1 Joau 3:1-24
3 Moone okwela onddimuwa onikwelilena Mulugu ofiyedhaga iyo okuweliwaga ana a Mulugu! Jijuwene-wene elihu, nona attu a mwilaboni kanniziwa sabwani kamuziwile Mulugu.
2 Anaga okweleya, ovano nili ana a Mulugu mbwenyi kaninonihiwa ejile enakalihu. Ninoziwa wi iyene agamala wonihiwa ninele okala oligana na iyene, sabwani ninele omona dhahene ninga muliye.
3 Vina wotene ole onimujedhela avikoddelihe dhahene ninga iyene oli wokoddela.
4 Ole onira yottega onolupa vina nlamulo sabwani ottega ku olupa nlamulo.
5 Nyuwo vina munoziwa wila Yezu wonihiwe wi aburutxe dhottega dhehu, vowi iyene kanna yottega.
6 Ole onkala mumodhani na Yezu kanira yottega; kawo muttu onira yottega omonile vina omuziwile.
7 Anaga okweleya, ahikalewo muttu onupupurutxani, onira yoligana ddoligana, dhahene ninga eli Yezu woligana.
8 Ole onira yottega ondha mwa Ddiabo, vowi Ddiabo oromile ottega ovenyana omaromo* nona mwana Mulugu odhele wi atolotxe mabasa a Ddiabo.
9 Wotene ole oli mwana Mulugu kanira yottega, sabwani beu* ya Mulugu elivi mwa iyene vina kanfwanyela wira yottega, vowi odhile wa Mulugu.
10 Enattiyaniha ana a Mulugu na ana a Ddiabo jiji: Ole ohinira dholigana vina ohinimukwela mbalaye kadhile wa Mulugu.
11 Txibarene, muselu wiwalenyu ovenyana omaromo bubu, enofuneya nikwelanege muttu na mukwaye;
12 kanikale ninga Kayini odhile mwa mwiddani, ampa mbalaye. Ompele eni? Sabwani merelo aye àli abure mbwenyi a mbalaye àli oligana.
13 Kamutikine abali, mwaha wa attu a mwilaboni mpuno ouwiddani.
14 Iyo nahikwa mbwenyi ovano nihikalawo sabwani ninowakwela abali ehu. Muttu ohinkwela olivi wokwene.
15 Nyuwo munoziwa wi muttu onimwidda mbalaye panga,* munoziwa vina wi ole oli panga kanakele egumi yohimala.
16 Iyo ninoziwa okwela sabwani Yezu oniperhekela egumi yaye, vina iyo ninofuniwana operheka egumi yehu mwaha wa abalihu.
17 Vano akala muttu onogumela dhokana dha elabo ejino vina onomona mbalaye ajombeliwaga elobo, masiki dhawene ahimweddela ttagaraga, onwodha dhavi omukwela Mulugu?
18 Anaga okweleya, okwela wehu kukale wa mazuvi bahi, mbwenyi onofuneya woneyege na merelo vina okale webaribari.
19 Dhahene ninele oziwa wi ninoweddana ebaribari vina ninokuluveliha murimehu wi Mulugu ononikwela,
20 Masiki dila dhina murima wehu onisumelaga, nihidduwale wi Mulugu munddimuwa opitta murima wehu vina onoziwa dhilobo dhotedhene.
21 Anaga okweleya, akala murima wehu kunnisumela ninowodha ologa vamentoni va Mulugu nihovaga elo;
22 vina ninowakela dhotedhene dhinimulobihu sabwani ninoweddana dhoruma dhaye vina ninokosa esile dhinimuzivela.
23 Txibarene, yoruma ya Mulugu jiji: Niroromele nzina na Mwanaye Yezu Kristu vina nikwelanege muttu na mukwaye dhahene ninga munirumeliye.
24 Ottiya ejo, oniwelela dhoruma dha Mulugu onokala mumodhani na Mulugu vina Mulugu onokala mumodhani na oddo. Vina na muya onivahiliye ninoziwa wi iyene oli mumodhani na iyo.
