1 Korinto 1:1-31
1 Miyo Paulo, okuweleliwe okala murumiwi wa Yezu Kristu na ofuna wa Mulugu, vamodha na Sóstene mbalihu,
2 ddinolebela karta eji mulogo wa Mulugu oli o Korinto, vamodha na otene ali dhipaddi dhina, abuwene anromola nzina na Nabuya Yezu Kristu, oli Nabuya wawa vina Nabuya wehu. Mulugu ohusakulani nyuwo wi mukale mumodhani na Yezu Kristu vina ohukuwelani wi mukale akoddeli:
3 Mulugu Babihu vina wa Nabuya Yezu Kristu aulagiheni mahala aye vina auvaheni murenddele.
4 Ddinomutamalela Mulugu masiku otene mwaha wa mahala aye aulagihiliyeni nyuwo muninfwara Kristu Yezu.
5 Nyuwo murelihiwa venjene sabwani muli mumodhani na iyene, dhahene munowodha olaleya mazu a Mulugu vina mukaana ononelamo onddimuwa,
6 onamoona mwaha wa Kristu, olibihiwa vari venyu,
7 nona mwaha wa ejuwene nyuwo mukaana dhilobo dhotene dhinfunenyu oku mmujedhaga Nabuya wehu Yezu Kristu, mudhidhi onfuniye wonihiwa.
8 Iyene onele ouwimetxani pwí mpaka omagomo, wila muhifwanyiwena muladdu siku ninadhe Nabuya wehu Yezu Kristu.
9 Mulugu ddororomeleya, ddi iyene oukuweleni wi mukale mumodhani na Mwanaye, Yezu Kristu Nabuya wehu.
10 Abali, ddinoukokomezani na nzina na Nabuya wehu Yezu Kristu wi mwiwananege vina vahikale ogawana vari venyu, ottiya ejo mweddege mumodhani na yubuwelo vina na efunelo modhene.
11 Abalaga, ena a ntakulu na Klowe ahiddaddela wi vari venyu kavali wiwanana.
12 Enfunemi ologa jawi muttu-muttu wa nyuwo onloga: “Miyo ddininfwara Paulo,” “Miyo ddininfwara Apolo,” “Miyo ddininfwara Sefa,” mbwenyi “Miyo ddininfwara Kristu.”
13 Kuloga Kristu ogaweya? Koddi Paulo okwa vampigirhizini, aukwelagani nyuwo? Obe nyuwo mbatiziwe na nzina na Paulo?
14 Ddinomutamalela Mulugu mwaha wa miyo ohimbatiza nne mmodha wa nyuwo, ahili Krispo na Gayo,
15 wila ahikalewo muttu onaloge wi obatiziwe na nzina naga.
16 Ndde, ddihabatiza vina a ntakulu na Estéfana, mbwenyi kaddinziwa akala ddihimbatiza muttu mwina.
17 Kristu kaddirumele obatiza, mbwenyi oddirumele olaleya miselu dhapama, ottiya na eziwelo ya attu, wila okwa wa Kristu vapingirhizini ohikale webewene.
18 Txibarene, mwa abale ali mudila ya otolotxiwa, anona muselu mwaha wa pingirhizi ya goyi * ninga otolo. Mbwenyi iyo ninvuniwa, ninona ninga guru ya Mulugu.
19 Malebo anloga dhahi: “Ddinele ogomiha zelu ya aliba onona vina ddinele okodda eziwelo ya aziwitxi.”
20 Aliba zelu ali wuvi? Ali wuvi aziwitxi a nlamulo? Ali wuvi abale anziveliwa ologela dha elabo ejino?* Mulugu konihile wi eziwelo ya mwilaboni j’otolo?
21 Mulugu na ononelemo waye, kattiyile wi attu a elabo amuziwe na eziwelo yawa. Mbwenyi, Iyene oziveliwa wavuna abale anrumela miselu esi dhinoniwa na attu ena ninga dhotolo.
22 Oku Ayuda akumbirhaga vizinddiyelo vina Agregu atamelaga ononelamo,
23 iyo ninimulaleya Kristu opiwe vapingirhizini. Ayuda anona muselu obo ninga wokwakwattutxa vina attu a malogo meena anona ninga otolo.
24 Mbwenyi Kristu ji guru vina eziwelo ya Mulugu, mwa abale akuweliwe na Mulugu, Ayuda vamodha na Agregu.
25 Sabwani ejile eli ya Mulugu, enoniwa ninga kinna eziwelo ja eziwelo opitta attu, vina ejile eli ya Mulugu, enoniwa ninga yowobana joliba opitta attu.
26 Abali, nyuwo munowodha wona wi mwa abale akuweliwe na Mulugu, enjiyá kahiyo aziwitxi vamentoni va attu, nne enji vina kahiyo a eziwelo, nne kadhile muzizani na attu ofuma.
27 Mulugu osakula esile dhili dhotolo wi àtotena manyazo aziwitxi, vina osakula dhawobana wi àtotena manyazo abale ovadda.
28 Mulugu osakula esile dhinoniwa mwilaboni ninga dhotowa ttima, dhopwaziwa vina dhihili elo wila avevutxena esile dhinoniwana ttima
29 wi ahikalewo onvittukulela vamentoni va Mulugu.
30 Ji sabwa ya Mulugu elinyu mumodhani na Kristu Yezu, oli mwa iyo ninga eziwelo ya Mulugu. Sabwa ya Kristu, Mulugu onira aligani, akoddeli vina onifurula mwaha wa yobolo,
31 wila yireye dhahene ninga mulebeliwani: “Ole ongaya, agaye mwa Yehova.”
