1 Timóteo 5:1-25
5 Ohimulage na owali mulobwana wowuluvala. Ottiya ejo, omulage na nriho ninga babi wawo, azombwe alobwana ninga abalawo,
2 ayana anddimuwa ninga amayi, ayana azombwe ninga arogorawo, na okoddela murima wotene.
3 Wazuzumelege* amamukwela ali txibarene amamukwela.*
4 Mbwenyi akala akalawo amamukwela anna anawa obe adhulawa, aboyá arome osunza omova Mulugu vamuralani vawa, vina àpitxelege amambali awa na abibiwa esile dhinafwanyelela, vowi eji enomuzivela Mulugu.
5 Mamukwela oli txibarene mamukwela vina ohinna muttu womukuluvela, njedhelo naye nili mwa Mulugu, iyene onodidela omunlela vina omulobelela mattiyu na mutana.
6 Mbwenyi mamukwela onkosa dhinziveliwiye,* omala okwa, masiki baliwovi.
7 Nona wavahegevi malago aba,* wi awene ahifwanyiwena muladdu.
8 Txibarene akala muttu kanasapela amudhaye, ttabwa-tttabwa abale a ntakulu naye, onokodda nroromelo vina ottabwa opitta ole ohinna nroromelo.
9 Onfwanyela olebeliwa ddi mamukwela onna ngafuna vyaka 60 dh’obaliwa, wateliwege na mulobwana mmodha,
10 onziwiwa na mabasa apama, walelile aima, wali namakela aleddo, osuwile manyalo a akoddeli, wakamihedhile abale ajombeliwa vina waviperhekela ottidda mabasa otene apama.
11 Mbwenyi kuwalebele amamukwela ali azombwe, sabwani efunelo yawa ya ogonihana egazuzumihaga mumulabelani mwawa Kristu, awene anfuna oteliwa.
12 Vina awene anovitotela muladdu anyene mwa onyanyala nroromelo nannani vamaromo.*
13 Yakakene vina awene anokala attu otowa mabasa, eddaga dhuwa-dhuwa mmatakulu mwakwawa, vina kankala bahi attu otowa mabasa, anokala anamaba, ekaga mulomo mmakanini ahinapatta vina alogaga dhahafwanyelani ologa.
14 Vano, ddinfuna wila ayana a amamukwela ali azombwe ateliwe, akaane aima vina eddihege murala wawa. Dhahene mwiddani kanakane mwaha wa osumulela.
15 Mwebaribari, ena ahipupuruwa vina ahinfwara Satana.
16 Akala okalawo muyana oli mukristu onna anamudhi ali amamukwela, iyene àkamihedhege wila anapwattelihe muttorho mulogo. Dhahene mulogo onakamihedhege ayana a amamukwela ali txibarene amamukwela.*
17 Anddimuwa a mmulogoni ansogorhela pama anofwanyela ovahiwa nriho ninddimuwa, ttabwa-ttabwa abale anlaba na guru mulogani vina musunzihani.
18 Sabwani malebo anologa: “Kammage omulomoni wa ng’ombe emususurulaga tirigu,” anologa vina wi: “Namalaba onottambirha enfwanyelela mabasa aye.”
19 Kurumele omagedhiwa wa munddimuwa wa mulogo ahilivo attu eli obe araru amvaha onamoona.
20 Watxinutxe vamentoni va otene abale anira yottega, wi ena ovege.
21 Miyo ddinoukokomeza na guru dhotedhene vamentoni va Mulugu, va Kristu Yezu vamodha na va anju asakuliwe, wi ofware malago aba ohimuttiyanihaga muttu vina ohikanaga nsakulano.
22 Kumaguvele omutapulela muttu mada* nne vina kuwire dhottega dhinira attu ena, okale wokoddelene murima.
23 Kumwege manje,* mbwenyi omwege vang’onovi vinyu sabwa ya eredda yawo ya nipu vina sabwa ya weyo okalaga obulelavi.
24 Dhottega dha attu ena dhinoziweya na otene vina dhinowattukulela wuttongiwani, mbwenyi ena dhottega dhawa dhinziweya mwa ovira wa mudhidhi.
25 Yakakene, mabasa apama anoziwiwa na attu otene vina masiki ahiziweyaga kankalavi oviteya.
Manota
^ Na egregu, “wattittimihege.”
^ Obe, “amamukwela anjombeliwa-wene,” kuloga ahinna dhovikalihanawo.
^ Txino enaddiwana efunelo ya ogonihana.
^ Obe, “dhoruma esi.”
^ Obe, “nipikirhelo nakosilani vamaromo.”
^ Obe, “amamukwela anjombeliwa-wene,” kuloga ahinna dhovikalihanawo.
^ Kuloga, kumaguvele omuttomela muttu mabasa.
^ Obe, “kumwege manjevi bahi.”
