1 Timóteo 6:1-21
6 Abale ali adhari, aweddihege anabuyawa na nriho notene, wila nzina na Mulugu vamodha na masunziho aye ahilogiwe bure.
2 Ottiya ejo, abale anna anabuyawa ali akristu ahittiye wariha mwaha wokala abali. Vano, anofuniwana ottidda mabasa na murima wawa wotene, sabwani abale ampurelamo mabasa awa apama, akristu vina abali ankweliwa.
Odidele osunziha esidhá vina wakokomezana esidhá.
3 Akala muttu onosunziha masunziho meena vina ahirumelaga masunziho apama* andha wa Nabuya wehu Yezu Kristu, akoddaga vina masunziho aniwanana na omulabela Mulugu na ororomeleya,
4 odhaleliwa ovittukulela vina kannonelamo elo. Iyene ohittitteya sabwa ya opambihana vina ovanyihana mwaha wa mazu. Dhilobo esi dhinotota aje, owanawana, wakulana* na waganyedhana,
5 wakulana mudhidhi wotene mwaha wa makani ahinna osogorhowa na attu amalile otakaliha dhubuwelo dhawa vina ahinna ebaribari, anubuwela wi omulabela Mulugu na ororomeleya nipara na oranjulana.
6 Txibarene, ole onimulabela Mulugu n’ororomeleya onopurelamo venjene vina onowagalala na esile dhinniyena.*
7 Sabwani nidhaga mwilaboni mpuno, kanidhilena elo vina nigakwa kaninttukula elo.
8 Nona nigakana yoja* vina yowabala,* nagalale na esuwene.
9 Mbwenyi abale angana wi akale areli anogwela munyengetteyani, mmuregani vina anotamela dhifunelo dhinji dhotakala, dhoputtula, dhinattukulela attu okwa vina otolowa.
10 Sabwani okwela kobiri nipara na dhotedhene dhimputtula, ena akwekwetteyile na okwela oku apupurutxiwa munroromeloni mwawa avitotelaga goyi dhinjidhene.
11 Nona, weyo muttu wa Mulugu, kattawa esidhá, mbwenyi ozuzumele oligana, omulabela Mulugu na ororomeleya, nroromelo, okwela, ovilela vina okurumuwa.
12 Karaba koddo yapama ya nroromelo, ottidde na guru dhotedhene egumi yohimala ekuweleliwe weyo vina elaleyile weyo pama vamentoni va anamoona enjene.
13 Miyo ddinoupanga vamentoni va Mulugu ole onkosiha dhotedhene okalawo vina va Kristu Yezu ovahile onamoona wapama alogaga vamentoni va Pónsio Pilato, ahovaga elo
14 wi wiwelelege dhoruma na murima wokoddela vina n’otowa muladdu ofiyedha siku na wonihiwa wa Nabuya wehu Yezu Kristu,
15 iyene ddohagalala vina ddi Nabuya Wowodha, onele okosa ejoyá vansakaniva. Iyene ddi Mwene wa amwene otene anlamulela vina ddi Nabuya wa anabuya otene,
16 ddi iyene bahi ohinkwa, onkala mburo wa txeza yottittimiheya, ohinwodha attu waddamela. Mburo obo, kawo muttu waromilege wona vina onwodha wona. Nttittimiho vamodha na owodha ohingoma avahiwe iyene okala-nokala-wene. Amen.
17 Wavahe malago* abale arelile mwilaboni mpuno* wi ahikale anamavittukulela, vina ahikuluvele dhorela dhawa dhingoma, mbwenyi amukuluvele Mulugu, onnivaha vawinjiva-vene dhotedhene dhinnagalaliha.
18 Wawaddele wi akosege mabasa apama, akale areli na merelo apama, akale anamavaha vina akalege omala-nawale wi agawelena,
19 avipigelaga nifumo oli alsersi wapama wa musogorho, agakosa dhawene anottidda egumi yebaribari.
20 Timóteo, okoye ekuluvelihiwe weyo na Mulugu. Kuvuruwane makani ahimpuriha elo, angudulana na Mulugu vina dhubuwelo dha attu anubuwela wi ahikana eziwelo, mbwenyi eziwelo yawa enogudulana na “ejile eli ebaribari.”
21 Ena mwaha wa ofwara eziwelo ejo, attiya ebaribari.
Mahala a Mulugu akale na nyuwo.
Manota
^ Obe, “opureleyamo; attima.”
^ Obe, “mazu osuva.”
^ Na egregu “wakwanana esile dhinniyena.”
^ Obe, “y’ovikalihanawo.”
^ Obe txino, “vokala.” Na egregu, “yovikunelana.”
^ Obe, “walamule.”
^ Obe, “nsaka nttino.” Kang’ana Mazu Atapuleliwe.