1, 2. (a) Ifa ewe osukosuk Paul me chienan kewe ra kúna me lón Efisus? (b) Met sipwele káé lón ei sópwun?

 EKKEWE aramas lón Efisus ra púppúchér me ssáfetál wóón ewe al. Eú mwichen aramas mi song ra kochufengen me ra poputá le aosukosuk. Ekkóch me lein chókkana ra turufi rúúemén me lein chienen Paul kewe le sái, me ra átekiniir. A pwal chómmóng aramas wóón ewe alelap ikewe ekkewe sitowa ra nóm ie. Ra fiti ena mwichen aramas iir mi song me ra fetál ngeni eú watteen leenien katol sipai lón ena telinimw mi tongeni kuch 25,000 aramas lón. Lape ngeni ekkena aramas rese mwo nge silei iká pwata ena mwichen aramas ra song, nge ra ekieki pwe ewe imwenfel me néúr we kot fefin mi aúchea itan Artemis a kúna itengaw. Ina popun ra poputá le púppúchér me apasa: “Artemis mi lap, án chón Efisus!”—Féf. 19:34.

² Sia pwal kúna sefál án Setan néúnéú eú mwichen aramas mi song le aúkatiw chéúfetálin ewe kapas allim ussun ewe Mwúún Kot. Ewer, esap chék ina met Setan a áeá le aúkatiw ewe angangen afalafal. Lón ei sópwun, sipwe pwóróus wóón pwal fitu mettóch Setan a áeá le aúkatiw ewe angangen afalafal me atai tipeeúfengenin ekkewe Chón Kraist lón fansoun ekkewe aposel. Nge lap seni meinisin, sipwe káé pwe a sópwongaw, me sipwe káé pwe ren “án Jiowa manaman, an we kapas a chéúfetál me péppéchékúleló.” (Féf. 19:20) Pwata ekkena Chón Kraist ra tongeni sópwósópwoló lón ar angang? Ren pwal chék ekkewe popun sia sópwósópwoló lón ei fansoun. Ewer, sia tufichin sópwósópwoló lón ewe angangen afalafal me chék tittipeeúfengen ren álillisin Jiowa. Iwe nge, ussun chék ekkewe Chón Kraist lón fansoun ekkewe aposel, a lamot ach sipwe angang weires. Ren álillisin án Jiowa we ngún mi fel, sia tongeni ámááraatá ekkewe napanap repwe álisikich le sópwósópwoló lón ewe angangen afalafal. Sipwe mwo akkomw káé ussun pwóróusen Apolos.

3, 4. Met Akwila me Prisila ra esilla ussun Apolos, me ifa ussun ra álisi?

³ Atun Paul a sái ngeni Efisus lón an aúlúngátin sái lón an angangen misineri, emén re Jus itan Apolos a wareiti ena telinimw. I seni ewe telinimw mi iteféúló itan Aleksantria lón Isip. A wor ekkóch napanap mi múrinné Apolos a napanapeni. A mmen angangéch le kapas, me “i emén mi . . . silefichi ekkewe Taropwe mi Pin.” Pwal och, “a fókkun tinikken ren álillisin ewe ngún mi fel.” Apolos a pwal fókkun tinikken me pwora atun a fós ngeni ekkewe chón Jus lón ewe sinakok.—Féf. 18:24, 25.

⁴ Akwila me Prisila ra rong án Apolos kapas. Sia tongeni anchangei pwapwaar atun ra rong an kapas. Inaamwo iká a pwúng án Apolos asukul ussun Jises, nge ekiseló mwirin, Akwila me Prisila ra esilla pwe ese silei eú mettóch mi fókkun lamot. I “a chék silei ewe angangen papatais án Jon.” Ena pean pwúpwúlú iir mi tipetekison, iir chón ffér tento, rese pireir le fós ngeni Apolos inaamwo iká i a fókkun angangéch le kapas me a tipáchem. “Ra eweinaaló me áweweéchú ngeni ewe alen Kot.” (Féf. 18:25, 26) Iwe met Apolos a féri? A ffat pwe a pwáári eú me lein ekkewe napanap mi kon aúchea emén Chón Kraist a tongeni ámááraatá, ina tipetekison.

5, 6. Met a efisi án Jiowa epwe néúnéú Apolos, me met sia tongeni káé seni pwóróusan?

⁵ Pokiten Apolos a etiwa án Akwila me Prisila álillis, iwe a lipwákéchúló lón an angang ngeni Jiowa. A sái ngeni Akaia ikewe a “fókkun álisi” ekkewe Chón Kraist ie. A pwal afalafal ngeni ekkewe chón Jus ikena ie iir mi fókkun lúkú pwe Jises esap i ewe Messaia mi pwonetiw. Luk a apasa: “A fókkun tinikken le ánnetaéchú ngeni ekkewe chón Jus mwen mesen aramas pwe ra mwáál, me pwáári ngeniir seni ekkewe Taropwe mi Pin pwe Jises, i ewe Kraist.” (Féf. 18:27, 28) Apolos a fókkun álilliséch ngeni ekkena Chón Kraist! Pokiten ena, iwe chómmóng aramas ra rong ussun án Jiowa we kapas me a péppéchékúleló. Met sia tongeni káé seni pwóróusen Apolos?

⁶ Tipetekison, ina ewe napanap a lamot án meinisin Chón Kraist repwe ámááraatá. A wor ren kich meinisin ekkewe napanap mi múrinné. Eli sia sipeéch, lipwákéch, me silelap lón ekkóch mettóch. A lamot pwe ach tipetekison epwe lap seni tufichich kewe, pwe iká ese, iwe epwe chék atoto osukosuk. Iká sise túmúnúéch, iwe ach kena tufich ra tongeni efisi ach sipwe lamalamtekia. (1 Kor. 4:7; Jem. 4:6) Iká sia enletin tipetekison, sipwe achocho le mirititi pwe  ekkewe ekkóch ra tekia senikich. (Fil. 2:3) Sisap song atun ekkewe ekkóch ra áwenakich, nge sipwe fen mut ngeniir ar repwe asukulakich. Sisap lamalamtekia me péchéú wóón pwisin ach ekiek atun sia silei pwe ewe ngún mi fel a fen emmweni án Jiowa we mwicheich le féri och mettóch mi sókkóló seni me mwan. Iká sia tipetekison, Jiowa me Néún we ra tongeni néúnéúkich.—Luk 1:51, 52.

7. Ifa ussun Paul me Apolos ra isettiw leenien áppirú ussun ar tipetekison?

⁷ Iká sia tipetekison, iwe sisap lólówóiti ekkewe ekkóch. Anchangei úkúúkún án Setan mochen efisi tipefesen lein ekkena Chón Kraist lón fansoun ekkewe aposel. Setan epwe fókkun pwapwa iká Apolos me Paul, ekkewe rúúemén chón asukul mi fókkun lipwákéch, repwe lólówófengen me ánini iká ién a kon lap lón ewe mwichefel. A tongeni mecheres ngeniir ar repwe féri ena. Ekkóch Chón Kraist lón Korint ra poputá le erá, “Ngang néún Paul,” nge ekkóch ra erá, “Nge ngang néún Apolos.” Itá Paul me Apolos ra mochen chiener kana Chón Kraist repwe peni epek? Aapw! Paul a tipetekison, me a apúnga Apolos ren an angang ngeni Jiowa. A pwal mwo nge ewisa ngeni ekkóch angang an epwe féri, me Apolos a álleasochisi án Paul emmwen. (1 Kor. 1:10-12; 3:6, 9; Tait. 3:12, 13) A ifa me múrinnéén ar leenien áppirú ngenikich lón ei fansoun ussun ar tipetekison me tipeeúfengen!

8. Ifa fetálin án Paul sái lón an liwiniti Efisus, me pwata a filaatá ena esin fetálin sái?

⁸ Paul a fen pwonei pwe epwe liwinsefál ngeni Efisus, me a apwénúetá an na pwon. a (Féf. 18:20, 21) Iwe nge, nengeni ia a pwer ie atun a liwiniti Efisus. A poputááni an sái seni Antiok, Siria. Ren an epwe tour ngeni Efisus, a chék tongeni sái ngeni Selusia, fiti efóch siip, me ssáffóch ngeni ikewe epwe ló ie. Nge a fen sáifetál “lón ekkewe kinikin mi towaw seni órosset.” Eli a arapakkan engéréú mwail án Paul we sái mi mak pwóróusan lón Féffér 18:23 me 19:1! Pwata Paul a filaatá ena esin fetálin sái mi ttam me áweires? Pokiten a fókkun mochen “apéchékkúla meinisin ekkewe chón káé.” (Féf. 18:23) An aúlúngátin sái lón an angangen misineri, a weires ussun chék pwal ekkewe ruu akkomw, nge me ren Paul pwe ese lusmwáál an féri ena. Lón ei fansoun, ekkewe chónemmwen mi wisen sáifetál me pwúlúwer kewe, ra pwal eáni án Paul ekiek. Sia fókkun kilisou ren ar pwáári ewe esin tong mi pennúkúóló pwisin mochenin!

9. Pwata a lamot án ewe kúmiin chón káé repwe pwal papatais sefál, me ifa ewe lesen sia tongeni káé seniir?

 ⁹ Atun Paul a wareiti Efisus, a kúna ina epwe 12 chón káé, néún Jon ewe Chón Papatais. Ra fen papatais lón án Jon we papatais, ewe kkótun papatais ese chúen ketiw. Pwal och, ussun ekkena aramas rese kon lien silei, are rese fen silei ussun ewe ngún mi fel. Iwe, Paul a áweweei lamoten ar repwe papatais lón iten Jises, me ra áppirú Apolos le tipetekison le mochen káé. Mwirin ar papatais lón iten Jises, ra angei ewe ngún mi fel me pwal ekkóch feiéch seni án Kot na manaman. A ffat pwe Jiowa a efeiéchú chókkewe mi tipemecheres le fiti ekkewe mineféén emmwen mi feito seni an we mwicheich.—Féf. 19:1-7.

10. Pwata Paul a ló seni ewe sinakok me mwékút ngeni ewe leenien asukul, me ifa ussun sia tongeni áppirú lón ach angangen afalafal?

¹⁰ Epwele pwal fis och mettóch. Paul a tinikken le afalafal ngeni aramas lón ewe sinakok ren úkúúkún úlúngát maram. Inaamwo iká a “alúkúlúkú ngeniir ussun ewe Mwúún Kot,” nge ekkóch me leir rese mochen aúseling, me ra poputá le ú ngeni. Paul ese asolapaaló an fansoun le fós ngeni chókkana mi “eáni kapas mi ngaw fán iten Ewe Al,” nge a fen poputá le ló afalafal iteiten rán lón eú leenien asukul. (Féf. 19:8, 9) A lamot án chókkewe mi mochen sópweeló le alapaaló ar káé ussun ewe Mwúún Kot, repwe mwékút seni ewe sinakok me ló ren ewe leenien asukul. Sipwe áppirú Paul, sipwe aúkaló ach pwóróus ngeni emén iká sia esilla pwe ese mochen aúseling ngenikich are a chék mochen ánini. A chúen chómmóng ekkewe mi letipwenechar mi lamot ngeniir ar repwe rong ewe kapas allim!

11, 12. (a) Ifa ussun Paul a isettiw leenien áppirú ren an fókkun angang weires me tipemecheres le féri siwil? (b) Ifa ussun Chón Pwáraatá Jiowa ra fókkun angang weires me tipemecheres le féri siwil atun ra afalafal?

 ¹¹ Eli Paul a afalafal lón ewe leenien asukul iteiten rán seni kulók 11 lesossor ngeni kulók 4 lekuniol. Eli ikkena ekkewe atun a mmen pwichikkar, me ina atun chómmóng ra mwo kaúló seni ar angang me ra mwéngé me asésé. Iká Paul a sópweeló le afalafal iteiten rán lón ekkena kulók lón unusen ekkewe ruu ier, iwe eli a fen néúni lap seni 3,000 awa le asukul. b Iwe nge, pwal iei eú popun an a chéúfetál me péppéchékúleló án Jiowa we kapas, pún Paul a fókkun tinikken me tipemecheres le féri siwil. A tipemecheres le siwili ineet me ia a afalafal ie ren an epwe álisi chómmóng lón ewe leeni. Iwe met mwirilóón? “Meinisin chókkewe mi nónnóm lón ewe fénú Eisia, iir chón Jus me chón Krik, ra rong ewe kapas án ewe Samol.” (Féf. 19:10) Paul a unusen afalafala ewe pwóróus allim!

¹² Chón Pwáraatá Jiowa lón ei fansoun ra pwal angang weires me tipemecheres le féri siwil pwe repwe tongeni álisi ekkewe ekkóch. Sia achocho le afalafal ikewe sia tongeni kúna chómmóng aramas me ie, me pwal lón ekkewe atun sipwe sereniir. Sia afalafal wóón ekkewe al, leenien amémé, me pwal lón ekkewe leeni mi chómmóng aramas ie. Sia pwal fós ngeni aramas ren ach kériir wóón phone are ren ach mak taropwe. Me atun sia afalafal imw me imw, sia achocho úkúúkún ach tufich le chuuri aramas lón ekkewe atun ra kan nóm lón imwer kewe.

13, 14. (a) Met Jiowa a atufichi Paul an epwe féri? (b) Ifa ewe mettóch néún Skefa kewe mwán ra mwáálliló wóón, me ifa ewe mettóch chómmóng chón Kristentom ra pwal mwáálliló le féri?

¹³ Mwirin, sia álleani lón ewe puken Féffér pwe Jiowa a álisi Paul le féri “manaman mi fókkun amwarar.” Ekkewe aramas mi  semmwen ra pwal mwo nge chikaretá atun ra angei úfen Paul kewe me an kewe maikake. Pisekin Paul kewe ra pwal mwo nge asúoló ekkewe ngún mi ngaw. c (Féf. 19:11, 12) Lape ngeni ekkewe aramas, ra máirú ren án ekkewe ngún mi ngaw towu seni ekkewe aramas, nge esap meinisin ra pwapwa ren ena.

¹⁴ Ekkóch “ekkewe chón Jus mi sáifeil le asúoló ekkewe timon,” ra sótun nikáppirú ekkewe manaman Paul a féri. Ekkóch me lein ekkena chón Jus ra sótun asúoló ekkewe timon ren ar néúnéú iten Jises me Paul. Néún ewe souasor mi lap itan Skefa kewe fúmén mwán, ra sótun féri ena. Ewe ngún mi ngaw a ereniir: “Ngang úa silei Jises me úa sissilei Paul, nge ámi ié?” Mwirin, ewe mwán mi wor ngún mi ngaw wóón a mwetetá wóón ekkena chón likótuputup ussun emén manmwacho, me a áchcheereló fán ar kinás me seleló. (Féf. 19:13-16) A ffat ngeni meinisin pwe Jiowa a fang ngeni Paul watteen manaman, nge esap ekkena mwán mi féri angangen lamalam chofona. Lón ei fansoun, a wor fite million chókkewe mi ekieki pwe ren ar repwe apwapwaai Kot, a chék lamot ar repwe apasa ewe it Jises, are erá pwe iir Chón Kraist. Iwe nge, Jises a fen affata pwe ekkewe chék mi wesewesen féri letipen Seman we, iir a wor ar enletin ápilúkúlúk fán iten mwachkkan.—Mat. 7:21-23.

15. Ifa ussun sia tongeni áppirú ekkewe chón Efisus?

¹⁵ Atun a ffatoló pwe ese wor án néún Skefa kewe mwán manaman, chómmóng aramas ra wiliiti Chón Kraist, me ra likitaaló ar angangen roong. Chómmóng chón Efisus ra lúkú lón angangen roong, áwewe chék ren fériér, me ar áeá ekkewe pisekin me puken angangen roong. Ekkewe chón Efisus mi lúkú Kot, ra uweiaato néúr kewe puken angangen roong me keniireló mwen mesen ekkewe aramas, inaamwo iká ra fókkun mémmóng. d Luk a erá: “Pokiten án Jiowa manaman, an we kapas a chéúfetál me péppéchékúleló.” (Féf. 19:17-20) A ifa me amwararen án Jiowa me chókkewe mi túppwél ngeni okkufu lamalam chofona me ngún mi ngaw. Chókkana mi túppwél ra isettiw leenien áppirú mi múrinné fán itach lón ei fansoun. Ikenái sia pwal nóm lón ei ótót mi ur ren angangen roong. Iká sia kúna och pisekich mi riri ngeni angangen roong, a lamot  sipwe áppirú met ekkewe chón Efisus ra féri. Sipwe mwittir otur senikich! Ousipwe atowawaakicheló seni ekkena sókkun mettóch mi annou, ese lifilifil úkúúkún méén.

16, 17. (a) Áweweei ifa ussun Temetrius a poputááni ewe osukosuk lón Efisus. (b) Ifa ussun ekkewe chón Efisus ra fókkun péchéúló wóón pwisin ar lúkú?

¹⁶ Mwirin, sia álleani pwóróusen án Setan néúnéú eú mwichen chón efeiengaw. Luk a apasa: “A ppiitá eú watteen osukosuk mi weneiti Ewe Al.” A mmen efeiengaw minne a fis. e (Féf. 19:23) Emén chón angang ngeni silifer itan Temetrius a poputááni ewe osukosuk. Akkomw, a ereni pwal ekkewe ekkóch chón angang ngeni silifer pwe a lamot ar repwe améméló néúr kewe uluulun pwe epwe watte winner. Mwirin, a ereniir pwe ewe pwóróus Paul a afalafala a angawaaló ar business, pokiten ekkewe Chón Kraist rese fel ngeni uluulun. Mwirin, Temetrius a silei pwe chókkewe mi aúseling ngeni, ra aúcheani telinimwer we me mwúúr we. Ina popun, a éúréúrer pwe iká ra aúseling ngeni Paul, iwe néúr we kot fefin Artemis me an we imwenfel mi iteféúló, “epwele itengawoló.”—Féf. 19:24-27.

¹⁷ Minne Temetrius a apasa a efisi án ekkewe aramas resap etiwa minne Paul a apasa. Ekkewe chón angang ngeni silifer ra song me ra poputá le púppúchér me erá, “Artemis mi lap, án chón Efisus!” Iwe, ekkewe aramas lón ena telinimw ra rukoruk me ra poputá le aosukosuk. f Paul a fókkun pwora me a mochen feiló ngeni ewe leenien katol sipai me afalafal ngeni ewe mwichen aramas, nge ekkewe chón káé ra péchéú le ereni an esap feiló pwe ete feiengaw. Emén mwán itan Aleksanter a útá mwen mesen ena mwichen aramas me sótun fós. Pokiten i emén chón Jus, eli a fókkun mochen áweweei sókkofesenin ekkewe chón Jus me ekkena Chón Kraist. Nge ekkena aramas rese mochen aúseling. Atun ra esilla pwe Aleksanter i chón Jus, rese mut ngeni an epwe kapas, me ren úkúúkún ruu awa ra ekkenniwili le apasa, “Artemis mi lap, án chón Efisus!” Lón ei fansoun,  a pwal wor chókkewe mi umwesiló ren pwisin ar kewe lúkú, me ra fókkun péchéúló wóón minne ra lúkú.—Féf. 19:28-34.

18, 19. (a) Ifa ussun ewe néúwis a ekinamweetiw ewe mwichen aramas mi song lón Efisus? (b) Ifa ussun néún Jiowa kewe aramas ra kúna túmún fán ekkóch seni ekkewe néúwisin mwú, me met sia tongeni féri pwe sipwe pwal kúna túmún?

¹⁸ Iwe, a wor emén néúwisin mwú a amosonosonaalóói ewe mwichen aramas. Ena néúwis a tipepwetete. Akkomw, a ereni ena mwichen aramas mi song pwe ekkewe Chón Kraist rese turunufasa án néúr we kot fefin we imwenfel. Mwirin, a erá pwe ese wor tipisin Paul me chienan kewe ngeni án ar we kot Artemis we imwenfel. A pwal erá pwe iká ekkewe aramas rese sani met Paul me chienan kewe ra féri, iwe repwe ereni ekkewe sounemenem. Nge minne ena néúwis a erá mwirin, a fókkun échchúngúúr atun a áchchema ngeniir pwe án ekkewe aramas efisi efitikoko, a ú ngeni ewe allúkún Rom. Iwe mwirin, a ásáraalóói ewe mwiich. Mwittir chék, ekkena aramas mi song ra kinamweetiw ren án ena néúwis kapas pwetete.—Féf. 19:35-41.

¹⁹ Esap iei ewe áeúin atun are sáingoon atun án emén néúwis mi tipepwetete epwe peni ekkewe chón tapweló mwirin Jises. Ren enletin, ewe aposel Jon a kúna lón kúnaan we pwe atun ekkewe ránin lesópwólóón, ekkewe mettóch mi núkúnúkéch lón ei ótót, mi liosuetá ewe fénúfan, epwe oromaaló ewe chénúpupu, ina án Setan kewe angangen eriáfféwúmwááli chókkewe mi tapweló mwirin Jises. (Pwár. 12:15, 16) A fen fis ena mettóch. Lón chómmóng atun, ekkewe soukapwúng mi tipemecheres, ra álisaatá án Chón Pwáraatá Jiowa pwúúng le féri ar angangen fel me afalafala ewe kapas allim ngeni aramas. Ewer, ach féffér múrinné, eli ina eú popun mi aúchea pwata ekkewe soukapwúng ra peni ach pwúúng. Eli án Paul féffér múrinné a amwékútú ekkóch néúwis lón Efisus ar repwe súféliti me túmúnú seni feiengaw. (Féf. 19:31) Amwo ach wenechar me súfél epwe efisi án chókkewe sia chuuriir repwe pwal súfélitikich. A tongeni fis chómmóng mettóch mi múrinné ren ach eáni féffér mi múrinné.

20. (a) Met meefiom atun ka ekieki ussun chéúfetálin me péppéchékkúlelóón án Jiowa we kapas me lóóm, me lón ei fansoun? (b) Met ka úppós le féri?

²⁰ A mmen amwarar ach ekieki ussun chéúfetálin me péppéchékkúlelóón án Jiowa kapas lón fansoun ekkewe aposel. A apwapwa ach kúna pwe Jiowa a pwal ewinnakich lón ach ei fansoun. Ka pwal mochen pachelong lón ena esin mettóch? Iwe, kopwe káé seni pwóróusen chókkewe sia fen pwóróus ussur. Kopwe chék tittipetekison, fiti feffeitáán án Jiowa we mwicheich, angang weires, ttiisonuk angangen roong, me fókkun achocho le eáni féffér múrinné ren óm wenechar me súfél.