1 Tesalónika 5:1-28
5 Ovano abali, mwaha wa mudhidhi na masakayá kili yofuneya oulebelani elo.
2 Sabwani nyuwo munoziwa pama wi siku na Yehova nindha ninga mbava na mattiyu.
3 Mudhidhi onalogege attu: “Nikaana murenddele vina ofwasa!” momaguva-mwene anele orurumutxiwa na otolotxiwa, dhahene ninga wiwa opa oninfwanya muyana onna yari onfuna obala, vano aweneyá kanavuneye nne vang’ono.
4 Mbwenyi nyuwo abali, kamukale mwiddimani ninga ambava wila siku ntto ninaufwanyeni n’orurumutxa,
5 vowi nyuwo motene muli ana a txeza, vina ana a mutana. Iyo kanili a mattiyu nne a mwiddimani.
6 Nona, nihigone ninga enira attu enjene, mbwenyi nikale mento nubuwelege na malago,
7 sabwani abale angona, angona na mattiyu vina abale anlezela, anlezela na mattiyu.
8 Mbwenyi iyo oli attu a mutana, nubuwelege na malago vina nabale nroromelo vina okwela, dhahene ninga enabalihu yabalo ya mujila embarela peto, nabale vina njedhelo na ovuniwa ninga kapaseti.
9 Sabwani Mulugu kanisakuleli ofwanyiwa owali waye, mbwenyi onisakuleli wila nivuneye anirumelaga Nabuya wehu Yezu Kristu.
10 Iyene onikwela iyo wila masiki banili mento peno nigonaga,* nikalewo vamodha na iyene.
11 Nona, mudhowegevi mupangarhazagana vina mulibihagana muttu na mukwaye dhahene ninga munkoselinyu.
12 Ovano abali, ninoulobani wi mwarihege abale anlaba na guru vari venyu, anusogorhelani vina anulagani mmabasani a Nabuya;
13 mwarihege venjene na okwela mwaha wa mabasa ankosani. Mukane murenddele muttu na mukwaye.
14 Vano ninoukokomezani nyuwo abali, wila mwalage abale ahiniwelela, mwapangarhaze abale akumuwile,* mwalibihe obanile, mwavilelege otene.
15 Muvyang’anele wi ahikalewo muttu ontamela wiyihedha obure n’obure, mbwenyi mutamelege wirelana opama muttu na mukwaye vina mwawirelege dhapama attu otene.
16 Mudhidhi wotene muttabege.
17 Mudidelege olobela.
18 Mmutamalelege Mulugu mwaha wa dhilobo dhotedhene. Jijene enafunana Mulugu abale aninfwara Kristu Yezu.
19 Kamubarele muya wa Mulugu * onttidda mabasa mwigumini mwenyu.
20 Kamupwaze mavuhulo.
21 Mupime dhilobo dhotedhene, muziwe ejile eli yapama, mufwarege ejuwene.
22 Murabele obure wotene.
23 Mwinyene Mulugu wa murenddele akwanihe okoddela wenyu. Nona abali, mukale otowa muladdu na egumi* yenyu, na maningo enyu otene vina mukale okoddelene mwa dhotedhene ofiyedha siku ninadhe Nabuya wehu Yezu Kristu.
24 Ole oukuwelileni ddororomeleya, nona iyene onele wakwaniha ejoyá.
25 Abali, munilobelelegevi iyo.
26 Mwalejele abali otene mvahagana beju.*
27 Ddinoukokomezani na nzina na Nabuya wila karta eji yengeseliwe abali otene.
28 Mahala a Nabuya wehu Yezu Kristu akale na nyuwo.
Manota
^ Obe, “nigonaga mukwani.”
^ Obe, “ojeyile.”
^ Na egregu, “muhittimihe motto wa muya.”
^ Kang’ana Mazu Atapuleliwe.
^ Akristu anlejelana avahagana beju mudhidhi wagumanani.
