Akadda Éfezo 4:1-32
4 Nona, miyo ofugeliwe mwaha wa onfwara Nabuya, ddinoulobani wi mweddege mowiwanana na ejile ekuweleliwenyu,
2 na oviyeviha wotene, n’okurumuwa, n’ovilela, mpiselagana murima muttu na mukwaye mukwelani,
3 muvilibihedhege na murima wotene wila mukane muya mmodhene vina wiwanana ondhana murenddele.
4 Olí nningo nimodha, muya wokoddela mmodha, dhahene ninga mukalelaniwo njedhelo nimodha nikuweleliwenyu.
5 Olí Nabuya mmodha, nroromelo nimodha, obatizo omodha;
6 Olí Mulugu mmodha bahi Babi wa otene, iyene ddi munddimuwa wapitta attu otene, owodha waye onottidda mabasa na mikalelo dhotene.
7 Muttu-muttu wa iyo ohakela mahala a Mulugu vina Kristu ddinvahile muttu ddi muttu wa iyo mahala abo,
8 Malebo anloga dhahi: “Muweleli iyene wirimu ohattukula afugiwi, oharuma alobwana abo wi akale mivaho.”
9 Kito mazu aba awi “muweleli iyene wirimu” antapulela eni? Antapulela wi waromile otitela velaboni ya vati.
10 Wakakene otiteli vati dduddwene vina owelile odhuluwa-odhuluwa wirimu, wila akwanihedhe dhilobo dhotedhene.
11 Mwaha wa alobwana abo àttomiliye ninga mivaho, ena arumiwi, enayá anamavuhulela, ena anamalaleya* oku ena akumbuzi vina anamasunziha,
12 wi awodhe wakamihedha* akoddeli weddana ekalelo yapama, attiddaga mabasa a wakamihedhana ena vina olibiha maningo a Kristu,
13 ofiyedha iyo notene okaana nroromelo nimodhanene, vina okaana eziwelo yebaribari mwaha wa Mwana Mulugu, wi nikale attu anddimuwa mpaka mikalelo dhehu okala dhowakwana ninga dha Kristu.
14 Nona nihikale ninga aima, sabwani ole wotene onfwara masunziho a ottambi a attu anakwekwetta akwawa, onligana na mwanddiya ontukumiwa na pevo vina na manebe otukumeliwaga oku-n’oku.
15 Mbwenyi nilogege ebaribari vina nonihege okwela dhawene ninele owodha okala attu owunuwa mwa dhotedhene, oku neddaga mumodhani na Kristu oli musogorheli.*
16 Ddi iyene onira wi yano ji yano ettiddane mmagumanihedho, yakele guru dhaye. Yano ji yano egalaba pama enokosiha manigoyá wunuwa wi otene alibe mukwelani.
17 Nona ddinouwaddelani vina ddinoukokomezani mwa Nabuya, kamweddege ninga muneddela attu a malogo meena, abuwene amfwara yubuwelo yawa yohikala.
18 Yubuwelo yawa eli mwiddimani vina alapelana n’egumi envaha Mulugu, sabwani kanfuna omuziwa Mulugu mwaha wa ovadda wawa murima.
19 Aboyá arimeliwa mweddelo wotene wapama, kankana manyazo, vina aviperhekela mweddelo wotene wabure ononiha mweddelo wohifwanyelela ontota manyazo* oku eddagana mikalelo dhotedhene dhabure, ahifiriyeliwaga.
20 Mbwenyi nyuwo musunzihiwa wi Kristu kali dhawene.
21 Yezu osunziha ebaribari, nona akala nyuwo muhiwa vina musunzihiwa na iyene, bahito munoziwa pamene dhilobo eso.
22 Nyuwo musunzihiwa wi murule omuttu wenyu wawale obuwene oniwanana na mweddelo wenyu wawale, vina ononiha wi dhofuna dha omuttu oko wawale sonyengetta.
23 Muhittiye okalihiwa aswa na guru dhineddiha dhubuwelo dhenyu.
24 Mwabale omuttu oswa opaddutxiwe mowiwanana na ejile eli ofuna wa Mulugu, mweddagana oligana wa ebaribari na ororomeleya.
25 Nona, ninga munyanyala ottambi, muttu-muttu wa nyuwo alogege ebaribari na mukwaye, vowi iyo notene nili vyano dhili mumodhani na dhina.
26 Musilidhiwe, mbwenyi kamuttege, kamuttiye nzuwa ofiyedha oddowela oku bamuli wosilidhiwene.
27 Kamunvahe mburo Ddiabo.
28 Ole oniya atxelele wiyawa, ottiya ejo aviperhekele olaba mabasa apama na guru dhotedhene na mada aye, wi akaane yomukamihedhana ole onjombeliwa.
29 Mwano mwenyu muhibudduwege mazu abure mbwenyi mulogege esile dhili dholibiha ninga munfuneyelani wila mwapurelihemo abale anuvuruwanani.
30 Vina kamukubanyihe muya wokoddela wa Mulugu, obuwene ovahiwenyu ninga ezinddiyelo ya siku ninfunenyu woboleliwa.
31 Muttiye okala attu antxiga, owali, osilidhiwa, onyanyuwa vina ologa mazu osuva na dhobure dhotene.
32 Mbwenyi mwirelegena opama muttu na mukwaye, mweddelagane ttagaraga, mulevelelagana na murima wotene dhahene ninga euleveleleni Mulugu na murima wotene mwa Kristu.
Manota
^ Obe, “anamalaleya a miselu dhapama.”
^ Obe, “asunzihe.”
^ Na egregu, “musorho.”
^ Na egregu, aselgeya. Kang’ana Mazu Atapuleliwe anloga: “Mweddelo Wohifwanyelela Ontota Manyazo.”
