1 Timóteo 1:1-20
1 Miyo Paulo, murumiwi wa Kristu Yezu osakuliwe na Mulugu Mvuni wehu vina na Yezu Kristu, njedhelo nehu,
2 ddinomulebela Timóteo mwanaga wororomeleya, mmabasani a Nabuya:
Okaane mahala, ttagaraga vina murenddele wa Mulugu, Baba, na wa Yezu Kristu Nabuya wehu.
3 Dhahene ninga mulobilemi wi ohale o Éfezo, mudhidhi wadhowimi o Masedónia, ovano ddinouloba wi wakokomeze attu ena wila ahisunzihege dhilobo dhottiyana,
4 vina kufwaseyelege ovuruwana gahala dhottambi, nne vina ologa mwaha wa mazina azamani, dhilobo esi kadhinna ttima, mbwenyi dhinowattukulela attu opambihana mwaha wa esile dhihinziwani; esi kahiyo esile dhinvaha Mulugu wila alibihena nroromelo nawa.
5 Txibarene, yofuna ya malago aba jiji: Mukane okwelana webaribari ondha mmurimani, mubuwelo wapama na nroromelo nohisarapitta.
6 Ena attiya dhilobo esi, ahipupurutxeliwa dhopambihana dhebewene.
7 Awene anfuna akale anamasunziha a nlamulo, mbwenyi kannonelamo esile dhinlogani vina kanziwelamo esile dhindidelani osunziha.
8 Vano iyo ninoziwa wila Nlamulo ttapama akala ninoweddiwana mofwanyelela,
9 niziwaga wi nlamulo kaniniteliwa attu oligana murima, mbwenyi niniteliwa avirigani, attu ahiniwelela, ahinimuttittimiha Mulugu, attegi, ahinroromeleya, anamaveyiha, abale anapa ababiwa na amayiwa vina apanga,
10 abale anira dhogonihana wonyakuwa,* alobwana angonihana alobwanavi, ambava, anamazivala, abale anddubelela yovene na dhotedhene dhihiniwanana na masunziho ebaribari
11 andha wa Mulugu wohagalala mowiwanana na miselu dhapama dha nttittimiho, esuwene dhikuluvelihiwemi.
12 Ddinomutamalela Kristu Yezu Nabuya wehu, oddivahile guru, vowi ohiddonana ororomeleya addittomelaga mabasa a Mulugu,
13 masiki miyo wale vanveyihimi Mulugu, vaafwara-fwarimi arumiwi vina vavittukulelimi. Vano Mulugu oddeddela ttagaraga vowi miyo kaddaziwa dhakosimi vina kaddanna nroromelo.
14 Mbwenyi, Nabuya wehu oddoniha ttagaraga yawinjiva vina miyo ddihakela nroromelo na okwela ondha wa Kristu Yezu.
15 Mazu aba b’ebaribari vina anofwanyela okuluveliwa: Kristu Yezu odha mwilaboni wi àvune attegi; mwa aboyá miyo ddili muttegi wottabwaya.
16 Mbwenyi ddiheddeliwa ttagaraga, wi miyo ottabwile okala muttegi Kristu Yezu onihe ttagaraga yaye, addikosihaga okala yotagiha ya abale anamuroromele wi afwanye egumi yohimala.
17 Vano Mwene wa mukalakala ohinkwa vina ohinoneya, Mulugu mmodha, avahiwe nttittimiho na nriho, okala n’okala-wene. Amen.
18 Mwanaga Timóteo, ddinouvaha malago aba mowiwanana na dhovuhuleliwa dhinuloga weyo, wila ofwaraga esidhá odidele oraba koddo yapama,
19 okaane nroromelo na mubuwelo* wapama, esuwene dhikoddile attu ena, attukuleleyaga orimeliha* nroromelo nawa.
20 Ena mwa attu aboyá ddi Heminewu na Alexandre, miyo ddihaperhekela Satana wi atxinutxiwe ahinveyihege Mulugu.
Manota
^ Na egregu, porneya. Kang’ana Mazu Atapuleliwe.
^ Kang’ana Mazu Atapuleliwe.
^ Na egregu, “oririmiha.”