Akadda Éfezo 5:1-33
5 Nona, mmutagihege Mulugu, ninga anaye okweleya,
2 mweddege mulagihagavi okwela dhahene ninga Kristu onikwelile, oviperhekeli iyo, ninga mvaho vina mukutto wonukela onimuzivela Mulugu.
3 Ogonihana wonyakuwa* na dhotakala dhotene vina nrima kadhiromoliwege vari venyu dhahene ninga munfuneliwana attu anrumeliwa na Mulugu;
4 nne mweddelo ontota manyazo obe mazu otowa zelu peno dhoruwana—dhilobo dhihili dhofwanyelela—ottiya ejo mulogege mazu omutamalelana Mulugu.
5 Sabwani nyuwo munoziwa vina munononelamo pama esidhá; kavo muttu onira dha ogonihana wonyakuwa, * kavo muttu onira dhonyakuwa obe muliba nrima entapulela webedha dhingamuttu onavolowe Mumweneni mwa Kristu vina mwa Mulugu.
6 Kamurumele onyengettiwa na mazu ahili ebaribari, vowi mwaha wa dhilobo eso, Mulugu onosilidhiwa na abale ahiniwelela.
7 Nona kamukosege dhinkosa awene,*
8 vowi wale nyuwo mwali eddima, mbwenyi ovano muli txeza mumodhani na Nabuya. Mweddegevi ninga ana a txeza,
9 milima dhindha mowiwanana na txeza dhintapulela okala wapama mwa dhilobo dhotedhene, oligana murima vina weddana ebaribari.
10 Mudhidhi wotene mutamelege oziwa esile dhinimuzivela Nabuya;
11 muttiye okosa mabasa a mwiddimani, abuwene ahimpuriha elo; ottiya ejo moonihe wi mabasayá abo botakala.
12 Vowi esile dhinkosani muviteyani dhinovaha manyazo ologawa.
13 Sabwani dhotedhene esile dhimmoneyiwa na txeza dhinowoneya, vina dhotedhene esile dhinoneya, dhinkala txeza.
14 Nona egalogiwaga dhahi: “Kavenyani nyuwo mungona vina kavenyani mukwani, dhahene Kristu onele oumoneyani.”
15 Mukale txenjewa wi muheddege ninga atolo, mbwenyi mweddege ninga attu a zelu,
16 muziwaga olabana pama mudhidhi wenyu, wowi masikuyá babure.
17 Nona, muttiye okala attu ohikana zelu, vano munonelemo enufunanina Yehova.
18 Ottiya ejo, muhilezelege,* vowi olezela onomukosiha muttu wira dhotaduwa, vano mudhale muya wokoddela.
19 Mulogege muttu na mukwaye na masalmo na jibo dhomuttittimihana Mulugu, jibo dhomuyani, mwibaga vina mmuttittimihaga Yehova mmurimani mwenyu,
20 mmutamalelaga Mulugu vina Baba mwaha wa dhilobo dhotedhene na nzina na Nabuyehu. Yezu Kristu
21 Mwiwelelagane muttu na mukwaye muhipambihagana mmovaga Kristu.
22 Muyana oteliwe amwiwelelege mamunaye ahimpambihaga, dhahene ninga munimwiweleliye Nabuya,
23 sabwani mulobwana otelile ddi musogorheli* wa mwadhiye, dhahene ninga eli Kristu musogorheli* wa mulogo vina mvuni wa nningo ntti.
24 Txibarene, dhahene ninga mulogo onimwiwelela Kristu ohimpambihaga, muyana oteliwe vina onofuniwana omwiwelelaga mamunaye ahimpambihaga mwa dhotedhene.
25 Nyuwo alobwana mutelile, kamuttiye wakwela awadhinyu, dhahene ninga Kristu okwelile mulogo afiyedha olevela egumi yaye mulogoyá,
26 iyene okoseli ejoyá wi akoddelihe mulogo, ahabihaga na nzu na Mulugu dhahene ninga muhabihedhiwani na manje,
27 N’esidhá, Kristu ofunile wila mulogo woneye valiye wodhala nttittimiho ohinna maleba peno makunyari obe elobo yina yotakala, mbwenyi ofunile wila okale wokoddelene ohinna yosumuleliwana.
28 N’ekalelo yakakene, mulobwana otelile, amukwele mwadhiye dhahene ninga munkweleliye maningo aye, mulobwana onimukwela mwadhiye onovikwela mwinya,
29 vowi kawo mulobwana onidda maningo aye, mbwenyi onojiha vina onokoya, dhahene ninga munkosela Kristu mulogo,
30 txibarene iyo nili vyano dha maningo aye.
31 “Nona mulobwana onele omuttiya maye na babe, adhowe akalege na mwadhiye, vina oheli anakale nningo nimodha.”
32 Yoviteya eji ya Mulugu enddimuwa vaddiddi, vano ddinlogela mwaha wa Kristu vina mulogo.
33 Nona, muttu-muttu wa nyuwo amukwelege mwadhiye dhahene ninga envikweliye mwinya, vina muyana oteliwe onofuniwana wi amurihege venjene mamunaye.
Manota
^ Na egregu, porneya. Kang’ana Mazu Atapuleliwe.
^ Na egregu, porneya. Kang’ana Mazu Atapuleliwe.
^ Obe, “kamuvitaganyihe na awene.”
^ Na egregu, “muhilezelege vinyu.”
^ Na egregu, “musorho.”
^ Na egregu, “musorho.”
