Akadda Éfezo 2:1-22
2 Ottiya ejo, Mulugu ohuvahani egumi masiki valinyu okwene mwaha wa dhovonya dhenyu na dhottegadhá.
2 Mudhidhene obo, mwanfwara mweddelo wa elabo ejino* vina mwankosa dhofuna dha mulamuleli wa elaboyá ejino, odduwene oneddiha dhubuwelo* dha attu ahiniwelela, esuwene dhidhalile mwilaboni mpuno ninga pevo.
3 Txibarene, notene iyo nedda dhahene ninga awene mowiwanana na dhofuna dha maningo ehu, niraga dhinziveliwa maningo na dhubuwelo dhehu; vina oromana siku nibaliwehu iyo nanfwanyelela owali wa Mulugu dhahene ninga ena enjiyá.
4 Mbwenyi Mulugu, ddodhala ttagaraga vina mwaha wa okwela waye onddimuwa onikwelileyena,
5 onivaha egumi vamodha na Kristu masiki valihu w’okwene mwaha wa dhovonya dhehu; nyuwo muvuniwa mwaha wa mahala aye.
6 Ottiya ejo, Mulugu onivenyiha mukwani vamodha na Kristu, vina onigilatiha na iyene wirimu mumodhani na Kristu Yezu.
7 Mulugu okosele ejo afunaga wi elabo eswa endha,* anonihe winjiva wa mahala aye mudhidhi onfuniye onirela dhapama iyo oli mumodhani na Kristu Yezu.
8 Ba mahala a Mulugu auvunileni mwaha wa nroromelo, ovuneya oko mvaho wa Mulugu, kudhile mwa nyuwo.
9 Nne, kahiyo mwaha wa merelo enyu, wila ahikalewo muttu onfuna okaana sabwa yovittittimihana.
10 Iyo nili mabasa attiddiwe na mada a Mulugu; nittanddiwe mumodhani na Kristu wila nire mabasa apama, attomile Mulugu na ottaga wi neddege niraga mabasayá abo.
11 Nona muhidduwale wi nyuwo muli attu a malogo meena, wale mwakuweliwa “ohitxetteliwa” na abale “atxetteliwe,” otxetteliwa wa maningo onkosiwa na mada a attu.
12 Nsaka-nene ntto nyuwo kamwamuziwa Kristu, mwali wolapelana na Izrayel, mwali aleddo ahaziwa nipagano na nipikirhelo, kamwana njedhelo vina kamwamuziwa Mulugu mwilaboni.
13 Vano sabwa ya okala mumodhani na Yezu Kristu nyuwo mwahamuziwa Mulugu ddabuno munomuziwa mwaha wa nikami na Kristu.
14 Sabwani iyene ddi murenddele wehu, ddi iyene ogumanihile malogo meli banikala nimodha, vina iyene ohigujula ngome yali vari vawa, ejuwene yabarela.
15 Mwaha wa iyene operheka maningo aye, ogomiha widdana na dhoruma dha Nlamulo na Mizé, nttuwene natotela ohiwanana vari va makuru aba meli. Venevo ohiwananiha makuru aba banikala nikuru nimodha, vano nikuru ntto ba anamafwara aye, vina Kristu ohadhelana murenddele;
16 mwaha wa okwa waye vapingirhizini ya goyi,* ogomiha ohiwanana, ohiwananiha makuru abo wi nikale nikuru nimodha, vina ohawandaniha na Mulugu.
17 Iyene odha vina ohulaleyelani miselu dhapama dha murenddele nyuwo mwali wolapela vina ohalaleyela murenddele abale àli vakuvi.
18 Mwaha wa mukutto waye, iyo notene, makuru omeli ninowodha omulobelela Babi wa wirimu sabwani notene nihakela muya wokoddela mmodhene.
19 Ovano nyuwo kamuli anawedda, nne kamuli attu a elabo yina, mbwenyi muli a elabo modhene na abale ali akoddeli vina munokosa epaddi ya anamudhi a Mulugu.
20 Nyuwo mulibihiwa na alsersi wa arumiwi, na wa anamavuhulela, vina Kristu Yezu ddi nlugu ninddimuwa na alsersiya.
21 Mumodhani na iyene, nyumba yotene na dhipaddidha dhotene dhinlaba mumodhani dhinolibihiwa wila okale mparha wokoddela vamentoni va Yehova.
22 Mumodhani na iyene nyuwo vina munolibihiwa vamodha na ena wi mukale mburo onfuna Mulugu okala na muya waye wokoddela.
Manota
^ Kang’ana Mazu Atapuleliwe anloga: “Nsaka nttino.”
^ Obe, “muya.”
^ Obe, “nsaka ntto nindhawo.” Kang’ana Mazu Atapuleliwe.
^ Kang’ana Mazu Atapuleliwe.
