SÓPWUN 5
“Áúpwe Álleasochisi Kot”
Ekkewe aposel ra isettiw leenien áppirú ngeni meinisin Chón Kraist mi enlet
A lóngólóng wóón Féffér 5:12–6:7
1-3. (a) Pwata ekkewe aposel ra nóm mwen án chón Jus we mwichen soukapwúng mi tekia, me ifa ewe kapas eis a ppiitá? (b) Pwata sia fókkun mochen silei met ekkewe aposel ra féri?
EKKEWE soukapwúng lón án chón Jus we mwichen soukapwúng mi tekia, ra fókkun song! Néún Jises kewe aposel ra útá mwen ena mwichen soukapwúng mi tekia. Pwata? Josef Kaifas ewe souasor mi lapalap me pwal meilapen ena mwichen soukapwúng, a allúkúchowu ngeniir: “Áúa fókkun allúkú ngenikemi pwe ousap chúen asukul fán ásengesin ei it.” Ena meilap mi fókkun song ese pwal mwo nge mochen féúni iten Jises. Iwe, a pwal sópweeló le apasa, “oua okuoló Jerusalem ren ámi asukul, me oua mochen etipisikem ren málóón ei mwán.” (Féf. 5:28) A ffat met a mochen: A mochen ar repwe úkútiw le afalafal, pwe iká rese, iwe repwe kúna kapwúng!
2 Iwe, met ekkewe aposel repwele féri? Wiser le afalafal a feito seni Jises, ewe an pwúúng a feito seni Kot. (Mat. 28:18-20) Itá ekkewe aposel repwele fangetá ren ar niweiti aramas me úkútiw le afalafal? Are, repwe tipeppós fán pwora me sópweeló le afalafal? Fen iei ei kapas eis: Itá repwe álleasochisi Kot, are aramas? Piter a kapas fán iten meinisin ekkewe aposel, mwittir chék, a fósetá fán pwora me tuwenewen.
3 Pokiten kich Chón Kraist mi enlet, sia fókkun mochen silei met ekkewe aposel ra féri atun án chón Jus we mwichen soukapwúng mi tekia a eniwer. Ewe allúk ussun afalafal, a pwal weneitikich. Kot a allúkú ngenikich ach sipwe afalafal, me eli sipwe pwal kúna koput atun sia álleasochisi ena allúk. (Mat. 10:22) Eli chón oput kich repwe sótun áweiresi ach sipwe afalafal are pinei ach angang. Nge, met sipwe féri? Sia tongeni kúna álillis seni ach silei met a álisi ekkewe aposel ar repwe fókkun pwora, me met a fis atun ra kúna kapwúng mwen án chón Jus we mwichen soukapwúng mi tekia. a
“Néún Jiowa we Chónláng A Suuki Ekkewe Asam” (Féffér 5:12-21a)
4, 5. Pwata Kaifas me ekkewe Satusi ra “uren lólówó”?
4 Chemeni pwe lón ewe áeúin atun ra allúkú ngeni Piter me Jon ar repwe úkútiw le afalafal, iei met ra apasa: “Áúsapw tongeni úkútiw le kapas ussun ekkewe mettóch áúa kúna me rong.” (Féf. 4:20) Mwirin án Piter me Jon we áeúin kapwúng mwen án chón Jus we mwichen soukapwúng mi tekia, iir me ekkewe pwal ekkóch aposel ra sópweeló le afalafal lón ewe imwenfel. Ekkewe aposel ra féri manaman mi amwarar, áwewe chék, ra echikara ekkewe mi samaw me asúoló ekkewe timon. Ra féri ena “lón ewe kinikin itan Alen Salomon,” ina eú leenien fetál mi wor imwan lón kiánin ewe imwenfel me éétiw ikewe chómmóng chón Jus ra kan kochufengen ie. Ekkewe aramas ra pwal mwo nge chikaretá ren núrún án Piter fetál! Chómmóng me lein chókkewe mi chikar seni ar samaw ra etiwa ewe kapas allim. Ina minne a “chómmóng mwán me fefin ra lúkú ewe Samol me ra wiliiti chón káé.”—Féf. 5:12-15.
5 Kaifas me ekkewe Satusi, ewe mwichen lamalam Kaifas a chóni, ra “uren lólówó” me allúkú ngeni ekkewe chón mmas ar repwe oturaalong ekkewe aposel lón ewe imwen kalapus. (Féf. 5:17, 18) Pwata ekkena Satusi ra fókkun mángaw? Ekkewe aposel ra afalafala pwe Jises a manawsefál, nge ekkena Satusi rese lúkú ewe manawsefál. Ekkena aposel ra apasa pwe ewe chék emén mi lúkú Jises, i a tongeni kúna manaw, nge ekkena Satusi ra niwokkus iká ewe mwúún Rom epwe apwúngúúr iká ekkewe aramas ra etiwa Jises an epwe néúr Sounemenem. (Jon 11:48) Ina popun ekkewe Satusi ra fókkun mochen án ekkewe aposel repwe úkútiw le afalafal!
6. Lón ei fansoun, ifa ewe popun néún Jiowa aramas ra kúna riáfféúmwáál, me pwata sise máirú ren ena?
6 Pwal ina ussun lón ei fansoun, néún Jiowa aramas ra kúna riáfféúmwáál, pún ekkewe néúwisin lamalam chofona ra etipetipa aramas ar repwe eriáfféwúr. Ekkena néúwis ra áeá ar nemenem le etipetipa néúwisin mwú me áeá pekin media le aúkatiw ewe angangen afalafal. Kich mi máirú ren ena? Aapw. Minne sia afalafala a álisi aramas le weweiti pwe mi mwáál met ekkewe néúwisin lamalam chofona ra afalafala. Lupwen ekkewe aramas mi letipwenechar ra etiwa ewe enlet lón Paipel, ra ngaseló seni fán nemenien ekkewe lúkú me ééreni mi mwáál. (Jon 8:32) Ina popun, minne sia afalafala a efisi án ekkewe néúwisin lamalam repwe oputakich me eriáfféúkich.
7, 8. Met meefien ekkewe aposel ren minne ewe chónláng a ereniir, me met a lamot sipwe pwisin eisinikich?
7 Atun ekkewe aposel ra nóm lón kalapus me witiwiti ar kapwúng, eli repwe ekieki iká ekkewe chón oputer repwe nireló pokiten ar lúkú. (Mat. 24:9) Nge lón ewe pwinin, a fis eú mettóch mi ámáirú, “néún Jiowa we chónláng a suuki ekkewe asamen ewe imwen kalapus.” b (Féf. 5:19) Iwe, ena chónláng a tichiki ngeniir met repwe féri: “Oupwe . . . útá lón ewe imwenfel, me sópweeló le kakkapas.” (Féf. 5:20) Ese wor tipemwárámwár pwe met ena chónláng a ereniir, a alúkúlúkú ngeniir pwe ra féri met mi pwúng. Ese mwáál, alon na a pwal apéchékkúla ngeniir ar repwe sópweeló le afalafal inaamwo iká repwe kúna riáfféúmwáál. Iwe, atun a rániló, fán pwora me watteen án ekkena aposel lúkú “ra tolong lón ewe imwenfel me poputá le asukul.”—Féf. 5:21.
8 A lamot emén me emén kich sipwe pwisin eisinikich ei kapas eis, ‘Mi nóm rei ewe esin lúkú me pwora mi lamot ren ái úpwe tufichin sópweeló le afalafal atun úpwe kúna ena esin osukosuk?’ Sia sópweeló ach “unusen pwáraatá ussun ewe Mwúún Kot” pún sia silei pwe ekkewe chónláng ra álisaatá me ekkemmweni.—Féf. 28:23; Pwár. 14:6, 7.
“Áúpwe Álleasochisi Kot Lap Seni Aramas” (Féffér 5:21b-33)
“Iwe, ra uweiireto me aútáár mwen án chón Jus we mwichen soukapwúng mi tekia.”—Féffér 5:27
9-11. Met ekkewe aposel ra apasa atun án chón Jus we mwichen soukapwúng mi tekia a allúkú ngeniir ar repwe úkútiw le afalafal, me ifa ussun ra isettiw leenien áppirú fán iten Chón Kraist mi enlet?
9 Kaifas me ekkewe pwal ekkóch soukapwúng lón án chón Jus we mwichen soukapwúng mi tekia, iei ra mmólnetá le apwúngú ekkewe aposel. Ra tiinaaló ekkewe chón mmas ar repwe uweato ekkewe aposel seni ewe imwen kalapus pún rese silei pwe ewe chónláng a fen atorowu. Anchangei máirúún ekkena chón mmas atun ra kúna pwe rese chúen nóm inaamwo iká a lok ewe imwen kalapus me núkúnúkéch, me “ekkewe chón mmas ra útá ppen ekkewe asam.” (Féf. 5:23) Ekiseló mwirin, ewe meilapen imwenfel a silei pwe ekkewe aposel ra nómsefál lón ewe imwenfel me afalafala ussun Jises Kraist, ewe angang ra kalapus ren! Iwe, ena meilap me néún kewe chón mmas ra mwittir feiló ngeni ewe imwenfel pwe repwe aresini ekkena aposel me uweiireló ngeni án chón Jus we mwichen soukapwúng mi tekia.
10 Sia fen káé seni lepoputáán ei sópwun pwe ekkewe néúwisin lamalam mi fókkun song, ra ereni ekkewe aposel ar repwe úkútiw le afalafal. Met ekkewe aposel ra apasa? Piter ewe mi wisen tupuniir le fós, a apasa fán pwora: “Ám áúpwe álleasochisi Kot lap seni aramas.” (Féf. 5:29) Ina minne, ekkewe aposel ra isettiw eú leenien áppirú ngeni meinisin Chón Kraist mi enlet seni lón ar we fansoun feito. Inaamwo iká Kot a erenikich ach sipwe álleasochisi ekkewe néúwisin mwú, nge ese wor ar pwúúng ar repwe aúkatiw ach féri letipen Kot. Ina popun, lón ach ei fansoun, iká “ekkewe néúwis” lón mwú ra pinei ach angangen afalafal, sisap úkútiw le féri wisach na me ren Kot le afalafala ewe kapas allim. (Rom 13:1) Sipwe fen áeá ach mirit le kútta alen ach sipwe sópweeló le unusen pwáraatá ussun ewe Mwúún Kot.
11 Ekkewe soukapwúng ra fókkun song ren ekkewe aposel pokiten met ewe ra pélúwen ngeniir fán pwora. Ra fókkun ‘mochen nieló’ ekkewe aposel. (Féf. 5:33) Ekkewe aposel ra ekieki pwe repwele ninniiló, nge Jiowa a álisiir lón eú napanap mi ámáirú!
“Ouse Tongeni Aúkúffóchereló” (Féffér 5:34-42)
12, 13. (a) Ifa alon Kamaliel ngeni chienan kewe soukapwúng, me met ra féri? (b) Ifa ussun Jiowa a tongeni álisi néún kewe aramas lón ei fansoun, me met sia tongeni lúkúlúk wóón iká a mut ngenikich ach sipwe kúna riáfféú fán iten minne mi pwúng?
12 Kamaliel, “emén senseen Allúk mi ésúúfél me ren aramas,” a penaatá ekkewe aposel. c Ese mwáál, chienan kewe soukapwúng ra fókkun súféliti pún atun a “allúkú pwe repwe mwo atowu ekkewe mwán lúkún ren ekis fansoun,” ra aúseling ngeni. (Féf. 5:34) Mwirin án Kamaliel fós ussun pwóróusen sópwongawen án ekkewe ekkóch angangen ú ngeni mwirin málóón néúr kewe souemmwen, a pesei ekkewe soukapwúng ar repwe likiitú me tipemecheres ngeni ekkewe aposel, ewe a kerán má seniir néúr we Souemmwen, Jises. Alon Kamaliel ei, a fókkun amwékútú ekkena soukapwúng: “Ousap aosukosuka ekkeei mwán, nge oupwe likitiireló. Pún iká ei kókkót are ei angang a feito seni aramas, iwe epwe úkúffócholó, nge iká a feito seni Kot, ouse tongeni aúkúffóchereló. Pún iká oua aosukosuker, neman oua fen fiu ngeni Kot.” (Féf. 5:38, 39) Ekkewe soukapwúng ra fiti met ewe a eáni éúréúr. Iwe nge, ra chúen awata ekkewe aposel me allúkú ngeniir “ar repwe úkútiw le fós fán ásengesin iten Jises.”—Féf. 5:40.
13 Pwal ina ussun lón ei fansoun, eli Jiowa epwe amwékútú ekkewe néúwis ussun chék Kamaliel le álisi néún kewe aramas. (SalF. 21:1) Jiowa a tongeni áeá an we ngún mi fel le amwékútú ekkewe sounemenem mi watte maner, ekkewe soukapwúng, are sou ffér allúk le féri met a mochen. (Ne. 2:4-8) Nge iká a mut ngenikich ach sipwe kúna riáfféú pokiten minne mi pwúng, iwe sia tongeni lúkúlúkú ekkeei ruu mettóch. (1 Pit. 3:14) Áeúin, Kot a tongeni fang ngenikich péchékkúl le likiitú. (1 Kor. 10:13) Oruuan, chón oputakich ‘resap tongeni aúkúffócheeló’ án Kot angang.—Ais. 54:17.
14, 15. (a) Met ekkewe aposel ra féri atun aramas ra awater, me pwata? (b) Apwóróusa eú pwóróus mi pwáári pwe néún Jiowa kewe aramas ra likiitú fán pwapwa.
14 Itá ekkewe aposel ra lichippúng are mochen fangetá pokiten án aramas awater? Aapw! Ra “feiló seni me mwen án chón Jus we mwichen soukapwúng mi tekia fán pwapwa.” (Féf. 5:41) Pwata ra “pwapwa”? Inaamwo iká a ámmetek ewe riáfféú ra kúna, nge ra pwapwa pwe ra silei pwe ra kúna riáfféúmwáál ren ar amwéchú ar túppwél ngeni Jiowa me tapweló mwirin Jises, ar we Leenien Áppirú.—Mat. 5:11, 12.
15 Kich sia pwal ussun chienach kewe lón fansoun ekkewe aposel, sia likiitú fiti pwapwa atun sia kúna riáfféú fán iten ewe kapas allim. (1 Pit. 4:12-14) Ewer, sise mochen án aramas repwe eniwakich, eriáfféúkich, are kalapusei kich. Nge sia pwapwa atun sia akkamwéchú ach túppwél ngeni Jiowa. Áwewe chék ren pwóróusen Henryk Dornik, ewe mi likiitú ren fitu fansoun fán nemenien ewe mwú mi kirikiringaw. A chemeni pwe lón August 1944, ekkewe sounemenem ra filaatá ar repwe tiiniireló me chienan kewe Chón Kraist ngeni eú leenien fétek. Chón koputan ra apasa: “A fókkun weires ach sipwe etipetiper le féri och mettóch. Ar silei pwe ra tongeni máló pokiten ar lúkú, a atoto ngeniir pwapwa.” Iei met Pwiich Dornik a áweweei: “Inaamwo iká úse mochen máló, nge ái tongeni akkamwéchú ái túppwél ngeni Jiowa me kúna ésúfélúi fán weires, ina met a atoto ngeniei pwapwa.”—Jem. 1:2-4.
Sia afalafal “seni imw ngeni imw,” ussun chék ekkewe aposel
16. Ifa ussun ekkewe aposel ra pwáári pwe ra unusen esilefeili ewe kapas allim, me ifa ussun sia áppirú napanapen ar afalafal?
16 Ekkewe aposel ra mwittir poputásefál le afalafal. Fán pwora, “iteiten rán, rese úkútiw le sópweeló ar asukul me esilefeili ewe kapas allim ussun ewe Kraist, Jises, lón ewe imwenfel me seni imw ngeni imw.” d (Féf. 5:42) Ekkena chón afalafal mi tinikken ra úppós le unusen esilefeili ewe kapas allim. Nengeni pwe ra ló ngeni imwen aramas ussun chék met Jises Kraist a ereniir ar repwe féri. (Mat. 10:7, 11-14) Ese wor tipemwárámwár pwe ina ussun ar ra okuoló Jerusalem ren ar asukul. Lón ei fansoun, Chón Pwáraatá Jiowa ra silleló ren ar eáni ena esin napanapen afalafal ussun chék ekkewe aposel. Atun sia ló ngeni imw me imw lón ach kewe leenien afalafal, sia fókkun pwáári pwe kich sia pwal mochen unusen esilefeili ewe kapas allim me atufichi án meinisin repwe rong ewe kapas allim. Jiowa mi efeiéchú ach angangen afalafal imw me imw? Ewer. Fite million aramas lón ei fansoun sópwólóón ra etiwa kapas allimen ewe Mwú, me lape ngeni aramas ra akkomw rong ewe kapas allim atun emén Chón Pwáraatá a chuuriir lón imwer.
Ekkewe Mwán mi Fich Ar Repwe Túmúnú Eú “Angang” mi Aúchea (Féffér 6:1-6)
17-19. Ifa ewe osukosuk mi ppiitá mi tongeni efisi kinikinfesen, me ifa ewe kapasen emmwen ekkewe aposel ra awora pwe epwe pwák ena osukosuk?
17 Iei a pwal fis eú watteen osukosuk lón ewe mineféén mwichefel. Itá epwele fis kinikinfesen lein chón ena mwichefel. Chómmóng ekkewe chón káé mi papatais, iir waséla ngeni Jerusalem me ra pwal mochen alapaaló ar káé me mwen ar repwe liwiniti leenier. Ekkewe chón káé lón Jerusalem ra pwapwa le asor moni pwe epwe atufichi osupwangen ekkena waséla lón pekin mwéngé me pwal ekkóch mettóch. (Féf. 2:44-46; 4:34-37) Lón ei atun, a fis eú osukosuk me a lamot án ekkewe aposel repwe fókkun túmúnúéchú le ataweei pwe esap atai tipeeúin ewe mwichefel. “Lón ewe angangen einet mwéngé iteiten rán,” ekkewe chón einet “ra túmúnúngaw” ngeni ekkewe fefin mi má seniir pwúlúwer, iir mi eáni fósun Krik. (Féf. 6:1) Iwe nge, ekkewe chón einet rese túmúnúngaw ngeni ekkewe fefin mi má seniir pwúlúwer, iir mi eáni fósun Ipru. Ussun ina eú osukosuken eimwumwu me aapaap. Ena mettóch a tongeni efisi kinikinfesen lón ewe mineféén mwichefel.
18 Ekkewe aposel mi angang weires lón wiser wisen soupwúngúpwúng lón ewe mwichefel mi watteeló, ra mirititi pwe a eú alen tipáchem ar resap ‘likitaaló ewe kapasen Kot fán iten ar repwe einet mwéngé.’ (Féf. 6:2) Ren ar repwe pwákini ena osukosuk, ra ereni ekkewe chón káé ar repwe kútta fúmén mwán mi “ur ren ngún mi fel me tipáchem,” iir ekkewe aposel ra tongeni ewisa ngeniir ena “angang” mi aúchea. (Féf. 6:3) A lamot epwe wor ekkena mwán mi fich ngeni ena angang, pún a kapachelong lón ena angang ewe angangen einet mwéngé, túmúnún moni, kamé pisek, me makkeetiw meinisin met ra féri. Meinisin ekkena mwán mi kefilitá, iter iten chón Krik, eli ina met a ámecheresi án ekkewe fefin mi má seniir pwúlúwer lúkúlúk wóór. Mwirin án ekkewe aposel ekilon fiti iótek, ra filaatá fúmén mwán ar repwe mesemes wóón ena “angang” mi aúchea. e
19 Itá án ekkewe fúmén mwán angangen einet mwéngé a wewe ngeni pwe esap pwal chúen wiser ar repwe afalafala ewe kapas allim? Aapw esap ina! Pwe Stifen i emén me lein ekkena mwán mi kefilitá, a wiliiti emén chón afalafala ewe kapas allim mi tinikken me pwora. (Féf. 6:8-10) Filip pwal i emén me lein ekkewe fúmén mwán, me a iteni “ewe chón esilefeili pwóróus allim.” (Féf. 21:8) A ffat pwe ekkewe fúmén mwán ra sópweeló le afalafala pwóróusen ewe Mwú fán tinikken.
20. Ifa ussun néún Kot kewe aramas lón ei fansoun ra áppirú ekkewe aposel?
20 Lón ei fansoun, atun néún Jiowa kewe aramas ra seikaatá ekkewe mwán ar repwe túmúnú ewe mwichefel, ra áppirú met ekkewe aposel ra féri. A lamot ngeni ekkena mwán ar repwe eáni án Jiowa ekiek me pwáári uwaan ewe ngún mi fel lón manawer. Fán emmwenien ewe Mwichen Soupwúngúpwúng, ekkewe mwán mi apwénúetá ekkewe mettóch mi makketiw lón Paipel fán iter, ra kewis ar repwe mwán mi ásimaw are chónálillisin mwichefel. f (1 Tim. 3:1-9, 12, 13) Pokiten ekkewe napanap mi fich ngeni ekkena mwán ar repwe eáni a nóm lón ewe Paipel, iwe sia tongeni apasa pwe ra seikitá me ren ewe ngún mi fel. Ekkewe mwán mi angang weires, ra túmúnú ekkewe angang mi aúchea. Áwewe chék, ekkewe mwán mi ásimaw eli repwe akkóta angangen álillis ngeni ekkewe chinnap mi túppwél mi osupwangen álillis. (Jem. 1:27) Ekkóch ekkewe mwán mi ásimaw, ra pwal álillis lón angangen kaútáán ekkewe Leenien Mwiich, akkóta ekkewe mwichelap, are álillis lón ewe pekin Hospital Liaison Committe. Ekkewe chónálillisin mwichefel ra pwal eáni chómmóng angang, nge ekkewe mwán mi ásimaw ra emmweni ewe angangen túmúnú me asukula ewe mwichefel. A lamot ngeni meinisin ekkena mwán mi fich ngeni ekkena wis, ar repwe itepék me rúúepek lón wiser lón án Jiowa we mwicheich, lón ewe mwichefel, me lón ewe angangen afalafala kapas allimen ewe Mwú.—1 Kor. 9:16.
“Ewe Kapasen Kot A Sópwósópwoló le Chéúfetál” (Féffér 6:7)
21, 22. Met a pwáári pwe Jiowa a efeiéchú ewe mineféén mwichefel?
21 Ren án Jiowa álillis, chón ewe mineféén mwichefel ra úppós fán riáfféúmwáál seni chón ú ngeniir me rese kkuf ren ewe osukosuk mi fis seni me lón ewe mwichefel mi tongeni efisi kinikinfesen. A pwápwááló án Jiowa efeiéchú ena mwichefel ussun met a makketiw: “Ewe kapasen Kot a sópwósópwoló le chéúfetál me a fókkun chóchchómmóngoló chóchóón ekkewe chón káé lón Jerusalem, me eú mwichemmóngun souasor ra poputá le etiwa ewe lúkú.” (Féf. 6:7) Ina eú chék me lein ekkewe chómmóng pwóróus sia álleani lón ewe puken Féffér ussun án Jiowa efeiéchú ewe mwichefel. (Féf. 9:31; 12:24; 16:5; 19:20; 28:31) Lón ei fansoun, sise péchékkúletá atun sia rong feffeitáán ewe angangen afalafala pwóróusen ewe Mwú lón ekkóch fénú?
22 Lón fansoun ekkewe aposel, ekkewe néúwisin lamalam mi fókkun song, rese fangetá. Epwele lallapoló ewe angangen eriáfféú. Ekiseló mwirin, ekkóch aramas ra wesewesen eriáfféwúmwááli Stifen ussun met sipwele káé lón en sópwun mwirin.
a Ppii ewe pwóór “ Án Chón Jus we Mwichen Soukapwúng mi Tekia.”
b Iei áeúin me lein ekkewe 20 atun ewe puken Féffér a fós ussun chónláng. Lón Féffér 1:10, ekkewe “mwán mi úféúf mi pwech,” iir pwal chónláng.
c Ppii ewe pwóór “ Kamaliel, mi Ésúúfél me Lein Ekkewe Rappai.”
d Ppii ewe pwóór “ Afalafal ‘Seni Imw Ngeni Imw.’”
e Ese mwáál, a lamot ngeni ekkeei mwán ar repwe pwáári ekkewe napanap mi múrinné a lamot ngeni emén mwán mi ásimaw an epwe eáni pún a watte túmúnún ei “angang” mi aúchea. Iwe nge, ewe Paipel ese pwal affata ineet ekkewe mwán ra poputá le kewis ngeni mwán mi ásimaw are chónemmwen lón ewe mwichefelin Chón Kraist.
f Lón fansoun ekkewe aposel, a wor ekkewe mwán mi kefilitá ar repwe wisen seikaatá ekkewe mwán mi ásimaw. (Féf. 14:23; 1 Tim. 5:22; Tait. 1:5) Lón ei fansoun, ewe Mwichen Soupwúngúpwúng a wisen seikaatá ekkewe chónemmwen mi wisen sáifetál, nge ekkena chónemmwen ra wisen seikaatá ekkewe mwán mi ásimaw me chónálillisin mwichefel.
