1, 2. Met ewe Saul a akkóta an epwe féri lón Tamasikos?

 EÚ KÚMIIN mwán ra sái wóón ewe al, me ra arap ngeni Tamasikos. Ra akkóta le féri och mettóch mi fókkun ngaw. Repwele átekinawu néún Jises kewe chón káé seni lón imwer kewe, féétiir, ássáwer, me átekiniireló Jerusalem pwe repwe kapwúng ren án chón Jus we mwichen soukapwúng mi tekia.

² Ewe mwán meilapen ena kúmi, itan Saul. I emén me lein chókkewe mi nieló emén mwán. a Saul a kakkatol me tipeeú ngeni án ekkóch chón Jus mi achocho lón ar lamalam manei ngeni Stifen faw tori an a máló. Stifen i emén néún Jises chón káé mi túppwél. (Féf. 7:57–8:1) Mwirin ena, Saul a poputá le eriáfféwú néún Jises kewe chón káé mi nónnóm lón Jerusalem. A pwal wisen emmweni ewe angangen kútta néún Jises kewe chón káé lón ekkewe pwal ekkóch leeni me eriáfféwúr. A fókkun mochen arosaaló ewe kúmiin lamalam mi iteni “Ewe Al,” pún me ren mi efeiengaw.—Féf. 9:1, 2; ppii ewe pwóór “ Án Saul Pwúúng lón Tamasikos.”

3, 4. (a) Met a fis ngeni Saul? (b) Ikkefa ekkewe kapas eis sipwele pwóróusfengen wóór?

³ Eú saram mi fókkun saramaram a mwittir fiitiw únúkkún Saul. Ekkewe mwán mi eti ra kúna ena saram, nge rese tongeni kapas pwe ra fókkun máirú. Ena saram a ochunaaló Saul me a turuló lepwúl. Saul ese chúen tongeni kúna mwan me a rong eú méngúngú seni láng mi apasa: “Saul, Saul, pwata ka eriáfféwúmwááli ei?” Saul a apasa: “Samol, en ié?” Ese mwáál, Saul a fókkun máirú ren an ereni: “Ngang Jises, ewe ka eriáfféwúmwááli.”—Féf. 9:3-5; 22:9.

⁴ Met sia tongeni káé seni minne Jises a akkomw apasa ngeni  Saul? Ifa ussun sia tongeni kúna feiéch seni ach káésefál pwóróusen minne a fis ewe atun Saul a wiliiti néún Jises chón káé? Me ikkefa ekkewe lesen sia tongeni káé seni napanapen án ewe mwichefel áeá ewe fansoun mi kinamwe mwirin án Saul a wiliiti emén néún Jises chón káé?

5, 6. Met sia tongeni káé seni met Jises a apasa ngeni Saul?

⁵ Lupwen Jises a akaúlóói Saul me wóón ewe al ngeni Tamasikos, Jises ese eisini: “Pwata ka eriáfféwúmwááli nei kewe chón káé?” Nge ussun met a mak asan, a fen erá: “Pwata ka eriáfféwúmwááli ei?” (Féf. 9:4) A ffat pwe atun néún Jises kewe chón káé ra kúna riáfféú, i a pwal riáfféú.—Mat. 25:34-40, 45.

⁶ Iká ka kúna riáfféúmwáál pokiten óm lúkú Kraist, ka tongeni lúkúlúk pwe Jiowa me Jises ra kúna met a fis ngonuk. (Mat. 10:22, 28-31) Iei, neman Jiowa esap amóeló ewe sóssót mi toruk. Nge chemeni pwe Jises a kúna án Saul álisaatá ninniilóón Stifen me án Saul átekinawu ekkewe chón káé mi túppwél me lón imwer kewe lón Jerusalem. (Féf. 8:3) Iwe nge, Jises ese akaúlóói ena angangen eriáfféú lón ena fansoun. Nge, Jiowa a néúnéú Kraist an epwe fang ngeni Stifen me ekkewe pwal ekkóch chón káé ewe péchékkúl mi lamot ngeniir pwe repwe akkamwéchú ar túppwél.

7. Met a lamot kopwe féri pwe kopwe tongeni likiitú fán ekkewe riáfféúmwáál mi toruk?

⁷ Ka pwal tongeni likiitú fán ekkewe riáfféúmwáál mi toruk iká kopwe féri ekkeei mettóch: (1) Úppós le akkamwéchú óm túppwél ngeni Jiowa ese lifilifil met epwe fis. (2) Tingor álillis seni Jiowa. (Fil. 4:6, 7) (3) Likiti ngeni Jiowa an epwe wisen liiwini ekkewe mettóch mi ngaw a fis ngonuk. (Rom 12:17-21) (4) Lúkúlúk pwe Jiowa epwe fang ngonuk óm péchékkúl pwe kopwe tongeni likiitú tori ewe fansoun epwe amóeló ewe osukosuk.—Fil. 4:12, 13.

8, 9. Eli ifa meefien Ananaias ren ewe wis a kewis ngeni?

⁸ Mwirin án Jises pélúweni án Saul eisini, “Samol, en ié?” A ereni: “Kopwe útá me feiló ngeni ewe telinimw, iwe emén epwap erenuk met a lamot kopwe féri.” (Féf. 9:6) Saul ese chúen tongeni kúna mwan, ina popun ekkewe mwán mi eti ra emmwenaaló ngeni Tamasikos, ikewe a echikefel me iótek ren úkúúkún úlúngát rán. Nge lón ena atun, Jises a pwáári pwóróusen Saul ngeni emén chón káé itan Ananaias lón ena telinimw, ewe emén “ekkewe chón Jus meinisin ikena ie ra kapaséch ussun.”—Féf. 22:12.

 ⁹ Ekieki ekkewe memmeef eli Ananaias a meefi! Jises Kraist ewe mi manawsefál, ewe Mékúren mwichefel, a fós ngeni me filaatá an epwe kewis ngeni eú wis mi aúchea. A ifa me feiéchún ren ena wis, nge ina eú wis mi fókkun weires! Atun Jises a ereni Ananaias an epwe ló fós ngeni Saul, i a apasa: “Samol, úa rong seni chómmóng aramas ussun ei mwán, ussun meinisin angangen efeiengaw a fér ngeni noum kewe aramas lón Jerusalem. Me iei a wor an pwúúng seni ekkewe souasor mi lap an epwe aresini meinisin mi kékkéri itom.”—Féf. 9:13, 14.

10. Met sia káé seni Jises ren napanapen an fós ngeni Ananaias?

¹⁰ Jises ese apwúngú Ananaias ren met a apasa. Iwe nge, a awora ngeni kapasen emmwen mi fataffatéch. A pwal pwáár ngeni an chúngú ren an ereni ewe popun a mochen an epwe féri ewe wis. Iei met Jises a apasa ussun Saul: “Úa filaatá ei mwán an epwe afalafala ussui ngeni aramasen ekkewe ekkóch mwú pwal ngeni ekkewe king me chón Israel. Pún ngang úpwe pwáriéchú ngeni úkúúkún chómmóngun riáfféú epwe kúna pokiten itei.” (Féf. 9:15, 16) Ananaias a mwittir álleasochisi Jises. A ló chuuri Saul me ereni: “Pwii Saul, ewe Samol Jises, ewe a pwá ngonuk me wóón ewe al atun óm feito, a tiinieito pwe kopwe tongeni kúnasefáli mwom me ur ren ngún mi fel.”—Féf. 9:17.

11, 12. Met sia káé seni ei pwóróus ussun Jises, Ananaias, me Saul?

¹¹ Sia káé fitu mettóch seni pwóróusen Jises, Ananaias, me Saul. Áwewe chék, sia káé pwe Jises a emmweni ewe angangen afalafal, pún ina met a fen pwonei an epwe féri. (Mat. 28:20) Inaamwo iká Jises ese pwisin fós ngeni emén me emén kich lón ei  fansoun, nge a ekkemmweni ewe angangen afalafal ren an néúnéú ewe chón angang mi túppwél, ewe a ewisa ngeni an epwe túmúnú néún kewe chón angang. (Mat. 24:45-47) Fán emmwenien ewe Mwichen Soupwúngúpwúng, ekkewe chón afalafal me pioneer ra tiitiiló ar repwe kútta chókkewe mi mochen alapaaló ar silei ussun Kraist. Ussun met sia fen káé lón ewe sópwun mwen ei, chómmóng me lein ekkena esin aramas ra tingor emmwen seni Kot, nge ekiseló mwirin, Chón Pwáraatá Jiowa ra toriir me afalafal ngeniir.—Féf. 9:11.

¹² Ananaias a álleasochisi Jises, etiwa ewe wis a ewisa ngeni, me a kúna feiéch. Ka álleasochisi ewe allúk ach sipwe unusen pwáraatá ewe kapas allim inaamwo iká ena angang epwe efisi óm kopwe meefi aúrek?  Me ren ekkóch, a áweires ngeniir ar repwe afalafal imw me imw me chuuri aramas rese sissileer. Ekkóch, ra meefi pwe a áweires ar repwe afalafal ngeni aramas lón ar leenien angang, wóón al, are wóón phone are ren ar mak taropwe. Ananaias a pworacho ngeni an niwokkus me a feiéch ren an a wisen álisi Saul le angei ewe ngún mi fel. b I a sópwéch pokiten a lúkúlúk wóón Jises me lúkú pwe Saul a tongeni wiliiti emén chienan Chón Kraist. Sia tongeni pworacho ngeni ach niwokkus iká sipwe áppirú Ananaias le lúkúlúk pwe Jises a emmweni ewe angangen afalafal, sipwe tongei aramas, me ápilúkúlúk pwe pwal mwo ewe aramas sia pireir le afalafal ngeni a tongeni wiliiti chienach Chón Kraist.—Mat. 9:36.

13, 14. Iká ka kákkáé ewe Paipel nge kesaamwo papatais, met ka tongeni káé seni Saul?

¹³ Saul a mwittir le féri siwil alóngólóng wóón met a káé. Mwirin an a kúnasefáli mwan, a papatais me poputá le chiechi ngeni ekkewe chón káé lón Tamasikos. Nge iei met a pwal féri. “Mwittir chék a poputá le afalafala lón ekkewe sinakok pwe Jises i ewe Néún Kot.”—Féf. 9:20.

¹⁴ Iká ka kákkáé ewe Paipel nge kesaamwo papatais, kopwe itá áppirú Saul me mwittir apwénúetá minne ka káé? Ewer, Saul a akkomw kúna ewe manaman Kraist a féri, me eli ina met a álisi an epwe papatais. Nge mi wor ekkóch ra pwal kúna ekkewe manaman Jises a féri. Áwewe chék, ekkewe Farisi ra kúna án Jises echikara emén mwán mi pe efóch péún, me chómmóng chón Jus ra silei pwe Jises a amanawaatá Lasarus seni máló. Nge chómmóng me leir rese mochen tapweló mwirin Jises, me ekkóch ra pwal mwo nge ú ngeni. (Mark 3:1-6; Jon 12:9, 10) Nge Saul a sókkóló, pún a siwil. Pwata Saul a wiliiti néún Kraist chón káé nge ekkewe ekkóch rese? Pún i a niwokkusiti Kot lap seni aramas me a fókkun aúcheani ewe úméúméch Kraist a pwáári ngeni. (Fil. 3:8) Iká kopwe pwal káé le ina ussun, iwe, esap wor och mettóch epwe aúkúketiw seni óm afalafal me seni óm achocho le fich ngeni papatais.

15, 16. Met Saul a féri lón ekkewe sinakok, me met meefien ekkewe chón Jus lón Tamasikos ren án Saul afalafal?

¹⁵ Anchangei meefien ekkewe aramas atun Saul a poputá le afalafala ussun Jises lón ekkewe sinakok. Ekkóch leir ra máirú, nge ekkóch ra  pwal mwo nge song. Ra apasa: “Esap pwe iei i ewe mwán a fókkun eriáfféwú chókkewe mi nóm lón Jerusalem, iir kewe mi kékkéri ei it?” (Féf. 9:21) Atun Saul a áweweei ewe popun a siwili an ekiek ussun Jises, a “ánnetaéchú ngeniir pwe Jises ewe Kraist.” (Féf. 9:22) Nge eú áwewe mi fataffatéch, ese efisi án meinisin repwe lúkú. Ese tongeni siwili ekiekin aramas mi péchéúló le eáni manaw mi lóngólóng wóón éérenien aramas are iir kewe mi lamalamtekia. Iwe nge, Saul ese fangetá.

¹⁶ Úlúngát ier mwirin, ekkewe chón Jus lón Tamasikos ra chúen ú ngeni Saul. Iwe, ra akkóta ar repwe nieló i. (Féf. 9:23; 2 Kor. 11:32, 33; Kal. 1:13-18) Atun a pwá ar na kókkót, Saul a filaatá an epwele sú seni ena telinimw lemonomon ren án ekkóch repwe senietiw lón eú pasikit lón eú asammwachoon etippen ewe telinimw. Luk a apasa pwe chókkana mi álisi Saul le sú lón ena pwinin, iir “néún [Saul] kewe chón káé.” (Féf. 9:25) Ussun a ffat me ren na wokisin pwe ekkóch me lein chókkewe mi rongorong met Saul a eáni afalafal me lón Tamasikos, ra etiwa me wiliiti néún Kraist chón káé.

17. (a) Met meefien ekkóch aramas atun ra rongorong ewe enlet seni Paipel? (b) Met a lamot sipwe sópweeló le féri, me pwata?

¹⁷ Atun ka kerán poputá le apwóróusa ngeni chón óm famili, chienom kewe, me pwal ekkóch aramas ekkewe mettóch mi múrinné ka káé, ese mwáál ka ekieki pwe iir meinisin repwe etiwa ewe enlet seni Paipel pokiten a mmen ffat. Ekkóch, neman ra etiwa, nge chómmóng rese. Féfférún chón lón imwom we ngonuk, neman epwe ussun nge en chón koputer. (Mat. 10:32-38) Iwe nge, iká kopwe sópweeló le émúrinnéló óm tufichin áweweei masouen Paipel me sópweeló le eáni napanapen Chón Kraist kewe, eli pwal mwo nge chókkewe mi ú ngonuk repwe tongeni siwili ekiekiir.—Féf. 17:2; 1 Pit. 2:12; 3:1, 2, 7.

18, 19. (a) Met a fis lupwen Parnapas a álisi Saul? (b) Ifa ussun sia tongeni áppirú Parnapas me Saul?

¹⁸ Lupwen Saul a ló Jerusalem, a ffat ewe popun pwata ekkewe aposel rese lúkú pwe i a emén néún Jises chón káé. Iwe nge, atun Parnapas a ereniir pwe Saul a wiliiti emén chón káé, ekkewe aposel ra etiwa i, me a nónnóm rer ren och fansoun. (Féf. 9:26-28) Saul a túmúnúéch me ese sáwásini ewe kapas allim. (Rom 1:16) A tipepwora le afalafal lón Jerusalem, ikewe a poputááni an angangen eriáfféwú néún Jises Kraist kewe chón káé. Lupwen ekkewe chón Jus lón Jerusalem ra silei pwe i ewe emén ra ekieki pwe epwe wisen emmweni ewe angangen arosaaló Chón Kraist nge a wiliiti emén me leir, iwe ra fókkun song, me ra mochen nieló. Nge iei met Paipel a erá ussun Saul: “Lupwen chienan kewe chón lúkú ra silei ussun ei, ra uweatiw ngeni Seseria me ra tiinaaló ngeni  Tarsus.” (Féf. 9:30) Saul a álleasochisi án ewe mwichefel kewe emmwen mi feito seni Jises. Ina minne, i me ewe mwichefel ra kúna feiéch.

¹⁹ Parnapas a akkomw mwékút le álisi Saul. Ese mwáál, ina met a efisi án néún Jiowa keei rúúemén chón angang mi tinikken repwe chiechiéch. Ka ussun Parnapas le álisi ekkewe minefé lón ewe mwichefel, fitiir lón ewe angangen afalafal, me álisiir ar repwe wiliiti Chón Kraist mi múrinné? Kopwe fókkun feiéch iká kopwe ina ussun. Nge iká en emén mi kerán wiliiti chón afalafal, kopwe ussun Saul le etiwa ewe álillis seni ekkewe ekkóch? Iká kopwe fiti ekkewe chón afalafal mi lipwákéch lón ewe angangen afalafal, epwe múrinnéló óm afalafal, lapóló óm pwapwa, me epwe wor chiechiom mi enlet tori feilfeiló.

20, 21. Ifa ussun néún Kot chón angang lóóm me lón ei fansoun ra alamota ekkewe “fansoun kinamwe”?

²⁰ Mwirin án Saul wiliiti emén Chón Kraist me ló seni Jerusalem fán núkúnúkéch, “meinisin ekkewe mwichefel lón unusen Jutia me Kalili me Sameria ra nóm lón fansoun kinamwe.” (Féf. 9:31) Ifa ussun ekkewe chón káé ra áeá ena “fansoun kinamwe”? (2 Tim. 4:2) Ewe Paipel a erá pwe ra “péchékkúleló.” Ekkewe aposel me ekkewe pwal ekkóch Chón Kraist mwán mi wor wiser, ra apéchékkúla án ekkewe chón káé lúkú me álisi chón ewe mwichefel le “feffetál lón ar niwokkusiti Jiowa me angei ourur me ren ewe ngún mi fel.” Áwewe chék, Piter a alamota ena fansoun le apéchékkúla ekkewe chón káé lón ewe fénú Saron lón ewe kinikin Litta. An achocho a efisi án chómmóng mi nónnóm ikena repwe “kul ngeni ewe Samol.” (Féf. 9:32-35) Ekkewe chón káé rese mut ngeni ekkóch mettóch ar repwe aosukosuker, nge ra fókkun achocho le pwáári ar tongfengen lefiler me fiti ewe angangen afalafal. Pokiten ena, iwe a “chék chóchchómmóngoló” chón ewe mwichefel.

²¹ Ina epwe lón ewe ier 1990, ekkewe Chón Pwáraatá Jiowa lón chómmóng fénú ra pwal nóm lón ena esin “fansoun kinamwe.” Ese chúen wor manen ekkewe mwú mi eriáfféwú néún Kot kana aramas ren fite fite ier. Ina minne, a mecheresiló án Chón Pwáraatá afalafal lón ekkewe leeni mi pinepin ewe angangen afalafal ie me ese chúen pinepin lón ekkóch leeni. Fitengéréú Chón Pwáraatá ra áeá ena fansoun le afalafal lepwápwááló, iwe chómmóng aramas ra etiwa ewe kapas allim.

22. Ifa ussun kopwe alamotaéchú ewe fansoun kinamwe ka nóm lón?

²² Ka alamotaéchú ewe fansoun kinamwe ka nóm lón? Iká ka  nónnóm lón ewe leeni ese wor pinepinen angangen lamalam ie, Setan a mochen etipetipaók óm kopwe áeá watteen óm fansoun le alapaaló wéum lap seni óm angang ngeni Jiowa. (Mat. 13:22) Kopwe túmúnúéch. Kopwe áeáfichi ewe fansoun kinamwe ka nónnóm lón iei. Ekieki pwe ina eú fansoun ka tongeni áeá le unusen pwáraaló pwóróusen ewe Mwúún Kot me apéchékkúla ewe mwichefel. Chemeni pwe nónnómun manawom a tongeni mwittir siwil.

23, 24. (a) Met sia káé seni pwóróusen Tapita? (b) Met a lamot sipwe tipeppós le féri?

²³ Ekieki met a fis ngeni emén chón káé itan Tapita, are Torkas. I a nónnóm Joppa, eú sóópw ese pwal towaw seni Litta. Ei fefin mi túppwél a áeáéchú an fansoun me wéún le féri “féffér mi múrinné” me eáni “liffangen úméúméch.” Iwe nge, ekiseló chék a semmwen me máló. c Ekkewe chón káé lón Joppa ra fókkun chúúpwúl, ákkáeúin ekkewe fefin mi má seniir pwúlúwer, iir kewe mi fókkun chúng letiper ren an kirekiréch. Lupwen Piter a wareiti ewe imw, ikewe ia ra ammólnatá somáán we ngeni peiás, a féri eú manaman néún Jises Kraist kewe aposel resaamwo féri fán eú. Piter a iótek, iwe mwirin a amanawaatá Tapita! Anchangei pwapwaan ekkewe fefin mi má seniir pwúlúwer me ekkewe pwal ekkóch chón káé atun Piter a kérisefálliirelong lón ewe ruumw me ápwár ngeniir pwe Tapita a manaw! Minne a fis lón ena atun, neman a apéchékkúler ngeni ekkewe sóssót epwe toriir mwirin. Ese wor tipemwárámwár pwe ena manaman “a chéúfetál lón unusen Joppa, me chómmóng ra wiliiti chón lúkú ewe Samol.”—Féf. 9:36-42.

²⁴ Sia tongeni káé ruu mettóch mi lamot seni met a fis ngeni Tapita. (1) A tongeni weiweitá múchchún manawach. Iwe, a fókkun lamot ach sipwe féri met sipwe itéch ren me ren Kot atun sia chúen manaw. (SalAf. 7:1) (2) Epwe fókkun fis ewe manawsefál. Jiowa a kúna chómmóngun án Tapita féfférún kirekiréch me a efeiéchú. I epwe pwal chechchemeni ach angang weires me epwe amanawakichetá iká sia máló me mwen fisin ewe  Armaketon. (Ipru 6:10) Ina minne, ese lifilifil iká sia nóm lón “fansoun weires” are lón “fansoun kinamwe,” sipwe tipeppós le unusen pwáraatá pwóróusen Kraist.—2 Tim. 4:2.