1. Áweweei met aramas ra meefi lupwen ewe fetellapen Pentikos.

 A CHÓMMÓNG aramas iir mi pwapwa wóón ekkewe alen Jerusalem. a Étúétún ekkei seni ewe róngen asor a étútá atun ekkewe chón Lifai ra kélú ekkewe kél lón Kölfel 113 ngeni 118. Chómmóng aramas ra feffetál wóón ekkewe al. Ra feito seni leeni mi towaw áwewe chék ren Elam, Mesopotamia, Kapatosia, Pontus, Isip, me Rom. b Met epwe fis? Ekkewe aramas ra chufengen pwe repwe féri apwapwaan ewe fetellapen Pentikos, mi pwal iteni “ewe ränin kinikinin mwen ua.” (Num. 28:26) Ena fetellap a fis fán eú lón eú ier lemuchúlóón ewe rásin parli me lepoputáán ewe rásin wiich. Ina eú fansoun mi apwapwa.

2. Ifa ewe mettóch mi amwarar a fis lón Pentikos lón ewe ier 33?

² Lón ina epwe kulók tiu lesossor lón ewe ier 33 lón fansoun ráás, och mettóch mi amwarar a fis aramas repwe chék fóffósun tori ach ei fansoun. Mwittir chék a fis “eú méngúngú seni láng, ussun úngúúngún och ásepwál mi péchékkúl.” (Féf. 2:2) Ena méngúngú mi léúwommóng a ouraló ena imw ikewe néún Jises kewe 120 chón káé ra chufengen ie. Mwirin, och mettóch mi amwarar a fis. Chéén mwéngé mi ussun ngeten ekkei a pwá wóón emén me emén leir. c Mwirin “ra uroló ren ewe ngún mi fel” me ra poputá le kapas lón sókkopaten fós! Atun ra ló seni ena imw, ekkewe aramas ra chuuriir wóón alen Jerusalem ra máirú, pún ekkena chón káé ra tufichin fós ngeniir! Ewer, emén me emén ra “esilla pwisin fósun fénúer.”—Féf. 2:1-6.

3. (a) Pwata ewe Pentikos ier 33 ina eú fansoun mi aúchea lón uruwoon fel mi enlet? (b) Ifa ussun Piter a áeá ewe áefóchun “kii fán iten ewe Mwúún láng” lón an afalafal atun ewe Pentikos ier 33?

 ³ Ena fansoun mi amwarar a fókkun aúchea lón uruwoon fel mi enlet pokiten ina poputáán ewe Israel lón pekin lúkú, ewe mwichefelin Chón Kraist mi kepit. (Kal. 6:16) Nge a wor pwal ekkóch mettóch mi lamot ra fis. Atun Piter a fós ngeni ewe mwichen aramas lón na ránin, a áeá ewe áefóchun kii me lein ekkewe úlúfóch “kii fán iten ewe Mwúún láng.” Efóch me efóch ekkena kii epwe suuki ngeni sókkopaten kúmien aramas wis mi aúchea. (Mat. 16:18, 19) Ewe áefóchun kii a atufichi ekkewe chón Jus me ekkewe chón Jus iir chón lúkún Israel, ar repwe etiwa ewe kapas allim me kepit ren án Kot we ngún mi fel. d Repwe kapachelong lein ewe Israel lón pekin lúkú, iwe pokiten ena, repwe ápilúkúlúkún wiseni ewe wis king me souasor lón ewe Mwúún Messaia. (Pwár. 5:9, 10) Ló, ló, ló, epwe suuk ngeni chón Sameria me chón Jentail ena wis. Met Chón Kraist lón ei fansoun ra tongeni káé seni minne a fis lón ewe Pentikos ier 33?

4. Ifa ussun ewe mwichefelin Chón Kraist lón ei fansoun a sópweeló ewe angang ewe mwichefel mi kerán ffér lón ewe ier 33 a féri?

⁴ Ewe mwichefelin Chón Kraist a poputá ren ina epwe 120 chón káé mi “kochufengen lón eú chék leeni” ina ewe ruumw asan, me  iir ekkewe ra kepit ren ngún mi fel. (Féf. 2:1) Lemuchúlóón ena rán, fitengéréú ra papatais. Ena mwicheich a chék lallapoló tori ikenái! Iei ena kúmi iir chón ewe mwichefelin Chón Kraist lón ei fansoun, me ra fókkun súféliti Kot. Ra afalafala kapas allimen ewe Mwú “wóón unusen fénúfan pwe epwe eú minen pwáraatá ngeni aramasen mwú meinisin” mwen warotoon sópwólóón ei ótóten fénúfan.—Mat. 24:14.

5. Menni feiéch emén epwe kúna iká a chóni ewe mwichefelin Chón Kraist lón fansoun ekkewe aposel me lón ach ei fansoun?

⁵ Ewe mwichefelin Chón Kraist epwe pwal álisi me apéchékkúla chókkewe mi chóni, iir ekkewe mi kepit, me mwirin och fansoun ekkewe pwal ekkóch “siip.” (Jon 10:16) Paul a pwáári úkúúkún an kilisou ren ewe álillis chón ewe mwichefel repwe awora lefiler atun a makkeei ei ngeni ekkewe Chón Kraist lón Rom: “Úa fókkun mochen kúnakemi, pwe úpwe ngenikemi eú liffang seni Kot pwe oupwe péchékkúleló. Me úa pwal mochen kúnakemi pwe sipwe apéchékkúlafengenikich. Iwe, sipwe apéchékkúla emén me emén leich ren ewe lúkú mi nóm rei me ewe mi nóm remi.”—Rom 1:11, 12.

6, 7. Ifa ussun ewe mwichefelin Chón Kraist lón ei fansoun ra apwénúetá án Jises we allúk le afalafal ngeni mwú meinisin?

⁶ A chék taitap ewe angang ewe mwichefelin Chón Kraist lóóm, me iei ra féri. Jises a ewisa ngeni néún kewe chón káé eú angang mi apwapwa me weires. A ereniir: “Oupwe feiló me asukula aramasen mwú meinisin pwe repwe wiliiti chón tapwoto mwiri, me papataisiir lón iten ewe Sam me ewe Naw me ewe  ngún mi fel. Oupwe asukuler pwe repwe álleasochisi meinisin ekkewe mettóch úa fen allúkú ngenikemi.”—Mat. 28:19, 20.

⁷ Jiowa a néúnéú Chón Pwáraatá Jiowa le féri ena angang lón ei fansoun. Pwúngún, a weires ach sipwe tikeri aramas iir mi eáni sókkopaten fós. Iwe nge, Chón Pwáraatá Jiowa ra awora ekkewe puken áweween Paipel lón lap seni 1,000 fós. Iká ka fiffiti án ewe mwichefelin Chón Kraist kewe mwiich me fiti ewe angangen afalafala ewe mwú me álisi aramas le wiliiti chón káé, iwe ka tongeni pwapwa. Ka kapachelong lein ewe kúkkún kúmiin aramas wóón fénúfan iei iir mi afalafalafeili iten Jiowa we!

8. Ifa ussun emén me emén chón ewe mwichefel ra kúna feiéch?

⁸ Jiowa Kot a awora ewe mwicheichen pwipwi wóón unusen fénúfan an epwe álisuk le likiitú fán pwapwa lón fansoun weires. Paul a makkeei ei ngeni ekkewe chón Ipru Chón Kraist: “Ousipwe ekieki ussun ach sipwe alollolaatái emén me emén kich ren ach sipwe pwáári tong me féffér múrinné. Ousisap etiwaaló ach mwichfengen, ussun met ekkewe ekkóch ra féfféri, nge sipwe apéchékkúlafengenikich, me alapaaló ach féri ekkeei mettóch meinisin pún ewe rán a arapoto.” (Ipru 10:24, 25) Ewe mwichefelin Chón Kraist ina eú liffang seni Jiowa ren óm kopwe apéchékkúla  ekkewe ekkóch me pwal pwisin en. Kopwe ririéch ngeni chienom kewe Chón Kraist. Kosap fókkun etiwaaló ach mwichfengen!

9, 10. Met ekkóch ra féri pwe repwe tongeni afalafal ngeni chókkewe mi eáni fósun ekis?

⁹ Anchangei úkúúkún pwapwaan ekkewe chón Jus me chón lúkún Israel lón ewe Pentikos ier 33. Chómmóng mi nóm lón ena atun eli ra sile fósun Krik are Ipru. Nge iei “ra esilla pwisin fósun fénúer atun ekkewe chón káé ra kakkapas.” (Féf. 2:6) Ese mwáál a fókkun chúng letipen ekkena chón aúseling atun ra rong ewe kapas allim lón pwúkún ar fós. Kot ese fang ngeni Chón Kraist lón ei fansoun ewe tufich le mwittir sile pwal eú fós. Iwe nge, chómmóng lón ei fansoun ra afalafala kapas allimen ewe Mwú ngeni aramasen mwú meinisin. Ifa ussun? Ekkóch ra káé eú mineféén fós pwe repwe tongeni álillis lón eú mwichefel mi kkan ngeni leenier mi eáni ena fós, are ra mwékút ngeni pwal eú fénú. Fán chómmóng, ra kúna pwe chókkewe ra afalafal ngeniir ra mwaar ren ar achocho.

¹⁰ Áwewe chék, Christine me fúmén chienan kewe Chón Kraist ra fiti eú sukulen fósun Gujarati. Atun a sereni emén chienan chón angang mi eáni fósun Gujarati, a kapwong ngeni. Chienan na a máirú me a mochen silei iká pwata a achocho le káé fósun Gujarati. Christine a afalafal ngeni, iwe chienan na a ereni: “Ese wor pwal eú lamalam a pesei néúr kewe aramas ar repwe káé eú fós mi weires. Ese mwáál minne ka mochen ereniei a fókkun lamot.”

11. Ifa ussun sia tongeni mmólnetá le afalafala pwóróusen ewe Mwú ngeni chókkewe mi eáni pwal eú fós?

 ¹¹ Mei pwúng, saminne kich meinisin sia tongeni káé pwal eú fós. Iwe nge, sia tongeni mmólnetá le afalafala pwóróusen ewe Mwú ngeni chókkewe mi eáni pwal eú fós. Ifa ussun? Ren ach áeá ewe JW Language^® app le káé ifa ussun sipwe kapwong ngeni emén lón ewe fós lape ngeni aramas ra kan eáni lón leeniach. Ka pwal tongeni káé ekkóch kapas epwe efisi ar repwe mochen káé ussun Kot. Áiti ngeniir jw.org me ekkewe video me puk mi kawor lón fósun fénúer. Atun sia néúnéú ekkena minen álillis lón ewe angangen afalafal, eli sipwe eáni ewe esin pwapwa chienach kewe lón fansoun ekkewe aposel ra meefi atun aramas seni ekis meinisin ra mwaar le rong ewe kapas allim lón “pwisin fósun fénúer.”

12. (a) Ifa ewe oesini Sowel a eáni mi weneiti ewe manaman a fis lón ewe Pentikos ier 33? (b) Pwata néún Jises kewe chón káé ra ésúkúsúkú pwénútáán án Sowel we oesini?

¹² “Piter a útá” pwe epwe fós ngeni ewe mwichemmóngun aramas mi eáni sókkopaten fós. (Féf. 2:14) A áweweei ngeniir pwe Kot a atufichi ekkewe chón káé ar repwe fós lón sókkopaten fós pwe epwe pwénútá ei oesini seni Sowel: “Üpwe tinato Ngüni won aramas meinisin.” (Sow. 2:28) Me mwen án Jises epwele feitá láng, a ereni néún kewe chón káé: “Úpwe tingorei ewe Sam me i epwe ngenikemi pwal och álillis.” Jises a affata pwe ina “ewe ngún mi fel.”—Jon 14:16, 17.

13, 14. Ifa ussun Piter a achocho le achchúngú letipen chókkewe mi aúseling ngeni, me ifa ussun sia tongeni áppirú?

 ¹³ Mwirin Piter a tuwenewen le ereni ekkewe aramas: “Ámi meinisin aramasen Israel oupwe wesewesen silei pwe Kot a féri án Jises epwe Samol me Kraist, ewe emén oua chúfélúetá wóón ewe irá.” (Féf. 2:36) Pwúngún lape ngeni chókkewe mi aúseling ngeni Piter rese nóm atun Jises a chúfélútá wóón ewe irá. Nge pokiten iir seni ewe mwú mi nieló Jises, iwe ra pwal kapachelong lón ena tipis. Nge katol pwe Piter a fós ngeni chienan kewe chón Jus fán súfél me a sótun achchúngú letiper. Piter a mochen án chókkewe mi aúseling ngeni repwe áier, nge ese fen mochen apwúngúchowur. Itá ekkewe aramas ra song ren met Piter a erá? Aapw. Nge a fen “el letiper.” Iwe ra eis: “Met áúpwe féri?” Ese mwáál án Piter fós fán súfél a álisi le achchúngú letipen chómmóng, pwe iwe ra áier.—Féf. 2:37.

¹⁴ Sia tongeni áppirú napanapen án Piter achchúngú letipen aramas. Atun sia afalafal ngeni aramas, ese lamot ach sipwe ákkáwena meefier meinisin ese lóngólóng wóón Paipel. A fen éch sipwe fós ussun ekkewe pwóróus sia tongeni tipeeúfengen wóón. Iká sia féri ena, iwe sia tongeni álisiir le weweiti án Kot we Kapas. Atun sia áppirú napanapen án Piter asukul, iwe ese mwáál chókkewe mi letipwenechar repwe sani le aúseling.

15. (a) Met Piter a apasa, me met ekkewe aramas ra féri? (b) Pwata a fich ngeni ekkewe fitengéréú mi rong ewe kapas allim lón Pentikos ar repwe papatais lón chék ewe ránin?

¹⁵ Lón ewe ránin Pentikos ier 33, Piter a ereni ekkewe chón Jus  me ekkewe chón lúkún Israel: “Oupwe áier, me emén me emén leimi epwe papatais.” (Féf. 2:38) Iwe mwirin, ina epwe 3,000 ra papatais eli lón ekkewe konik lón are kkan ngeni Jerusalem. e Itá ra chék mwittir papatais nge rese mmólnetá? Itá a pwal wewe ngeni pwe ekkewe chón káé me néún ekkewe sam me in Chón Kraist repwe tongeni papatais nge rese mwo mmólnetá? Aapw. Chemeni pwe ekkewe chón Jus me ekkewe chón Jus iir chón lúkún Israel mi papatais lón ewe ránin Pentikos ier 33, ra sani le káé án Kot we Kapas me ra fen chóni ewe mwú mi epinipiniló me ren Jiowa. Pwal och, ra fen tinikken. Ekkóch me leir ra sái towaw pwe repwe fiti ena fetellap. Mwirin ar mirititi watteen wisen Jises lón pwénútáán letipen Kot we, iwe ra tongeni sópweeló le angang ngeni Kot. Nge lón na atun repwe wiliiti chón tapweló mwirin Kraist mi papatais.

16. Ifa ussun ekkewe Chón Kraist lóóm ra pennúkúóló pwisin mocheniir?

¹⁶ Jiowa a efeiéchú chókkana. Iei met a fis: “Meinisin ekkewe mineféén chón káé ra kochufengen me áeáfengen lefiler meinisin met mi wor rer, me ra améméló fénúer me meinisin minne ar me eineti méén we ngeni meinisin, alóngólóng wóón met emén me emén a osupwangan.” f (Féf. 2:44, 45) Meinisin Chón Kraist mi enlet ra mochen áppirú ar tong me pennúkúóló pwisin mocheniir.

17. Met a lamot emén epwe féri pwe epwe tongeni fich ngeni an epwe papatais?

¹⁷ Ewe Paipel a áiti ngenikich pwe a wor fitu mettóch a lamot emén epwe féri me mwen epwe fangoló manawan ngeni Jiowa me papatais. A lamot epwe káé án Kot we Kapas. (Jon 17:3) Epwe anganga an lúkú me áier seni an kewe féffér me lóóm me pwáári pwe a enletin niamamesiniir. (Féf. 3:19) Mwirin a lamot epwe kulsefál, me poputá le féri ekkewe mettóch Kot a mochen an epwe féri. (Rom 12:2; Efi. 4:23, 24) Mwirin an féri ekkena epwe fangoló manawan ngeni Kot lón iótek me papatais.—Mat. 16:24; 1 Pit. 3:21.

18. Ifa ewe feiéch a suuk ngeni néún Jises kewe chón káé mi papatais?

¹⁸ En emén néún Jises chón káé mi papatais? Iká ewer, kopwe kilisou ren ena feiéch a suuk ngonuk. Ussun ekkewe chón káé lóóm iir mi uroló ren ngún mi fel, Jiowa a tongeni néúnéú en le apwénúetá letipan me unusen pwáraaló ewe enlet!