1 Tesalónika 3:1-13
3 Vano, vonilehu wi kanawodha ovilela, nisakula okala noka o Atena,
2 vina nihurumelani Timóteo mbalihu onlaba na iyo mmabasani a Mulugu, alaleyaga miselu dhapama mwaha wa Kristu. Nimurumele wila alibihe vina apangarhaze nroromelo nenyu,
3 wila ahikalewo muttu onajeriheye mwaha wa makattamiho aba. Vowi ninga munziwelinyu kinwodheya orabela makattamiho aba.
4 Valihu na nyuwo, nanuwaddelani mwaha wa makattamiho agagumanilehuna vina jijuwene empadduwa, ninga munziwelinyu.
5 Nona, vahawodha miyo ovilela, ddimuruma iyene wila aziwe mwaha wa ororomela wenyu, sabwani ddannova wi Ddiabo anaunyengetteni vina mabasa attiddilehu na guru akale ebewene.
6 Mbwenyi Timóteo onofiya-wene ondhana wenewo vina onaddela miselu dhapama mwaha wa ororomela na okwela wenyu. Iyene ohiloga wi nyuwo munonubuwela mudhidhi wotene na okwela, vina ologa wi munofuna venjene onona dhahene ninga munfunelihu ouwonani.
7 Nona abali, mudhidhi wotene ongumanana iyo masoso vina makattamiho, ninopangarhazeya mwaha wa nyuwo, vina mwaha wa ororomela ononihenyu.
8 Vano, vaziwilihu wila wandana wenyu na Nabuya oliba, iyo vina niliba.*
9 Ninawodhe dhavi omutamalela Mulugu wehu sabwa yenyu vina sabwa ya nyuwo onagalaliha venjene vamentoni va Mulugu wehu?
10 Mattiyu na mutana ninolobela venjene, wila egawodheya nuwoneni kove na kove vina nukamihedheni vanfuneya wila nroromelo nenyu nilibe.
11 Mwinyene Mulugu, Babi wehu vina Babi wa Nabuyehu Yezu anikamihedhe odha wenewo.
12 Ottiya ejo, Nabuya enjivihe venjene okwelana wenyu vina wakwela wenyu attu otene, dhahene ninga munukwelani iyo.
13 Dhahene, iyene onele olibiha mirima dhenyu, dhihikane yosumuleliwana, vina dhikale dhokoddela vamentoni va Mulugu Baba, nsaka na odha wa Nabuyehu Yezu vamodha na akoddeli aye otene.
Manota
^ Na egregu, “iyo nihikala agumi.”
