1-3. (a) Ifa ewe mettóch mi eniwokkus a fis ngeni Stifen, nge a fet napanapan? (b) Ikkefa ekkewe kapas eis sipwele pwóróus wóón?

 STIFEN a sápe ngeni chón ewe soukapwúng mi tekia. Lón eú ruumw mi watte, eli kane ngeni ewe imwenfel lón Jerusalem a wor 71 mwán ra mómmóót mwan. Ekkeei soukapwúng, iir án chón Jus we mwichen soukapwúng mi tekia, ra mwichfengen pwe repwe apwúngú Stifen. A fókkun watte maner me lape ngeniir rese súféliti néún Jises kewe chón káé. Me ewe Souasor mi Lapalap Kaifas a emwichafengeni ekkena soukapwúng, i ewe a pwal mesemes wóón ewe kapwúng pwe Jises epwe ninniiló fitu maram mwen ei. Itá Stifen a niwokkus?

² Wówóón wóón mesen Stifen a mmen amwarar. Ekkena soukapwúng ra newenewen ngeni me ra kúna pwe wóón mesan “a ussun wóón mesen emén chónláng.” (Féf. 6:15) Ekkewe chónláng ra wisen atoura pwóróus seni Jiowa Kot, ina minne ese wor popun ar repwe niwokkus nge ra chék mosonoson me uren kinamwe. Iwe a pwal ina ussun ren Stifen, ekkena soukapwúng mi uren koput ra pwal mwo nge tongeni kúna. Met a álisi an epwe mosonoson me kinamwe?

³ Chón Kraist lón ei fansoun, ra tongeni káé chómmóng mettóch seni pélúwen ena kapas eis. A pwal lamot ach sipwe silei met Stifen a féri pwe iwe a nóm lón ena imwen kapwúng. Ifa ussun a penaatá an lúkú me mwan? Me ifa ussun sipwe tongeni áppirú?

4, 5. (a) Pwata Stifen a fókkun álilliséch ngeni ewe mwichefel? (b) Met weween án Stifen “uren chen me ren Kot me manaman”?

⁴ Sia fen káé pwe Stifen a fókkun álilliséch ngeni ewe mwichefelin Chón Kraist mi kerán fférútá. Lón ewe sópwun mwen ei, sia  káé pwe i emén me lein ekkewe fúmén mwán mi tipetekison mi etiwa eú wis mi aúchea seni ekkewe aposel. Sia fókkun mwaar ren an tipetekison atun sia chemeni pwe Kot a fang ngeni chómmóng tufich. Lón Féffér 6:8, a mak pwe a tufichin féri “watteen manaman me esissil” ussun minne ekkewe aposel ra tongeni féri. Sia pwal káé pwe a “uren chen me ren Kot me manaman.” Met weween ena?

⁵ Ewe kapasen Krik mi afféú ngeni “uren chen me ren Kot” a pwal tongeni wewe ngeni “kirekiréch.” A ffat pwe Stifen a aramaséch me tipepwetete ina popun chómmóng aramas ra sani le nóm ren. Atun a kan fós ngeni aramas, ra meefi pwe a fós ngeniir seni enletin letipan me ewe enlet a asukula epwe émúrinnéló manawer. A uren manaman pokiten án Jiowa we ngún mi fel a álisi, me fán tipetekison a mut ngeni ena ngún mi fel an epwe emmweni. Ese lamalamtekia pokiten tufichin kewe. Nge a fen ngeni Jiowa ewe ling me a pwáári pwe a chúngú chókkewe a fós ngeniir. Esap pwata iwe chón oputa i ra meefi pwe i emén chón efitikokooi ar lamalam!

6-8. (a) Ikkefa ekkewe ruu mettóch chón oputa Stifen ra tipi ngeni wóón, me pwata? (b) Pwata a mmen álilliséch pwóróusen Stifen ngeni Chón Kraist lón ei fansoun?

⁶ Ekkóch mwán ra sótun ánini ngeni Stifen nge ‘rese tongeni ú ngeni pwe i a kakkapas fán watteen tipáchem me ren álillisin ewe ngún mi fel.’ a Pokiten rese tongeni pwáári pwe ra pwúng, iwe “ra etipetipa ekkewe mwán lemonomon” pwe repwe mwakenetá pwóróus ussun ei mwán ese wor tipisin nge mi tapweló mwirin Kraist. Ra pwal “asongaatá letipen ekkewe aramas,” ekkewe néúwisin Jus, me ekkewe soumak, pwe repwe átekinaló Stifen mwen mesen ewe soukapwúng tekia. (Féf. 6:9-12) Chókkana mi ú ngeni ra erá pwe a féri ekkeei ruu mettóch: A turunufasa Kot me Moses. Ifa ussun?

⁷ Ekkena chón tipimwáál ngeni Stifen ra erá pwe a turunufasa Kot ren an apasa met mi ngaw ussun ewe imwenfel lón Jerusalem eú “leeni mi pin.” (Féf. 6:13) Ra pwal erá pwe a ekkesiwili ekkewe ééreni Moses a ákkáiti ekkewe aramas, weween a ú ngeni ewe Allúkún Moses me a ésúfélúngawa. A mmen watte ekkena sókkun tipis pokiten ekkewe chón Jus lón na atun, ra fókkun aúcheani ewe imwenfel, ewe Allúkún Moses, me ekkewe chómmóng ééreni ra apachaalong lón ena Allúk. Iwe, minne ra tipimwáál ngeni Stifen a wewe ngeni pwe i emén mi efisi fitikoko, me a fich ngeni an epwe ninniiló!

 ⁸ A mmen eletipechou pokiten fán chómmóng chókkewe mi achocho lón lamalam ra féri ekkena sókkun mettóch pwe repwe osukosuka néún Kot kewe chón angang. Lón ei fansoun, fán ekkóch chókkewe mi echeni ar lamalam ra pesei ekkewe néúwisin mwú ar repwe eriáfféwú Chón Pwáraatá Jiowa. Met sipwe féri atun aramas ra chofonatá pwóróus ussuch? Sia tongeni káé chómmóng seni pwóróusen Stifen.

9, 10. Met ekkóch ra erá ussun án Stifen afalafal mwen án chón Jus we mwichen soukapwúng mi tekia, me met sipwe chemeni?

⁹ Ussun met a fen mak lepoputáán ei lesen, wówóón wóón mesen Stifen a ussun mesen emén chónláng me a chék mosonoson atun a rong ar kapasen otuttur. Iwe Kaifas a nengeni me ereni: “Mi pwúng ekkeei mettóch?” (Féf. 7:1) Iwe iei Stifen epwele fós, me a fós fán pwora!

¹⁰ Ekkóch rese sani án Stifen afalafal pokiten ra erá inaamwo iká a ttam, nge ese ánneta pwe ese wor tipisin. Nge ren enletin, Stifen a isettiw eú leenien áppirú mi múrinné fán itach ren ifa ussun sipwe “pélúweni chókkewe mi eis” ussun ewe pwóróus allim. (1 Pit. 3:15) Chemeni pwe aramas ra tipimwáál ngeni Stifen pwe a ésúfélúngawa Kot pokiten ra erá pwe a apasa met mi ngaw ussun ewe imwenfel me a ésúfélúngawa Moses ren an ú ngeni ewe Allúk. Stifen a fós ussun úlúngát fansoun lón uruwoon Israel, me a menlapei ekkóch pwóróus mi lamot. Iei sipwele etittina eú me eú ekkena úlúngát atun lón uruwoon Israel.

11, 12. (a) Pwata Stifen a apachaalong pwóróusen Eperiam lón an we afalafal? (b) Pwata Stifen a fósun Josef lón an we afalafal?

¹¹ Fansoun semelapen ekkewe chón Israel. (Féf. 7:1-16) Stifen a poputááni an afalafal ren an fós ussun Eperiam, ewe ekkewe chón Jus ra fókkun súféliti pokiten an lúkú. Stifen a poputá le fós ussun ena pwóróus pokiten a silei pwe iir meinisin repwe tipeeú ngeni wóón, me a menlapei pwe Jiowa “ewe Koten ling,” a akkomwen pwáári i ngeni Eperiam me lón Mesopotamia. (Féf. 7:2) Ren enletin, Eperiam i emén choisá lón ewe Fénúen Pwon. Me ikena ie, ese wor ewe imwenfel me ewe Allúkún Moses. Ina popun, ifa ussun emén a tongeni péchéú le erá pwe túppwél ngeni Kot a chék lóngólóng wóón ewe imwenfel are ekkewe allúk?

¹² Chókkana mi aúseling ngeni Stifen ra pwal fókkun súféliti Josef, mwirimwirin Eperiam, nge Stifen a pwal áchchema ngeniir pwe pwiin Josef kewe, iir semelapen ekkewe einangen Israel, ra eriáfféwúmwááli ena mwán mi pwúng me améméló pwe epwe slave. Iwe nge, Kot a  néúnéú pwe epwe seláni ekkewe chón Israel seni lengita. Stifen a silei pwe minne a fis ngeni Jises a pwal léllé ngeni minne a fis ngeni Josef. Nge ese aléllééi Jises ngeni Josef lón an we afalafal pokiten a mochen chókkewe mi aúseling ngeni repwe aúselinga unusen an afalafal.

13. Ifa ussun án Stifen pwóróus ussun Moses a ánneta pwe mi mwáál minne chón oputa ra etipisi wóón, me met a affata ussun néún Kot kewe aramas?

¹³ Fansoun Moses. (Féf. 7:17-43) Stifen a erá chómmóng mettóch ussun Moses. An féri ena a pwáári an mirit, pokiten lape ngeni chón ewe mwichen soukapwúng tekia iir Satusi. Ra oput meinisin ekkewe puk lón Paipel chilóón chék ekkewe Moses a makkeei. Sipwe pwal chemeni pwe ra tipi ngeni Stifen pwe a ésúfélúngawa Moses. Nge a ánneta pwe ra mwáál pokiten a pwáári pwe a fókkun súféliti Moses me ewe Allúk. (Féf. 7:38) A pwal erá pwe pwiin Moses kewe ra ú ngeni, inaamwo iká a achocho le álisiir. Ra ú ngeni atun a 40 ierin. Me lap seni 40 ier mwirin, ra ú ngeni fán fite. b Iwe pokiten án Stifen féri ena, ekis me ekis a affata met néún Kot kewe aramas ra féri: Fán chómmóng ra ú ngeni chókkewe Jiowa a seikiiretá le emmweniir.

14. Stifen a áeá pwóróusen Moses le ánneta menni pwóróus mi aúchea?

¹⁴ Stifen a áchchema ngeni chókkewe mi aúseling ngeni pwe Moses a oesini pwe epwe pwá me lón Israel emén soufós ussun i. Nge ién na, me epwe met meefien aramas ussun? Stifen a pélúweni an kana kapas eis lesópwólóón an we afalafal. A pwal pwóróus ussun och mettóch mi aúchea: Atun Jiowa a fós ngeni Moses lón ewe irá mi pulopulen ekkei, a pin  ewe pwúl, iwe a káé pwe Jiowa a tongeni epini ese lifilifil leeni. Iwe, itá Jiowa a mochen aramas repwe fel ngeni seni lón chék ewe imwenfel Jerusalem? Sipwele ppii.

15, 16. (a) Pwata Stifen a fós ussun ewe imwenfel mangaku? (b) Ifa ussun Stifen a áeá pwóróusen án Salomon we imwenfel lón an afalafal?

¹⁵ Ewe imwenfel mangaku me ewe imwenfel. (Féf. 7:44-50) Stifen a ereni chón ewe mwichen soukapwúng tekia pwe me mwen fférún ewe imwenfel Jerusalem, Kot a ereni Moses an epwe féri eú imwenfel mangaku, ina och tento fán iten fel, nge ra tongeni amwékútú. Ese wor emén me leir epwe erá pwe ena imwenfel mangaku, ewe Moses a féri me fel lón, ese aúchea ussun ewe imwenfel Jerusalem.

¹⁶ Mwirin och fansoun, atun Salomon a aúetá ewe imwenfel Jerusalem, a erá och mettóch mi fókkun lamot lón an iótek. Iwe Stifen a pwal apasa ei, “ewe mi Unusen Tekia Seni Meinisin ese kan nónnóm lón ekkewe imw férien péún aramas.” (Féf. 7:48; 2 Kron. 6:18) Eli Jiowa a tongeni áeá eú imwenfel le apwénúetá letipan, nge a pwal tongeni apwénúetá letipan inaamwo iká ese wor. Ina popun, chókkewe mi fel ngeni resap ekieki pwe ra chék tongeni fel ngeni lón ewe imwenfel, férien aramas. Stifen a asopwaló an afalafal ren ei pwóróus mi fókkun aúchea seni ewe puken Aisea: “Láng ái leenien móótun king, nge fénúfan leenien pwuun pechei. Met sókkun imw kopwe aúetá fán itei? Are, ifa ái leenien asésé? Esap pwe pei a féri ekkeei mettóch meinisin?”—Féf. 7:49, 50; Ais. 66:1, 2.

17. Ifa ussun án Stifen afalafal a (a) affata pwe a mwáál ekiekin chókkewe mi aúseling ngeni, me (b) ánnetatá pwe ese féri och mettóch mi mwáál?

¹⁷ Atun sia ekieki ussun minne Stifen a apasa, sia kúna pwe a affata ngeni chókkewe mi tipimwáál ngeni pwe a mwáál ekiekiir. A pwáári pwe Jiowa ese tichik me ese pwal nóm fán nemenien éérenien aramas, nge a tipemecheres le féri siwil iká mi lamot pwe epwe apwénúetá letipan. Chókkana mi aúseling ngeni án Stifen na afalafal ra fókkun aúcheani ewe imwenfel mi lingéch lón Jerusalem me ekkewe chómmóng ééreni ra apachaalong lón ewe Allúkún Moses. Nge rese weweiti pwata Jiowa a awora ena Allúk me pwata a akkóta kaúún ena imwenfel. Iwe seni án Stifen we afalafal a eppiietá ei esin kapas eis mi lamot: Esap pwe sia tongeni enletin súféliti ewe Allúk me ewe imwenfel ren ach álleasochisi Jiowa? Alon Stifen kana a ánneta pwe ese féri och mettóch mi mwáál, pún a álleasochisi Jiowa ren úkúúkún an tongeni.

18. Ifa ussun sipwe áppirú Stifen?

¹⁸ Met sia tongeni káé seni án Stifen we afalafal? A fókkun silefichi masouen ekkewe wokisin. Pwal ina chék ussun ren kich, a lamot sipwe  káéfichi án Kot we Kapas iká sia mochen “afalafalaéchú me áweweéchú ewe kapas mi enlet.” (2 Tim. 2:15) Sia tongeni káé seni Stifen ach sipwe fós ngeni aramas fán kirekiréch nge sisap fen áchepetekiir. Chókkana mi aúseling ngeni ra fókkun arochongaw! Nge a achocho úkúúkún an tufich le fós ngeniir ussun ekkewe mettóch ra tipeeúfengen wóón pokiten ikkena ekkewe mettóch a mmen aúchea ngeniir. A pwal fós ngeniir fán súfél me a kér ngeni ekkena mwán mi chinnap, “semei kana.” (Féf. 7:2) A pwal lamot ach sipwe afalafala ewe enlet seni án Kot we Kapas “fán mosonoson me watteen súfél.”—1 Pit. 3:15.

19. Ifa ussun Stifen a atoura án Jiowa kapwúng fán pwora ngeni ewe mwichen soukapwúng mi tekia?

¹⁹ Iwe nge, sise kaúló le afalafala ewe enlet seni án Kot we Kapas, pokiten sia niwokkus le áchepeteki aramas. Sisap pwal siwili án Jiowa kapwúng ren ach sipwe apwapwaai aramas. Stifen a isettiw eú leenien áppirú mi múrinné fán itach. A fókkun mirititi pwe ekkena soukapwúng mi lamalamtekia rese siwil inaamwo iká a pwáár ngeniir chómmóng pisekin ánnet. Iwe án Jiowa we ngún mi fel a amwékútú le asopwaló an we afalafal fán pwora ren an ereniir pwe ra ussun semelaper kewe mi ú ngeni Josef, Moses, me meinisin ekkewe soufós. (Féf. 7:51-53) Ren enletin, iir ekkewe soukapwúng mi nieló ewe Messaia, ewe Moses me meinisin ekkewe soufós ra oesini warotoon. Ewer a kon ssenúk ngawen ar álleasolapa ewe Allúkún Moses!

20, 21. Met meefien ekkena soukapwúng ussun alon Stifen kana, me ifa ussun Jiowa a apéchékkúla?

²⁰ Ekkena soukapwúng rese tongeni pélúweni minne Stifen a erá, pokiten a pwúng. Ina popun ra fókkun song me rese chúen tongeni pwouni, iwe ra assúngúrú ngiir ngeni. Ese wor tipemwárámwár pwe ena mwán mi túppwél a silei pwe esap kúna úméúméch seni ekkena soukapwúng, ussun chék néún we Masta, Jises.

²¹ A lamot ngeni Stifen pwora pokiten met epwele fis ngeni, me a fókkun péchékkúletá ren kúnaan we Jiowa a fang ngeni fán kirekiréch. Stifen a kúna lingen Kot, me a kúna án Jises úkkúútá lepeliefichin Jiowa! Atun a áweweei ngeni ekkena soukapwúng kúnaan we, ra pinei selinger. Pwata? Fitu maram mwen ena, Jises a ereni ekkena soukapwúng pwe i ewe Messaia me ekiseló chék epwe nóm lepeliefichin Seman we. (Mark 14:62) Kúnaien Stifen na a ánnetatá pwe mi enlet minne Jises a apasa. Ewer, ekkena soukapwúng ra afangemá me nieló ewe Messaia! Fán eú chék, iir  meinisin ra rangeiti Stifen me oturawu me ra manei ngeni faw tori an máló. c

22, 23. Ifa ussun án Stifen máló a ussun málóón néún we Masta, me ifa ussun Chón Kraist lón ei fansoun ra tongeni eáni ewe esin lúkúlúk Stifen a eáni?

²² Atun Stifen a máló a ussun néún we Masta, a enletin kinamwe me unusen lúkúlúk wóón Jiowa, me a omusaaló tipisin chókkewe mi nieló. A erá, “Samol Jises, úa onómu manawei lepoum,” eli pokiten a chúen tongeni kúna Jises me Jiowa. Ese mwáál, Stifen a silefichi alon Jises keei mi apéchékkúl: “Ngang ewe manawsefál me ewe manaw.” (Jon 11:25) Sáingolóón, Stifen a iótek ngeni Kot fán léúwommóng: “Jiowa, kosap ngeniir chappen ei tipis.” Mwirin an apasa ena, a méúrúló lón máló.—Féf. 7:59, 60.

²³ Stifen i ewe áeménún chón káé mi ninniiló lepéún chón oputa. (Ppii ewe pwóór “ Stifen A Máló Pokiten A Afalafal Ussun Jises”.) A mmen eletipechou pwe a wor chókkewe mi pwal ninniiló mwirin. Tori lón ach ei fansoun, ekkóch néún Jiowa chón angang mi túppwél ra ninniiló lepéún chókkewe mi kon péchékkúl lón lamalam, achocho lón politics, me mi chék kirikiringaw. Nge, sia tongeni lúkúlúk lón Jiowa ussun chék Stifen. Jises a wisen King iei, me Jiowa a fang ngeni watteen manaman. Ese wor met epwe eppeti seni an amanawasefáli néún kewe chón káé mi túppwél.—Jon 5:28, 29.

24. Met Saul a féri atun Stifen a ninniiló, me ifa ussun málóón ena mwán mi túppwél a achchúngú chómmóng aramas?

²⁴ Emén mwán itan Saul a nóm atun Stifen a ninniiló. A tipeeú ngeni ninniilóón me a pwal mwo nge túmúnú úfen chókkewe mi mammanei. Ekiseló mwirin ena, a poputá le eriáfféwúmwááli néún Jises kewe chón káé. Nge án Stifen máló epwe achchúngú chómmóng aramas. An leenien áppirú epwe apéchékkúla ekkóch Chón Kraist ar repwe akkamwéchú ar túppwél ngeni Jiowa tori máló. Pwal och, Saul ewe mi iteni Paul mwirin, a fókkun niamam ren minne a féri atun Stifen a ninniiló. (Féf. 22:20) A álillis le nieló Stifen, nge mwirin och fansoun a mirititi ei: “Ngang emén chón turunufasa Kot me chón eriáfféwú néún kewe chón káé me emén mi ésúfélúngaw.” (1 Tim. 1:13) A ffat pwe Paul ese namanaaló Stifen me an we afalafal lón na ránin. Ren enletin, ekkóch án Paul kewe afalafal me minne a makkeei a riri ngeni minne Stifen a apachaalong lón an we afalafal. (Féf. 7:48; 17:24; Ipru 9:24) Mwirin och fansoun, Paul a unusen áppirúfichi án Stifen lúkú me pwora, i emén “mi uren chen me ren Kot me manaman.” Iwe kapas eis, Sipwe pwal áppirú Stifen?