1-3. (a) Pwata ewe aposel Paul a fókkun mángaw me lón Aten? (b) Met sia tongeni káé seni Paul?

 PAUL a fókkun mángaw. A nóm lón Kriis lón ewe kinikin Aten, eú telinimw ikewe ekkewe souáák ra asukul ie, áwewe chék ren Socrates, Plato, me Aristotle. Ekkewe aramas lón Aten ra mmen achocho lón lamalam. Ra fel ngeni chómmóng kot, ina popun Paul a kúnékún uluulun ekis meinisin ia a feiló ie. A kúnékún me lón ekkewe imwenfel, leenien emwicheich, me wóón ekkewe al. Paul a silei met ekiekin Jiowa, ewe Kot mi enlet, ussun fel ngeni uluulun. (Eks. 20:4, 5) Ena aposel mi túppwél a pwal ussun Jiowa le oputa uluulun!

² Paul a fókkun máirú ren met a kúna atun a tolong lón ewe leenien amémé. Chómmóng uluulun mi ánnioput, uluulun ewe kot Ermes, ra nóm lón ewe pwokuku mi sape ngeni notouááfeng kkan ngeni ewe asamalapen tolong. A chómmóng ekkewe leenien fel lón ena leenien amémé. Ifa ussun ena aposel mi túppwél epwe afalafal lón ena esin leeni mi uren uluulun? Epwe nemeni meefian me kúna och mettóch iir me ekkena aramas ra tipeeú wóón pwe epwe tongeni fós ngeniir ussun? Epwe sópwéch le álisi ekkóch ar repwe kútta ewe Kot mi enlet me kúna i?

³ Minne Paul a apasa ngeni ekkewe mwán lón Aten mi fiti sukul, a mak lón Féffér 17:22-31. Paul a fókkun angéch le fós, a túmúnú minne epwe apasa, me a pwáári mirit. Sia tongeni káé chómmóng mettóch seni Paul ren ifa ussun sipwe pwóróus wóón met kich me ekkewe aramas sia tipeeú wóón me álisiir ar repwe ekieki met ra rong.

4, 5. Ia Paul a afalafal ie me lón Aten, me met sókkun aramas ra nóm ikena ie?

⁴ Paul a ló ngeni Aten lón an we oruuen sái lón an angangen misineri, ina epwe lón ewe ier 50 mwirin Kraist. a Atun Paul a witiwiti Sailas me  Timoty ar repwe waroto seni Perea, a “poputá le asukula ekkewe chón Jus” me lón ewe sinakok, ussun met a kan féfféri. A pwal afalafal “lón ewe leenien amémé,” ikewe a tongeni fós ngeni ekkewe aramas esap iir chón Jus mi nóm Aten. (Féf. 17:17) Ena leenien amémé lón Aten a fókkun watte me a kkan ngeni ewe leeni mi panapanetá itan Akropolis. Ena leenien amémé, esap chék eú leeni aramas ra kan kamé me amémé ie, nge pwal ina eú leenien emwicheich mi fókkun aúchea lón ena telinimw. Me ren eú puk, ina ewe iolap lón ena telinimw ikewe ekkewe businessmen, chón politics, souáák, me ekkewe soumak ra kan chufengen ie. Ekkewe chón Aten ra kan sani le chufengen ikena ie pwe repwe pwóppwóróus wóón met ekkewe mi aúchea.

⁵ Esap mecheres ngeni Paul an epwe álisi ekkewe aramas lón ewe leenien amémé ar repwe etiwa met epwe eáni afalafal. Me lein ekkewe chón aúseling ngeni, a wor ekkewe Epikurean me Stoik, iir aramas mi tipáchem mi fókkun sókkóló minne ra eáni lúkú. b Ekkewe Epikurean ra lúkú pwe manaw a chék pwisin fisitá. Iei met ra lúkú: “Ese lamot óm kopwe niwokkusiti Kot; Ese wor metek ren emén mi máló; Ka tongeni emén mi múrinné; Ka tongeni likiitú ngeni minne mi ngaw.” Ekkewe Stoik ra lúkú pwe a lamot án aramas repwe kútta tipáchem me wewe nge rese lúkú pwe Kot i wesewesen Emén. Ekkewe Epikurean me Stoik rese lúkú ewe manawsefál néún Kraist kewe chón káé ra afalafala ussun. A ffat pwe án ekkena ruu mwichen aramas lúkú, a fókkun sókkóló seni ewe enlet ekkewe Chón Kraist ra lúkú, ewe Paul a afalafala ussun.

6, 7. Met ekkewe souáák chón Krik ra ekieki ussun án Paul afalafal, me met ekkóch aramas lón ei fansoun ra ekieki ussun ach afalafal?

⁶ Met ekkewe souáák chón Krik ra ekieki ussun án Paul afalafal? Ekkóch ra eita ngeni Paul emén mi “sou fós,” eú kapas lón Krik mi pwal wewe ngeni “chón ioi pwikil.” (Féf. 17:18) Iei alon emén soukáé ussun ena kapasen Krik: “Ena kapas a wesewesen weneiti emén kúkkúnún machchang mi ioi fetál féún pwikil, nge mwirin a weneiti ekkewe aramas mi ioi fetál lusun mwéngé me pwal ekkóch mettóch lón ekkewe leenien amémé. Ló, ló, ló, aramas ra pwal néúnéú ena kapas fán iten emén mi kan ioni sókkopaten pwóróus, ákkáeúin fán iten emén ese weweéchútiir.” Ina minne, ekkewe souáák ra apasa pwe Paul mi tiparoch me a chék apasa met a rong seni ekkewe ekkóch. Iwe nge, ussun met sia fen kúna pwe Paul ese pwal ekieki ar kapasen ákkápii.

⁷ A pwal ina ussun lón ach ei fansoun. Kich Chón Pwáraatá Jiowa sia kan kúna ákkápii me aramas ra mesáánikich pokiten sia lúkú ewe Paipel. Áwewe chék, ekkóch sense ra apasa pwe mi pwúng ewe afalafal ussun evolution me ra péchéúló le erá pwe iká en mi tipáchem kopwe  lúkú ena afalafal. Ra ekieki pwe iká kese lúkú ena afalafal, iwe en mi tiparoch. Ekkena esin aramas ra mochen án ekkewe ekkóch repwe ekieki pwe kich mi tiparoch pokiten sia asukula met Paipel a apasa me áiti ngeniir pisekin pwáraatá pwe mi wor emén Chón Féraatá mi féri mettóch meinisin. Nge kich sise pwal ekieki ekkena. Sia fen fós fán lúkúlúk atun sia penaatá ach lúkú pwe ewe Chón Féraatá mi tipáchem, Jiowa Kot, a féraatá manaw wóón fénúfan.—Pwár. 4:11.

8. (a) Met meefien ekkóch chókkewe mi rong án Paul we afalafal? (b) Epwe met weween ar ra uwealó Paul ngeni ewe Ariapakus? (Ppii ewe footnote.)

⁸ Ekkóch ekkewe aramas lón ewe leenien amémé mi aúseling ngeni án Paul afalafal, a sókkóló ar ekiek. Iei met ra erá: “Ussun i néún ekkewe koten ekis chón aronga.” (Féf. 17:18) Iká Paul a asukula ngeni ekkewe chón Aten ussun ekkóch mineféén kot, iwe epwele tori osukosuk. Fite ier mwen ena, aramas ra tipimwáál ngeni ewe souáák itan Socrates pwe a féri pwal ena esin mettóch. Iwe pokiten ena me pwal ekkóch popun, a kúna kapwúng me a pwúngúló an epwe niniiló. Ina popun, esap eú minen ámáirú ar ra uwealó Paul ngeni ewe Ariapakus me ereni an epwe áweweei met ewe a eáni asukul mi sókkóló me ren ekkewe chón Aten. c Ifa ussun Paul epwe afalafal ngeni ekkewe aramas rese silei masouen ekkewe Taropwe mi Pin?

9-11. (a) Met Paul a akkomw fós ussun lón an we afalafal? (b) Ifa ussun sia tongeni áppirú Paul lón ach angangen afalafal?

⁹ Chemeni pwe Paul a fókkun mángaw ren ewe angangen fel ngeni kot chofona a kúna. Iwe nge, Paul ese wenewen ngeni ekkewe aramas me apwúngúúr lón ar fel ngeni uluulun, a fen chék akkamwéchú an mángaw. Paul a túmúnú met a apasa, a sótun álisiir ren an poputá le fós ussun ekkewe mettóch i me chókkana ra tongeni tipeeú wóón. A poputá le apasa: “Ámi re Aten, úa kúna pwe lón mettóch meinisin ussun oua kon niwokkusiti ekkewe kot lap seni ekkewe ekkóch.” (Féf. 17:22) Ussun itá Paul a apasa, ‘Úa kúna pwe oua fókkun achocho lón lamalam.’ Paul a mirit pwe a apúnger ren ar achocho lón lamalam. A silei pwe a wor ekkóch aramas mi tupuló ren afalafal chofona iir aramas mi múrinné mi mochen silei ewe enlet. Paul a silei pwe me akkomwan, féfférún a ussun emén ‘ese wor an sile,’ me “a ussun féfférún emén ese wor an lúkú Kot.”—1 Tim. 1:13.

 ¹⁰ Mwirin, Paul a apasa pwe a kúna och mettóch mi ánneta pwe ekkewe chón Aten ra fókkun achocho lón lamalam. A kúna eú róóng mi mak wóón, “Ngeni Emén Kot Áúse Sissilei.” Me ren eú puk, “ekkewe chón Krik me ekkewe ekkóch ra kan soun ffér róóng fán iten ‘ekkewe kot rese sissilei.’ Ra féri ena pún ra niwokkus iká e wor emén kot nge rese feffel ngeni, iwe ena kot epwe song rer.” Ena róóng a pwáári pwe ekkewe chón Aten ra lúkú pwe mi wor emén Kot rese silei ussun. Paul a áeá ei róóng le poputááni an pwóróus ussun ewe kapas allim a afalafala. A apasa: “Met oua kan fel ngeni nge ouse silei, iei úpwe esile ngenikemi.” (Féf. 17:23) Paul a túmúnú met a apasa, nge a manaman. I ese afalafala ussun emén mineféén kot ussun met ekkewe ekkóch ra tipimwáál ngeni. A áweweei ngeniir ussun ewe Kot rese sissilei, ina i ewe Kot mi enlet.

¹¹ Ifa ussun sia tongeni áppirú Paul lón ach angangen afalafal? Iká sipwe túmúnúéchú met ekkewe mi nóm wilioruch, eli sipwe kúna pwe ewe emén a achocho lón lamalam, eli ren an foffout och pisek, are eáni eling lúkún imwan och pisek are liosun lamalam. Sia tongeni apasa: ‘Úa kúna pwe en emén mi achocho lón lamalam. Úa fókkun mochen fós  ngeni emén mi achocho lón lamalam.’ Iká sipwe esilla met emén mi achocho lón lamalam a eáni lúkú, sia tongeni silei met sókkun pwóróus sipwe tipeeú wóón me pwóróusfengen wóón. Chemeni pwe sise mochen apwúngú ekkewe ekkóch alóngólóng wóón met ra eáni lúkú. Chómmóng lein chienach kewe Chón Kraist, me lóóm iir ra fókkun lúkú met ekkewe lamalam chofona ra asukula ngeniir.

12. Ifa ussun Paul a ekkesiwili napanapen an afalafal?

¹² Paul a tongeni sópweeló an afalafal ngeni ekkewe re Aten wóón och mettóch ra tipeeú wóón? Án Paul silei pwe ekkewe chón aúseling ngeni ra káé ekiekin ekkewe soutipáchem chón Krik nge rese silei masouen ekkewe Taropwe mi Pin, a álisi le siwili napanapen an afalafal. Áeúin, a fós ussun met ewe Paipel a eáni káit, nge ese aloni masouen ewe Paipel. Oruuan, a ámmeef ngeniir pwe a weweitiir, me i ussun chék iir, fán ekkóch a néúnéú ekkeei kapas “kich” me “sia.” Aúlúngátin, a aloni alon néún chón Krik kewe puk pwe epwe pwáári pwe ekkóch ekkewe mettóch a eáni asukul ra makketiw lón pwisin makkeier kewe. Iei sipwele etittina án Paul kewe kapas mi fókkun manaman. Ikkefa ekkewe pwóróus mi enlet Paul a afalafala ussun ewe Kot ekkewe chón Aten rese sissilei?

13. Met Paul a áweweei ussun poputáán unuselapen láng me fénúfan, me met a affata?

¹³ Kot a féri unuselapen láng me fénúfan. Paul a apasa: “Ewe Kot mi féri fénúfan me mettóch meinisin mi nóm lón, pokiten i Samolun láng me fénúfan, i esap nónnóm lón imwenfel férien péún aramas.” d (Féf. 17:24) Unuselapen láng me fénúfan, ese chék pwisin fisitá. Ewe Kot mi enlet, I ewe Chón Féraatá mettóch meinisin. (Kölf. 146:6) I ewe Samol mi Lapalap lón láng me fénúfan, me ese tongeni kuch lón ekkewe imwenfel férien péún aramas. I ese ussun Atena are ekkewe pwal ekkóch kot ar ling a lóngólóng wóón ekkewe imwenfel me ekkewe róóng. (1 King 8:27) Paul a affata pwe ewe Kot mi enlet a fókkun watte an manaman lap seni ekkewe uluulun férien aramas mi nóm lón ekkewe imwenfel férien aramas.—Ais. 40:18-26.

14. Ifa ussun Paul a pwáári pwe Kot ese osupwangen án aramas álillis?

¹⁴ Kot ese osupwangen án aramas álillis. Ekkewe aramas mi fel ngeni uluulun ra elinga néúr kewe uluulun ren ar afouta ngeniir úf mi ling, uweato rer liffang mi mémmóng, are uweato rer mwéngé me minen ún. Ra ekieki pwe ekkena uluulun ra osupwangen ekkena mettóch! Iwe  nge, ekkóch me lein ekkewe soutipáchem chón Krik mi aúseling ngeni án Paul afalafal eli ra lúkú pwe emén kot ese osupwangen och mettóch seni aramas. Iká ina met ra lúkú, iwe neman ra tipeeú ngeni án Paul apasa pwe ese “lamot ngeni [Kot] án aramas repwe angang fán itan pokiten ese wor och mettóch a osupwangan.” Ewer, ese fókkun wor och mettóch ewe Chón Féraatá a osupwangan seni aramas! A fen wisen fang ngeni aramas met ra osupwangan, a fang ngeniir “manaw, me ngasangas me mettóch meinisin,” kapachelong ewe akkar, púngún rán, me ewe pwúl mi ámáári irá. (Féf. 17:25; Ken. 2:7) Ina minne, Kot, ewe mi fang ngenikich mettóch meinisin, ese osupwangen ach álillis.

15. Ifa ussun Paul a affata ngeni ekkewe chón Aten pwe iir rese tekia seni ekkewe esap iir chón Krik, me ifa ewe lesen mi aúchea sia tongeni káé seni?

¹⁵ Kot a féri aramas. Ekkewe chón Aten ra lúkú pwe ra tekia seni ekkewe aramas esap iir chón Krik. Nge ach meefi aúcheach pokiten fénúach are einangach, a ú ngeni ewe Paipel. (Tut. 10:17) Paul a túmúnúéch me sipeéch le affata ei pwóróus mi enlet. Lupwen a apasa, “[Kot] a féri seni emén mwán iteiten einangen aramas,” ese mwáál minne a apasa a efisi án ekkewe chón aúseling ngeni repwe ekiek. (Féf. 17:26) Paul a fós ussun ewe pwóróus lón puken Keneses ussun Atam, ewe semelapen aramas meinisin. (Ken. 1:26-28) Pokiten aramas meinisin ra pop seni emén chék semelap, iwe ese wor eú fénú are einang a múrinné seni ekkewe ekkóch. Meinisin ekkewe chón aúseling ngeni Paul ra tongeni weweiti met weween alon na. Sia káé eú lesen mi aúchea seni an leenien áppirú. Inaamwo iká sia mochen túmúnúéchú met sipwe apasa me sia tipemecheres lón ach angangen afalafal, nge sise mochen ekkesiwili ewe enlet lón Paipel fán iten chék án ekkewe ekkóch repwe etiwa.

16. Met ewe Chón Féraatá a mochen aramas repwe féri?

¹⁶ Kot a mochen án aramas repwe ririéch ngeni. Inaamwo iká ekkewe souáák iir mi aúseling ngeni Paul ra fen pwóppwóróusfengen ren fite fite ier wóón ewe popun sia manaw, nge rese fókkun tongeni áweweéchú.  Iwe nge, Paul a pwáriéchú met Kot a mochen fán iten aramas, ina ar repwe “kútta Kot, iká repwe kúkkútta i, ra tongeni kúna i, pún ren enletin i ese towaw seni emén me emén leich.” (Féf. 17:27) Mi fókkun tufich án aramas repwe silei ewe Kot chón Aten rese sissilei. Ren enletin, ese towaw seni chókkewe mi enletin kúkkútta i me mochen káé ussun i. (Kölf. 145:18) Katol pwe Paul a néúnéú ei kapas “leich,” weween a apachaalong pwisin i lein chókkewe mi achocho le “kúkkútta” Kot.

17, 18. Pwata a lamot án aramas repwe mochen arap ngeni Kot, me met sia tongeni káé seni napanapen án Paul álisi aramas ar repwe mochen aúseling?

¹⁷ A lamot aramas repwe meefi ar mochen arap ngeni Kot. Paul a apasa pwe pokiten I, “sia manaw me mwékútúkút, me nónnóm.” Ekkóch soukáé ra apasa pwe Paul a fós ussun alon Epimenides, emén soumakken kúúkúún fós seni Krit mi manaw fite fite ier lóóm, me emén mi aúchea lón éérenien ewe lamalamen Aten. Paul a pwal fós ussun eú popun pwata a lamot án aramas repwe meefi ar mochen arap ngeni Kot, ren an apasa: “Ekkóch néúmi soumak ra apasa, ‘Pún kich pwal néún.’” (Féf. 17:28) A lamot án aramas repwe meefi ar ririéch ngeni Kot pokiten I Semelapen ewe áeménún mwán, ewe meinisin aramas ra feito seni. Ren án Paul epwe álisi ekkewe aramas le mochen aúseling, fán mirit a aloni makkeien ekkewe chón Krik eli ekkewe chón aúseling ra súféliti. e Ussun  chék Paul, eli fán ekkóch sipwe aloni alon ekkewe ekkóch puk, áwewe chék ekkewe encyclopedia, are pwal ekkóch puk aramas ra súféliti masouan. Áwewe chék, ach aloni alon eú puk aramas ra súféliti masouan, eli a tongeni álisi emén esap Chón Pwáraatá an epwe weweiti ia a pop seni ie ekkóch ekkewe ééreni lamalam chofona ra eáni.

¹⁸ Paul a fós ussun ekkewe pwóróus mi aúchea me enlet ussun Kot me a sipeéch le néúnéú ekkewe kapas mi fichiiti ekkewe chón aúseling. Met ewe aposel a mochen án ekkewe chón aúseling repwe féri ussun ewe pwóróus mi aúchea ra rong? A mwittir ereniir met mi lamot repwe féri.

19, 20. (a) Ifa ussun Paul a pwáári fán túmúnúéch pwe eú angangen tiparoch ewe fel ngeni uluulun? (b) Met a lamot án ekkewe chón aúseling ngeni Paul repwe féri?

¹⁹ Paul a mmólnetá le pesei ekkewe chón aúseling ngeni ar repwe mwékút. Ussun met a fen aloni seni makkeien ekkewe chón Krik, iei met a erá: “Iei minne, pokiten kich néún Kot, sisap ekieki pwe Kot mi ussun kolt are silifer are faw, ussun och mettóch aramas ra féri ren péúr me ren ekiekiir.” (Féf. 17:29) Iká Kot a féraatá aramas, iwe epwe ifa ussun án Kot epwe ussun chék ekkewe uluulun férien aramas? Paul a áiti ngeniir pwe eú angang mi tiparoch án aramas repwe fel ngeni ekkewe uluulun férien chék aramas. (Kölf. 115:4-8; Ais. 44:9-20) Ren án Paul apachaalong pwisin i ren an apasa “sisap,” iwe eli a ámecheresi án ekkewe chón aúseling ngeni repwe etiwa an kapasen éúréúr.

²⁰ Ewe aposel Paul a affataéchú ngeni ekkewe chón aúseling ngeni pwe a lamot ar repwe mwékút, a erá: “Me lóóm Kot a engiló lupwen aramas . . . [ra anchangei pwe Kot a tongeni pwapwa ren ekkewe aramas mi fel ngeni uluulun], nge iei a esilei ngeni meinisin aramas ekis meinisin pwe a lamot repwe áier.” (Féf. 17:30) Eli ekkóch lein chókkana ra máirú atun ra rong án Paul ereniir pwe mi lamot ar repwe áier. Nge án Paul kapas mi manaman a affata ngeniir pwe ra manaw pokiten Kot, ina minne Kot epwe apwúngúúr alóngólóng wóón ifa ussun ra áeá manawer. A lamot ar repwe kútta Kot, káé ewe enlet ussun i, me áeá unusen manawer lón ewe napanap Kot a tipeni. Weween, a lamot án ekkewe chón Aten repwe weweiti pwe fel ngeni kot chofona ina eú tipis me repwe úkútiw seni.

21, 22. Ifa án Paul we kapasen lemuchúlóón mi péchékkúl, me ifa weween ngenikich lón ei fansoun?

²¹ Paul a amuchaaló an afalafal ren ekkeei kapas mi péchékkúl: “[Kot] a filaatá eú rán an epwe apwúngú fénúfan fán pwúng, ren emén aramas i a seikaatá, me i a awora eú minen alúkúlúk ngeni aramas meinisin ren an amanawaatá i seni máló.” (Féf. 17:31) Iei ra silei pwe a fókkun arapoto ewe Ránin Kapwúng, ina minne a wor eú watteen popun  ar repwe kútta me kúna ewe Kot mi enlet. Paul ese apasa iten ewe Soukapwúng. Iwe nge, a kon ámáirú met Paul a apasa ussun ena Soukapwúng: I emén a manaw wóón fénúfan, a máló, me Kot a amanawasefáli seni máló!

²² Ena kapasen lemuchúlóón mi péchékkúl, a watte weween ngenikich lón ei fansoun. Sia silei pwe ewe Soukapwúng mi seikitá me ren Kot, ina i Jises Kraist ewe a manawsefál. (Jon 5:22) Sia pwal silei pwe ewe Ránin Kapwúng epwe engéréú ier ttaman me a fókkun arapoto. (Pwár. 20:4, 6) Sise niweiti ena Ránin Kapwúng pún sia silei pwe epwe atoto feiéch mi amwarar ngeni chókkewe mi pwáraatá ar túppwél. Ach ápilúkúlúk fán iten ewe manaw mi pwapwa lón mwachkkan, a núkúchar ren ewe manaman mi fókkun lapalap, ina án Jises Kraist we manawsefál!

23. Ifa meefien ekkewe aramas mi aúseling ngeni án Paul afalafal?

²³ A sókkopat meefien ekkewe aramas mi aúseling ngeni án Paul afalafal. “Ekkóch ra poputá le esiit” atun ra rong ussun ewe manawsefál. Ekkóch ra pwáári súfél nge rese filaatá ar repwe áier me wiliiti chón lúkú, ra apasa: “Áúpwe pwal aúselingoksefál ussun ei.” (Féf. 17:32) Iwe nge, mi wor ekkóch ra sani met a afalafala, iwe “ra fiti i me wiliiti chón lúkú. Ekkóch me leir Tionisius, i emén chón ewe mwichen soukapwúng lón ewe Ariapakus, me emén fefin itan Tamaris, me pwal ekkóch me lúkúúr.” (Féf. 17:34) Sia pwal kúna ena esin napanap lón ach angangen afalafal. Ekkóch aramas eli ra song ngenikich, nge ekkóch eli repwe súfélitikich nge rese pwal mwékút. Iwe nge, atun ekkóch ra etiwa pwóróusen ewe Mwú me wiliiti chón lúkú sia fókkun pwapwa.

24. Met sia tongeni káé seni án Paul we afalafal atun a nóm lón ewe Ariapakus?

²⁴ Atun sia ekilonei met Paul a eáni afalafal, sia tongeni káé chómmóng mettóch ren ifa ussun sipwe áweweei och pwóróus lón eú napanap aramas repwe mochen aúseling ngeni me alúkúlúkú ngeniir pwe a enlet met sia eáni afalafal. Pwal och, sia káé ussun lamoten ach sipwe mosonottam me túmúnúéch lón ach kapas ngeni ekkewe aramas mi letipwenechar mi lúkú áitien lamalam chofona. Sia pwal tongeni káé ei lesen mi aúchea: Sisap fókkun ekkesiwili ewe enlet lón Paipel fán iten chék án ekkewe ekkóch repwe etiwa. Iwe nge ren ach áppirú án Paul leenien áppirú, sia tongeni wiliiti emén chón afalafal mi lipwákéch lón ewe angangen afalafal. Pwal och, ekkewe chónemmwen ra tongeni angangéchúló lón ar asukul lón ewe mwichefel. Ina minne, sipwe mmólnefichitá le álisi ekkewe ekkóch ar “repwe kútta Kot,” me “ra tongeni kúna i.”—Féf. 17:27.