Lón ewe October 1, 2023, Pwiich Carlito Dela Cruz, emén chón lón ewe Kúmiin Chón Túmúnú Keangen Ofesilap lón Micronesia, a atowu lón fósun Chúúk ewe Kapasen Kot—Paipelin Ótót Séfé (Mattu-Pwáraatá). A wor wanik me úlúmén chóchóón chón fiti ena mwiich mi kkóló aúchean atun a apio katowuun ena Paipel. A pwal wor fépúkú ilik me nimmén chón fiti online, kapachelong ekkewe mwichefel me kúmi lón fósun Chuuk lón Guam me Merika. Mwirin chék katowuun ena Paipel, a kawor lón digital edition, weween sia chék tongeni download me wóón ewe Internet. Nge ewe printed edition are wesewesen puk, epwap kawor lón January 2024.

Fósun Chuuk, ina ewe fós chón ewe fénú Chuuk ra kan eáni, ewe fénú mi nóm notoun Pacific Ocean, me ena fénú ina kinikinin Federated States of Micronesia. Chón Pwáraatá Jiowa ra poputá le chiyakúúni lón fósun Chuuk ekkewe puken álillisin Paipel lón ewe ier 1978. Lón ei fansoun, a wor ina epwe 180 Chón Pwáraatá Jiowa lón ekkewe ruu mwichefel lón Chuuk, eú mwichefel lón Guam, eú lón Merika, me pwal ekkewe úlúngát kúmi lón fósun Chúúk lón Merika, kapachelong pwal ewe eú pregroup ikena.

Inaamwo iká a fen wor Paipel mi chiyakú lón fósun Chuuk, nge iten Kot we, Jiowa ese nóm lón lape ngeni ekkena Paipel. Ewe Paipelin Ótót Séfé, a eliwinalóng iten Kot we mi pin lón úrúrún leenian. Iei met Pwiich Dela Cruz a apasa: “Úa fókkun lúkúlúk pwe ei afféún Paipel epwe álisi chómmóng aramas iir mi eáni fósun Chuuk le silei esap chék iten Jiowa we, nge epwe pwal álisiir le ririéch ngeni I.”

Sia fókkun pwapwa ren katowuun ewe Paipelin Ótót Séfé lón fósun Chuuk pokiten epwe álisi chómmóng “chókkewe letiper a páengeni ar repwe etiwa ewe enlet mi awora manaw esemuch” le káé ussun Jiowa.—Féffér 13:48.