1 Tesalónika 4:1-18
4 Nona abali, dhahene ninga mwakelilenyu malago ehu awi munofwanyela weddaga n’ekalelo enufunanina Mulugu, jijene eneddana nyuwo, ninoulobani vina ninouttiddani myeddo mwa nzina na Nabuya Yezu wi mweddegevi dhahene vopitta.
2 Vowi nyuwo munoziwa malago auvahileni iyo andha wa Nabuya Yezu.
3 Eji jinfuna Mulugu, wi mukale okoddela vina murabele ogonihana wonyakuwa.*
4 Muttu ddi muttu wa nyuwo onofuniwana oziwa wang’anela maningo aye n’ekalelo yokoddela vina ya nttittimiho,
5 muhatagihaga attu a mwilaboni mpuno abuwene ahinimuziwa Mulugu, anunlela ogonihana wonyakuwa ahifiriyeliwaga.
6 Mwaha wa makani aba, ahikalewo muttu onira dhohifwanyelela ampelaga malago mbalaye, vowi Yehova onele wattonga attu otene anira esidhá, dhahene ninga vowaddelileni iyo mutanene, nukokomezagani.
7 Vowi Mulugu kanikuweleli wira dhotakala, mbwenyi onikuweleli okala okoddela.
8 Nona onkodda wiwelela esidhá kanimukodda muttu, mbwenyi onimukodda Mulugu omvaha muya wokoddela.
9 Vano, mwaha wa okwelana wobali, kili yofuneya iyo oulebelani elobo vowi muhisunzihiwa na Mulugu wila mukwelanege muttu na mukwaye.
10 Txibarene, nyuwo munowakwelavi abali otene o Masedónia. Vano ninfuna nukokomezeni, abali, wila mukosegevi ejoyá vopitta.
11 Mutamelege okalawo na murenddele vina muttu-muttu azuzumelege dhili dhaye, mulabaga na mada enyu, dhahene ninga musunzilenyu na iyo,
12 wila mweddege okoddelene vamentoni va attu otakulu* vina muhikane elo enujombelani.
13 Ottiya eji, abali, kaninfuna wi muhiziwe mwaha wa abale angona mukwani mufiyedhaga okala okubanyene ninga abale ahinna njedhelo.
14 Akala ninororomela wi Yezu okwa vina ovenyihiwa mukwani, bahito ninororomela wi Mulugu onele wavenyiha mukwani abale akwile amuroromelaga Yezu.
15 Enuwaddelani iyo na mazu a Yehova jiji: Iyo onakalewovi ofiyedha siku na odha wa Nabuya, ninele ovenyihiwa wi nidhowe wirimu, mbwenyi abale aromile okwa banarome ovenyihiwa ngamala panavenyihiwe iyo;
16 sabwani Nabuya wehu onele otita wirimu, iyene onele okuwa na lizu nolamula, na okuwa wa arkanju amuttiddelaga parhaza wa Mulugu, vina abale akwile mumodhani na Kristu banakale oroma ovenyihiwa mukwani.
17 Ngamala iyo oliwo ninavuluwe, ninele ottukuliwa vamodha na awene mmiraboni wi nagumane na Nabuya wirimu, dhahene ninakalegevi na Nabuya.
18 Nona mupangarhazegena muttu na mukwaye na mazu aba.
Manota
^ Na egregu, porneya. Kang’ana Mazu Atapuleliwe.
^ Obe, “abale ahinkosa epaddi ya mulogo wa Okristu.”
