1 Joau 5:1-21
5 Muttu ddi muttu onrumela wi Yezu ddi Kristu, oddo mwana Mulugu, vina wotene ole onimukwela Mulugu, onowakwela vina ana a Muluguyá.
2 N’eji ninoziwa wi ninowakwela ana a Mulugu; nigamukwela Mulugu vina nigeddana dhoruma dhaye.
3 Omukwela Mulugu entapulela wiwelela malamulo aye, vano malamuloyá kanlemela.
4 Sabwani ole wotene oli mwana Mulugu onopemberha elabo. Ennipemberiha elabo tti nroromelo nehu.
5 Bani onwodha opemberha elabo? Kahiyo ole onroromela wi Yezu Mwana Mulugu?
6 Oddu dduddu odhile na manje vina na nikami, Yezu Kristu; iyene kadhile na manjevi bahi, mbwenyi odhile vina na nikami. Muya wokoddela onovaha onamoona vowi muya ji ebaribari.
7 Dhiliwo dhilobo ttaru dhinoniha wi Yezu Mwana Mulugu:
8 muya, manje na nikami; onamoona wa dhilobo esi dhottaru onowiwanana.
9 Akala ninorumela onamoona wa attu, onamoona wa Mulugu onddimuwa. Sabwani obu bu onamoona wa Mulugu, onamoona ovahiliye mwaha wa Mwanaye.
10 Muttu onimuroromela Mwana Mulugu onororomela mmurimani mwaye ejile enimusunziha Mulugu. Ohinimuroromela Mulugu, onimwira Mulugu muttambi, sabwani kanroromela onamoona ovahile Mulugu mwaha wa Mwanaye.
11 Onamoonawa kuku: Mulugu, onivaha egumi yohimala, egumi ejo endha mwa Mwanaye.
12 Onimurumela Mwana okaana egumi eji; onimukodda Mwana Mulugu kanna egumi eji.
13 Ddinoulebelani dhilobo esi nyuwo ororomelile nzina na Mwana Mulugu wila muziwe wi mukaana egumi yohimala.
14 Iyo ninokuluvela wi Mulugu ononivuruwana, nigamuloba elobo-txilobo eniwanana na ofuna waye.
15 Vina nigaziwa wila iyene ononiwa mwaha wa esile dhinimulobihu, ninoziwa wila ninele wakela esile dhilobilehu, vowi ninimuloba iyene.
16 Akala muttu onomoona mbalaye akosaga yottega ehinttukulela wukwani, amulobelele, Mulugu onele omvaha egumi muttu oddo, ndde Mulugu onele wavaha egumi abale anira yottega ehinttukulela wukwani. Ekalawo yottega enttukulela wukwani, kahiyo ejene enlogimi wi mulobelelege.
17 Dhabure dhotedhene yottega, mbwenyi ekalawo yottega ehinttukulela wukwani.
18 Ninoziwa wila ole wotene oli mwana Mulugu kanira yottega, mbwenyi Mwana Mulugu* onomwang’anela nona mwiddani kanwodha omwirela yabure.*
19 Iyo ninoziwa wi nili attu a Mulugu, mbwenyi elabo yotene eneddihiwa na Mwiddani.
20 Ninoziwa wi Mwana Mulugu odhele wi anivahe ononelamo wila nimuziwe Mulugu webaribari. Iyo nili mumodhani na Mulugu webaribari mwaha wa Mwanaye Yezu Kristu. Mulugu oddo ddi Mulugu webaribari vina egumi yohimala.
21 Anaga okweleya, murabele dhingamuttu.
