1-3. Pwata ewe aposel Paul a ló Korint, me ikkefa ekkóch mettóch neman a ekieki ussun?

 ARAP ngeni lemuchúlóón ewe ier 50 mwirin Kraist, ewe aposel Paul a nóm Korint, eú telinimw mi wéú, ikewe ia aramas ra kan etto ngeni pwe repwe kamé me amémé ie me a chómmóng chón Krik, chón Rom, me chón Jus ra nónnóm ie. a Paul ese etto Korint fán iten an epwe kamé are amémé mettóch are kút an angangen moni. A etto ikena ie fán iten eú popun mi fókkun aúchea, ina an epwe afalafala ussun án Kot we Mwú. Iwe nge, Paul a osupwangen eú leeni epwe nónnóm ie, me ese mochen áweiresi ekkewe ekkóch ren an tingorer repwe álisi lón pekin moni. I ese mochen ámmeef ngeniir pwe pokiten i chón afalafala án Kot Kapas, iwe wiser ar repwe uwou ngeni moni. Met epwele féri?

² Paul a sile fférún tento. Ena angangen ffér tento ese mecheres, nge a tipemecheres le ffér pwe epwe atufichi pwisin manawan. Epwe kúnékún an angangen moni me lón ena telinimw? Epwe kúna eú imw ia epwe nónnóm ie? Ikáámwo Paul a ekieki ekkena mettóch, nge ese ménúki an we angang mi aúchea, ina ewe angangen afalafal.

³ Ussun Paul a nóm Korint ren och fansoun, me an angangen afalafal ikena ie a fókkun sópwéch. Met sia tongeni káé seni minne Paul a féri lón Korint mi tongeni álisikich le unusen  pwáraatá pwóróusen án Kot we Mwú ikewe sia nónnóm ie?

4, 5. (a) Ia Paul a nóm ie atun a nóm Korint, me met sókkun angangen moni a eáni? (b) Ifa ussun Paul a káé fférún tento?

⁴ Ekiseló mwirin án Paul wareiti Korint, a chuuri eú pean pwúpwúlú mi awasélaéch, emén re Jus itan Akwila me pwúlúwan we itan Prisila, are Priska. Ena pean pwúpwúlú ra mwékút ngeni Korint pokiten ewe sounemenem itan Klautius a allúkú ngeni “meinisin ekkewe chón Jus ar repwe towu seni Rom.” (Féf. 18:1, 2) Akwila me Prisila ra etiwa Paul an epwe nónnóm rer me epwe pwal angang rer. Iei met Paipel a apasa: “Pokiten iir ra eáni eú chék sókkun angang, angangen ffér tento, iwe, a nónnóm lón imwer me fitiir le angang.” (Féf. 18:3) Paul a nóm ren ena pean pwúpwúlú mi kirekiréch me awasélaéch atun a féri an angangen afalafal lón Korint. Atun an nóm rer, ese mwáál a makkeei ekkóch me lein ekkewe taropwe mwirin och fansoun ra pachelong lón ewe Paipel. b

⁵ Ikáámwo Paul a fen piin “angei káit seni Kamaliel,” nge pwal i emén chón ffér tento. Ifa ussun a fis ena? (Féf. 22:3) Ussun me ren ekkewe  chón Jus lemanawen ekkewe aposel, ese wor ássáwen án néúr kewe repwe káé angangen paw inaamwo iká néúr kana ra pwal fiti sukul. Paul i seni Tarsus lón Silisia. Ena leeni a iteféúló ren eú sókkun mangaak aramas ra kan áeá le ffér tento. Ese mwáál, Paul a káé fférún tento atun an alúwél. Ena angangen ffér tento, ese mecheres. Ren án emén epwe féri eú tento, a lamot epwe akkomw féri ewe mangaak fán iten tento are fichi me teii. Ina eú angang mi áweires pún ewe mangaak ra áeá, a fókkun kire maanún.

6, 7. (a) Met ekiekin Paul ussun ewe angangen ffér tento, me met a áiti ngenikich pwe Akwila me Prisila ra pwal eáni ena esin ekiek? (b) Ifa ussun ekkewe Chón Kraist lón ei fansoun ra áppirú Paul, Akwila, me Prisila?

⁶ Ewe angangen ffér tento esap ina met a kon aúchea me ren Paul. A chék féri ena angang pwe epwe tongeni atufichi manawan lón an angangen afalafala ewe kapas allim nge ese “angei liiwin.” (2 Kor. 11:7) Ifa úkúúkún án Akwila me Prisila aúcheani ar we angangen ffér tento? Pokiten iir Chón Kraist, iwe ese wor tipemwárámwár pwe ra pwal eáni án Paul ekiek ussun angangen moni. Ren enletin, atun Paul a ló seni Korint lón ewe ier 52 mwirin Kraist, Akwila me Prisila ra likitaaló ar we business me fiti le mwékút ngeni Efisus. Me ikena ie ra áeá imwer we le féri án ewe mwichefel kewe mwiich. (1 Kor. 16:19) Ekiseló mwirin, ra liwiniti Rom, mwirin ra pwal liwiniti Efisus. Ena pean pwúpwúlú mi tinikken, ra akkomwa angangen ewe Mwú me ra tipemecheres le atufichi osupwangen ekkewe ekkóch lap seni pwisin iir. Pokiten ena, iwe “meinisin ekkewe mwichefel lein ekkewe esap iir chón Jus” ra fókkun kilisou ngeniir.—Rom 16:3-5; 2 Tim. 4:19.

⁷ Chón Kraist lón ei fansoun, ra áppirú Paul, Akwila, me Prisila. Pwiich kewe mi tinikken, ra achocho le angangen tufichiir pwe rese mochen ‘áweiresi’ ekkewe ekkóch. (1 Tes. 2:9) Chómmóng pioneer ra isettiw leenien áppirú mi múrinné ren ar angang part-time are fitu maram pwe repwe mééni met ekkewe ra osupwangan. Nge ewe angangen pioneer, ina met a kon aúchea me rer. Chómmóng néún Jiowa kewe chón angang ra pwal ussun Akwila me Prisila le eleenia ekkewe chónemmwen mi wisen sáifetál. Meinisin chókkewe mi “éérenaaló le awasélaéchú aramas,” ra silei pwe ach féri ena a atoto ach péchékkúl me pwapwa.—Rom 12:13.   

8, 9. Met Paul a féri atun ekkewe chón Jus ra ú ngeni, me ia a ló afalafal ie mwirin?

⁸ Ekiekin Paul ussun an angangen ffér tento mi atufichi manawan lón an angangen afalafal, a pwápwááló atun Sailas me Timoty ra war seni Masetonia fán liffang. (2 Kor. 11:9) Pún mwirin chék ena, Paul a poputá le “áeá unusen an fansoun le afalafala ewe kapas.” (Féf. 18:5) Iwe nge, atun Paul a tinikken le afalafal, ekkewe chón Jus ra chék úkkú ngeni. Ra tunaaló ewe pwóróus pwe Kraist a tongeni selániir. Paul a mochen affata ngeni ekkewe chón Jus mi ú ngeni pwe esap tipisin met ra filaatá le féri. Ina minne, a wichikaaló úfan we me ereniir: “Iká oupwe máló, pwisin tipisimi. Ngang mi liméch. Seni iei úpwe feiló ngeni aramasen ekkewe ekkóch mwú.”—Féf. 18:6; Is. 3:18, 19.

⁹ Iwe, ia Paul epwele afalafal ia iei? Emén mwán itan Taitius Justus, ussun emén chón lúkún Israel mi fiti ewe lamalamen chón Jus, ewe imwan we a chék pach ngeni ewe sinakok, a eleenia Paul lón imwan na. Ina minne, Paul a kaúló le afalafal lón ewe sinakok me a sópweeló le afalafal lón imwen Justus na. (Féf. 18:7) Atun Paul a nóm Korint a kan nónnóm lón imwen Akwila me Prisila we, nge i a áeá imwen Justus we le féri an angangen afalafal.

10. Met a affata pwe Paul ese ekiekin an epwele chék afalafal ngeni “aramasen ekkewe ekkóch mwú”?

¹⁰ Án Paul erá pwe epwe feiló ngeni aramasen ekkewe ekkóch mwú, esap weween nge epwele kaúló le afalafal ngeni ekkewe chón Jus are ekkewe chón lúkún Israel mi fiti ewe lamalamen chón Jus mi mochen aúseling. Áwewe chék, “Krispus, ewe néúwisin ewe sinakok, a wiliiti chón lúkú lón ewe Samol fitifengen me unusen chón leimwan.” A ffat pwe a pwal wor ekkóch seni ena sinakok ra fiti Krispus, pún iei met Paipel a erá: “Pwal chómmóng me lein chón Korint mi rong ra poputá le lúkú me papatais.” (Féf. 18:8) Ina minne, imwen Taitius Justus we a wiliiti eú án ewe mineféén mwichefelin Chón Kraist chón Korint leenien mwichfengen. Iká Luk epwe makkeei ekkena mettóch lón tettelin atun ar fis, ussun met a kan féfféri lón staenin an mak, iwe weween pwe ekkena chón Jus are chón lúkún Israel mi fiti ewe lamalamen chón Jus ra wiliiti Chón Kraist mwirin án Paul we  wichikaaló úfan we. Ena a pwáári pwe Paul a tipemecheres le féri siwil me afalafal ngeni chókkewe mi mochen aúseling ngeni.

11. Ifa ussun Chón Pwáraatá Jiowa lón ei fansoun ra áppirú Paul atun ra afalafal ngeni chón ekkewe tipitipin lamalamen Chón Kraist?

¹¹ Lón ei fansoun, chómmóng aramas ra fiti ekkewe tipitipin lamalamen Chón Kraist. Ekkena lamalam ra etipetipa chókkana ren fite fite ier. Wóón unusen fénúfan, misinerin ekkena tipitipin  lamalamen Chón Kraist ra angang weires le achómmóngaaló chón fitiir. Ekkewe aramas mi erá pwe iir Chón Kraist, ra kan fitipachei éérenien ar we lamalam lap seni ar riri ngeni Kot. Pwal ina ussun ekkewe chón Jus mi nónnóm Korint lón fansoun ekkewe aposel. Nge ussun chék Paul, ewe mi álisi ekkewe chón Jus le weweiti ewe Paipel, sia pwal achocho le álisi aramas lón ei fansoun le weweiti met ra álleani me lón ewe Paipel. Pwal mwo nge atun aramas ra ú ngenikich are atun néúr kewe néúwisin lamalam ra eriáfféwúkich, sise fangetá le álisi aramas. Eli a wor me lein ekkewe aramas mi “tinikken fán iten Kot,” nge ese lóngólóng wóón “sile mi pwúng,” iir mi tipetekison le mochen silei ewe enlet ussun Kot. Iwe, a lamot sipwe kútta ekkena esin aramas.—Rom 10:2.

12. Met sókkun kapasen apéchékkúl Paul a kúna lón ewe lángipwi?

¹² Eli Paul a tipemwárámwár iká epwe sópweeló an angangen afalafal lón Korint. Nge a silei minne epwe féri mwirin án ewe Samol Jises a pwá ngeni lón eú lángipwi lepwin me ereni: “Kosap niwokkus, kopwe sópweeló le fós nge kosap fanafaneló, pún ngang úa etuk me ese wor emén aramas epwe awatók me kirikiringaw ngonuk, pún a chómmóng nei aramas lón ei telinimw.” (Féf. 18:9, 10) A ifa me apéchékkúlen ena lángipwi! Jises a pwisin alúkúlúkú ngeni Paul pwe i epwe túmúnú seni chón koputan kewe me a wor chómmóng aramas lón ena telinimw a mochen an epwe afalafal ngeniir. Met Paul a féri mwirin an silei ena? Paipel a apasa: “A nóm ikena ie úkúúkún eú ier wonu maram, a asukula án Kot we kapas leir.”—Féf. 18:11.

13. Eli met Paul a ekieki atun a kkan ngeni ewe leenien apwúng? Nge ifa ussun a silei pwe esap fis ngeni met a fis ngeni Stifen?

¹³ Mwirin án Paul nóm Korint úkúúkún eú ier, a fis och mettóch mi alapaaló an lúkúlúk pwe ewe Samol a álisi. “Ekkewe chón Jus ra tipeeúfengen le ú ngeni Paul, me uwealó ngeni ewe leenien apwúng,” ewe mi iteni beʹma. (Féf. 18:12) Ekkóch ra ekieki pwe ena leenien apwúng mi ekis nangetá seni pwúl, a ffér seni ewe faw itan marble mi pwech me araw me a wor eling mi rup wóón. Eli ena beʹma a nóm arapakkan lukanapen ewe leenien amémé lón Korint. Mwen mesen ena leenien apwúng, a  wor eú watteen leeni ikewe eú kúmiin aramas ra tongeni kochufengen ie. Ekkóch chón uruwo ra lúkú pwe ena leenien apwúng a chék kkan ngeni ewe sinakok, ina minne a fókkun kkan ngeni imwen Justus. Atun Paul a tori ewe beʹma, ese mwáál a chemeni ewe atun ra manei ngeni Stifen faw, ewe áeménún Chón Kraist a ninniiló pokiten an afalafal ussun Jises. Paul ewe mi iteni Saul me lóóm, a “tipeeú ngeni ninniilóón.” (Féf. 8:1) Iei manawen Paul a pwal nóm lón efeiengaw! Nge ese lamot án Paul epwe lólilen pún Jises a fen pwon ngeni pwe ese wor emén epwe efeiengawa.—Féf. 18:10.

14, 15. (a) Met ekkewe chón Jus ra tipimwáál ngeni Paul, me pwata Kallio a mwittir apasawu pwúngún an we case? (b) Met a fis ngeni Sostenes, me pwata ekkóch ra ekieki pwe i a wiliiti emén Chón Kraist?

¹⁴ Met a fis atun Paul a ló ngeni ewe leenien apwúng? Kallio i ewe soukapwúng. I ewe governor lón Akaia, pwiin Seneca watte, ewe souáák chón Rom. Ekkewe chón Jus ra tipimwáál ngeni Paul, ra erá: “Ei mwán a etipetipa aramas pwe repwe fel ngeni Kot lón napanap mi ú ngeni ewe allúk.” (Féf. 18:13) Ussun itá ekkena chón Jus ra apasa pwe Paul a ú ngeni ewe allúk ren an etipetipa ekkóch ekkewe chón Jus ar repwe wiliiti Chón Kraist. Iwe nge, Kallio a kúna pwe ese wor án Paul “féfférmwáál” me ese féri eú tipis mi “atai allúk.” (Féf. 18:14) Kallio ese mochen angolong lón án ekkewe chón Jus we osukosuk. Me mwen án Paul epwe pwal mwo nge kapasetá, Kallio a mwittir apasawu pwúngúlóón an we case. Iwe, ekkewe chón tipimwáál ngeni, ra fókkun song. Ra fen watá ar song wóón Sostenes, ewe eli a siwili Krispus lón wisan néúwisin ewe sinakok. Ra turufi Sostenes me “poputá le awata i me mwen ewe leenien apwúng.”—Féf. 18:17.

 ¹⁵ Pwata Kallio ese eppeti ekkewe aramas seni ar awata Sostenes? Ese mwáál, Kallio a ekieki pwe Sostenes i meilapen ewe mwichen aramas mi ú ngeni Paul, ina minne a fichiiti an epwe angei chappen an féffér. Ese lifilifil iká mi pwúng ena are ese pwúng, nge a fis och mettóch mi múrinné pokitan. Lón néún Paul we áeúin taropwe a makkeei fite ier mwirin ngeni ewe mwichefelin Korint, i a fós ussun emén Chón Kraist mwán itan Sostenes. (1 Kor. 1:1, 2) Epwe ina i Sostenes, ewe ra awata me lón Korint? Iká pwe i ewe, iwe ese mwáál minne a fis ngeni a álisi an epwe wiliiti emén Chón Kraist.

16. Ifa ussun alon Jises we, “kopwe sópweeló le fós nge kosap fanafaneló, pún ngang úa etuk,” a apéchékkúlok le akkafalafal?

¹⁶ Chemeni pwe mwirin án ekkewe chón Jus rese mochen etiwa án Paul afalafal, Jises a ereni Paul: “Kosap niwokkus, kopwe sópweeló le fós nge kosap fanafaneló, pún ngang úa etuk.” (Féf. 18:9, 10) A lamot sipwe chemeni ekkena kapas, ákkáeúin atun aramas rese mochen etiwa minne sia afalafala. Kosap fókkun ménúki pwe Jiowa a silei letipen aramas me a pani ngeni pwisin i ekkewe mi letipwenechar. (1 Sam. 16:7; Jon 6:44) Ena a apéchékkúla letipach ach sipwe sópweeló le akkafalafal! Iteiten ier a wor fitepúkú ngéréú ra papatais, weween iteiten rán fitepúkú ra papatais. Jises a alúkúlúkú ngeni chókkewe mi álleasochisi an we allúk ar repwe ‘asukula aramasen mwú meinisin pwe repwe wiliiti chón tapwoto mwirin.’ A apasa: “Úpwe nónnóm remi lón ekkewe rán meinisin tori sópwólóón ótóten ei fénúfan.”—Mat. 28:19, 20.

17, 18. Met eli Paul a ekieki ussun atun a sái ngeni Efisus?

¹⁷ Sise silei iká minne Kallio a apwúngaló ina met a efisi ewe fansoun mi kinamwe fán iten ewe mineféén mwichefelin Chón Kraist lón Korint. Iwe nge, Paul a “nónnóm pwal fitu rán” me mwen epwe kapwong ngeni chienan kewe lón Korint me ló seniir. Lón ewe fansoun ráás lón ewe ier 52 mwirin Kraist, Paul a filaatá an epwe sái ngeni Siria seni ewe orooren Kenkrea mi nóm ina epwe fisu mwail éétiwen Korint. Iwe nge, me mwen án Paul epwe ló seni Kenkrea, a “fichimwochei mékúran . . . , pokiten a eáni eú pwon.” c (Féf. 18:18) Mwirin ena, a uwei Akwila me  Prisila me ra sáiló lón ewe Setin Aegean ngeni Efisus lón Eisia Minor.

¹⁸ Atun Paul a sái seni Kenkrea, ese mwáál a ekieki met a fis ngeni me lón Korint. A chómmóng met mi múrinné a fis ngeni me a chómmóng popun an epwe meefi pwapwa. An angangen afalafal ikena ie úkúúkún 18 maram, a uwaéch. Iei a wor eú mwichefel lón Korint mi mwichfengen lón imwen Justus we. Ikkeei iir ekkóch me lein chókkewe mi wiliiti chón lúkú, Justus, Krispus me chón leimwan, me pwal chómmóng. Paul a tongei chókkana, pún a álisiir ar repwe wiliiti Chón Kraist. Mwirin och fansoun, a mak ngeniir me erá pwe iir ra ussun eché taropwe mi mak lón letipan. Kich sia pwal fókkun tongei chókkewe sia álisiir ar repwe fel ngeni Jiowa. A ifa me apwapwaan ach kúna chienach kewe mi ussun “taropwe” mi manaw!—2 Kor. 3:1-3.

19, 20. Met Paul a féri atun a tori Efisus, me met sia tongeni káé seni ussun ach akkóta manawach pwe sipwe tufichin unusen angang ngeni Kot?

¹⁹ Atun Paul a tori Efisus, a mwittir poputá le afalafal. A “tolong lón ewe sinakok me a asukula ekkewe chón Jus ren an álisiir le weweiti ekkewe Taropwe mi Pin.” (Féf. 18:19) Lón ei atun, Paul a nóm Efisus ekis chék fansoun. Inaamwo iká ra tingorei an epwe ekis nómotiw, “nge i ese tipeeú ngeni.” Atun a kapwong ngeni ekkewe chón Efisus, a ereniir: “Iká Jiowa a mochen, ngang úpwe liwinsefálitikemi.” (Féf. 18:20, 21) Paul a silei pwe mi chúen chómmóng aramas a lamot epwe afalafal ngeniir me lón Efisus. Ina minne, a ekiekin liwiniti ikena, nge a filaatá an epwele chék likit ngeni lepéún Jiowa. Esap pwe ina eú leenien áppirú mi múrinné sipwe chechchemeni? Sia mochen akkóta manawach lón napanap epwe atufichi ach sipwe unusen angang ngeni Kot. Iwe nge, fansoun meinisin a lamot ach sipwe lúkúlúk wóón án Jiowa emmwen me achocho le etipeeúfengeni ach féffér me letipan.—Jem. 4:15.

²⁰ Paul a likitaaló Akwila me Prisila lón Efisus, me a sái lemataw me sáitiw ngeni Seseria. Ese mwáál, “a feitá” ngeni Jerusalem me kapwong ngeni chón ewe mwichefel ikena ie. (Féf. 18:22) Mwirin, Paul a ló ngeni Antiok lón Siria ikewe a kan nónnóm ie atun ese sái. An oruuen sái lón an angangen misineri a much me a fókkun sópwéch. Iei sipwele ppii met a fis lón an we sáingoon sái lón an angangen misineri.