1-3. (a) Ifa ussun ewe ngún mi fel a emmweni Paul me chienan kewe? (b) Ikkefa ekkewe mettóch sipwe pwóróusfengen wóón?

 EÚ KÚMIIN fefin ra ló seni ewe telinimw Filipai lón Masetonia. Iwe, ra tori ewe kúkkún chénúpupu Gangites. Ussun met ra fen éérenaaló le féfféri, ra móttiw ppen ena chénúpupu me iótek ngeni ewe Koten Israel. Jiowa a nennengeniir.—2 Kron. 16:9; Kölf. 65:2.

² Nge pwal lón ena atun, eú kúmiin mwán a ló seni ewe telinimw Listra éérún Kalesia lap seni 500 mwail éétiwen Filipai. Fitu rán mwirin, ra tori efóch alelap mi asaruto férien chón Rom mi aleló ngeni ewe leeni chómmóng aramas ra nóm ie mi nóm notoun fénúen Eisia. Ikkeei iten ekkena mwán, Paul, Sailas, me Timoty. Iir ra sái wóón ena al pwe repwe ló ngeni Efisus me ekkewe pwal ekkóch telinimw pwe repwe afalafal ngeni ekkewe aramas mi lamot ngeniir ar repwe rong ussun Kraist. Nge me mwen ar repwe poputááni ar na sái, ewe ngún mi fel a eppetiir, inaamwo iká ewe Paipel ese pwal affata. Ewe ngún mi fel ese mut ngeniir ar repwe ló afalafal lón Eisia. Pwata? Fán emmwenien án Kot we ngún mi fel, Jises a emmwenaaló Paul me chienan kewe ngeni Eisia Minor, ngeni ewe Setin Aegean, me tori ewe kúkkún chénúpupu itan Gangites.

³ Sia tongeni káé ekkóch lesen mi aúchea lupwen sipwe ekieki ifa ussun Jises a emmweni Paul me chienan kewe le feiló ngeni Masetonia. Ina minne, sipwe enniwili ekkóch mettóch mi fis atun án Paul oruuen sái lón an angangen misineri, ewe mi poputá ina epwe lón ewe ier 49 mwirin Kraist.

4, 5. (a) Met a fis ngeni Paul me chienan kewe arapakkan Pitinia? (b) Ifa ewe kefil ekkewe chón káé ra eáni, nge met mwirilóón?

⁴ Pokiten ese mumu ngeni Paul me chienan kewe ar repwe afalafal lón Eisia, iwe ra feiló ngeni efeng, lón ekkewe telinimwen Pitinia pwe repwe afalafal. Ren ar repwe tori ekkena telinimw, eli ra fetál wóón  ekkewe al mi kitiféúféú lefilen Frikia me Kalesia, ikewe ese kon chómmóng aramas ra nónnóm ie. Iwe nge, atun ra akkarap ngeni Pitinia, Jises a pwal áeásefál ewe ngún mi fel le eppetiir. (Féf. 16:6, 7) Ese mwáál, ekkena mwán ra osukosuk ren ena. Ra silei met repwe eáni afalafal me ifa ussun repwe afalafal, nge rese silei ia repwe afalafal ie. Ra sótun sái ngeni Eisia, nge ese mumu ngeniir ar repwe afalafal ikena ie. Ra sótun feiló ngeni Pitinia, nge ese pwal mumu ngeniir ar repwe afalafal ikena ie. Iwe nge, Paul a tipeppós le sáifetál tori an kúna eú leeni ia epwe afalafal ie. Iwe, ekkena mwán ra féri eú kefil ussun itá ese éch. Ra kun ngeni notou me fetál úkúúkún 350 mwail, ra pássini ekkewe telinimw tori ar tikeri ewe oroorun Troas, me seni ikena ra tongeni sái ngeni Masetonia. (Féf. 16:8) A iei aúlúngátin án Paul sótun feiló ngeni eú leeni an epwe afalafal ie. Iwe lón ei atun, Jises a mut ngeni an epwe afalafal lón ena leeni.

⁵ Luk, ewe mi fiti Paul me chienan kewe le ló Troas, a apasa: “Eú lángipwi a pwá ngeni Paul lepwin—emén re Masetonia a úkkúútá ikena me pesei, a apasa: ‘Kopwe feito lón Masetonia me álisikem.’ Atun chék a kúna ewe lángipwi, ám áúa sótun feiló Masetonia pún áúa ekieki pwe Kot a kérikem ám áúpwe esile ngeniir ewe kapas allim.” a (Féf. 16:9, 10) Iwe iei, Paul a silei ia epwe afalafal ie. A ifa me pwapwaan Paul ren an ese fangetá lón an kúkkútta chókkewe epwe afalafal ngeniir lón ekkewe pwal ekkóch leeni! Mwittir chék ekkena fémén mwán ra sái ngeni Masetonia.

6, 7. (a) Menni lesen sia tongeni káé seni met a fis atun án Paul sái? (b) Pwata pwóróusen Paul a apéchékkúlakich?

⁶ Menni lesen sia tongeni káé seni ena pwóróus? Ekieki ei: Paul a poputááni an sái ngeni Eisia me án Kot we manaman a eppeti an epwe ló afalafal ikena ie. A pwal sótun feiló ngeni Pitinia me Jises ese pwal mut ngeni an epwe feiló ikena ie. Iwe, atun Paul a wareiti Troas, Jises a emmweni an epwe ló ngeni Masetonia. Jises, ewe Mékúren mwichefel, neman epwe pwal emmwenikich lón ena esin napanap lón ei fansoun. (Kol. 1:18) Áwewe chék, neman sia kan ekieki ren och fansoun iká sipwe fiti ewe angangen pioneer, are mwékút ngeni eú leeni mi osupwangen chón afalafal ie. Iwe nge, eli mwirin chék ach féri och mettóch pwe sipwe tikeri met sia achocho ngeni, iwe Jises epwe áeá án Kot we ngún mi fel le emmwenikich. Pwata? Ekieki ei kapas áwewe: Emén chón únteng a tongeni eriki waan we tarakú ngeni peliefefin are peliemwán iká pwe ewe tarakú mi mwékút. Pwal ina chék ussun ren Jises, i epwe pwal álisikich le alapaaló ach angangen afalafal iká sia achocho.

⁷ Iwe nge, met sipwe féri iká ach achocho ese mwittir uwaéch? Itá sipwe fangetá, ekieki pwe án Kot we ngún mi fel ese emmwenikich?  Aapw. Chemeni pwe ese pwal mecheres ngeni Paul an epwe tikeri met ewe a achocho ngeni. Iwe nge, i ese fangetá le kúkkútta ewe leeni epwe afalafal ie tori an a kúna. Sia tongeni lúkúlúk pwe iká sipwe kúkkútta “eú watteen asam mi emmwen ngeni chómmóng angang,” Jiowa epwe efeiéchú ach achocho.—1 Kor. 16:9.

8. (a) Áweweei napanapen ewe telinimw Filipai. (b) Ifa ewe mettóch mi apwapwa a fis pokiten án Paul afalafal lón “eú leenien iótek”?

⁸ Mwirin án Paul me chienan kewe wareiti Masetonia, ra sái ngeni Filipai, eú telinimw ikewe aramasen lón ra lamalamtekia le erá pwe iir chón wiliposun Rom. Chómmóng mettóch lón Filipai ra taitap ngeni ekkewe mettóch lón Rom me chómmóng soufiu mi retire seni ar angangen soufiu ra nónnóm ikena ie. Lúkún tittin ewe telinimw, únúkkún eú chénúpupu, ekkewe misineri ra kúna eú leeni ikena ra ekieki pwe epwe wor “eú leenien iótek.” b Lón ewe ránin Sapat, ra feitiw lón ena leeni me kúna chómmóng fefin mi chufengen pwe repwe fel ngeni Kot. Ekkena chón káé ra móttiw me fós ngeniir. Jiowa a ‘suuki letipen’ emén fefin itan Litia pwe epwe aúselingéch. A fókkun chúng letipen Litia ren met a rong seni ekkena misineri, ina minne i me chón leimwan ra papatais. Mwirin, neminna a péchéú le ereni Paul me chienan kewe ar repwe feiló me nónnóm lón imwan we. c—Féf. 16:13-15.

9. Ifa ussun chómmóng lón ei fansoun ra áppirú Paul, me ifa ussun Jiowa a efeiéchúúr?

 ⁹ Anchangei úkúúkún pwapwaan Paul me chienan kewe atun Litia a papatais! Ese mwáál, Paul a fókkun pwapwa ren an etiwa ewe etiwetiw an epwe feiló Masetonia, me pwal ren án Jiowa filaatá an epwe néúnéú i me chienan kewe le pélúweni án ekkewe fefin mi tipetekison iótek! Lón ei fansoun, chómmóng pwiich kewe iir kúkkún me watte, lipich me pwúpwúlú ra pwal mwékút ngeni ekkewe leeni mi osupwangen chón afalafala pwóróusen ewe Mwú. Ewer, a pwal wor ekkóch weires mi toriir, nge ra likiitú ngeni pokiten ra fókkun pwapwa le kúkkútta ekkewe aramas ussun chék Litia, iir kewe mi etiwa me apwénúetá ewe enlet lón Paipel. En mi tongeni féri ekkesiwil mi atufichi óm kopwe feiló ngeni eú leeni mi osupwangen chón afalafal ie? Jiowa epwe efeiéchuk iká kopwe féri ena. Áwewe chék, iei pwóróusen emén Chón Kraist mwán itan Aaron, 20 som ierin, mi mwékút ngeni fénúen lón Central America. A aloni alon chómmóng mi pwal álillis lón chómmóng fénú, a erá: “Ái álillis lón ekkóch fénú, a álisiei ái úpwe feffeitá lón pekin ngún me ririéch ngeni Jiowa. Úa pwapwaiti ewe angangen afalafal ikeei ie. Úa kákkáé ngeni wanimén chón káé!”

10. Met ekkewe timon ra féri pwe ekkewe aramas repwe ú ngeni Paul me chienan kewe?

¹⁰ Ese mwáál Setan a fókkun song pokiten a chéúló ewe kapas allim lón ewe leeni a watte án i me néún kewe timon nemenem lón. Ina minne, esap eú minen ámáirú án ekkewe timon féri án ekkewe aramas repwe ú ngeni Paul me chienan kewe. Atun ra kan feiló ngeni ewe leenien iótek, emén fépwúl mi wor ngún mi limengaw wóón mi awora ngeni néún kewe masta néúr moni pokiten an osuni, a kan tattapweló mwirin chón Paul me púppúchér le apasa: “Ekkeei mwán iir chón angang ngeni ewe Kot mi Unusen Tekia Seni Meinisin me ra esilei ngenikemi ewe alen manaw.” Ese mwáál, ewe timon a efisi án ena fépwúl epwe apasawu ekkena kapas pwe ekkewe aramas repwe ekieki pwe met a kan eáni oesini me met Paul a eáni asukul ra feito seni Kot. Iwe, ekkewe aramas rese nefótófót wóón met chókkewe mi enletin tapweló mwirin Kraist ra eáni káit. Nge Paul a afalafalalóói ewe fépwúl ren an asúoló ewe timon seni.—Féf. 16:16-18.

11. Mwirin án Paul me Sailas atowu ewe timon seni ewe fépwúl, met a fis ngeniir?

¹¹ Lupwen néún neminna kewe masta ra silei pwe a kaúló ar alen moni tolong, ra fókkun song. Ra átekinaló Paul me Sailas lón ewe leenien amémé, ikewe ekkewe sounemenemen ewe telinimw ra nóm ie,  ikewe ekkewe néúwisin mwú mi tupuni Rom ra féri ar kapwúng ie. Néún ena fépwúl kana masta, ra silei pwe ekkewe soukapwúng ra oputa ekkewe chón Jus me iir mi lamalamtekia pokiten iir chón Rom. Ina minne, ra ereni ekkewe soukapwúng pwe Paul me Sailas ra efisi osukosuk ren ar asukula ekkewe ééreni ekkewe chón Rom rese tipeeú ngeni. Minne ra apasa a mwittir etipetipa ekkewe aramas. “Ekkewe aramas [lón ewe leenien amémé] ra ú ngeniir [Paul me Sailas],” me ekkewe sounemenemen ewe telinimw ra allúkú ar repwe awater “ngeni wok.” Mwirin ena, ra átekinaló Paul me Sailas ngeni ewe imwen kalapus. Ewe chón mmasen imwen kalapus a oturaalong lón ewe imwen kalapus ekkena mwán mi feiengaw me ékkúkaaló pecher kewe lefilen ekkewe sópwun irá mi chou. (Féf. 16:19-24) Lupwen ewe chón mmas a éppúngaaló ewe asam, a fókkun kiroch lón ewe ruumw me a weires án Paul me Sailas repwe kúnafengeniir. Iwe nge, Jiowa a kakkatol met a fis ngeniir.—Kölf. 139:12.

12. (a) Met meefien néún Kraist kewe chón káé ussun ar kúna riáfféúmwáál, me pwata? (b) Met sókkun angangen eriáfféú Setan me ekkewe aramas mi nóm fán an etipetip ra áeá lón ei fansoun?

¹² Fitu ier mwen ena, iei met Jises a ereni néún kewe chón káé: “Repwe . . . eriáfféwúkemi.” (Jon 15:20) Iwe, atun Paul me chienan kewe ra ló ngeni Masetonia, ra tepereni pwe aramas repwe ú ngeniir. Iwe atun ra nóm lón riáfféúmwáál, ra meefi pwe ina esissillen án Setan lingeringer nge esap esissillen án Jiowa ese pwapwa rer. Lón ei fansoun, ekkewe aramas mi nóm fán etipetipaen Setan ra ussun chék ekkewe aramas mi ú ngeni Paul. Ekkewe chón ú ngenikich ra pwenikich ren ar apwóróusa pwóróus ese pwúng fán itach lón leenien sukul me leenien angang. Iwe ena a efisi án ekkewe ekkóch repwe ú ngenikich. Lón ekkóch fénú, ekkewe néúwisin lamalam ra tipimwáál ngenikich ren ar apasa pwe sia asukula ekkewe ééreni ekkewe aramas rese sani. Lón ekkóch leeni, ekkóch lein chienach kewe ra kúna kawet me kóturulong lón kalapus. Iwe nge, Jiowa a kakkatol met a fis ngenikich.—1 Pit. 3:12.   

13. Met a efisi án ewe chón mmas epwe apasa: “Met a lamot úpwe féri pwe úpwe kúna manaw?”

¹³ A lamot ngeni Paul me Sailas och fansoun pwe repwe chikar seni feiengawer kewe lón ena ránin. Iwe nge, ina epwe lukenipwin, ra fen meefi péchékkúl seni kaweter kewe, me “ra iótek me mwareiti Kot lón kél.” Mwittir chék, eú watteen chechchechin fénú a áchchecha ewe imwen kalapus! Lupwen ewe chón mmas a neló, a kúna pwe ekkewe asam ra suuk, me a niwokkus pwe tipan nge ekkewe chón kalapus ra sú. A silei pwe a tongeni kúna kapwúng pokiten ena, iwe  a “úttawu néún we ketilas me itá epwele pwisin nieló.” Nge Paul a apasa: “Kosap pwisin efeiengawók, pún ám meinisin mi nóm ikeei!” Ewe chón mmas mi lólilen a apasa: “Met a lamot úpwe féri pwe úpwe kúna manaw?” Paul me Sailas rese tongeni amanawa i, Jises chék a tongeni. Ina minne ra ereni: “Kopwe lúkú ewe Samol Jises, iwe, kopwe kúna manaw.”—Féf. 16:25-31.

14. (a) Met Paul me Sailas ra féri pwe repwe álisi ewe chón mmas? (b) Ifa ussun Jiowa a efeiéchú Paul me Sailas ren ar likiitú fán pwapwa?

¹⁴ Itá ena chón mmas a wesewesen letipwenechar? Paul a lúkúlúk pwe átena a letipwenechar. Ena chón mmas i emén chón lúkún Israel, ese silei masouen án Kot we Kapas. Me mwen an epwe tongeni wiliiti emén Chón Kraist, a lamot an epwe káé me etiwa ekkewe pwóróus mi enlet lón án Kot we Kapas. Ina popun, Paul me Sailas ra awora fansoun le áiti ngeni “án Jiowa we kapas.” Pokiten ekkena mwán ra fókkun nefótófót wóón ar asukula masouen án Kot we Kapas, iwe ese mwáál a ménúk seniir metekin inisiir seni ar we kawet. Nge ewe chón mmas a kúna watteen kinásen lesékúrúr kewe me a limetiir. Iwe, i me chón leimwan we “ra mwittir papataiseló.” Paul me Sailas ra fókkun pwapwa pokiten ra likiitú fán ekkewe riáfféúmwáál mi toriir.—Féf. 16:32-34.

15. (a) Ifa ussun chómmóng Chón Pwáraatá lón ei fansoun ra áppirú Paul me Sailas? (b) Pwata mi lamot ach sipwe sópweeló le chuchchuuri chókkewe mi nóm lón ach leenien afalafal?

¹⁵ Chómmóng Chón Pwáraatá lón ei fansoun ra pwal ussun Paul me Sailas, ra afalafala ewe kapas allim atun ra nóm lón kalapus pokiten minne ra eáni lúkú me Jiowa a efeiéchúúr. Áwewe chék, lón eú fénú mi pinepin ach angang ie, a wor eú atun arapakkan esopwun Chón Pwáraatá mi nónnóm ikena ra káé ewe enlet ussun Jiowa atun ra nóm lón kalapus! (Ais. 54:17) Pwal chemeni pwe ewe chón mmas a kútta álillis mwirin chék an fis ewe chechchechin fénú. Pwal ina ussun ren ekkóch lón ei fansoun, rese mochen aúseling ngeni pwóróusen ewe Mwú nge neman repwe mochen aúseling ngeni mwirin fisin och mettóch mi aosukosuka manawer. Ren ach sópweeló le chuchchuuri chókkewe mi nóm lón ach kewe leenien afalafal, sia alúkúlúkú ngeniir pwe sia mmólnetá le asukuler ineet chék ra mmólnetá le etiwa ach álillis.

16. Met a fis lón ewe rán mwirin án Paul me Sailas kawet?

¹⁶ Lesossorun ewe rán mwirin án Paul me Sailas kawet, ekkewe sounemenemen ewe telinimw ra erá pwe Paul me Sailas repwe musowu. Nge Paul a erá: “Ra awatakem lein aramas, ese wor kapwúngúm inaamwo  iká ám chón Rom, me ra oturukemilong lón imwen kalapus. Iwe iei repwele omusakemiwu lemonomon? Aapw, ese fókkun éch! Repwe pwisin feito me emmwenikemiwu.” Lupwen ekkewe sounemenemen ena telinimw ra silei pwe ekkena rúúemén mwán iir chón wiliposun Rom, iwe “ra fókkun niwokkus” pún ra ésúfélúngawa án ekkena mwán pwúúng. d Iei a sossor ewe osukosuk. Ekkewe sounemenemen ena telinimw mi awata Paul me Sailas mwen mesen aramas, iei repwele omusomus mwen mesen aramas. Ra tingorei Paul me Sailas ar repwe ló seni Filipai. Iir ra tipeeú ngeni, nge ra akkomw ló apéchékkúla letipen meinisin ekkewe mineféén chón káé. Iwe mwirin, ra ló seni ena telinimw.

17. Ifa ewe lesen mi aúchea eli ekkewe chón káé ra silei seni án Paul me Sailas likiitú?

¹⁷ Iká Paul me Sailas ra apasa me mwan pwe iir chón wiliposun Rom, ese mwáál resap awater. (Féf. 22:25, 26) Nge iká ra féri ena, iwe neman ekkewe chón káé lón Filipai repwe ekieki pwe ra áeá ar pwúúng le eppeti seniir ar kúna riáfféú fán iten ewe kapas allim. Ifa ussun ena a tongeni kkúú án ekkewe chón káé lúkú, iir kewe esap iir chón wiliposun Rom? Ewe allúkún Rom ese tongeni túmúnúúr seni ar kúna kawet. Ina minne, ren án Paul me Sailas likiitú fán kawet, ra isettiw leenien áppirú fán iten ekkewe minefé chón káé. Ra pwáári pwe ekkewe chón tapweló mwirin Kraist ra tongeni likiitú atun a toriir riáfféúmwáál. Pwal och, pokiten Paul me Sailas ra apasa mwirin pwe iir chón wiliposun Rom, iwe fán osenimu ekkewe sounemenem ewe telinimw ra apasa mwen mesen aramas pwe ra atai ewe allúk. Iwe, lón ekkewe rán epwe feito eli ekkewe sounemenemen ewe telinimw repwele kon túmúnú ar repwe álleasochisi ewe allúk me túmúnú ekkewe Chón Kraist ar resap kúna ena esin kapwúng mi ngaw.

18. (a) Ifa ussun ekkewe chónemmwen lón ewe mwichefelin Chón Kraist ikenái ra áppirú Paul? (b) Ifa ussun sia ‘penaatá ewe kapas allim me fós ngeni ekkewe néúwisin mwú pwe epwe wor ach pwúúng le afalafala ewe kapas allim’ lón ach ei fansoun?

¹⁸ Lón ei fansoun, ekkewe chónemmwen lón ewe mwichefelin Chón Kraist ra pwal awora emmwen ren ar isettiw leenien áppirú. Minne ra ekieki pwe chiener kewe chón lúkú repwe féri, iir ra pwal féri. Sipwe ussun chék Paul, sipwe ekiekifichi ifa ussun me ineet sipwe áeá ach pwúúng lón pwúngún allúk pwe sipwe kúna túmún. Iká mi lamot, sipwe uwei ach case ngeni imwen kapwúng lón sópwuch, fénúach, me pwal mwo nge ngeni ekkewe pwal ekkóch imwen kapwúng pwe sipwe  kúna túmún lón ach angangen fel ngeni Jiowa seni pekin allúk. Lupwen sia féri ena, sise sótun siwili án ewe mwú allúk, nge sia fen ‘penaatá ewe kapas allim me . . . fós ngeni ekkewe néúwisin mwú pwe epwe wor ach pwúúng le afalafala ewe kapas allim,’ ussun met Paul a áweweei atun a mak ngeni ewe mwichefel lón Filipai ina epwe engol ier mwirin an kalapus ikena ie. (Fil. 1:7) Ese lifilifil met pwúngúlóón ewe kapwúng, sipwe áppirú Paul me chienan kewe, sipwe tipeppós le sópweeló ach esilefeili “ewe kapas allim” ikewe án Kot we ngún mi fel epwe emmwenikich ngeni ie.—Féf. 16:10.