieki: ‘Ina chék ii pwe ám me Mike aua fókkun tongofengen . . . ’

Ika en Heather, met kopwe féri ika ka naffún néúnéú kammwet?

Ika ka oturuketiw me wóón efóch irá me sótun chang usun emén machchang, iwe kopwe feiengaw. Pwal ina usun efeiengawen óm álleasolapa allúkún Kot ren manaw mi liméch usun met ei wokisin a apasa: “Unusen ngas seni sokun föförün lisowu.”—1 Tesalonika 4:3.

Ifa sópwongawen án emén álleasolapa ena allúk? Paipel a apasa: “Ousap fokun föri sokun föförün lisowu! . . . Nge are eman aramas a föri föförün lisowu a tipis ngeni püsin inisin.” (1 Korint 6:18) Ifa usun emén a tongeni tipis ngeni pwisin inisin ren an tipisin lisowu?

 Ekkewe soukútta pwóróus ra kúna pwe chómmóng sáráfé mi lisowu mwen pwúpwúlú ra meefi eú me lein ekkeei mettóch are fen lap seni.

• WEIRES. Chómmóng sáráfé mi lisowu mwen pwúpwúlú, ra mengiringir mwirin.

• LÚKÚLÚKÚMMANG. Mwirin án chókkana lisowufengen repwe tipemwaramwar le ekieki: “Pwal ié átenan are neminnan a lisowu ngeni?”

• LICHIPPÚNG. Chómmóng nengngin ra tipeni emén epwe túmúnúúr, esap turunufaseer. Nge chómmóng át ra sani ekkewe sókkun nengngin rese chék fitaaló mochenin át.

• Chemeni ei: Ika ka lisowu mwen pwúpwúlú, iwe ka ekisikisaaló aúchean inisum pokiten ka fen piin féri féfférún lisowu are kese chúen virgin. (Rom 1:24) Inisum a mmen fókkun aúchea iwe kosap fangemwááliló!

Pwári pwe ka tipeppós le ttii sonuk féfférún lisowumwáál. (1 Tesalonika 4:3) Iwe, ika kopwe pwúpwúlú eú rán, ka tongeni féri ewe féfférún lisowu. Me ka tongeni unusen pwapwaiti ei féffér me kosap meefi ekkewe memmeef mi pop seni lisowu mwen pwúpwúlú, choweán lólilen, mengiringir me niwokkus.—Än Salomon Fos 7:22, 23; 1 Korint 7:3.

• Itá emén mi enletin tongeok epwe tongeni angawa péchékkúlen inisum me pwapwaan manawom?

• Itá emén mi enletin chúnguk epwe tongeni sótunuk le atai óm riri ngeni Kot?—Ipru 13:4.