Pwiim mi Áchengicheng:

Ach tongei Kot me aramas a amwékútúkich ach sipwe apwénúetá alon Paipel ei: “Oupwe feiló me asukula aramasen mwú meinisin pwe repwe wiliiti chón tapwoto mwiri, me papataisiir.” (Mat. 28:​19, 20; Mark 12:​28-31) A fókkun watte manamanen ewe esin tong ese pwisin achéchééi. A tongeni achchúngú chókkewe “letiper a páengeni ar repwe etiwa ewe enlet mi awora manaw esemuch.”—Féf. 13:48.

Lón ekkewe ier a ló, sia kan nefótófót wóón ach sipwe émwéchúnúkú met sipwe eáni afalafal me likit ngeni aramas néúch kewe puk. Nge iei, a lamot sipwe angang wóón ach émúrinnéló napanapach le fós ngeni aramas. Sia mochen pwáári ach tongei aramas ren ach pwóróus ngeniir wóón met ekkewe ra mochen rong ussun. Weween sipwe tipemecheres le ekkesiwili met sipwe afalafal wóón, me ekieki met emén me emén iir ra lólileniesini me met ra mochen rong ussun. Ifa ussun ei brochure a tongeni álisikich le féri ena?

A wor 12 lesen lón ei brochure mi áiti ngenikich ekkóch napanap mi lamot sipwe ámááraatá pwe sipwe pwáári ach tongei aramas me álisiir ar repwe wiliiti néún Jises chón káé. Eú me eú lesen a lóngólóng wóón eú pwóróus lón Paipel mi menlapei eú napanap Jises are ekkewe Chón Kraist lóóm ra pwáári lón ar angangen afalafal. Ei brochure epwe álisikich le kútta alen ach sipwe pwáári tong ngeni aramas, nge esap ach sipwe émwéchúnúkú eú afalafal sipwe eáni. Inaamwo iká eú me eú ekkena napanap ra lamot lón meinisin kinikinin ach angangen afalafal, nge sipwe pwóróus wóón ifa ussun ekkóch ekkena napanap ra fókkun lamot atun sipwe poputááni ach fós ngeni aramas, ekkóch lón ach liwiniti aramas, me ekkóch lón ach káé ngeni aramas.

Atun ka káé eú me eú lesen, ekiekifichi ifa ussun ka tongeni apwénúetá ewe napanap atun óm fós ngeni ekkewe aramas lón leeniom we. Achocho le apéchékkúlaló óm tongei Jiowa me aramas. Ese wor och mettóch epwe kon múrinné seni ena tong epwe álisuk lón óm achocho le álisi aramas ar repwe wiliiti néún Jises chón káé.

Áúa fókkun pwapwa ren ach angangfengen lón ei angang. (Sef. 3:9) Amwo Jiowa epwe efeiéchúkemi lón ámi sópweeló le tongei aramas me álisiir le wiliiti néún Jises chón káé!