Ngeni Chón Afalafal mi Áchengicheng:

Anchangei pwe en emén ekkewe aposel mi nóm wóón ewe Chukun Olif. Jises a pwá ngenikemi. Me mwen chék an epwele feitá láng a erá: “Oupwe angei manaman atun ewe ngún mi fel epwe feito wóómi, me oupwe chón pwáraatá ussui lón Jerusalem, lón unusen Jutia me Sameria, me tori lesopwuchikin fénúfan.” (Féf. 1:8) Epwe met meefiom?

Neman ka meefi pwe a kon chou ena wis. Eli kopwe ekieki, ‘Ifa ussun áúpwe afalafal “tori lesopwuchikin fénúfan,” nge ám chókúkkún chék?’ Eli ka chemeni án Jises ei kapasen éúréúr lón ewe pwinin me mwen chék an epwele máló: “Emén slave esap lap seni néún masta. Iká ra eriáfféúei repwe pwal eriáfféwúkemi. Iká ra álleasochisi ái kapas, repwe pwal álleasochisi ámi kapas. Nge repwe féri ekkeei mettóch meinisin ngenikemi pokiten itei, pún rese silei ewe Emén mi tiinieito.” (Jon 15:20, 21) Atun ka ekieki an kana kapas eli ka pwisin eisinuk, “Ifa ussun úpwe tongeni unusen pwáraatá ewe enlet lón ewe angangen afalafal inaamwo iká aramas repwe eriáfféwúmwááliei?”

Sia pwal kúna ena lón ei fansoun. A lamot sipwe unusen pwáraatá ewe enlet lón ewe angangen afalafal “tori lesopwuchikin fénúfan,” me ngeni “aramasen mwú meinisin.” (Mat. 28:19, 20) Ifa ussun sipwe apwénúetá ei angang inaamwo iká aramas repwe ú ngenikich?

Ewe puken Féffér a masou ren ekkewe pwóróus mi ámmeseik ussun ekkewe aposel me chiener kewe Chón Kraist me ifa ussun ra apwénúetá wiser ren án Jiowa álillis. Ei puk ka álleani iei epwe álisuk le káé ussun ekkewe chómmóng mettóch mi fis ngeni ekkena Chón Kraist me kopwe pwal meefi ewe esin pwapwa ra meefi pokiten a mwittir chéúló ewe angangen afalafal. Kopwe máirú ren ekkewe chómmóng mettóch ekkena Chón Kraist me kich sia lélléfengen wóón. Kopwe kúna pwe ese chék léllé ewe angang sia féri nge a pwal léllé kókkótun ach féri ena angang. Atun ka ekiekifichi ekkena pwóróus, epwe fókkun lapóló óm lúkúlúk pwe Jiowa Kot a chúen sópweeló le ekkemmweni an we mwicheich wóón fénúfan.

Áúa áneánei fiti iótek pwe óm káéfichi ewe puken Féffér epwe alapaaló óm lúkúlúk pwe Jiowa epwe álisuk me epwe áeá an we ngún mi fel le elikiitúk. Atun ka apwénúetá minne ka káé lón ei puk, epwe apéchékkúlok le sópweeló le “unusen pwáraatá” pwóróusen ewe Mwúún Kot me álisi aramas le kúna manaw.—Féf. 28:23; 1 Tim. 4:16.