1-3. (a) Áweweei met a fis lón ewe pwinin Iutikos a máló. (b) Met Paul a féri, me met ena mettóch a pwáári ussun Paul?

 PAUL a chuuri chómmóng chón ewe mwichefel lón Troas me ra mwichfengen lón eú ruumw asan. A attama an afalafal ngeni chienan kana pokiten iei ewe sáingoon pwinin epwe nóm rer. Iei a fen lukenipwin. A wor chómmóng lamp mi kú lón ena ruumw, ina popun a pwichikkar me ese kon kus ásepwál lón. Emén alúwél át itan Iutikos a móót lón eú ekkewe asammwacho. Iwe, atun Paul a kakkapas, Iutikos a méúrúchouló me a turutiw seni ewe aúlúngátin sássár!

² Pokiten Luk emén tokter, iwe ussun i emén me lein chókkewe mi ssátiw fan me cheki ewe alúwél át. A ffat met a fis. Iutikos “a fen má.” (Féf. 20:9) Nge mwirin, a fis eú manaman. Paul a chapoló wóón ewe alúwél me a ereni ekkewe aramas: “Oupwe kaúló le akúrang pún i mi manaw.” Paul a amanawasefáli Iutikos!—Féf. 20:10.

³ Án Iutikos manawsefál a pwáári amwararen ekkewe mettóch Jiowa a tongeni féri ren an we ngún mi fel. Esap tipisin Paul án Iutikos máló. Iwe nge, ese mochen án chienan kewe repwe ló seni ewe mwiich mi fókkun aúchea fán ar letipeta are chepetek ren met a fis. Ren án Paul amanawasefáli Iutikos, i a oururu me apéchékkúla chienan kewe Chón Kraist pwe repwe tongeni sópweeló ar afalafal fán tinikken. A ffat pwe Paul a silei pwe manaw a fókkun aúchea. A cheme ngenikich alon ei: “Esap tipisi málóón emén aramas.” (Féf. 20:26) Sipwele ppii ifa ussun án Paul leenien áppirú a tongeni álisikich ach sipwe pwal aúcheani manaw.

4. Met sókkun mettóch mi eniwokkus a fis ngeni Paul?

⁴ Sia fen káé lón ewe lesen mwen ei pwe atun Paul a nóm Efisus  a fis ngeni och mettóch mi fókkun eniwokkus. Ekkewe aramas lón Efisus ra fókkun song ren met a eáni afalafal. Meinisin chókkewe mi ffér me amémé ekkewe uluulun fán iten fel ngeni Artemis, ra fiti ewe mwichen aramas mi osukosuk ngeni! Féffér 20:1, a erá: “Lupwen a kúkkúnúló ewe osukosuk, Paul a tiiti ekkewe chón káé, iwe mwirin an apéchékkúler me kapwong ngeniir, a poputááni an sái ngeni Masetonia.”

5, 6. (a) Eli ifa úkúúkún ttamen án Paul nóm Masetonia, me met a féri fán iten ekkewe Chón Kraist ikkena ie? (b) Met meefien Paul ngeni chienan kana chón lúkú?

⁵ Lón án Paul sái ngeni Masetonia, a kaúló Troas me ekis nónnóm ikena. Paul a áneán pwe Taitos epwe fiti me ikena, ewe i a fen tiinaaló ngeni Korint. (2 Kor. 2:12, 13) Iwe nge, lupwen a fen ffat ngeni Paul pwe Taitos esap war, iwe a ló Masetonia me nónnóm ikena eli eú ier are lap seni. Iwe, lón ena atun a “ngeni chókkewe mi nóm ikena ie chómmóng kapasen apéchékkúl.” a (Féf. 20:2) Mwirin och fansoun, Taitos a fiti Paul me lón Masetonia me a apwóróusa ngeni Paul án ekkewe Chón Kraist lón Korint etiwaéchú néún we áeúin taropwe. (2 Kor. 7:5-7) Ena mettóch a amwékútú Paul an epwe makkeei pwal eú taropwe ngeniir, ina ewe 2 Korint.

⁶ Iwe, Luk a erá pwe án Paul chuuri ekkewe Chón Kraist lón Efisus me Masetonia a fókkun “apéchékkúler.” Ena a pwáári úkúúkún án Paul tongei chienan kana chón lúkú. Ese ussun ekkewe Farisi mi ekieki pwe ra múrinné seni ekkewe ekkóch. Pún i a pwapwa le eti chienan kana le angang ngeni Kot. (Jon 7:47-49; 1 Kor. 3:9) Paul ese fókkun ekieki pwe a múrinné seni ekkewe ekkóch pwal mwo nge atun a ngeniir kapasen fén mi péchékkúl.—2 Kor. 2:4.

7. Ifa ussun ekkewe chónemmwen lón ei fansoun ra achocho le áppirú Paul?

⁷ Lón ach ei fansoun, ekkewe mwán mi ásimaw me chónemmwen mi wisen sáifetál ra achocho le áppirú Paul. Pwal mwo nge atun a lamot ngeni emén kapasen fén mi péchékkúl, ra kan achocho le fénéú lón napanap epwe apéchékkúla. Ra achocho le weweiti meefien ekkewe ekkóch me apéchékkúler, nge rese fen apwúngúúr. Emén chónemmwen mi wisen sáifetál ren langattam fansoun, a apasa: “Lape ngeni, a tori chienach kewe Chón Kraist ekkewe mettóch mi elichippúngúr are eniwokkusur me rese silei met ra tongeni féri.” A mmen watte met ekkewe mwán mi ásimaw ra tongeni féri pwe repwe apéchékkúla chiener kewe Chón Kraist.—Ipru 12:12, 13.

8, 9. (a) Pwata a siwil án Paul kókkótun sái ngeni Siria? (b) Pwata ekkewe chón Jus ra fókkun song ren Paul?

⁸ Paul a sái seni Masetonia ngeni Korint. b Mwirin úlúngát maramen an nónnóm ikena, a mochen ló ngeni Kenkrea, ikewe a akkóta an epwe fiti efóch waa ngeni Siria. Seni ikena ie, a tongeni feiló Jerusalem me atoura ekkewe álillis fán iten ekkewe chón lúkú mi osupwang ikena ie. c (Féf. 24:17; Rom 15:25, 26) Iwe nge, a fis och mettóch mi weiweitá mi efisi án Paul epwe siwili an kókkót. Féffér 20:3, a erá: “Ekkewe chón Jus ra ekiekin rawangawei i”!

⁹ Ekkewe chón Jus ra fókkun oputa Paul pokiten a likitaaló ewe lamalamen Jus. Pwal och, kukkuto chék pokiten án Paul afalafal lón Korint, Krispus, ewe meilapen ewe sinakok ikena ie, a wiliiti emén  Chón Kraist. (Féf. 18:7, 8; 1 Kor. 1:14) Lón pwal eú atun, ekkewe chón Jus lón Korint ra ló ren ewe governor lón Akaia itan Kallio. Ra tipimwáál ngeni Paul pwe a atai ewe allúk, nge Kallio ese etiwa ar kapasen tipimwáál. Ina met a efisi ar repwe fókkun song. (Féf. 18:12-17) Ese mwáál ekkena chón Jus lón Korint ra silei are ekieki pwe ekiseló chék Paul epwe fiti efóch waa seni Kenkrea, ina popun ra ekiekietá eú angangen rawangaw ar repwe souni me ikena me nieló. Met Paul epwele féri?

10. Mi wor mwáállin án Paul ese pwer Kenkrea? Áweweei.

¹⁰ Pokiten Paul a mochen túmúnú manawan me ewe álillis a kewis an epwe atoura, iwe a filaatá an esap pwere ngeni Kenkrea, nge epwele fen liwinsefál nge epwe pwer Masetonia. Ewer, a mmen pwal efeiengaw án emén epwe fetál lón ekkena leeni. Lón ena fansoun, ekkewe chón solá ra kan op ppen ekkewe al. A pwal mwo nge efeiengaw ekkewe leeni ekkewe chón fetál repwe pwinipwin ie. Iwe nge, Paul a ekieki pwe a fen túmún an epwe fetál ikena ie, lap seni an pwer Kenkrea. Me a múrinné pwe Paul ese chék ákkáláemén lón an sái. Ikkeei iir chienan lón an ei sái, Aristarkus, Kaius, Sekuntus, Sopater, Timoty, Trofimus, me Tikikos.—Féf. 20:3, 4.

11. Met ekkewe Chón Kraist lón ei fansoun ra tongeni féri pwe repwe túmúnú pwisin iir, me ifa ewe leenien áppirú Jises a isettiw?

¹¹ Ekkewe Chón Kraist lón ei fansoun, ra pwal ussun Paul ren ar achocho le túmúnúéch atun ra fiti angangen afalafal. Lón ekkóch leeni atun ra afalafal, ra kan kúmiitiw, are mwaren ákkárúúemén. Ifa ussun ren riáfféúmwáál? Ekkewe Chón Kraist ra weweiti pwe rese tongeni opoló seni riáfféúmwáál. (Jon 15:20; 2 Tim. 3:12) Nge ra túmúnúéch atun ra afalafal. Ekieki pwóróusen Jises. Lón eú atun, lupwen ekkewe chón ú ngeni mi nóm Jerusalem ra poputá angang faw pwe repwe mane ngeni Jises, i “a op me a towu seni ewe imwenfel.” (Jon 8:59) Ekiseló mwirin, lupwen ekkewe chón Jus ra akkóta ar repwe nieló i, iwe, “ese chúen fetálfeil le pwápwááló lein ekkewe chón Jus, nge a ló seni ikena me feiló ngeni ewe leeni arap ngeni ewe fénúpéén.” (Jon 11:54) Jises a achocho le féri met a tufichin féri pwe epwe túmúnú manawan pwe epwe tongeni apwénúetá minne Kot a tipeni fán itan. Pwal ina met ekkewe Chón Kraist lón ei fansoun ra féri.—Mat. 10:16.

12, 13. (a) Met chón ewe mwichefel ra meefi atun Paul a amanawasefáli Iutikos? (b) Menni ápilúkúlúk a tongeni oururu chókkewe mi má seniir attongeer kewe lón ei fansoun?

¹² Paul me chienan kewe ra sái lón Masetonia nge mwirin ra mwo  ekis káimufesen. Nge ussun ra chufengensefál me lón Troas. d Iei met Paipel a erá: “Mwirin nimu rán áúa toriir me lón Troas.” e (Féf. 20:6) Ikena ie ewe Paul a amanawaatá Iutikos, ewe sia pwóróus wóón me lepoputáán ei lesen. Anchangei met meefien ekkewe Chón Kraist ikena ie atun ra kúna chiechier na Iutikos a manawsefál! Ei pwóróus a erá pwe “ra meefi watteen ourur.”—Féf. 20:12.

¹³ Ewer, ese fis lón ach ei fansoun ekkena esin manaman. Iwe nge, pokiten ewe ápilúkúlúk Paipel a awora ussun manawsefál, chókkewe mi má seniir attongeer kewe “ra meefi watteen ourur.” (Jon 5:28, 29) Ekieki ei: Pokiten Iutikos ese unuséch, ló, ló, ló, a málósefál. (Rom 6:23) Nge chókkewe repwe manawsefál lón án Kot we ótót séfé ra eáni ápilúkúlúkún manaw tori feilfeiló! Pwal och, chókkewe mi manawsefál me eti Jises le nemenem lón láng repwe eáni ewe manaw esap tongeni máló. (1 Kor. 15:51-53) Ina minne, ekkewe mi kepit me ekkewe ekkóch siip ra tongeni “meefi watteen ourur” ren ewe ápilúkúlúkún manawsefál.—Jon 10:16.

14. Met Paul a ereni ekkewe mwán mi ásimaw seni Efisus atun a chuuriir me lón Mailitus?

¹⁴ Paul me chienan kewe ra sái seni Troas ngeni Assos, mwirin ngeni Mitilene, Kios, Samos, me Mailitus. Paul a achocho ngeni an epwe tori Jerusalem lón ewe ránin Chulapen Pentikos. Ina popun, lón ei atun a filaatá an epwe fiti efóch waa mi onuchang seni Efisus. Iwe nge, pokiten Paul a mochen fós ngeni ekkewe mwán mi ásimaw lón Efisus, a tiiti iir ar repwe chufengen me lón Mailitus. (Féf. 20:13-17) Lupwen ra war, Paul a ereniir: “Oua fókkun silei ussun napanapei leimi seni ewe áeúin rán úa kerán tolong lón ewe fénú Eisia, ussun ái slave ngeni ewe Samol ren watteen tipetekison. Me pokiten ekkewe chón Jus ra rawangaweei, ngang úa kechiw me kúna riáfféú, oua pwal silei pwe úa afalafal ngenikemi nge úse túkúmaaló ekkewe mettóch mi échúitikemi are úa asukulakemi lein mwicheichen aramas pwal seni imw ngeni imw. Nge úa unusen pwáraatá ngeni ekkewe chón Jus me ekkewe chón Krik pwe a lamot repwe áier, fel ngeni Kot, me lúkú lón ach Samol Jises.”—Féf. 20:18-21.

15. Ikkefa ekkóch feiéchún ach angangen afalafal imw me imw?

 ¹⁵ A chómmóng alen ach sipwe atoura ngeni aramas ewe kapas allim lón ei fansoun. Sia ussun chék Paul le ló ngeni ekkewe leeni ia aramas ra soun nóm ie, áwewe chék ren ekkewe bus stop, wóón ekkewe al mi tep aramas ie, are lón ekkewe leenien amémé. Nge ewe angangen afalafal imw me imw, ina ach we ákkáeúin alen angangen afalafal. Pwata? Eú popun, pún a suuki ngeni meinisin aramas alen ar repwe rong pwóróusen ewe Mwúún Kot iteitan. Ei a pwáári pwe Kot ese lifilifil aramas. Pwal eú popun, sia tongeni awora ngeni ekkewe mi letipwenechar ewe álillis mi lamot ngeniir pwe repwe silei Kot. Pwal och, kich pwisin sia kúna feiéch pokiten ach lúkú a péchékkúleló me sia káé ach sipwe likiitú. Ren enletin, aramas lón ei fansoun ra tongeni esilla pwe kich Chón Kraist mi enlet pokiten ach tinikken le afalafal “lein mwicheichen aramas pwal seni imw ngeni imw.”

16, 17. Ifa ussun Paul a pwáári pwe a pwora, me ifa ussun ekkewe Chón Kraist lón ei fansoun ra áppirú i?

¹⁶ Paul a áweweei ngeni ekkewe mwán mi ásimaw lón Efisus pwe ese silei met sókkun feiengaw epwe tori me lón Jerusalem. Iei met a ereniir: “Nge ngang, úse ekieki pwe a aúchea ngeniei pwisin manawei. Pwal eú, met úa mochen úpwe féri, ina ái úpwe apwénúetá  minne a lamot úpwe féri me ewe angang úa angei seni ewe Samol Jises, ina ái úpwe unusen esilefeili kapas allimen án Kot kirekiréch mi somwoló.” (Féf. 20:24) Paul a fókkun pwora. Ese mut ngeni och mettóch, pwal mwo nge an semmwen are riáfféúmwáál, epwe eppeti le féri ewe angang Kot a mochen an epwe féri.

¹⁷ Ekkewe Chón Kraist lón ei fansoun ra pwal kúkkúna sókkopaten osukosuk. Ekkóch ra kúna riáfféúmwáál me mwúún fénúer a pinei ar angang. Ekkóch ra semmwen lón pekin inis are memmeef, nge ra chúen achocho. Ekkewe sáráfé ra kúna weires ren án chiener kewe chón sukul etipetiper le féri minne mi ngaw. Chón Pwáraatá Jiowa ra ussun chék Paul, ra tipeppós ren ar rese mut ngeni och mettóch an epwe aúkaretiw lón ar “unusen pwáraatá” ewe kapas allim.

18. Ifa ussun Paul a túmúnú seni tipisin málóón emén aramas, me ifa ussun ekkewe mwán mi ásimaw lón Efisus ra pwal tongeni féri ena?

¹⁸ Lupwen ekkewe mwán mi ásimaw seni Efisus ra feito chuuri Paul, i a ereniir kapasen fén mi fataffatéch me áchchema ngeniir ifa ussun a chúngú ewe mwichefel. Akkomw, a ereniir pwe eli ina ewe sáingoon fansoun repwe kúna i. Mwirin, a erá: “Esap tipisi málóón emén aramas, pún úa afalafal ngenikemi nge úse túkúmaaló senikemi meinisin án Kot kewe kapasen fén.” Ifa ussun ekkena mwán mi ásimaw seni Efisus repwe áppirú Paul me túmúnú seniir tipisin málóón emén aramas? A ereniir: “Oupwe túmúnú pwisin ámi me unusen ewe mwichen siip, ewe, ewe ngún mi fel a seikikemiitá pwe oupwe chónemmweni, pwe oupwe túmúnú ewe mwichefelin Kot, ewe a mééni ren chchaan Néún we ussun emén chón mmasen siip.” (Féf. 20:26-28) Paul a éúréúrer, a erá pwe ekkewe “wolif mwacho” ra tongeni tolong lein ewe mwichen siip me “ámwáálaló ewe enlet pwe repwe erikaló ekkewe chón káé ngeni pwisin iir.” Met a lamot ekkena mwán mi ásimaw repwe féri? Paul a éúréúrer: “Oupwe mammasa, me chechchemeni pwe ren úkúúkún úlúngát ier, lerán me lepwin, úse fókkun úkútiw le fénéú emén me emén leimi fán ssúrún chénún mesei.”—Féf. 20:29-31.

19. Menni angangen rikiló a pwá ina epwe 60 ier mwirin án Jises máló, me met a fis mwirin ena?

¹⁹ Ekkewe “wolif mwacho” ra pwá lón ewe mwichefel ina epwe 60 ier mwirin án Jises máló. Ina epwe lón ewe ier 98 mwirin Kraist, ewe aposel Jon a makkeei: “Pwal mwo nge iei a chómmóng ekkewe chón ú ngeni Kraist ra pwá . . . Ra towu senikich pún esap iir  chón ach kúmi. Pún iká iir chón ach kúmi, iwe repwe chék nómotiw rech.” (1 Jon 2:18, 19) Ina epwe 200 ier mwirin án Jises máló, ekkewe souemmwen chón rikiló, ra ekieki pwe iir eú kúmiin aramas mi tekia seni meinisin lón ewe mwichefel. Mwirin, ina epwe 300 ier mwirin án Jises máló, ewe sounemenemen Rom itan Constantine a álisaatá ewe “lamalamen Chón Kraist” mi chofona. Ren enletin, atun ekkewe néúwisin lamalam ra apachaalong lón ewe “lamalamen Chón Kraist” áitien ekkewe lamalam rese lúkú Kot me ar kewe ééreni, iwe ra “ámwáálaló ewe enlet.” Ekkewe tipitipin lamalamen Chón Kraist ikenái ra chúen fiti ekkena ekiek mi mwáál me ééreni.

20, 21. Ifa ussun Paul a pwáári an pennúkúóló pwisin mochenin, me ifa ussun ekkewe mwán mi ásimaw lón ei fansoun ra pwal tongeni féri ena?

²⁰ Paul a fókkun sókkóló seni ekkewe chónemmwen mi áeá ewe mwichefel le angei feiéchúr seni. A angang fán iten tufichin pwisin manawan pwe esap áweiresi chón ewe mwichefel. A achocho le angang ngeni chienan kewe chón lúkú, nge ese ekiekin angei moni seniir. Paul a pesei ekkewe mwán mi ásimaw lón Efisus ar repwe pwal ina ussun lón ar angang ngeni chiener kewe Chón Kraist. Iei met a ereniir: “Ren ámi angang weires lón ei napanap, mi lamot oupwe álisi iir kewe mi apwangapwang me mi lamot oupwe chechchemeni án ewe Samol Jises kewe kapas, lupwen pwisin i a apasa: ‘A watte pwapwaan fang lap seni angei.’”—Féf. 20:35.

²¹ Lón ach ei fansoun ekkewe mwán mi ásimaw ra áppirú Paul lón ar pennúkúóló pwisin mocheniir. Ra sókkóló seni ekkewe néúwisin lamalam mi angei moni seni aramas pwe repwe wéúéchúló. Ekkewe mwán mi ásimaw ra weweiti pwe Kot a ewisa ngeniir ar repwe túmúnú an we mwichefel, nge ar féri ena esap fán iten pwisin feiéchúr. Ekkewe aramas mi lamalamtekia me mochen án ekkewe ekkóch repwe ingeitiir, ese wor leenier lón ewe mwichefel. Ló, ló, ló, chókkana mi ‘püsin kütta watten iteüöchur,’ repwe sópwongaw.—SalF. 11:2; 25:27.

22. Pwata ekkewe mwán mi ásimaw lón Efisus ra tongei Paul?

²² Paul a enletin tongei chienan kewe Chón Kraist ina minne iir ra pwal tongei. Lupwen a tori an epwele ló seniir, “ra fókkun kechiw meinisin, me ra turufaaló Paul me kisi fán tong.” (Féf. 20:37, 38) Ekkewe Chón Kraist ra enletin aúcheani me tongei chókkewe mi ussun Paul le pennúkúóló ar fansoun, ar péchékkúl, me wéúúr fán ásengesin ar repwe angang ngeni chiener kewe chón lúkú. Mwirin ach káé ussun án Paul leenien áppirú mi fókkun múrinné, a ffat pwe a kapas enlet atun a erá: “Esap tipisi málóón emén aramas.”—Féf. 20:26.