•  Dhowenjedhedha Dhoroma 2

•  Mafumo a Mazu a Mulugu 3-5

  •  Diskursu 3

  •  Mafumo Omuyani 4

  •  Wengesa wa Bibilia 5

•  Ovilibihedhe Mmabasani a Olaleya 6-14

  •  Oroma Makani 7

  •  Wunuwihe Efunelo 8

  •  Mabasa a Wakosa Anamafwara 9

  •  Otapulele Dhinrumeliwe 10

  •  Diskursu 11

  •  Dhilimo 12

  •  Dhinfuneyavo 13

  •  Olabihedha Mavidiyu Vina Manivuru 14

•  Yeddelo ya Akristu 15-16

  •  Nsunzo na Bibilia na Mulogo 16

•  Dhowenjedhedha Dhomariha 17

•  Otamalela Vina Ovaha Malago 18

•  Wang’anela Mudhidhi 19

•  Sumana ya Nameddelela Milogo 20

•  Sumana ya Mutugumano wa Murudda obe wa Ttattamwa 21

•  Sumana ya Wubuwela Okwa wa Yezu 22

•  Musogorheli wa Yeddelo na Mabasa a Matugumano 23

Mwimeleli wa Yeddelo na Mabasa a Matugumano 24

•  Mabasa a Mbali oli Namalaga 25

•  Mburo Mwina wa Anamasunza 26

•  Mavidiyu 27

1. Malago anfwanyeya dokumentu eji, anele wakamihedha otene ankosa dhipaddi mmatugumanoni a Mabasa na Yeddelo Yehu ya Okristu. Ahinatti osasanyedha dhipaddi dhawa awene anofwanyela osunza wili malago anfwanyeya mu Nivuru Nehu na Mabasa vina Yeddelo Yehu ya Okristu vina anfwanyeya dokumentu eji. Anamalaleya otene anofwanyela wobiwa wi akosege vipaddi dhinttomeliwa anamasunza. Attu ena anona sumana dhotedhene matugumano kakoddihiwe okosa vipaddi dha anamasunza; enfuneya ja aweneya okala attu anrumela dhinsunzihiwani mBibiliani vina wedda n’ekalelo eneddana Mukristu. Musogorheli wa Mabasa na Yeddelo ya Okristu onofwanyela osekeserha na muttu-muttuvi ohile namalaleya, enfwanyeliye okosa wila akosege dhipaddi, ngamala amwaddele akala iyeneya onorumeeliwa. Ejiya enofwanyela okosiwa balivo namasunziha waye (obe balivo babe obe maye oli mukristu). Dhinfuneyadha wila muttu awodhe wakwanihedha, sakakene dhinfuniwana muttu onfuna okala namalaleya wohibatiziwa.—od-T kap.8 nikuku.8.

2. Mutala modha. Sumana dhotedhene omamalelo wa jibo vina nlobelo noroma, mwimeleli wa epaddi ya Matugumano a Yeddelo Yehu ya Okristu, onogwaddela masunziho anfuna osunziwa labonene-ntto. Iyene vina onofwanyela oromola mazu anoneya ninga amakamaka anapurelihemo mulogo.

 3. Diskursu: Mitala 10. Mutomaya na anamusorhoya eli obe araru dhinolebiwa va Nivuruni na Mabasa a Matugumano. Epaddi eji, onttomeliwa munddimuwa wa mulogo obe mudhari wokamihedha onrumeliwa na anddimuwa a mmulogoni. Nigaromiwaga nivuru na Bibilia niswa ninengesiwe vasumananiva, vanolagihiwa vidiyu entapulela nivuruna. Namakosa epaddiya aladdanihege masunzoya na dhilogiwe mvidiyunimwa. Enofuneya iyeneya okana ebaribari yawi ohimala ologa mitoma dhotedhene dhilebiwe munivuruni na mabasa. Mudhidhi ogahalawo namakosa mpaddiya aloge mafoto alivo wi enjivihe masunzoya. Enorumelihiwa namakosa diskursu olabihedha miselu dhinfwanyeya mmapublikasauni mena bari akala miseludha dhinele wiwanana na makani enfwanyeya munivuruni nehu na mabasa.

 4. Nipepese Mafumo a Omuyani: Mitala 10. Obu mpaddi wa mavuzo na dhowakula, kuna mazu ofugulana nne ogomihiwana. Onttomeliwa munddimuwa wa mulogo obe mudhari wokamihedha onrumeliwa na anddimuwa a mulogo. Akose mavuzo otene alivo. Ddi iyene vina onsakula malebo alebeliwevo abuwene anfuna wengesiwa. Abale antonyiwa wi avahe dhowakula dhawa, aloge mwari mwa masegundo 30 obe dhohifiya.

 5. Wengesa wa Bibilia: Mitala 4. Epaddi eji ya anamasunza, anttomeliwa anamasunza ali alobwana. Namasunzaya engese epaddi ettomeliwiye; kaloge mazu ofugulana obe ogomihana. Mwimeleli w’epaddiya amukalele mento namasunzaya wi amukamihedhe wengesa n’ekalelo yawakwana-wene, yononeleyamo, yobaliwana, na ttontto, asanzaga nipadduwo ninengesiye, emelaga munfuneya, vina n’ogalamuwa. Vowi masaka mena maversu anttomeliwa namasunza anowinjiva mena anoyeva, musogorheli wa Mabasa vina Yeddelo Yehu ya Okristu onofwanyela opima ewodhelo ena namasunza ddi namasunza.

6. Mitala 15. Epaddi eji ya matugumano esasanyedhiwe wi yawodhihe otene oviwaralihedha mabasa a okala namasunziha vina namalaleya wa ttontto. Egawoneya ojombeliwa wa anamasunza, enorumelihiwa anddimuwa a mulogo okosa dhipaddi dha anamasunza. Namasunza ddi namasunza onofwanyela osunza vina ovirihamo nzunzo nittomeliwiye mu broshurani Ovilibihedhe obe Attu Okwela ninfwanyeya mwari mwa parenti osogorho wa epaddi enttomeliwiye mMabasani Na Yeddelo yehu ya Okristu. Mudhidhi na mudhidhi ninelege okana epaddi ya “Yoriganela’’. Epaddiya enofwanyela okosiwa na munddimuwa wa mulogo obe mudhari wokamihedha worumeeliwa.—Koona ddima  15 enloga mwaha wa okosa epaddi ya Yoriganela.

 7. Oroma Makani: Epaddi eji enowodheya okosiwa na namasunza wa mulobwana obe wa muyana. Mukamihedhiya onofwanyela okala wa yano yakakene obe munamudhi. Namasunza na mukamihedhi waye akana ofuru wa ogilati obe wimela.—Wila ofwanye miselu dhina dha epaddi eji vina mukoseloya koona ddima  12 na  13

 8. Wunuwihe Efunelo: Epaddi eji enowodheya okosiwa na namasunza wa mulobwana obe wa muyana. Mukamihedhiya onofwanyela okala wa yano yakakene. (km-T 5/97 nikuku. 2) Namasunza na mukamihedhi waye akana ofuru wa ogilati obe wimela. Namasunzihaya onofwanyela ologa mazu anunuwiha efunelo elagihile namasunza mowiwanana na makani alogilani dila yoroma.—Wila ofwanye miselu dhina dha epaddi eji vina mukoseloya koona  12 na  13

 9. Mabasa a Wakosa Anamafwara: Epaddi eji enowodheya okosiwa na namasunza wa mulobwana obe wa muyana. Mukamihedhiya onofwanyela okala wa yano yakakene. (km-T 5/97 nikuku. 2) Namasunza na mukamihedhi waye akana ofuru wa ogilati obe wimela. Epaddi eji enofwanyela olagiha epaddi eng’onovi ya nsunzo na Bibilia niromile. Kavali ofuneya wa okana mazu ofugulana vina ogomihana alabihedhe bahi akala namasunzaya onang’aniwa dhipaddene esi. Kili yofuneya wengesa ddima dhotedhene dhittomeliwani na lizu nowiweya, masiki akala ejoya enowodheya.

 10. Otapulele Dhinrumeliwe: Akala diskursu, epaddi eji enofwanyela okosiwa na namasunza wa mulobwana. Egakala nlagiho enowodheya okosiwa na namasunza wa mulobwana vina wa mwiyana. Mukamihedhiya onofwanyela okala wa yano yakakene obe munammudhi. Namasunza onofwanyela wakula nivuzo na epaddiya na mazu ononeleyamo vina na nriho alabihedhaga miselu dhindela publikasau ettomeliwiye. Namasunza okana ofuru wa ologa obe ohiloga publikasau mundela miselu ya epaddi yaye.

 11. Diskursu: Epaddi eji enofwanyela ottomeliwa namasunza wa mulobwana vina ekosiwe ninga diskursu. Akala diskursuya endela mwa yowenjedha ya broshura Attu Okwela namasunzaya onofwanyelela otapulela marhe a olabihedha maleboya mmalaleyoni. Ninga motagiha iyene onofwanyelela otapulela marhe a olabihedha, entapulelani, vina marhe a otanalela na attu mmalaleyoni. Akala diskursuya endela mmasunzoni a broshura Attu Okwela, namasunza onofwanyela ofwaseyela otapulela mulabihedho wa nsunzona mmabasani a olaleya. Enowodheya iyene oromola yotagiha enfwanyeya ddima yoroma ya nsunzona obe nlebo na wenjedhedha nili vansunzoniva, egakala yofuneya.

   12. Dhilimo: Miselu dhinfwanyeya ddima eji na enfwarela dhinlabihedhiwa mwari mwa dhipaddi dhinfwarela: “Oroma Makani” vina “Wunuwiha Efunelo”. Nigahakele malago mena, yogana ya namasunza ja ovuwiha ebaribari ya mBibiliani yovevuwa eli ya ttima mwa muttuya onvuruwana vina wila awodhe ottiya makani anamuttukulele omuyelela mwanamuralaya. Namasunzaya onofwanyela osakula makani anlogiwetxa mmuruddanimwa nsakanenento vina ofwanyelela. Iyene okana ofuru wa ogana akala onele olagiha nivuru obe vidiyu ya Muttumbini Mwehu mwa Dhipano Dhosunziha. Anamasunza anofwanyela ovilibihedha wunuwiha mikalelo dhoromana makani ninga watanaala attu vina ologa na mukalelo wobaliwana ottiya okoya mazu vina wiyelelaga ologa abuwene.

   13. Dhinfuneyavo: Namasunza onofwanyela olabihedha enfuneyavo, avirihagamo mowiwanana na ettomeliwiye. Ninga motagiha:

1.  (1) Nyumba na Nyumba: Epaddi eji eniwanana na olaleya numba na numba —masiki nikalaga kove na kove, nilabihedhaga karta obe telefoni obe akala ninomwiyelela mwanamurala odduwene ofwanyiwe mmabasani a olaleya nyumba na nyumba.

2.  (2) Ovaha Onamoona: Epaddi eji enolagiha marhe a opura gari wila nivahe onamoona nigalogaga makani-makanivi. Enotaganyiheya na walagiha malebo a mbibiliani attu anafwanyiwe omabasani, oskola, anamwanddamani, nigakosaga oleddo obe nigakala mburo mburovi onttiddiwa mabasa a siku na siku.

3.  (3) Olaleya Vattaddo: Marhe aba anotaganyiheya na ovaha onamoona modhela karinyu yolaleyana, telefoni naligarelaga attu ali mmimburoni munttiddani mabasa, ovaha onamoona mmarampani, majardin, mimburo munkoyiwa karo sikaleta mota obe mburo-mburovi munfwanyeya attu.

 14. Olabihedha mavidiyu vina manivuru: Mowiwanana na mikalelodha enowodheya namasunza ogana olagiha vidiyu obe nivuru. Akala namasunza onottomeliwa epaddi ena vidiyu obe akala onogana olagiha vidiyu, iyene onofwanyela oromola vina otapulela, mbwenyi kanfwanyela orumiha.

15. Jibo egamala wibiwa, epaddi eji ya mitala 15 vanele ologiwa mutoma mmodha obe minli dhinsasanyedhiwa wakamihedha anamewa wi awodhege wedda mowiwanana na Mazu a Mulugu. Egakala yowodheya, mpaddi obu attomeliwe munddimuwa wa mulogo worumeeliwa obe mudhari wokamihedha onrumeeliwa na anddimuwa a mmulogoni, mbwenyi epaddi ya dhofuneya dha vamulogoni enofwanyela okosiwa na munddimuwa wa mmulogoni bahi. Akala epaddiya joriganela vamodha na anamewa enowodheya namakosa epaddiya okosa mavuzo mena ottiya abale anfwanyeya venevale. Jofuneya ogwaddela mazu a oromana epaddiya wila akaanevi mudhidhi wa oromola makani a makamakaya wila anamewa akane mudhidhi wa ovaha dhowakula. Egakala yofuneya okosa entrevista japama muttuya onkosiwa mavuzoya avahe dhowakula dhaye bali opalkuni ottiya vampaddoni vaye, egawodheya.

  16. Nsunzo na Bibilia na Mulogo: Mitala 30. Epaddi eji onttomeliwa munddimuwa wa mulogo worumeliwa. (Akala mulogoya onojombeliwa anddimuwa a mmulogoni, attomeliwe mudhari wokamihedha onrumeliwa na anddimuwa a mmulogoni.) Abali a nikuru na anddimuwa a mmulogoni banimutonya mbali onfwanyela weddiha Nsunzo na Bibilia na Mulogo. Ole onttomeliwa weddiha nsunzona, onofwanyela ovisasanyedha, wi eddihe n’ekalelo yononeleyamo, agomihe nsunzona mwari mwa mudhidhiya, aromole malebo antonya nsunzona, vina aloge mazu anakamihedha attu otene okana efunelo ya ovirihamo masunzoya. Aneddiha epaddi eji, anela ofwanya nikamihedho agengesa nivuru ninvaha malago a omweddihana Mwang’aneli Wosunzana. (w23.04 nikuku .24, kasha) Akala makani anasunziwe sumanene ejo amala otapuleliwa mowakwana mone, kili yofuneya ogoneliha nsunzona. Egawodheya, anameddihaya vina anamengesaya atxinjiwege sumana modha-modha. Mwimeleli wa Yeddelo Yehu na Mabasa a Matugumano agaloga wi nsunzona nigwaddeliwe, nameddihaya onela winanela mwinya mugwaddeleloya. Agafuna onogwaddela wengesiwa wa ddimadha.

17. Mitala 3. Mwimeleli wa Yeddelo Yehu na Mabasa a Matugumano onologa mazu ogwaddela a masunzo a ttimaya-ttimaya alogiwe vamutugumanoniva. Iyene vina onoromola vang’onovi masunzo a sumana enfwarela. Ottiya ejo onofwanyela aloga mazina a anamasunza anfuna okosa epaddi sumana enfwarela. Akala kavali malago mena, dhovuwihiwa dhotedhene vina makarta dhofuneya, dhinofwanyelela wengesiwa na mwimeleli mwari mwa epaddi eji ya dhowenjedhedha dhomariha. Miselu dha mudhidhi wotene, ninga masasanyedho a mmabasani a olaleya, na masasanyedho a okoddeliha numba y’omwene, kadhilogiwe o tribunani, dhitomeyiwe veruguni ya dhovuwihiwa. Akala kinwodheya ovuwihiwa muselu obe wengesiwa karta mudhidhi wa dhowenjedhedha dhomariha, mwimeleli wa mutugumano onofwanyela omukumbirha mbali onakose epaddi ya Yeddelo ya Akristu wi agwaddele epaddi yaye ninga munwodheliye. (Koona ddima  16 na  19.) Matugumanoya anagome na jibo vina nlobelo.

18. Namasunza mmodha-mmodha agagomiha mpaddi waye, mwimeleli wa Yeddelo Yehu na Mabasa a Matugumano, onotamalela vina onovaha malago aniwanana na mutoma onfuniye olagiwa ejoya akose mwari mwa mutala mmodha. Mwimeleli agaromola mpaddi ottomeliwe namasunza, kaloge mutomaya onfuniye olagiwana. Namasunzaya agamala okosa epaddi yaye vina mwimeleli agamala omutamaalela, mwimeleli aloge mpaddi wattomeliwe namasunzaya ovisasanyedhela vina kadduwale ologa mpaddi okosile namasunzaya deretu mwari mwa mutomaya, obe n’ekalelo ya malago aloge ofuneya wa namasunza okalela mento mpaddiya obule. Mwimeleli vina aloge epaddi ekosile namasunzaya, ejuwene enoniye wi enele wapurelamo anamewa vamodha na anamasunzaya. Malago mena anda mwari mwa brochura Attu Wokwela obe nivuru Escola do Ministério, anofwanyelela okala malago opottowana omamalelo wa matugumano obe mudhidhi mwina, malago aba namasunzaya avahiwe mwari mwa nsunzo nittomeliwiye obe mwari mwa nsunzo ninattomeliwiye labo nina.—Miselu dhina dha mabasa a musogorheli wa Yeddelo Yehu na Mabasa a Matugumano vina na mabasa a mbali oli namalaga, koona ddima  19,  24 vina  25.

19. Kukalewo mpaddi onalupe mudhidhi ottomeliwe, nne vina mwimeleli wa Yeddelo Yehu na Mabasa a Matugumano kalupihe mitala dha ovahana malago. Masiki nivuru na Mabasa na Yeddelo Yehu ya Okristu mulebiwe mudhidhi onfwanyela ogonela epaddi ji epaddi, kili yofuneya wejedhedhavi mazu wila wakwanihedhe mudhidhi wotene opimeleliwe oku makaniya bamalile otapuleliwa mowakwanamwene. Akala Epaddi ya matugumano enokwaranya mudhidhiya, mwimeleli wa matugumano obe namavaha malago onofwanyela ompottotxa wi amulage. (Koona ddima  24 na  25.) Matugumano otene, otaganyiha na jibo vamodha na nlobelona, ogonelege wora modha na mitala 45.

20. Egakala sumana ya weeddeleliwa mulogo na nameddelela milogo, matugumano eddihiwe dhahene ninga mutadeliwani mwari mwa Nivuru na Mabasa a Matugumano; enajombevo jiji: Nsunzo na Bibilia na Mulogo eli epaddi ya Yeddelo ya Akristu; epaddi eji enela osadduliwa wi mitaladha 30 dhikosiwena diskursu ya nameddelela milogo. Diskursuya ehinatti okosiwa, mwimeleli wa Yeddelo Yehu na Mabasa a Matugumano onele ologa mogwaddela dhisunziwe, dhinasunziwe sumana enfwarela, onele ovuwiha miselu dhofuneya, vina onowengesa makarta ali ofuneya; agamala onologa mutoma wa diskursu ya nameddelela milogo. Omamalelo wa diskursuya, nameddelela milogo onela ogomiha matugumanoya na jibo esakuliye. Iyene okana ofuru wa omuttoma mbali wila akose nlobelo nomariha. Sumana ya weeddeleliwa abali otene a mmulogoni anofwanyela otugumana mumodhani ottiya olabihedha mburo mwina. Nikuru nintugumana na elogelo yottiyana na mulogoya, ninela otugumanelavi matugumano awa, masiki akala mulogo onkamihedha nikuruna ninoweddeleliwa. Mbwenyi enofuneya nikuruna ovitaganyiha na mulogoya mudhidhi wa madiskursu a nameddelela milogo.

21. Sumana ya matugumano a murudda obe matugumano a ttattamwa, kukalewo mulogo onatugumane. Masunzo asasanyedhiwe sumanaya anofwanyela osunziwa masiki muttu yeka obe na anamudhi.

22. Labo na Wubuwela Okwa wa Yezu nigaligana na labo na matugumano a vari va sumana, masasanyedho a Matugumano a Yeddelo Yehu ya Okristu, kanakosiwe.

 23. Asakuliwe munddimuwa wa mulogo mmodha wi akale musogorheli wa Yeddelo na Mabasa a Matugumano. Mabasa aye ba ozuzumela wona akala matugumano anoweedda mofwanyelela-mwene mowiwanana na malago avahiwe. Akane elemelelo ya ologa mowiwananeyana-mwene na mbali onlaba ninga namalaga. Nivuru na Matugumano a Mabasa na Yeddelo Yehu ya Okristu nigamala okalawo, musogorheli wa Yeddelo Yehu ya Okristu onele wattoma abali anfuna okosa dhipaddi mwari mwa myeri minli. Eji eniwanana na wattomela anyaskola dhipaddi, omuttoma mwimeleli wa matugumano a vari va sumana vina wattomela abali dhipaddi dhihili dha anyaskola afwaraga lista munfwanyeya mazina a abali arumeliwe na nikuru na anddimuwa a mmulogoni. (Koona ddima  3-16 vina  24.) Agaattomelaga dhipaddi anyaskola onofwanyelela otanalela yimo, eziwelo vina ewodhelo ya muttuya, kuloga akala onowodha otapulela pama makani anasekeserhiwe. Iyene onofwanyela olabihedha marhe akakene agaattomelaga abali dhipaddi dhina dha matugumano. Abali agattomeliwa dhipaddi, anofwanyela waddeliwa mutanene, mwari mwa sumana ttaru labo na matugumanoya nihinafiya. Akala epaddiya ja anyaskola anofwanyela ovahiwa Formulário de Designação (S-89) ya Yeddelo Yehu ya Okristu. Musogorheli wa Mabasa vina Yeddelo ya Okristu onofwanyela okana ebaribari wi matadelo a matugumano otene munfwanyeya dhipaddi dhittomeliwe abali etomeyiwa okwadrununi ontomeyiwa miselu dhovuwiha. Enowodheya nikuru na anddimuwa a mmulogoni omuttoma munddimuwa wa mulogo obe mudhari wokamihedha wila amukamihedhe. Mbwenyi ba anddimuwa a mmulogoni bahi anfwanyela wattomela abali dhipaddi dhihili dha anyaskola.

24. Sumana modha-modha asakuliwe munddimuwa wa mulogo mmodha wi akale mwimeleli wa Yeddelo Yehu ya Okristu. (Akala mulogoya onojombeliwa anddimuwa a mmulogoni, attomeliwe mudhari wokamihedha onrumeeliwa na anddimuwa a mmulogoni.) Mabasa aye ba osasanyedha dhowenjedhedha dhoroma na dhomariha. Iyene vina onovuwiha dhipaddi dhotene, mowiwanana na muttengo wa anddimuwa a mmulogoni enowodheya iyene vina okosa dhipaddi dhina dha matugumano makamaka dhipaddi enfuneya olagiha vidiyu bahi ehikanaga mazu ofugulana obe mazu ogomihana. Dhologa dha omukuwelana mbali onfuna okosa epaddi dhikalege dhomaguva. Nikuru na anddimuwa a mmulogo anowasakula anddimuwa a mulogoni ana ewodhelo ya okosa epaddi eji. Anddimuwa a mulogo anrumeliwa, agankosa mabasa a wimelela matugumano mudhidhi na mudhidhi. Mowiwanana na dhofuneya dha vamulogoniva mwimeleli wa Yeddelo Yehu ya Okristu aganinmelela matugumanoya mudhidhi mwinjene ottiya anddimuwa a mmulogoni ena arumeeliwe. Akala munddimuwa wa mulogo onorumeliwa weddihaga Nsunzo na Bibilia na Mulogo, enowoneya vina wi iyene onorumeliwa okala mwimeleli wa matugumano. Enofuneya oziwa wi munddimuwa wa mulogo onkosa mabasa a wimelela matugumano, akaane ekalelo ya okwela vina malago aye akalege malago anakamihedha anamewaya na abale anakela dhipaddi dhawa. Mwimeleli wa matugumano akalelege mento mudhidhi, wi matugumanoya amalege mwari mwa mudhidhiya opimeleliwe. (Koona ddima  17 na  19.) Akala mwimeleli onofuna vina ogakala mburho opalkuni, alogelege mwipanoni yina envaviha mazu wi akuwelege abali anfuna okosa vipaddi dhawa oku mbaliya onkuweliwa adhowaga wimela vatribunani. Mwawenjedhedha, mwimeleli agafuna akalege wogilatene vakaderani enkala opalkuni osogorho wa meza, mudhidhi wa wengesa wa Bibilia wa anamasunza anttomeliwa epaddi ya Ovilibihedhe Mmabasani a Olaleya. Agakosa dhahene onowinanela mudhidhi   .

25. Egakala yowodheya, mpaddi obu attomeliwe munddimuwa wa mulogo ona ttontto ya olaga. Mabasa a mbali oli namalaga ba wavaha malago moviteya-mwene egakala yofuneya, anddimuwa a mulogo vina adhari wokamihedha mowiwanana na dhipaddi dhinttomeliwani ninga dhipaddi dha Yeddelo Yehu ya Okristu, madiskursu, weddiha obe wengesa wa Mwang’aneli Wosunzana vina weddiha Nsunzo na Bibilia na Mulogo. (Koona ddima  19.) Mmulogonimwa mugakala anddimuwa a mulogo enjene ana ewodhelo ya ologa vina ya osunziha, enofuneya yaka modha-modha osadduliwa abali ali namalaga. Kili yofuneya mbali oli namalaga onvahaga malago namasunza mmodha-mmodha agamala okosa epaddi yaye.

26. Anamasunza agenjivana mmulogonimwa enofuneya osasanyedha mburho mwina wi attomeliwegewo anamasunza ena. Mburho mmodha-mmodha wa anamasunza, onofwanyela okana namalaga wa ttontto, egawodheya akale munddimuwa wa mulogo. Egahiwodheye attomeliwe mabasaya mudhari wokamihedha onrumeliwa na anddimuwa a mmulogoni. Nikuru na anddimuwa a mmulogoni banimutonya mbaliya onimonani na ewodhelo ya okosa mabasa aba, vina bawene anatxinja abaliya. Mbali oli namalaga onofwanyela ovirihamo malago a ddima 18. Ogafiya mudhidhi wa anamasunza ena odhowa mburho mwina, enofuneya anamasunzaya waddeliwa wi adhowewo omamalelo wa matugumano a epaddi ya Nipepese Mafumo a Omuyani na Mafumo a Mazu a Mulugu. Omamalelo wa epaddi ya Nivilibihedhe Mmabasani a Olaleya, awene anofwanyela ovitaganyiha wili na mulogoya.

27. Anele okalagawo mavidiyu agasakuleliwa matugumano aba. Vidiyu dha matugumano a vari va sumana dhingakala mu JW Library vina dhiganfwanyiwa na dhipano dhovavihana mazu dhottiyana-ttiyana.

© 2023 Watch Tower Bible and Tract Society of Pennsylvania

S-38-CO 11/23