1-4. Ifa ewe mettóch mi áweires Piter a nóm lón, me epwe met meefiom iká en i?

 A FÓKKUN akúrang asamen ewe imwen fétek mi ffér seni mechá atun ekkewe soufiu ra éppúngaaló me lúkúsékúrún Piter. Piter a féfé ngeni sein lefilen rúúemén chón mmas iir chón Rom, me ra uwealó ngeni fétek. Me ikena ie, Piter epwe witi fitu awa are eli fitu rán me mwen an epwe silei met epwele fis ngeni. Ese wor met epwe kúna me lúkún chék etippen ewe imwen fétek, ttitin we, seinnan kewe, me ekkewe chón mmasa.

² Iwe, Piter a angei kapwúng mi fókkun eletipechou. King Erot Akripa I a fókkun mochen pwe Piter epwe ninniiló. a Erot a mochen nieló Piter mwirin ewe Pasofer mwen mesen aramas pwe repwe pwapwa. A wor manen Erot, ina minne a tongeni fis ena. Erot a kerán chék efisi ninniilóón Jemes, emén me lein chienen Piter kewe aposel.

³ Anchangei minne a fis lón ewe kuniolun me mwen ewe rán atun Erot a mochen nieló Piter. Epwe met Piter a ekieki atun a chék áláeménúló lón ewe ruumwen kalapus mi kirochoroch? Ese mwáál a ekieki ussun met Jises a ereni fitu ier me mwan. Jises a erá pwe eú rán Piter epwe féfé, me aramas repwe uwealó fán péchékkúl pwe epwe ninniiló. (Jon 21:18, 19) Eli Piter a ekieki pwe ina ewe fansoun a war.

⁴ Iká a fis ngonuk minne a fis ngeni Piter, met kopwe meefi? Chómmóng aramas repwe lichippúng me ápilúkúlúkúngaw. Iwe nge, me ren néún Jises Kraist kewe enletin chón káé, ese wor met epwe efisi ar repwe unusen ápilúkúlúkúngaw. Met sia tongeni káé seni minne Piter me chienan kewe Chón Kraist ra féri atun ra kúna riáfféúmwáál? Sipwe ppii.

5, 6. (a) Pwata King Erot Akripa a eriáfféwú ekkewe Chón Kraist, me ifa ussun féri ena? (b) Pwata ninniilóón Jemes ina eú sóssót ngeni chón ewe mwichefel?

⁵ Sia fen káé lón ewe sópwun mwan pwe atun emén mwán itan Kornelius esap i chón Israel, me chón an we famili ra wiliiti Chón Kraist, ina eú fansoun mi fókkun aúchea fán iten ewe mwichefelin Chón Kraist. Nge eli ekkewe chón Jus esap iir Chón Kraist, iei ra máirú ren ar silei pwe chómmóng chón Jus Chón Kraist fengen me ekkewe esap iir chón Jus, ra tongeni fel ngeni Kot.

⁶ Erot, emén néúwis mi tipáchem solá. A ekieki pwe ena mettóch a tongeni suuki ngeni alen án ekkewe chón Jus repwe sani i, ina minne a poputá le eriáfféwú ekkewe Chón Kraist. Ese mwáál, a silei pwe aposel Jemes a fókkun chiechiéch ngeni Jises Kraist. Ina minne, Erot a “nieló Jemes, pwiin Jon we, ren ketilas.” (Féf. 12:2) Minne a fis a eletipechowu chón ewe mwichefel! Jemes emén me lein ekkewe úlúmén mi kúna án Jises wililó me i a pwal kúna ekkewe ekkóch manaman ekkóch ekkewe aposel rese kúna. (Mat. 17:1, 2; Mark 5:37-42) Jises a eita ngeni Jemes me pwiin we Jon “Néún Chopulap” pokiten ra fókkun tinikken. (Mark 3:17) Ina minne, atun Jemes a ninniiló, a péút seni ewe mwichefel emén aposel mi pwora, túppwél, me áchengicheng me rer.

7, 8. Met chón ewe mwichefel ra féri atun Piter a kalapus?

⁷ Ninniilóón Jemes a apwapwaai ekkewe chón Jus, me ina met Akripa a áneánei. Ina minne, a péchékkúl letipan an epwe pwal  eriáfféwú Piter. Ussun met ewe áeúin parakraf a apasa, a aresini Piter. Nge ese mwáál, Akripa a chemeni pwe ekkewe aposel ra musowu seni leenien kalapus ren eú manaman, ussun met ewe Sópwun 5 lón ei puk a fós ussun. Ina minne, Akripa a allúkú án Piter epwe féfé ngeni sein lefilen rúúemén chón mmas, me 16 chón mmas ra nikewiwi lerán me lepwin le mammasa pwe ete sú. Nge iká Piter a sú, iwe ekkewe chón mmas repwe ninniiló. Ifa ussun ekkóch chienen Piter kewe Chón Kraist ra tongeni álisi lón ekkena esin weires?

⁸ Chón ewe mwichefel ra fókkun silei met repwe féri. Féffér 12:5 a erá: “Atun Piter a nónnóm lón kalapus, ewe mwichefel a tittingormaw ngeni Kot fán ásengesin i.” Ewer, ra fókkun iótek seni letiper fán iten chiener kewe Chón Kraist. Málóón Jemes ese apwangapwangaaló ar lúkú. Ra chúen lúkú pwe Jiowa a aúseling ngeni ar kewe iótek. Iótek a fókkun aúchea me ren Jiowa. Iká ach kewe iótek ra tipeeú ngeni letipan, iwe epwe pélúweniir. (Ipru 13:18, 19; Jem. 5:16) Ina eú lesen mi aúchea fán iten Chón Kraist lón ei fansoun.

9. Ifa ussun sia tongeni áppirú ekkewe Chón Kraist iir mi iótek fán iten Piter?

⁹ Ka silei ussun pwal ekkóch Chón Kraist iir mi weires ren chómmóng sóssót? Eli ra likiitú fán riáfféúmwáál, án ewe mwú pinei ar angang ngeni Jiowa, are likiitú fán fisin feiengaw watte. Ka tongeni iótekiir. Eli ka pwal silei ekkóch iir mi likiitú fán ekkóch weires sise kon kúna, áwewe chék ren riáfféú seni chón ar famili, letipechou,  are pwal ekkóch mettóch mi sótuni ar lúkú. Iká ka ekilon mwen óm iótek, eli ka tongeni ekieki fitemén aramas ka tongeni féúni iter atun ka iótek ngeni Jiowa, ewe chón “aüselinga iotek.” (Kölf. 65:2) Me a pwal lamot ngonuk án chienom kewe Chón Kraist repwe iótek fán itom atun ka nóm lón weires.

10, 11. Áweweei ifa ussun néún Jiowa we chónláng a omusawu Piter seni kalapus.

¹⁰ Itá Piter a niwokkus ren met Erot epwele féri ngeni? Ese ffat, nge lón ewe sáingoon pwiin lón ewe imwen kalapus, a chék méúr lefilen ekkewe rúúemén chón mmas mi mammasafichi. A péchékkúl án Piter lúkú Jiowa, ina popun a fókkun silei pwe ese lifilifil met epwe fis ngeni, nge Jiowa epwe chechchemeni i. (Rom 14:7, 8) Nge eli Piter ese fókkun ekieki ussun ekkewe mettóch mi amwarar repwele fis. Mwittir chék, eú saram mi saramaram a asarama ewe ruumwen kalapus a nóm ie. Emén chónláng a útá ikena ie, eli ekkewe chón mmas rese kúna, me a mwittir féngúnatá Piter. Iwe seinen péún Piter kewe, ekkewe sókkun sein ese tongeni mwu, ra mwufesen!

¹¹ Ewe chónláng a ngeni Piter fitu allúk mi tichik: “Kopwe mwittir pwáátá!” . . . Kopwe úféúf me néúnéúlong ipwom kana. . . . “Úféúfetá úfom na úféúfen lúkún.” Piter a mwittir álleasochis. Mwirin, ewe chónláng a ereni: “Tattapwoto mwiri,” iwe, Piter a tapweló mwirin. Ra sú seni ewe ruumwen kalapus, me ánnifewu me pássini ekkewe soufiu lúkún iir mi mammasa ena leeni, me fetál ngeni ewe watteen ttit mi ffér seni mechá. Eli Piter a ekieki iká epwe ifa ussun ar repwe towu me lón ena ttit. Iká Piter a ekieki ena, iwe ese wor fansoun an epwe pwal ekieki ussun. Atun ra arap ngeni ewe ttit, “a pwisin suukuló ngeniir.” Iwe ra mwittir feiliwu seni ena ttit ngeni wóón ewe al, me ewe chónláng a móróló. Piter a chék áláeménúló ikena, me mirititi pwe a wesewesen fis ngeni meinisin ekkena mettóch, nge esap chék ina eú lángipwi. A wesewesen musowu!—Féf. 12:7-11.

12. Eli pwata sipwe péchékkúletá atun sia ekieki ussun án Jiowa seláni Piter?

¹² A mmen apéchékkúlakich ach ekieki ussun án Jiowa manaman ese wor aúkúúkún le seláni néún kewe chón angang. Piter a kalapus fán manamanen emén king mi fókkun péchékkúl an nemenem seni meinisin wóón fénúfan lón ena atun. Ikáámwo ina, nge a chék mecheres án Piter towu seni kalapus! Ewer, Jiowa ese féri ena esin manaman fán iten meinisin néún kewe chón angang. Ese féri ena ngeni Jemes, me ese pwal féri ngeni Piter atun a pwénúetá alon Jises kewe ussun i. Ekkewe Chón Kraist lón ei fansoun rese pwal  ekieki án Kot epwe selániir ren eú manaman. Iwe nge, sia chemeni pwe Jiowa ese siwil. (Mal. 3:6) Máló a ussun eú leenien kalapus ussun itá sise tongeni ngas seni, nge ekiseló chék, Jiowa epwe néúnéú Néún we le amanawasefáli fite million aramas mi fen máló. (Jon 5:28, 29) Ekkena pwon ra tongeni álisikich le pwora fán ekkewe sóssót sia kúkkúna lón ei fansoun.

13-15. (a) Met meefien chón ewe mwichefel mi mwicheto lón imwen Meri we atun Piter a wareitiir? (b) Met ewe puken Féffér a fós ussun mwirin, nge met sókkun álillis Piter a sópweeló le awora ngeni chienan kewe Chón Kraist?

¹³ Piter a útá wóón ewe al mi kiroch me ekieki met epwele féri. Iwe iei a silei met epwele féri. A wor emén Chón Kraist fefin itan Meri a nóm kkan ngeni ikena. I emén fefin mi má seni pwúlúwan nge eli mi wéúéch. A pwisin wor eú imwan mi watte me kuch án chón eú mwichefel repwe mwiich lón. I inen Jon Mark, átewe ewe puken Féffér a akkomw fós ussun, me ló, ló, ló, ussun itá a wiliiti néún Piter. (1 Pit. 5:13) Lón ena pwinin, inaamwo iká a pwinimaw, nge chómmóng chón ewe mwichefel ra nóm lón imwen Meri we, me ra fókkun sié lón ar iótek. Ese wor tipemwárámwár pwe ra ióteki án Piter epwe musowu, nge ra fókkun máirú ren ifa ussun Jiowa a pélúweni ar iótek!

¹⁴ Piter a fichifich wóón ttitin ewe imw. Emén chón angang fépwúl itan Rota, eú it mi iteféúló lón fósun Krik mi wewe ngeni “Rose,” a feiliwu ren ena ttit. Ese fókkun lúkú met a rong. Ina léúwen Piter! Seni án ena fépwúl máirú, ese fen chúen suuki ngeni Piter ena ttit, nge a likitaaló lúkún me ssásefálilong lón ewe imw me ereni chón ewe mwichefel pwe Piter a nóm lúkún. Ra apasa pwe a umwes, nge ese afangafang. A chék ekkereniir met a rong. Iwe ekkóch chón ena mwichefel ra lúkú, nge ra ekieki pwe eli emén chónláng ena a pwomweni pwe i Piter. (Féf. 12:12-15) Lón unusen ena atun, Piter a chék fiffichifich tori ar ra towu me suuki ewe ttit.

¹⁵ Seni ewe ttit, “ra kúna i me ra máirú”! (Féf. 12:16) Ra fókkun pwapwa ina pwata Piter a ereniir ar repwe fanafaneló pwe epwe apwóróusa ngeniir met a fis. A pwal ereniir pwe repwe apwóróusa ngeni ewe chón káé Jemes me ekkewe mwán Chón Kraist minne a fis. Iwe Piter a mwittir ló seniir pwe néún Erot kewe soufiu rete tori. A feiló me sópweeló an angang ngeni Jiowa fán túppwél lón pwal eú leeni mi núkúnúkéch seni ena. Ewe sáingoon atun puken Féffér a fós ussun Piter, ina lón sópwun 15 ewe mi áweweei ussun an álillis  le apwúngaló iká mi lamot án ekkewe Chón Kraist esap iir chón Jus repwe sirikomsais are ese pwal lamot. Iwe mwirin, ewe puken Féffér a nefótófót wóón án Piter angang me an sái. Iwe nge, sia tongeni lúkú pwe Piter a apéchékkúla án chienan kewe Chón Kraist lúkú ekis meinisin ia a ló ie. Ese wor tipemwárámwár pwe atun a ló seni chón ewe mwichefel lón imwen Meri we, ra fókkun pwapwa.

16. Pwata sia tongeni lúkúlúk pwe epwe fókkun apwapwa lón fansoun mwach?

¹⁶ Fán ekkóch, Jiowa a féri mettóch fán iten néún kewe chón angang lap seni met ra tongeni ekieki, iwe ra fókkun pwapwa. Ina met a pwal fis ngeni chienen Piter kewe lón ewe pwinin a musowu. A pwal ina ussun meefiach lón ei fansoun atun Jiowa a efeiéchúkich. (SalF. 10:22) Lón mwachkkan, sipwe kúna pwe meinisin án Jiowa kewe pwon repwe pwénútá wóón unusen fénúfan. Ekkewe feiéch mi amwarar sipwele kúna, repwe fókkun múrinné lap seni met sia tongeni ekieki. Iká sia túppwél, sia tongeni lúkúlúk pwe sipwe fókkun pwapwa lón ekkan rán mwach.

17, 18. Met a efisi án ewe mwichen aramas apatáái Erot?

¹⁷ Erot a fókkun máirú ren án Piter sú seni ewe imwen fétek me a pwal efisi an epwe fókkun song. Mwittir chék, Erot a allúkú ar repwe kúttafichi Piter, mwirin, Erot a fókkun etittina ekkewe chón mmasa Piter. Iwe “repwele angei kapwúngúúr,” ese mwáál, iei repwele ninniiló. (Féf. 12:19) Ese fókkun wor án Erot Akripa tong me úméúméch. Itá ena mwán mi kirikiringaw a angei kapwúngún?

¹⁸ Eli Erot Akripa a fókkun sáw ren sópwongawen an mochen nieló Piter, nge ekiseló chék a suuk ngeni an epwe féri och mettóch mi efisi an epwe lamalamtekia sefál. Ekkóch chón oputen Erot Akripa kewe ra feito ren me ra mochen ar repwe kinamwefengen me i, iwe a suuk ngeni átena an epwe eáni eú afalafal, me ese mwáál a fókkun pwapwa le eáni eú afalafal mwen eú mwichen aramas. Me mwen án Erot afalafal, Luk a makkeei pwe “Erot a foutei ngeni och sókkun úf mi kon ling.” Néún chón Jus we soukáé uruwo itan Josephus a makkeei pwe úfen Erot we, a ffér seni silifer, ina popun atun a ttinetiw saram wóón ena king a fókkun saramaram ina pwata ekkewe aramas ra ekieki pwe a ussun emén kot. Ena néúwis mi lamalamtekia a poputá le eáni afalafal. Ewe mwichen aramas mi apatáái Erot ra apasa: “Léúwen emén kot, nge esap emén aramas!”—Féf. 12:20-22.   

19, 20. (a) Pwata Jiowa a apwúngú Erot? (b) Pwata pwóróusen málóón Erot a apéchékkúlakich?

 ¹⁹ Kot chék a fich ngeni ena esin kapasen mwareiti, me I a kúna met a fis! A suuk ngeni Erot an epwe sú seni kapwúngún. A tongeni apwúngú ekkewe aramas are pwáári pwe ese tipeeú ngeniir. A nóm lón alon eú mwuten kapas mi erá: “Lamalamtekia a akom mwen feiengau.” (SalF. 16:18) “Mwittir chék, néún Jiowa we chónláng a efisi” án ewe mwán mi lamalamtekia máló lón eú esin napanap mi annou. ‘Ekkewe métté ra ocheei Erot.’ (Féf. 12:23) Josephus a pwal erá pwe a chék weiweitá án Akripa semmwen me a pwal erá pwe ena king a pwisin apasa pwe pokiten an tipeeú ngeni án aramas apatáái, iwe epwele máló. Josephus a makkeei pwe Akripa a semmwen ren úkúúkún nimu rán me mwen an epwe máló. b

²⁰ Fán ekkóch, ussun itá aramas mi ngaw ra tongeni féfféri minne mi ngaw nge rese angei kapwúngúúr. Sise máirú ren ena pún “unusen fénúfan a nóm fán nemenien ewe mi ngaw.” (1 Jon 5:19) Iwe nge, fán ekkóch néún Kot kewe chón angang mi túppwél ra osukosuk atun ussun itá aramas mi ngaw rese angei kapwúngúúr. Ina eú popun pwata ei pwóróus a apéchékkúlakich. Ena pwóróus a áiti ngenikich pwe Jiowa a apwúngú aramas mi ngaw, me a áchchema ngeni meinisin néún kewe chón angang pwe a aúcheani pwúng. (Kölf. 33:5) Ló, ló, ló, i epwe féri an angangen kapwúng.

21. Ifa ewe lesen mi aúchea mi mak lón Féffér sópwun 12, me eli pwata a oururukich lón ei fansoun?

²¹ A muchúló ei pwóróus ren eú lesen mi apéchékkúlakich: “Án Jiowa kapas a chéúfetál me a chómmóngoló aramas ra lúkú.” (Féf. 12:24) Ei pwóróus a áiti ngenikich pwe ewe angangen afalafal epwe sópwósópwoló le chéúfetál me a áchchema ngenikich pwe Jiowa a efeiéchú ewe angangen afalafal lón ei fansoun. A ffat pwe ewe pwóróus lón Féffér sópwun 12 ese chék fósun málóón emén aposel me pwal án emén aposel sú seni kalapus. Nge a fós ussun Jiowa me met a féri pwe epwe eppeti án Setan mochen aúkatiw ewe angangen afalafal. Setan ese sópwéch, iwe chókkewe mi sótun aúkatiw ach angangen afalafal, resap pwal sópwéch. (Ais. 54:17) Nge chókkewe mi filaatá le fel ngeni Jiowa me tapweló mwirin Jises Kraist, ra féri eú angang esap fókkun sópwongaw. Esap ina eú pwóróus mi apéchékkúlakich? A ifa me feiéchúch le álillis lón ewe angangen esilefeili “án Jiowa kapas” lón ei fansoun!