1 Joau 2:1-29
2 Anaga, miyo ddinoulebelani dhilobo esi wila muhikose yottega. Vano akala muttu onokosa yottega nikaana mukamihedhi* Yezu Kristu, muligani oli vamodha na Baba.
2 Yezu mukutto omperhekeliwa dhoddawa dhehu wila onandanihe na Mulugu, ottiya dhoddawa dhehu bahi, mbwenyi vina dhoddawa dha attu a elabo yotene.
3 N’eji ninonona wi ninomuziwa akala ninowiwelelavi malamulo a Yezu.*
4 Ole onloga wi: “Miyo ddinomuziwa iyene,” masiki dhawene ahivirihagamo malamulo aye, muttambi vina ebaribari kili mwa iyene.
5 Mbwenyi akala muttu onowiwelela nzu naye, mwa oddo okwela wa Mulugu onowakwanihedheyamo pama. Nigakosa dhawene ninoziwa wi nili mumodhani na iyene.
6 Muttu onloga wi oli mumodhani na iyene, onofuniwana weddagavi dhahene ninga mweddeli Yezu.
7 Anaga okweleya, kaddinulebelani nlamulo niswa mbwenyi ddinulebelani nlamulo nawale nttuwene ninziwenyu ovenyana omaromelo. Nlamulo ntto nawale tti nzu niwalenyu.
8 Ovano miyo ddinulebelani nlamulo niswa, eli ebaribari mwa Yezu vina mwa nyuwo, sabwani eddima enovira, txeza ya ebaribari enomoneya.
9 Ole onloga wi oli mutxezani oku amwiddaga mbalaye olivi mwiddimani.
10 Onimukwela mbalaye onokalavi mutxezani vina mwa oddo kayiwo elo enimukwakwattutxa.
11 Mbwenyi ole onimwidda mbalaye, oli mwiddimani, onedda mwiddimani vina kanziwa ondhowiye sabwani eddima emuttitta omentoni.*
12 Ddinoulebelani nyuwo anaga, sabwani dhoddawa dhenyu dhileveleliwa mwaha wa nzina na Yezu.
13 Ddinoulebelani nyuwo ababi, sabwani munomuziwa ole okalilewo ovenyana omaromo. Ddinoulebelani nyuwo azombwe, sabwani muhimpemberha mwiddani. Ddinoulebelani nyuwo anaga, sabwani munomuziwa Baba.
14 Ddinoulebelani nyuwo ababi, sabwani munomuziwa ole okalilewo ovenyana omaromo. Ddinoulebelani nyuwo azombwe, sabwani muli oliba, nzu na Mulugu nilivi mwa nyuwo vina nyuwo muhimpemberha mwiddani.
15 Kamukwele elabo na dhilobo dha mwilabonimwa. Akala muttu onokwela elabo, okwela wa Baba kuli mwa iyene;
16 sabwani dhotedhene dhili mwilaboni—ninga esile dhinfuna maningo ehu, ofuna dhotedhene dhinona mento ehu na otamela woniha dhotedhene dhinihuna,*—kadhindha wa Baba mbwenyi samwilaboni.
17 Ottiya ejo elabo enovira vamodha na dhotedhene esile dhinfuna attu, mbwenyi onkosa ejile enfuna Mulugu onokalawo namukalakala.
18 Anaga okweleya, obu mudhidhi womariha vina dhahene ninga mwiwalenyu wi mwiddani wa Kristu agahidha, ovano ahiteya amwiddani enjene a Kristu, nona ninoziwa wila obu mudhidhi womariha.
19 Awene abudduwile vari vehu mbwenyi kàli ehu, sabwani kokala ehu agahikalavi na iyo mbwenyi ahibudduwavo wila onihe wi kahiyo attu otene ali ehu.
20 Nona nyuwo motene mukuweliwa na Mulugu* wokoddela vina motene mukaana ebaribari.
21 Kaddinulebelani sabwa yohiziwa ebaribari mbwenyi ddinulebelani sabwani munoziwa ebaribari vina kawiwo ottambi oniteya mwibaribarini.
22 Muttambi dduvi, kahiyo ole onkodda wi Yezu ddi Kristu? Oddo ddili mwiddani wa Kristu, ole onimukodda Babi na Mwana.
23 Ole onimukodda Mwana kanrumeliwa na Baba. Mbwenyi ole onimuziwa Mwana onorumeliwa vina na Babi.
24 Nona, munofwanyela okanavi esile dhiwalinyu ovenyana omaromo. Akala esile dhiwalinyu ovenyana omaromo dhinokalavi na nyuwo, munele okala vina mumodhani na Mwana vina mumodhani na Baba.
25 Ottiya ejo, ejile enipikirheliye jiji—egumi yamukalakala.
26 Ddinoulebelani dhilobo esi mwaha wa abale antamela oupupurutxani.
27 Akala mukuweliwa na Mulugu* alabihedhaga muya waye wokoddela, munokalavi na muya obo vina kinfuneya wi muttu mwina ausunziheni. Vano owodha wa muya obo kwebaribari, kahiyo wottambi vina onousunzihani dhilobo dhotedhene. Dhahene ninga musunzihedhiwenyu, mukalegevi mumodhani na muya obo.
28 Nona anaga okweleya, mukale mumodhani na iyene wila mudhidhi onfuniye wonihiwa, niwodhe ologa nihovaga elo vina nihimuttawe na manyazo mudhidhi onfuniye odha.
29 Akala munoziwa wi Yezu ddoligana, munoziwa vina wi muttu wotene onira dholigana odhile mwa Mulugu.
Manota
^ Obe, “muttu onnikamihedha vamuladduni.”
^ Na egregu, “aye.”
^ Na egregu, “mento aye.”
^ Obe, “dhopurelamo dha muttu.”
^ Na egregu, “muttikitteliwa na makura.”
^ Na egregu, “muttikitteliwa na makura.”