1 Timóteo 2:1-15
2 Vamaromo-vene, ddinoukokomezani wi mmulobelelege Mulugu na ntidi mmuttiddaga myeddo, mmukumbirhaga vina mmutamalelaga mwaha wa attu otene,
2 amwene, otene anna ettomo, wila nikane egumi y’ofwasa vina ya murenddele nimulabelaga Mulugu na murima wotene.
3 Ejo japama vina enomuzivela Mulugu, Mvuni wehu,
4 odduwene onfuna wila attu a ekalelo yotene avuneye vina akaane eziwelo yowakwana ya ebaribari.
5 Oli Mulugu mmodha vina muttu mmodha onalogela attu wa Mulugu, Kristu Yezu,
6 iyene operheka egumi yaye wila awobolelena attu otene muttegani—esodhá dhinalogiwe mudhidhiyá ogafiya.
7 Wila ddivahe onamoona oku, ddihittomiwa ninga namalaleya vina murumiwi wa attu a malogo meena wila ddasunzihe okaana nroromelo vina oziwa ebaribari. Miyo ddinloga ebaribari, kaddinozivala.
8 Nona ddinfuna wi mburo wotene alobwana adidelege olobela, mbwenyi akosege ejoyá na murima wokoddela, ahisilidhiwaga vina ahipambihagana.
9 N’ekalelo yakakene, ayana anofuniwana wabalaga n’ekalelo yoriheya, ehintota manyazo, ottiya na muluwelo wa nttitti, obe na woru, obe na perola peno na guwo dha muttengo munddimuwa,
10 mbwenyi avikoddelihege ninga munkosela ayana animova Mulugu, aboyá anofwanyela okosaga mabasa apama, jijuwene enakale ovikoddeliha wawa.
11 Ayana agasunzaga akalege omaalene, ewelelaga, ahipambihaga.
12 Kaddinrumeliha wi muyana amusunzihe obe amusogorhele mulobwana, mbwenyi iyene onofuniwana okala omaalene.
13 Vowi Adamu ddiromile ottanddiwa, mmalelani badha Eva.
14 Ottiya ejo, Adamu kanyengettiwe, mbwenyi onyengettiwe ddi muyana bakala muttegi.
15 Vano muyana onavuneye sabwa ya wabala aima, agakalavi munroromeloni na okwela, wokoddela vamentoni va Mulugu vina na mweddelo wapama.
