1 Tesalónika 2:1-20
2 Txibarene abali, nyuwo munoziwa wi odha wehu ouwonani, kuwali webewene.
2 Masiki vatabuwilehu vina vabubuddiwehu o Filipo, ninga munziwelinyu, nihilibiha murima na nikamihedho na Mulugu wehu wi nidhe nulaleyeleni miselu dhapama dha Mulugu, masiki nifwara-fwariwaga venjene.
3 Sabwani nikokomezo ninuvahani iyo, kahiyo n’ottambi, kanindha na yubuwelo yonyakuwa nne kaninounyengettani.
4 Mbwenyi, vowi Mulugu oniruma wi nilaleye miselu dhapama, iyo ninologa nimwagalalihaga Mulugu ottiya wawagalaliha attu, vowi ddi iyene ompima mirima dhehu.
5 Nyuwo munoziwa wi iyo kaninloga mazu oziva oku nitamelaga ounyengettani nne vina kanitamelile okala attu apama wila nipurena elobo; Mulugu onoziwa esidhá!
6 Vina kanitamelile nttittimiho na attu, nne nenyu, nne na ena, masiki vafwanyelihu ninga arumiwi a Kristu, kanifunile oulemelihani muttorho wa onisapela.
7 Mottiyana-mwene, vari venyu nalivo ofwaseyene ninga mayi onawamwiha vina onatanala anaye.
8 Vowi ninoukwelani venjene, nahagalala oulaleyelani miselu dhapama dha Mulugu, kahiyo ejivi bahi, iyo nàli omala-nawale wila nuperhekeleni egumi yehu, vowi nyuwo mukala attu ankweliwa venjene na iyo.
9 Txibarene abali, nyuwo munowubuwela ovilibihedha wehu vina mabasa akosilehu na guru. Iyo nihilaba mattiyu na mutana wila nihikale muttorho wa nyuwo onisapela, oku nulaleyelagani miselu dhapama dha Mulugu.
10 Nyuwo vamodha na Mulugu muli anamoona ehu, vowi mudhidhi walihu na nyuwo, nàli ororomeleya, nahikosa dhilobo dhokoddela vina kananna muladdu.
11 Nyuwo munoziwa wi nannukokomezani, nannupangarhazani vina nannimulaga muttu ddi muttu wa nyuwo, dhahene ninga munkosela babi na anaye,
12 wila mweddegevi ninga munfunela Mulugu, odduwene oukuwelileni wila mukale Mumweneni mwaye vina mwakele nttittimiho.
13 Txibarene, jijene enimutamalela iyo Mulugu nihilemagana, vowi vakelilenyu nzu na Mulugu nulaleyileni iyo, kamurumelile ninga nzu na attu, mbwenyi muhakela muziwaga-wene wi nzu na Mulugu, nttuwene ninlaba mwa nyuwo attu anroromela.
14 Nyuwo abali, mufwara yotagiha ya Akristu a milogo dha Mulugu dha o Judeya dhili mumodhani na Kristu Yezu, sabwani nyuwo vina mutabuwa mmadani mwa attu a elabo yenyu, dhilobo dhakakene dhintabuwa Akristu o Judeya mmadani mwa Ayuda,
15 abuwene afiyedhile ompa Nabuya Yezu, àpile anamavuhulela vina anifwara-fwarile. Ottiya ejo, attu abo kanimuziveliha Mulugu, vano anokosa dhilobo dhihinapurelihamo attu,
16 sabwani anotamela onibarela wila nihalaleyele attu a malogo meena, adhe avuneye. N’eji, awene anowenjedhedha dhoddawa dhawa. Vano owali wa Mulugu, ohafiyedha.
17 Abali, vamwalanile iyo na nyuwo, mudhidhi mung’onovi (omwalana oku kwa kove, ottiya wa mmurimani), vowi nanfuna vaddiddi ouwonani kove na kove, nivilibihedha venjene wila niwodhe.
18 Nona, sabwa ya ejuwene nanfuna odha ouwonaniwo, ndde, miyo Paulo, dditamela odha dila bili, mbwenyi Satana ofuga dila yehu.
19 Mudhidhi onadhe Nabuyehu Yezu, bani onanivahe njedhelo? Bani onanihagalalihe? Vina bani onaniwodhihe wakela nlivo nehu? Kahiyo nyuwo?
20 Mwebaribari, ddi nyuwo muli nttittimiho nehu vina ottaba wehu.
