1 Joau 4:1-21
4 Anaga okweleya, kamurumele mazu otene ankala ninga andha wa Mulugu, mbwenyi mwehe mazuyá wi moone akala txibarene andha wa Mulugu, sabwani anamavuhulela enjene a ottambi amala obalaleyela mwilaboni.
2 Nyuwo munaziwe wi mazu aba andha wa Mulugu, akala mazu abo anorumela wi Yezu Kristu odha mwilaboni n’ekalelo y’omuttu.
3 mbwenyi mazu otene ahinimurumela Yezu, kandha wa Mulugu. Ottiya ejo, abo mazu a mwiddani wa Kristu wamwiwale nyuwo wi agahidha mwilaboni, ovano odha oli mwilaboni.
4 Anaga okweleya, nyuwo mundha wa Mulugu, vina muhapemberha anamavuhulela a ottambi, sabwani ole olí mumodhani na nyuwo munddimuwa ompitta Ddiabo odduwene onsogorhela elabo ejino.
5 Anamavuhulela abo a ottambi andha mwilaboni ejino, nona anologa dhilobo dhiniwanana na elabo ejino vina elaboyá enowavuruwana.
6 Iyo nindha wa Mulugu, ole onimuziwa Mulugu ononivuruwana; ole ohindha wa Mulugu kannivuruwana. Dhahene ninowodha ottiyaniha mazu ebaribari a Mulugu na mazu a ottambi.
7 Anaga okweleya, nikwelanegevi muttu na mukwaye, vowi okwela ondha wa Mulugu; ole wetene onkwela odhile wa Mulugu vina onomuziwa Mulugu.
8 Ohinkwela kanimuziwa Mulugu, sabwani Mulugu ddi okwela.
9 Mukalelo olagihile Mulugu onikwela waye bubu; Mulugu omuruma Mwanaye nammodha waye mwilaboni wi nifwanye egumi.
10 Okwela wonihiwe dhahi; kahiyo wi iyo nil’omukwela Mulugu, mbwenyi ddi Mulugu onikwelile ofiyedha omuruma Mwanaye ninga mukutto omperhekeliwa dhottega dhehu wi onandanihe na Mulugu.
11 Anaga okweleya, akala Mulugu onikwelile dhahene, bahito iyo vina ninofuniwana okwelagana muttu na mukwaye.
12 Kawo wamonilege Mulugu, akala ninokwelanavi muttu na mukwaye Mulugu onele okalavi mwa iyo vina okwela waye onowakwana mwa iyo.
13 N’eji ninoziwa wila nili mumodhani na Mulugu vina Mulugu oli mumodhani na iyo, sabwani iyene onivaha muya waye.
14 Ottiya ejo, iyo nanya nihona, ovano ninovaha onamoona wawi Mulugu omuruma Mwanaye ninga mvuni wa elabo.
15 Ole onrumela wi Yezu Mwana Mulugu, Mulugu onokalavi mumodhani na iyene; iyene vina onokalavi mumodhani na Mulugu.
16 Iyo ninoziwa okwela onikwelilena Mulugu vina ninorumela okwelawa oko.
Mulugu ddi okwela, ole onkanavi okwela onokala mumodhani na Mulugu, vina Mulugu onokala mumodhani na iyene.
17 Na mukalelo obu okwela ohakwanihedheya mwa iyo, wi niwodhe ologa nihovaga elo* siku n’ottongiwa, sabwani mikalelo dhehu mwilaboni mpuno dhinligana na mikalelo dha Kristu.
18 Ole onkwela kanova, sabwani okwela wowakwana onogomiha wova, vowi wova onomobaniha muttu; txibarene muttu onova okwela waye kuwakwanile.
19 Iyo ninomukwela, sabwani Mulugu ddiromile onikwela.
20 Akala muttu onologa dhai: “Miyo ddinomukwela Mulugu,” oku amwiddaga mbalaye muttambi, vowi ohinimukwela mbalaye onimoniye kanwodha omukwela Mulugu ohinimoniye.
21 Yoruma enittiyedhiye Jiji: Ole onimukwela Mulugu onofuniwana vina omukwela mbalaye.
Manota
^ Obe, “noliba murima.”
