Akadda Éfezo 3:1-21
3 Nona, miyo Paulo, ofugeliwe sabwa ya onfwara Kristu Yezu vina sabwa ya oukamihedhani nyuwo attu a malogo meena—
2 ddinona wila muhiwa wi miyo ddihittomeliwa oukamihedhani nyuwo opurelamo mahala a Mulugu,
3 ndde, Mulugu oddiziwiha yoviteya yaye vina ddihuziwihani ejuwoyá na mazu ogwaddela.
4 Dhahene mugengesaga esidhá, munele wona wi miyo ddinononelamo dhoviteya dha Mulugu mwaha wa Kristu.
5 Masaka a mundduni yoviteya eji kayaziwihiwe attu, dhahene ninga ovano vaziwihiwe na muya wokoddela arumiwi aye ororomeleya vamodha na anamavuhulela,
6 yoviteyayá jiji: Attu a malogo meena, abuwene ali mumodhani na Kristu Yezu, anele ohalana esile dhinahalena Kristu vina anele okosa epaddi ya nikuru nimodha,* awene anele wakela dhilobo dhakakene dhinipikirhelile Mulugu, sabwa ya miselu dhapama.
7 Mwaha wa mahala a Mulugu, miyo ddikala murumiwi wa yoviteya eji ya Mulugu, iyene oddivaha mahala aba na guru dhaye.
8 Miyo mung’onoya mwa akoddeli otene, ddivahiwa mahala aba a Mulugu wila ddalaleyele attu a malogo meena miselu dhapama mwaha wa dhorela dhohipimeya dhindha wa Kristu.
9 Mulugu, odduwene opaddutxile dhilobo dhotedhene oddivaha mabasa a waziwiha attu efunelo ya osogorhela weddihiwa wa yoviteya yaye; ejuwene yahaziweya ovenyana wale.
10 Ejo epadduweli wi sabwa ya mulogo, Mulugu àziwihe alamuleli na anddimuwa a wirimu eziwelo yaye; eziwelo ejo enoneya mwa mikalelo dhottiyana-ttiyana.
11 Eji enowiwanana na efunelo yaye ehingoma, yimetxiliye mwaha wa Kristu Yezu, Nabuya wehu,
12 mwaha waye, iyo ninologa nihovaga elo, vina ninomwaddamela Mulugu na nikuluvelo mwaha wa omuroromela wehu Kristu.
13 Nona ddinoulobani wi muhiyelele mundduni mwaha wa makattamiho angumanana miyo sabwa yenyu, vowi anowudhelanina nttittimiho.
14 Mwaha wa ejuwene ddinokokora vamentoni va Baba,
15 sabwani ddi iyene witile mirala dhotedhene, wirimu na velaboni ya vati.
16 Ddinolobela wi iyene na nttittimiho naye ninddimuwa auwodhiheni olibihiwa mmurimani mwenyu na guru dhindha na muya waye wokoddela,
17 wila na ororomela wenyu, Kristu akale mmurimani mwenyu na okwela. Mukale wotibeleyene vina wolibene va alsersini,
18 wi vamodha na akoddeli otene muwodhe ononelamo mowakwana-mwene munuwelo, mutalamelo, mulapelo, mvayelo
19 na okwela wa Kristu, onna ttima enddimuwa opitta eziwelo; wila muziwe mowakwana-mwene mikalelo dhinvaha Mulugu.
20 Vano vowi owodha wa Mulugu oli na iyo, iyene onodhowavi anikoselaga dhilobo dhinddimuwa dhinkwaranya esile dhinimulobihu na dhinubuwelihu.
21 Mulugu oddo attittimihiwege mwaha wa mulogo, vina mwaha wa Kristu Yezu masiku otene, okala n’okala-wene. Amen.
Manota
^ Obe, “nningo nimodha.”