1 Timóteo 3:1-16
3 Mazu aba b’ebaribari: Akala mulobwana onotamela okala munddimuwa onsogorhela, mabasa antameliye bapama.
2 Munddimuwa onsogorhela akale muttu wotowa muladdu, onna muyana mmodha bahi, onziwa ovipimelela mwa dhotedhene, wamalago, onziwa osasanyedha pama, onawakela aleddo vina onziwa osunziha,
3 ahikale mulezeli nne muwali, mbwenyi akale wokoddela murima, ohinfuna owana, kakwelege kobiri,
4 akale mulobwana onsogorhela pama ntakulu naye, anaye ewelelege vina akaane mweddelo wapama
5 (sabwani akala mulobwana kanwodha weddiha pama ntakulu naye, onawodhe dhavi weddiha mulogo wa Mulugu?),
6 ahikale muttu obatiziwe ovanenevi* wi anavittukulele, adhe ottongiwa, dhahene ninga munattongeliwe Ddiabo.
7 Ottiya ejo, enofuneya oniwegena opama na attu ahili a mmulogoni wila analogiwege bure vina anagwele vamuregani wa Ddiabo.
8 N’ekalelo yakakene, adhari okamihedha anofuniwana okala ororomeleya, ahipelege malago agalogaga, ahittabwihege omwa vinyu, ahitamelege opura ajelaga attu.
9 Awene anofuniwana ororomela masunziho a Okristu a yoviteya ya Mulugu akanaga mubuwelo* wotxena.
10 Vina, vamaromo onofuneya opimiwa akala anofwanyelela, agamala arumeliwe ninga adhari agahikane yosumuleliwana.
11 N’ekalelo yakakene, ayana anofuniwana akale ororomeleya, ahikale anamaba, aziwe ovipimelela mwa dhotedhene vina aroromeleyege na dhilobo dhotedhene.
12 Adhari okamihedha akale alobwana anna muyana mmodha bahi, anziwa wasogorhela pama anawa vina ntakulu nawa.
13 Txibarene, alobwana anlaba pama mabasa a Mulugu, anofwanyelela orihiwa vina anowodha ologa mwaha wa omuroromela wawa Kristu Yezu na nikuluvelo ninddimuwa.
14 Masiki miyo ddijedhelaga odha ogumana na weyo ovanene, ddinoulebela dhilobo esi,
15 wi akala miyo ddinogonela, weyo oziwe mweddelo onfuniwe weddana vari va anamudhi a Mulugu, oli mulogo wa Mulugu oliwo, nili ntxikwa vina ebarelo ya ebaribari.
16 Txibarene, kinaganyedheya wi yoviteya eji ya okala ororomeleya na Mulugu enddimuwa vaddiddi: ‘Yezu ovyoniha ninga muttu, ohoniwa okala oligana banna maningo a wirimu, ofiya vamentoni va anju, olaleyiwa vari va attu a malogo meena, orumeliwa mwilaboni vina ohakeliwa wirimu na nttittimiho.’
