Akadda Éfezo 1:1-23
1 Miyo Paulo, murumiwi wa Kristu Yezu na ofuna wa Mulugu, ddinowalebela karta eji akoddeli o Éfezo aninfwara Kristu Yezu na ororomeleya:
2 Mukane mahala na murenddele wa Mulugu, Babi wehu vina wa Nabuyehu Yezu Kristu.
3 Attittimihiwe Mulugu, vina Babi wa Nabuyehu Yezu Kristu sabwani nili anamafwara a Kristu, iyene onivaha maruriho otene andha wirimu anirumelaga muya waye.
4 Vowi iyene onisakula wi nikale mumodhani na Kristu elabo ehinatti witiwa, wila nikale akoddeli ahinna muladdu vamentoni vaye mwaha wa omukwela Mulugu.
5 Sabwani iyene ohinittana na ottaga wi nikale anaye mwaha wa Yezu Kristu mowiwanana na ejile yamuzivela vina na ofuna waye,
6 wila attittimihiwe mwaha wa mahala aye abuwene anivahiliye na murima waye wotene mwaha wa mwanaye wokweleya.
7 Mwaha wa mwanaye iyo nivuniwa vina nihoboliwa; ndde, ninoleveleliwa dhoddawa dhehu mwaha wa nikami naye; txibarene mahala a Mulugu ba manddimuwene.
8 Iyene ohoniha mahala abo manddimuwa, anivahaga eziwelo yotene na zelu yawakwana,
9 oniziwiha yoviteya ya Mulugu ya ejile yafuniye. Ejoyá eniwanana na ejile enimuzivela vina eganiliye.
10 Yofuna yaye ja osogorhela wa dhilobo dhotedhene, ejoyá enapadduwe nsaka nittomeliye nigafiya; iyene onele otugumaniha dhilobo dhotedhene mwa Kristu; dhilobo dha wirimu na dhilobo dha velaboni ya vati. Ndde, mwa iyene.
11 Iyo nili mumodhani na iyene, vina Mulugu onittomela wakela esile dhinipikirheliye. Iyene ottaga onisakula mowiwanana na efunelo yaye, sabwani onokosa dhilobo dhotedhene ninga munfuneliye,
12 Iyo okalile oroma omuroromela Kristu, Mulugu onisakula wila ninvuwihe vina nimuttittimihe iyene.
13 Mbwenyi nyuwo mumukuluvela iyene mmalilenyu wiwa mazu a ebaribari, kuloga miselu dhapama dha ovuneya wenyu. Varumelilenyu, Mulugu ohuvahani ezinddiyelo aurumelagani muya wokoddela wapikirheliye; iyene okosa ejoyá amurumaga Kristu,
14 muya wokoddela oli ninga nikuluvelo ninniziwiha wi iyo ninele wakela ejile enipikirhelile Mulugu. Mulugu okosa ejoyá mwa ovaha yobolo wila àfurule attu aye, ejo enokosiha wi iyene àkele nttittimiho ninddimuwa.
15 Nona, miyo vina mwiwalemi mwaha wa omuroromela wenyu Nabuya Yezu, na okwela onalagihenyu akoddeli otene,
16 kaddinttiya omutamalela Mulugu mwaha wenyu, ddinelege ouromolanivi mmalobeloni mwaga,
17 wila Babi wa nttittimiho, Mulugu wa Nabuya wehu Yezu Kristu, auvaheni owodha wa oziwa vina ononelamo esile dhinuwonihani iyene.
18 Mulugu amoneye mirima dhenyu wila moone vina muziwe njedhelo ninivahiliye vamodha na dhilobo dhotene dhapama dhakoyeliye akoddeli ninga dhohalana,
19 vina muziwe owodha waye onddimuwa ononihiliye iyo onroromela. Iyene ononiha owodha oko onddimuwa anirumelaga guru dhaye,
20 ku owodha-wene oko onvenyihiliyena Kristu mukwani amugilatiha omononi waye woja, wirimu;
21 iyene omuttittimiha venjene opitta agovernu otene, onddimuwa wotene, owodha wotene, olamulela wotene na mazinaya otene; ottiya bahi elabo ejino* mbwenyi vina ejo endhawo.
22 Mulugu ohika dhilobo dhotedhene mutxiddo mwa manyalo a Kristu vina omukosiha musogorheli* wa dhilobo dhotedhene dhiniwanana na mulogo.
23 Mulogo obo ba maningo aye mudhalile dhotedhene mwaha waye; Kristu oddo onowakwaniha dhotedhene.