1 Timóteo 4:1-16
4 Mazu andha wa Mulugu, anloga wi masaka omariha onele ofiya mudhidhi onattiye attu ena nroromelo nawa, avuruwanege masunziho a ottambi ankala ninga andha wa Mulugu vina anelege ovuruwana masunziho a adomonyo,
2 anelege opupurutxeliwa ovuruwana ottambi onloga attu ozivala, anna mubuwelo* opidiwe, onkala ninga oddumeyiwe na mujila woviha.
3 Awene anowakoddiha attu otela na oteliwa vina anowakoddiha attu wi ahijege dhoja dhina, esuwene dhipaddutxile Mulugu, wila abale anna nroromelo vina anziwa ebaribari yowakwana, ajege amutamalelaga.
4 Dhotedhene dhipaddutxile Mulugu sapama, nona kikalewo elobo enkoddiwa egakeliwa n’otamalela,
5 sabwani dhinokoddelihiwa na nzu na Mulugu vina na nlobelo.
6 Ogaavaha malago aba abali, onele okala murumiwi wororomeleya wa Kristu Yezu, osunzihiwe na mazu a nroromelo vina na masunziho apama abuwene anfwariwe n’ororomeleya.
7 Vano okoddege gahala dhottambi dhininveyiha Mulugu, esuwene dhinlogiwa na ayana ena ouluvala. Mbwenyi, ogane ovilibihedha omuroromela Mulugu.
8 Vowi olibiha maningo onodhana yopurelamo eng’onovi, mbwenyi omulabela Mulugu n’ororomeleya onomukamihedha muttu mwa dhilobo dhotedhene, sabwani onodhana nipikirhelo na egumi ovanene vina egumi ya musogorho.
9 Mazu aba b’ebaribari vina anofwanyela ororomeliwa-wene.
10 Nona, ninolaba na guru vina ninovilibihedha venjene, sabwani ninimujedhela Mulugu oliwo, oli Mvuni wa attu a ekalelo yotene, makamaka wa abale anroromela.
11 Odhowegevi wakokomezaga attu vina wasunzihaga na dhilobo esi.
12 Kuttiye muttu oupwaza mwaha wa weyo okala muzombwe. Ottiya ejo, wakalele tagiha otene abale anroromela na mulogelo wawo, na mweddelo wawo, na okwela wawo, na nroromelo nawo vina na mikalelo dhawo dhokoddela.
13 Ofiyedha mudhidhi onadhe miyo wenewo, ohittiye ovilibihedha wengesa osogorho wa attu ena, wakokomeza vina wasunziha.
14 Kupwaze mvaho onna weyo, ovahiwiwe mudhidhi otapuleliwe weyo mada na nikuru na anddimuwa.
15 Wubuwelegevi* dhilobo esi; ozuzumelege esuwene, wila attu otene one wunuwa wawo.
16 Mudhidhi wotene okalelege txenjewa mweddelo wawo vina ekalelo ensunziha weyo. Odidelege esidhá, ogakosa dhahene onovivuna weyo vamodha na abaleya anuvuruwana.
